ইফিষীয় 4:14 - Chakma Bible

¹⁴ মান্‌জ্যে পাজি বুদ্ধি খাদেইনে অন্যগুনোরে ভুল্ পধেদি নেযেবাত্যে যে ভুল্ শিক্ষ্যেনি দুয়োন, সেই ভুল্ শিক্ষ্যেনি ভিদিরে আমি বৈয়্যেরে দুলি উঠ্যে তুবোল ধোক্ক্যেন ইন্দি উন্দি ন-দুলিবোং।

ইফিষীয় 4:14 ပူးပေါင်းရင်းမြစ်များ

গীতসংহিতা 10:9

তে আন্দলত্তুন্ সিংহ ধোক্ক্যেন্ গুরি হাফ্ দি থায়; দুঘি মানুচ্চোরে ধুরিবাত্তে তে সিয়েন গরে, জালত্ ফেলেইনে তে তারে ধরে।

গীতসংহিতা 59:3

তারা মত্তেই হাফ্ দি আগন, দর্‌গরেপারা মানুচ্চুনে মঅ উগুরে আক্রমন আরাম্ভ গোজ্যন্; ও লগেপ্রভু, সিয়েন মর্ কনঅ অন্যেয় বা পাপত্তে নয়।

যিশাইয় 28:9

তারা কন্দে, “তে কারে শিক্ষ্যে দের্? তা কধানি কাইদু বুঝোর্? যিগুনে দুধ হানা চাজ্যন্, বুগো দুধোত্তুন্ যিগুনোরে সোরেই নেযা ওইয়্যে তারা ইদু কি?

মীখা 7:2

দেজত্তুন্ গোজেন ভক্তগুনোরে তুলি ফেলা ওইয়্যে; গম্ মানুচ্ এক্কোয়ো নেই। লো ঝোরেবাত্তে বেক্কুনে হাফ্ দি আগন্ ; পত্তিজনে তার্ নিজো জালত্ অন্যজনরে আক্‌সোবাত্যেই চান।

মথি লেখ্যে গম্ হবর্ 11:7

যোহন শিচ্চ্যগুন ফিরি যাদন্, এমন্ সময়োত্ যীশু মানুচ্চুনো ইধু যোহন পৌইদ্যেনে কুয়ো আরাম্ভ গুরিলো, “তুমি ধূল্যেচর-চাগালাত্ কি চেবাত্তে যেইয়ো? বোইয়্যেরত্ দুল্যে নল্-খাগড়া?

মথি লেখ্যে গম্ হবর্ 24:11

বোউত্ ফক্কর্ ভাববাদী এইনে ভালোক্ জনরে ঠোগেবাক্।

মথি লেখ্যে গম্ হবর্ 24:24

সেনত্যে সেক্কে বোউত্ ফক্কর্ মশীহ আর ফক্কর্ ভাববাদী এবাক্ আর আমক্ অবার্ চিহ্নো কাম্ গুরিবাক্ যেন সম্ভব অলে গোজেনর্ বেঈ লোইয়্যে মানুচ্চুনোরেয়ো তারা ঠোগেই পারন্।

প্রেরিত্‌ 23:21

তুই তারা কধালোই রাজী ন-অবে, কারন চল্লিশ জনত্তুন্অ বেশ্ মানুচ্ লুগিনে পৌলরে বাজ্জেই আগন্। পৌলরে খুন্ ন-গরানা সং এ মুনুচ্চুনে কিচ্চু ন-হেবাক্ বিলিনে সমত্ খেইয়োন্। তারা যুক্কোল্ ওইনে ইক্কিনে বানা তর্ রাজী অনাগান্ বাজ্জ্যেই আঘন্।”

১ করিন্হীয় 12:2

তুমি কোই পারঅ, যেক্কে তুমি গোজেনর্ উবোসনা ন-গুরিদা সেক্কে এমন মূত্তিগুনো ইন্দি তমারে টানি নেযা অদঅ যিগুনে কধা কোই ন-পারন্।

১ করিন্হীয় 14:20

ভেইলগ্, চিগোন গুরো ধোক্ক্যেন আর চিন্তে ন-গোজ্জ্য। ভান্ন্যেয় পৌইদ্যেনে তমা মনানি চিগোন গুরো ধোক্ক্যেন সরল ওক্, মাত্তর্ চিন্তেলোই তুমি বুড়ো মান্‌জ্য ধোক্ক্যেন্ অ।

