দ্বি’লম্বর বিররণ 9:28 - Chakma Bible

²⁸ সিয়েন্‌ গুরিলে যে দেজত্তুন্‌ তুই আমারে নিগিলেই আনিলে সে দেজর্‌ মানুচ্চুনে কবাক্, লগেপ্রভু তার্‌ এগেম্ গোজ্যে দেজত্‌ তারারে নেযেই ন-পারে বিলিনে বা তে তারারে ঘিনাই বিলিনে তারারে মারে ফেলেবাত্তে এ ধূল্যেচর-চাগালাত্ আন্যে।

দ্বি’লম্বর বিররণ 9:28 ပူးပေါင်းရင်းမြစ်များ

যাত্রা 32:12

কিত্তেই মিসরীয়গুনে এই কধাগান্‌ কবার্‌ সুযোগ্‌ পেবাক্‌, মুড়োমুড়ি চাগালা ভিদিরে আনিনে তারারে মারে ফেলেইনে পিত্‌থিমীর্‌ বুগোত্তুন্‌ তুলি দিবার্‌ ভান্ন্যেই আওজে তুই তারারে নিগিলেই আন্যচ্‌? তর্‌ এই জদবদে রাক্কান্‌ তুই থামা। দোয়্যে গর্‌, তঅ মানুচ্চুনো উগুরে তুই এই বিপদ্‌থান্‌ ন-আনিচ্‌।

যিহিষ্কেল 20:9

মাত্তর্ মঅ সুনাঙান্ রোক্ষ্যে গুরিবাত্তে মুই সিয়েন ন-গরং, যেনে তারা যে জাদ্‌‌‌‌তুনো ভিদিরে বজত্তি গোজ্যন তারা ইধু মঅ নাঙান্ অসিজি ন-অয়। মিসর দেজত্তুন্ ইস্রায়েলীয়গুনোরে নিগিলেই আনিনে সেই বেক্ জাদ্‌‌‌‌তুনোর চোগো মুজুঙোত্ মুই ইস্রায়েলীয়গুনো ইধু নিজোরে ফগদাং গুরিলুং।

গণাণা 14:16

লগেপ্রভু সেই মানুচ্চুনো ইদু যে দেজ্‌চান্‌ দিবার্‌ শমক্‌ গোজ্যে সিয়েনত্‌ লোই যেবার্‌ খেমতা নেই বিলিই তে ধূল্যেচর-চাগালাত্‌ তারারে মারে ফেলেয়্যে।

দ্বি’লম্বর বিররণ 1:27

তুমি নিজোর্‌ তাম্বুলো ভিদিরে বেশ্‌ কধা কনা আরাম্ভ গুরিলে আর কলাদে, লগেপ্রভু আমারে ঘিনেই। সেনত্তেই ইমোরীয়গুনো আদত্‌ তুলি দিইনে ভস্ত গুরিবাত্তেই তে আমারে মিসর দেজত্তুন্‌ নিগিলেই আন্যে।

দ্বি’লম্বর বিররণ 32:27

মাত্তর্‌ মুই হবর্ পেদুং ইয়েনত্‌ শত্রুগুনে বাড়্‌বো দেগেবাক্ আর ন-বুঝিনে কবাক্কে, তারা জিত্তোন্; লগেপ্রভু ইয়েনি কিচ্চু ন-গরে।”

দ্বি’লম্বর বিররণ 9:27

তর্‌ চাগর্‌ অব্রাহাম, ইসহাক আর যাকোবর কধানি মনত্‌ তুল্‌। এ মানুচ্চুনোর্‌ একবুস্যেগানি, ভান্ন্যেয়ানি আর পাপর্‌ কামানন্দি ন চেইচ্‌।

যিহোশূয় 7:9

কনানীয়গুনে আর এ দেজর্‌ অন্য মানুচ্চুনে এ কধানি শুনিবাক্‌ আর তারা আমারে ঘিরিবাক্‌ আহ্‌ দুনিয়ের্‌ বুগোত্তুন আমা নাঙানি বাদ দিবাক্‌। ইয়েনর্ পরেন্দি তুমি কিঙিরিনে তমার সুনাঙানি রোক্ষ্যে গুরিবা?”