যিহিষ্কেল 39:10 - Chakma Bible

¹⁰ মাদত্তুন্ বা ঝার্-জংলত্তুন্ তারার্ আর দার্‌‌‌‌‌বো তুবো ন-পুরিবো, কিত্তে গাজ বদলে তারা আত্যের্ পড়িবাক্। তারা তারার্ লুদেয়্যে পযাপিরানি লুদেবাক্; তারার্ পযাপিরানি যিগুনে কাড়ি নেযেয়োন তারার্ পযাপিরানি তারা কাড়ি নিবাক্। মুই প্রভু লগেপ্রভু এ কধাগান কঙর্।

যিহিষ্কেল 39:10 ပူးပေါင်းရင်းမြစ်များ

যাত্রা 12:36

তারা যিয়েনি চেবাক্‌ মিসরীয়গুনে যেনে তারারে সিয়েনিই‌ দুয়োন্‌ সেনত্যেই লগেপ্রভু আগে আগে মিসরীয়গুনোর মনত্‌ ইস্রায়েলীয়গুনো উগুরে এক্কান্‌ মেইয়্যের্‌ মনভাব্‌ গুরি দিলো। এসাইন্যাগুরি তারা মিসরীয়গুনোর্‌ বোউত্‌ কিজু অধিকার্‌ গুরি নিলাক্‌।

যাত্রা 3:22

পত্তি ইব্রীয় মিলে তারা পাড়াল্যেগুন্ আর নিজো ঘরত্‌ আগন্‌ এবাবোত্যে বেক্‌ মিসরীয় মিলেগুনোত্তুন্‌ সোনা আর রূবোর জিনিস আর কাবড়-চুগোর চেইনে নেযেবা। সে পরেদি সিয়েনিলোই তুমি তমার্‌ ঝি-পূয়োগুনোরে সাজেবা। এবাবোত্যেগুরি মিসরীয়গুনোর্‌ জিনিসছানি ইস্রায়েলীয়গুনে গজক্ গুরি নিবা।”

যিশাইয় 14:2

অন্য জাদ্‌তুনে তারারে নিইনে তারার্ নিজো দেজত্ লুমেই দিবাক্। লগেপ্রভুর দেজত্ অন্য জাদ্‌‌তুনে ইস্রায়েলীয়গুনোর চাগর্-চাগরানী অবাক্। যিগুনে তারারে বন্দী গোজ্যন্ ইক্কিনে সিগুনোরে তারা বন্দী গুরিবাক্ আর তারার অত্যেচার্ গুরিয়্যেগুনো উগুরে তারা নেতা অবাক্।

যিশাইয় 33:1

ও ভস্তগুরিয়্যে, তরে অভিশাব্ দুয়োং! তুই ভস্ত ন-ওইনেয়ো ভস্ত গোজ্যস্; তঅ উগুরে বেঈমানি গরা ন-অয় তো তুই বেঈমানি গোজ্যস্। ভস্তর্ কামানি থুম্ গুরিলে তরে ভস্ত গরা অবঅ; বেঈমানি গরানা থুম্ অলে তঅ উগুরে বেঈমানি গরা অবঅ।

যিহিষ্কেল 39:11

সেদিন্যে মুই গোগরে ইস্রায়েল ভিদিরে এক্কান গোর্ দিম। সিয়েন অবদে সাগর পূগেদি আঢি যেইয়্যেগুনোর কলগ ভিদিরে। যিগুনে যানা-এযানা গরন্ তারা পথ্‌তান ইয়েনে বন্ধ গুরি দিবো, কিয়া গোগ আর তার বেক্ দলবলুনোরে সিয়েনত্ গোর্ দিয়্যে অবঅ। সেনত্তে ইয়েনরে কুয়ো অবঅ গোগর দলবলর্ কলগ্।‌‌

মীখা 5:8

ভালোক্ জাদ ভিদিরে যাকোবর বাঁজি থেইয়্যে মানুচ্চুন অবাক্ ঝার্‌বো য়েমানুনো ভিদিরে সিংহ ধ‌‌োক্ক্যেন, ভেড়া পাল ভিদিরে বলা সিংহ ধোক্ক্যেন; সেই সিংহবো যেক্কে ভেড়াগুনোর সংমোধ্যেদি যায় সেক্কে তারারে ধুরিনে কট্টা কট্টা গুরি ছিড়ি ফেলায়; কনজনে তারারে উদ্ধোর্ গুরি ন-পারন।

হবক্‌‌‌‌কূক 2:8

তুই ভালোক্ জাদর্ ধন-সোম্বোত্তিগানি লুদেয়োচ্ বিলি সেই বেক্ জাদর্ বাঁজি থেইয়্যে মানুচ্চুনে তর্ ধন-সোম্বোত্তিগানি লুদেবাক্। ইয়েনর্ কারনান্ অলঅ, তুই মান্‌জ্যর লো ঝোরেয়োচ্; তুই নানান্ দেজ্, শঅর্ আর সিয়েনি ভিদিরে বেক্ মানুচ্চুনোরে অত্যেচার গোজ্যস্।

হবক্‌‌‌‌কূক 3:8

ও লগেপ্রভু, গাঙানি উগুরে কি তুই বেজার্ ওইয়োচ্? তঅ রাগ্‌কান কি গাঙানি উগুরে পোজ্যে? তুই কি সাগর উগুরে অমকদ কাঙেলেত্যে ওইয়োচ্? সেনত্তে কি তুই তর্ ঘোড়াগুনোত্ আর তর্ জিদি যেইয়্যে রথ্‌তানিত্ চড়ি বেড়র্?

সখরিয় 14:14

যিহূদায়ো যিরূশালেমর তপ্পে যুদ্ধো গুরিবো। কায়কুরে জাদ্‌তুনোর ধন-সোম্বোত্তিগানি, অত্তাৎ ভালোক্কানি সনা, রূবো আর কাবড়-চুগোর্ তুবো অবঅ।

মথি লেখ্যে গম্ হবর্ 7:2

কিয়া যেবাবোত্যেগুরি তুমি অন্যগুনোর দুষ্ ধরঅ সেবাবোত্যেগুরি তমারেয়ো দুষ্ ধরা অবঅ, আর যেবাবোত্যেগুরি তুমি মাবি দুয়ো সেবাবোত্যেগুরি তমাত্তেয়ো মাবা অবঅ।

ফগদাং পেইয়্যে 13:10

যিবের বন্দী অবার্ কধা আঘে তে বন্দী অবঅ। যিবের ছুড়িলোই খুন অবার কধা আঘে তে খুন অবঅ। ইয়েনত্যে গোজেন মানুচ্চুনোর ধৈজ্জ্য আর বিশ্বেজর্ দরকার।

ফগদাং পেইয়্যে 18:6

তে অন্যগুনো সমারে যেবাবোত্যে বেবহার গোজ্জ্যে তা সমারেয়ো সেবাবোত্যে বেবহার গর্; তা কামানির্ পুরোপুরি ফল তারে দে। যে গলজ ভিদিরে তে অন্যগুনোত্যে ভান্ন্যেই মিজেদ, সিয়েনত্ তার পুরোপুরি সাজা মিজেইনে তারে হেবাত্যে দে।