১ করিন্হীয় 3:19

কিয়া গোজেনর্ চোগেদি এ জগদর্ জ্ঞানান্ বানা মূর্খতা। পবিত্র বোইবোত্ লেগা আঘে, “গোজেনে জ্ঞানীগুনোরে তারার্ ছল-চালাগিগানিত্ ধরে।”

২ করিন্হীয় 2:17

নিজোর্ লাভত্যে যিগুনে গোজেনর্ কধালোই বেবসা গরন্ আমি সেবাবোত্যে মানুচ্চুনো ধোক্ক্যেন নয়; বরং খ্রীষ্ট সমারে মিজেইনে গোজেন মুজুঙোত্ গোজেনর্ পাদেয়্যে মানুচ্ ইজেবে আমি খাটি রিবেঙত্তুন্ কধা কোই।

২ করিন্হীয় 4:2

মান্‌জ্যে গুমুরোত্ যেদক্কানি লাজ্ গরেদে বাবোত্যে কাম্ গরন সিয়েনি আমি এক্কুবারে ন-গুরিই। আমি কনঅ কামত্ ছলনা ন-গুরিই, গোজেন কধানিত্ কনঅ ভুলোর্ ভেজাল্ ন-দিই। আমি বরং গোজেনর্ সত্যগান্ ফগদাং গুরিনে তা মুজুঙোত্ বেক্‌ মানুচ্চুনোর্ বিবেগ ইধু নিজোরে মানি লোইয়্যে বিলিনে তুলি ধুরিই।

গালাতীয় 3:1

ও অবুঝ্ গালাতীয়গুন! কন্না তমারে যাদু গোজ্জ্যে? তমা ইধু দঅ গমেদালে প্রচার গরা ওইয়্যেদে যে, যীশু খ্রীষ্টরে ক্রুশোত্ দিয়্যে ওইয়্যে।

ইফিষীয় 6:11

যুদ্ধোত্যে গোজেনর্ দিয়্যে বেক্ সাজ্-পোজাগ্‌কানি পিনি লঅ, যেন তুমি শদানর্ বেক্‌ চালাগ্‌কানির্ বিরুদ্ধে দরমর ওইনে থিয়্যেই পারঅ।

১ তীমথিয় 3:6

মন্ডলীর পরিচালক্‌কো যেন নুয়ো বিশ্বেজি ন-অয়, কিয়া নুয়ো বিশ্বেজি অলে তে অয়ত দেমাগে ফুলি উদিবো আর শদানরে দিয়্যে সাজার যগাজ্জ্যে অবঅ।

২ তীমথিয় 1:15

তুই হবর্ পাজ্ এশিয়া রেজ্যত্ বেক্কুনে মরে ফেলে যেয়োন। তারাত্তুন্ আঘন্ ফুগিল্ল আর হর্মগিনি।

২ তীমথিয় 3:13

মাত্তর্ পাজি মানুচ্চুনে আর ফক্করুনে দিন দিন আরঅ বজং অবাক্। তারা অন্যগুনোরে ভুল্ পধেদি নেযেবাক্ আর নিজেয়ো ভুল্ পধেদি চলিবাক্।

২ তীমথিয় 4:3

এন্‌ অক্ত এবঅ যেক্কে সত্য শিক্ষ্যেনি মান্‌জ্যর সোজ্জ্য ন-অবঅ, বরং নিজো আওজ্‌চান পূরোণ গুরিবাত্যে তারা ভালোক্কুন্ মাষ্টর্ তুবেবাক্ যিগুনে তারারে হুজি গরেদে ধোক্ক্যেন শিক্ষ্যে দিবাক্।

ইব্রীয় 13:9

নানান্ বাবোত্যে নূয়ো নূয়ো শিক্ষ্যেলোই যেন তমারে ভুল্ পধেদি ন-নেযান্। আমা মনানি উৎসর্বর হানা উগুরে ন-থেইনে যেন গোজেন দোয়্যে উগুরে থির্ ওইনে বজে। যিগুনে সেই হানাগান উগুরে নির্ভর্ গুরিনে চলিদাক্, সেই হানাগানত্তুন্ তারার্ কনঅ লাভ্ ন-অয়।

