দ্বি’লম্বর বিররণ 9:9 - Chakma Bible

⁹ লগেপ্রভু যে সুদোমান তমাত্যে থিদেবর্ গোজ্যে সেই সুদোমান লেখ্যে পাত্তরর্‌ ফলগত্‌ দ্বিবে গুজি লবাত্তে মুই মুড়ো উগুরে উদিনে চোল্লিশ দিন আর চোল্লিশ রেত্‌ সিয়োদোই এলুং। সেক্কে মুই পানি বা পিদে কিচ্ছু ন-খাং।

দ্বি’লম্বর বিররণ 9:9 ပူးပေါင်းရင်းမြစ်များ

১ রাজাবলী 19:8

সেনত্তে তে উদিনে হেলঅ। সে হানাগান হেই বল্‌ ওইনে তে চোল্লিশ দিন আর চোল্লিশ রেত্‌ আদিনে গোজেন মুড়ো হোরেবত্‌ যেইনে লুমিলো।

২ রাজাবলী 6:22

জোবত্ তে কলঅ, “না, তারারে ন-মারিবে। তর্ নিজোর্ তলোয়ার আর ধনুলোই তুই যিগুনোরে বন্দী গোজ্যস্ তারারে কি মারে ফেলেবে? তারারে তুই হানা আর পানি দিচ্, যেনে তারা হেইনে-থেইনে তারা গিরোজ ইদু ফিরি যেই পারন।”

যাত্রা 24:12

সে পরেদি লগেপ্রভু মোশিরে কলঅ‌, “তুই মুড়োবো উগুরে মইদু উদি এইনে কানক্ষণ্‌ ইয়োদোই থাগ। মানুচ্চুনোরে শিক্ষ্যে দিবাত্তে পাত্তরর্‌ যে ফলক্কো উগুরে মুই রীদি-সুদোম আর উগুম্‌ লিগি রাগেয়োং সিয়েনি মুই তরে দিম্‌।”

যাত্রা 24:15

মোশি মুড়োবোত্‌ উদিবার্‌ অক্তত্‌ মুড়োবো মেঘঅ চাক্কোই নাঢা গেলঅ‌,

যাত্রা 24:18

মুড়োবো বেঈ উদদে উদদে মোশি সেই মেঘ ভিদিরে সোমেলগোই। তে চোল্লিশ্‌ দিন আর চোল্লিশ্‌ রেত্‌ সং সেই মুড়োবোত্‌ রলঅ‌।

যাত্রা 31:18

সিনাই মুড়োবো উগুরে মোশি ইদু এই বেক্‌ কধানি কনা থুম্‌ গুরিনে লগেপ্রভু তারে দ্বিবে সাক্ষ্য-ফলক্‌ দিলো। এ দ্বিবে পাত্তর আরুগ্ উগুরে গোজেনে নিজেই তার্‌ উগুমানি লেখ্যে।

যাত্রা 32:1

মুড়োবোত্তুন লামি এত্তে মোশির্‌ দেরি অর্‌ দেগিনে মানুচ্চুনে হারোণর্‌ চেরোকিত্তে এগত্তর্‌ ওইনে কলাক্‌, “পথ্‌ দেগেইনে নেযেবাত্তে তুই‌ আমারে ভুত্‌-দেবেদা বানেই দে কিত্তে সেই মোশি, যে আমারে মিসর দেজত্তুন্‌ নিগিলেই আন্যে, তার্‌ কি ওইয়্যে আমি হবর্‌ ন-পেই।”

যাত্রা 34:28

সিনাই মুড়োবো উগুরে মোশি লগেপ্রভু ইদু চল্লিশ দিন আর চল্লিশ রেত্‌ এলঅ‌। এই সময়ো ভিদিরে তে কনঅ পিদে বা পানি ন-খায়। লগেপ্রভু সেই পাত্তরর্‌ আরুগ্ দ্বিবে উগুরে তার্‌ সুদোমর্‌ কধানি আরঅ‌ লিগি দিলো, আর সিয়েনিই অলঅ‌ সেই দশ্‌ছান্‌ উগুম্‌।

মথি লেখ্যে গম্ হবর্ 4:2

সিধু তে চল্লিশ দিন আর চল্লিশ রেত্ উবোস্ থানার পরেদি যীশুর পেট্ পুরের্।

গালাতীয় 4:24

মুই আগারে-ইঙিদে ইয়েনি কঙর্। এ দ্বি'বে মিলে দ্বি'য়েন সুদোমরে বুঝোয়। এক্কান সুদোম সিনাই মূড়োবোত্তুন্ এচ্চ্যে আর সিয়েন তার্ অধীনোত্ মান্‌জ্যরে চাগর্ অবার পধেদি নেযার্। ইবে অলঅ সেই চাগরাণিবো হাগার।

দ্বি’লম্বর বিররণ 8:3

পেত্‌পুড়োনার দুঘ দিইনে আর যে মান্নার্‌ কধা তমারে আর তমার পুরোণি মানুচ্চুনোর্‌ অজানা এলঅ সিয়েন্‌ খাবেইনে তে তমার বাড়্ গরানাগানি ভাঙি দিয়্যে। ইয়েন্দোই তে তমারে এ শিক্ষ্যেগান্‌ দিবাত্তে চেয়্যেদে, মান্‌জ্যে বানা পিদেলোই ন-বাঁজন, মাত্তর্‌ লগেপ্রভুর্‌ মুয়োর্‌ এক্‌ এক্কান কধালোই বাঁজন্‌।

দ্বি’লম্বর বিররণ 9:11

সে চোল্লিশ দিন আর চোল্লিশ রেত্‌ কাদানার্‌ পরেন্দি লগেপ্রভু সে সুদোমানি লেখ্যে পাত্তরর্‌ আরুগ্ দিবে মরে দিয়্যে।

দ্বি’লম্বর বিররণ 9:15

ইয়েনর্ পরেন্দি মুই মুড়োবোত্তুন্‌ লামি এলুং; সেক্কেয়ো মুড়োবোত্‌ আগুন্‌ জ্বলের, আর মর্‌ আদত্‌ এলদে বেবস্থা লেখ্যে সেই দ্বিবে আরুগ।

দ্বি’লম্বর বিররণ 9:18

লগেপ্রভুর চোগেদি ভান্ন্যেই এধোক্ক্যেন বেক্‌ পাপ্পানি গুরিনে তুমি তার্‌ রাগ্‌কান জাগেই দুয়ো বিলিনে মুই আগঅ ধোক্ক্যেন আরঅ চোল্লিশ দিন আর চোল্লিশ রেত্‌ লগেপ্রভুর মুজুঙোত্‌ আদু পাড়িনে পড়ি রোলুং; পানি বা পিদে কিচ্ছু মুয়োত্‌ ন-দিলুং।

ইব্রীয় 9:4

এ ভাগ্‌কানত্ আগর্‌বাট্টি জ্বালেবাত্যে সনার্ ডালিপূজো আর সাক্ষ্য সুন্দুক এলঅ। সিবের্ চেরোকিত্যেদি সনালোই বেড়েয়্যে এলঅ। সিবে ভিদিরে এলঅ সনার্ পিলেত্ থোইয়্যে মান্না, হারোণর যে লুদিক্কোত্ ফুল ফুট্যে সেই লুদিক্কো, আর বেবস্থা-লেগা দ্বিয়েন পাত্তর আরুগ্।