যিহিষ্কেল 32:7 - Chakma Bible

⁷ তরে শেজ্ গুরি দিবার সময় মুই আগাজ্‌‌‌‌‌‌চান নাঢি দিম আর তারাগুন্ কালা গুরি দিম; মেঘ্‌‌‌‌‌‌কোই মুই বেলানরে নাঢি দিম আর চানানে পহ্‌‌‌‌‌‌র ন-দিবো।

যিহিষ্কেল 32:7 ပူးပေါင်းရင်းမြစ်များ

ইয়োব 9:7

তে মানা গুরিলে বেলানে পহ্‌র নঅ-দে আর তারাগুনে পহ্‌র দেনা বন্ধ গরন্‌।

গম্ উপদেজ্ 13:9

গোজেন ভক্তগুনোর্ পহ্‌রান জোল্ জোল্যে গুরি জলে, মাত্তর্ পাজিগুনোর বাত্তিগুন্ মুরি যান।

উপদেশক 12:2

সে অক্তত্ বেলান্, পহ্‌রানে, চান্নো আর তারাগুন্ আন্ধার্ ওই যেবাক্, আর ঝর্ দেনার্ পরেদি মেঘ্‌কানে আরঅ ফিরি এঅঅ।

যিশাইয় 13:10

সেক্কে আগাজত্ তারা আর নক্ষত্রগুনে পহ্‌র ন-দিবাক্; বেলান্ উদিবার অক্তত্অ আন্ধার থেবঅ আর চানানেয়ো পহ্‌র ন-দিবো।

যিশাইয় 34:4

আগাজর্ বেলান-চানান্-তারাগুন্ ভস্ত ওই যেবাক্ আর আগাজ্‌ছান বুদি থোইয়্যে কাবোজ্ ধোক্ক্যেন বুদি যেবঅ। যেবাবোত্যেগুরি আংগুর লুদি আর ডোমোর্ গাজত্তুন্ শুগুনো পাদানি পড়ি যায় সেধোক্ক্যেন্ গুরি বেক্ তারাগুন্ পড়িবাক্।

যিরমিয় 13:16

তুমি তমার গোজেন লগেপ্রভুরে বাঈনী গরঅ, সিয়েন ন-গুরিলে তে আন্ধার্ আনিবো আর আন্ধার ওই এচ্চ্যে বেক্ মুড়োমুড়িগুনো উগুরে তমা টেঙানিয়ে উজোত্ হেবঅ। তুমি পহ্‌‌‍র আশা গুরিলে তে সিয়েন অান্ধার গুরি দিবো, ঘুর্‌‌‍‍‍গুজ্যে আন্ধার্ গুরি দিবো।

যিহিষ্কেল 30:18

মুই যেক্কেনে মিসরর জুঙোলান্ ভাঙি ফেলেম সেক্কে তফন্‌হেষত্ দিনোত্ আন্ধার্ লামি এবঅ; সিয়েনত্ তার খেমতার বাড়্ গরানায়ো শেজ্ ওই যেবঅ। তে মেঘে নাঢা যেবঅ আর তার আদামানির মানুচ্চুন বন্দীদজাত্ যেবাক্।

যিহিষ্কেল 30:3

এক্কো দর্‌‌গরেপারা দিন এজের্, কিত্যে দিন্নো কায়কুরে লুম্মেগি; সিবে মেঘে ঢাক্যে দিন আর জাদ্‌‌তুনোর শেজ্ সময়।

যিহিষ্কেল 31:15

মুই প্রভু লগেপ্রভু আরঅ কঙর্, যেদিন্যে তে মরণর্ জাগাত্ লামিলো সেদিন্যে তাত্তে আবিলেচ্ গরানার চিহ্নো ইজেবে সেই গভীন্ পয়নালাবো মুই নাঢি দিলুং; মুই তার বেক্ গঙারান থামেই দিলুং, সেক্কে তার বেক্ পানিগান বন্ধ ওই গেলঅ। ইয়েনত্তে মুই লেবাননরে আবিলেচ্ গোরেলুং আর ঝারর্ পত্তি গাজ্ শুগেই গেলঅ।

