যিহিষ্কেল 31:8 - Chakma Bible

⁸ গোজেনর বাগান এরস গাজ্‌চুনেয়ো তা সমারে পাল্লা দি ন-পারিদাক্। বেরস গাজর্ ডেলাগুন্‌অ তার দাঙর্ দাঙর্ ডেলাগুনো সং ন-এলাক্; তার ডেলাগুনোর লগে আর্মোণ গাজর্ তুলনা ন-অদঅ। আজল্ কধা, গোজেনর বাগান কনঅ গাজ দোলদি তার সং সং ন-এলাক্।

যিহিষ্কেল 31:8 ပူးပေါင်းရင်းမြစ်များ

পত্থম 13:10

সেক্কে লোটে রিনি চেইনে দেগিলো যর্দনর্ বেক্ সংজাগানত্‌ বোউত্‌ পানি আঘে আর জাগায়ান্‌ চাদে পেরায় লগেপ্রভুর বাগান ধোক্ক্যেন, আর সিয়েন্‌ ন-অলেয়ো প্রায় সোয়রত্‌ যেবার পদত্‌ মিসর দেজছান ধোক্ক্যেন। সেক্কেয়ো লগেপ্রভু সদোম আর ঘমোরা শঅরান্‌ ভস্ত গুরি ন-ফেলায়।

গীতসংহিতা 37:35

চিৎনপুজ্যে মানুচ্চোরে মুই দাঙর্ অদে দেখ্যং, দেখ্যং নিজোর্ জাগানত্ থেইয়্যে ডেলালোই ছিদি পোজ্যে পাদালোই ভোজ্যে গাজ ধোক্ক্যেন্।

গীতসংহিতা 80:10

সিয়েনর ছাবালোই মুড়ো-মুড়ি ঢাগা গেলঅ; সিয়েনর ডেলাগুন দাঙর্ দাঙর্ এরস গাজ্‌ছুনোরে ঢাগি ফেলেল।

পরমগীত 5:15

তা উলুহুলুন্ দ্বিবে যেন খাটি সোনা খুদো উগুরে বোজেয়্যে মার্বেল পাত্তরর্ খুদো। তা কিয়্যেগান্ লেবাননর্ অজল্ মুড়োবো ধোক্ক্যেন্, লেবাননর্ বেঈ লোইয়্যে এরস গাজ ধোক্ক্যেন্ জোগ্‌‌‌‌‌‌যোক্যে।

যিশাইয় 51:3

মুই হামাক্কাই সিয়োনানরে বুঝেম্ আর তার বেক্ ভস্তর্ জাগানি উগুরে মেয়্যে গুরিম; তার ধূল্যেচর-চাগালাগানরে মুই এদন বাগান ধোক্ক্যেন গুরিম আর ধূল্যেচরানরে লগেপ্রভুর বাগান ধোক্ক্যেন গুরিম। সিয়েন ভিদিরে, রঙ্গ, ফুত্তি, ভালেদি আর গীদোর্ রঅ পাহ্ যেবঅ।

যিহিষ্কেল 28:13

তুই গোজেনর বাগান এদনত্ এলে। নানান্ বাবোত্যে মংগা মংগা পাত্তর্, সার্দীয়মুণি, সূর্যকান্তমণি, নীলকান্তমণি, চুনী, পান্না আর সোনালোই তুই সাজেয়্যে এলে; তর্ সিরিস্টির্ দিনোত্ ইগুনোরে যুক্কোল্ গরা ওইয়্যে।

যিহিষ্কেল 31:16

মরা মানুচ্চুনো লগে মুই যেক্কে তারে মরণ জাগাত্ লামেই দিলুং সেক্কে তার পড়ি যানার্ রলোই জাদ্‌‌‌‌‌তুনে গির্‌‌‌‌‌গিরে উদিলাক্। সেক্কে এদনর্ বেক গাজ্‌‌‌‌‌চুন, লেবাননর্ বেঈ লোইয়্যে আর সেরা গাজ্‌‌‌‌‌চুন আর গমেডালে পানি পেইয়্যে বেক্ গাজ্‌‌‌‌‌চুন পিত্‌‌‌‌‌থিমীর গভীনোত্ সান্তনা পেলাক্।

যিহিষ্কেল 31:18

ও ফরৌণ, সয়-সাগোজ্যে আর বাঈনী গরানাগান ইন্দি এদনর্ গাজ্‌চুনো ভিদিরে এক্কোয়ো তর্ সং সং নয়। তো এদনর্ গাজ্‌‌‌‌‌‌চুনো সমারে তরেয়ো পিত্‌‌‌‌‌‌থিমীর গভীনোত্ লামেই দিয়্যে অবঅ; যিগুনে যুদ্ধোত্ মুরি যেইয়োন সেই সু্ন্নত-ন-গোজ্যে মানুচ্চুনো সমারে তুই পড়ি থেবে। মুই প্রভু লগেপ্রভু কঙর্, সেই গাজ্‌‌‌‌‌‌‌চুন অলাক্ ফরৌণ আর তার বেক্ দলুন।

যিহিষ্কেল 31:3

আসিরিয়ার কধা চিন্তে গুরি চাহ্, তে একদিন লেবাননর্ এরস গাজ্ এলঅ। তার দোল্ দোল্ ডেলাগুন ঝারত্ ঘন ছাবা ফেলেদ; সিবে অমকদ অজল্ এলঅ, তার মাঢাবো যেন আগাজ ইধু লুম্মেগোই।

যিহিষ্কেল 31:7

তার ছিদি পোজ্যে ডেলাগুনোর দোলান্দোই তে দাঙর্ এলঅ, কিত্যে তা শিঙোরানি তলে বোউত্ পানি ইধু যেইয়্যে।

ফগদাং পেইয়্যে 2:7

যিবের্ শুনিবার কান আঘে তে শুনোক্, পবিত্র আত্মাগানে মন্ডলীগুনোরে কি কর্। যে জিদিবো তারে মুই গোজেনর্ পরমদেজর্ জিংকানি-গাজর্ ফল হেবাত্যে দিম।