যাকোব 1:6

সালে কনঅ সন্দেহ ন-গুরিনে তারে বিশ্বেজ্ গুরিনে মাগা পরিবো কিয়া যে সন্দেহ গরে তে বৈয়্যেরত্ ফুলি উঠ্যে সাগর তুবোল ধোক্ক্যেন; বৈয়্যেরানে তারে থেলি নেযায়।

যাকোব 3:4

আরঅ চঅ, জাহাজ্‌চান যুনিয়ো বোউত্ দাঙর্ আর জোরে বৈয়্যেরানে সিয়েন ঠিলিনে নেযায় তো বানা চিগোন্ এক্কান পাঙেইলোই নাবিক্কো সিয়েনরে যিন্দি মনে কয় সিন্দি নেযেই পারে।

২ পিতর 2:18

তারা বাজে আর দাঙর্ দাঙর্ কধা কন্ আহ্ মান্‌জ্যর পাপ-খাচ্চ্যদর্ কামনাবলা আওজ্‌চান জাগেই তুলিনে তারা এন্‌ মানুচ্চুনোরে ভুল পধেদি নেযান্ যিগুনে অন্যেয় ভিদিরে বজত্তি গুরিয়্যে মানুচ্চুনোত্তুন্ নিগিলি এবার পধত্ এলাক্।

১ যোহন 2:19

খ্রীষ্টর্ এ শত্রুগুন আমা ভিদিরেত্তুন্ নিগিলি যেয়োন। মাত্তর্ তারা আমা মানুচ্‌ ন-এলাক্। যুনি তারা আমার্ অদাক্ সালে আমা সমারে থেদাক্, মাত্তর্ তারা নিগিলি যেইয়োন বিলিনে বুঝো যার্, তারা কেঅই আমার নয়।

১ যোহন 2:26

যিগুনে তমারে ভান্ন্যেই পধেদি নেযেবার চেট্ট্যা গত্তন্ তারা পৌইদ্যেনে মুই তমা ইধু ইয়েনি বেক্কানি লিগিলুং।

১ যোহন 4:1

কোচ্‌পানার্ পুয়ো-ছা লগ্, তুমি বেক্‌ আত্মাগুনোরে বিশ্বেজ্ ন-গোজ্জ্য, বরং চাগি চঅ সিগুনে গোজেনত্তুন্ এচ্চ্যন কিনা, কিয়া জগদত্ বোউত্ ভন্ড ভাববাদী নিগিল্লোন।

যিহূদা 1:12

এ মানুচ্চুনে যেক্কে দুঘ্ সাহচ্‌‌সোই তমার কোচ্‌পানার-হানাত মিলোন্ সেক্কে তমার সেই হানা ভিদিরে তারা কাজর ধোক্ক্যেন অন্। ইগুনে বানা নিজো পৌইদ্যেনে চিন্তে গরন্। ইগুনে বৈয়্যেরত্ ভাজেই নেযেইয়্যে পানি-নেইয়্যে মেঘ ধোক্ক্যেন। গুলোগুলি পাড়িবার অক্তত্ গুলোগুলি নেই বিলিনে শিঙোর্ সুদ্ধো উগুরেই ফেল্ল্যে গাজ ধোক্ক্যেন ইগুনে দ্বি'কিত্যেদি মরা।

ফগদাং পেইয়্যে 19:20

সেই য়েমান্নোরে ধরা অলঅ আর যে ফক্কর্ ভাববাদীবো তার্ ওইনে আমক্ কাম গত্ত তারেয়ো ধরা অলঅ। যিগুনে সেই য়েমান্নোর্ চিহ্নোগান মানি লোইয়োন আর তা মূত্তিবোর পূজো গুরিদাক্ সেই ভন্ড ভাববাদীবো সেই আমক্ কামানিলোই তারারে ভুলেই রাগেয়্যে। জ্বোল্‌‌‌জোল্যে গন্ধক আগুনো হ্রদত্ জেদাবাদে এ দ্বিজনরে ফেলেই দিয়্যে অলঅ।