যিহিষ্কেল 34:12

গরগে যেবাবোত্যেগুরি তার ছিদি পোজ্যে পালরে তগায় সেবাবোত্যেগুরি মুই মর্ ভেড়াগুনোরে তোগেম্। মেঘ আর আন্ধার দিনোত্ তারা যেদক্কানি জাগাত্ ছিদি পোজ্যন্ মুই সিয়েনিত্তুন্ তারারে উদ্ধোর্ গুরিম।

যোয়েল 2:10

তারা মুজুঙোত্ পিত্‌থিমীগান গির্‌গিরেই, আগাজ্‌চানে গির্‌গিরেই, চানানে আর বেলানে আন্ধার্ ওই যায় আর তারাগুনে পহ্‌র দেনা বন্ধ গুরি দুয়োন্।

যোয়েল 2:2

সিবে আন্ধার্ আর অমকদ আন্ধারর্ দিন, মেঘর্ আর ঘুর্‌গুজ্যে আন্ধারর দিন। মুড়ো-মুড়ি উগুরে যেবাবোত্যে বেন্যেপোত্যে পহ্‌‌রান্ ছিদি পড়ে সেবাবোত্যেগুরি এক্কো দাঙর্ আর বোলী পুগ্-যুগর সৈন্যদল এজের্। এবাবোত্যে সৈন্যদল আগ-কালত্ কনদিন্‌অ ন-এলঅ, আর যিদুক্কুন যুগ এত্তন্ সেক্কেনেয়ো ন-থেবাক্।

যোয়েল 2:31

লগেপ্রভুর সেই মহৎ আর দর্‌‌গরেপারা দিনুন এবার্ আগেদি বেলান্ আন্ধার্ ওই যেবঅ আর চানান্ লো ধোক্ক্যেন অবঅ।

যোয়েল 3:15

বেলান্ আর চানান্ আন্ধার্ অবঅ আর তারাগুন পহ্‌‌‌র দেনা বন্ধ গুরি দিবাক্।

আমোষ 8:9

প্রভু লগেপ্রভু কত্তে, “সেদিন্যে দিবুজ্যে অক্তত্ মুই বেলানরে ঢুবেই দিম আর দিনোত্ পিত্‌থিমীগানরে আন্ধার্ গুরি দিম‌‌‌‌‌‌।

মথি লেখ্যে গম্ হবর্ 24:29

সেই সময়োত্ দুঘোর্ ঠিগ্ পরেদি বেলান্ আন্ধার্ ওই যেবঅ, চানানে আর পহর্ ন-দিবো, তারাগুন্ আগাজত্তুন্ খুয়োই পড়িবাক্ আর চানান্-বেলান্-তারাগুন্ আর থির্ ন-থেবাক্।

মার্ক 13:24

সেই সময়োত্ দুঘোর্ ঠিগ্ পরেদি বেলান্ আন্ধার্ ওই যেবঅ, চানানে আর পহর্ ন-দিবো,

লূকে লেখ্যে গম্ হবর্ 21:25

“সেক্কে বেলান্, চানান্ আর তারাগুনো ইধু বোউত্ চিহ্নো দেগা যেবঅ। পিত্‌থীমিত্ বেক জাদ্‌তুনে দুঘ্ পেবাক্ আর দোজ্যে সাগরর্ গুজুরোনি আর তুবোলত্তে তারা অমকদ থির্ নেইয়্যে অবাক্।

ফগদাং পেইয়্যে 8:12

ইয়েনর পরেদি চের্-লম্বর স্বর্গদূত্‌তো তা তুরীবো বাজেল। সেক্কে বেলানর্ তিন ভাগর এক ভাগ, চানানর্ তিন ভাগর এক ভাগ আর তারাগুনোর তিন ভাগর এক ভাগ আন্ধার্ ওই গেলঅ। দিনোর তিন ভাগর এক ভাগত্ আর রেদোর্ তিন ভাগর এক ভাগত্ কনঅ পহ্‌র ন-থেলঅ।