দ্বি’লম্বর বিররণ 7:26 - Chakma Bible

²⁶ কনঅ ঘিনাইদে জিনিস তমা ঘরত্‌ ন-আনিবা। সিয়েনি তুমি মনে-পরাণে ঘিনেবা আর ঈচ্ গুরিবা, কিত্যে সিগুনো উগুরে আগেদে ভস্ত অবার্‌ অভিশাব। সিয়েনি যুনি তুমি ঘরত্‌ আনঅ সালে তমা উগুরেয়ো ভস্তর্‌ অভিশাব লামি এবঅ।

দ্বি’লম্বর বিররণ 7:26 ပူးပေါင်းရင်းမြစ်များ

যিশাইয় 2:20

সেদিন্যে মান্‌জ্যে তারার্ পূজোত্তে বানেয়্যে সোনা আর রূবোর্ মুত্তিগুন্ চুজি হেইয়্যে আর বাদোলুনো ইদু ফেলেই দিবাক্।

যিশাইয় 30:22

সেক্কে তুমি তমার্ রূবো আর সোনালোই বেড়েয়্যে মূত্তিগুন্ অসিজি গুরিবা; তুমি সিগুনোরে কজরা কাবড় ধোক্ক্যেন ফেলেই দিইনে কবাদে, “দূর্ অ, দূর্ অ!” ‍

যিশাইয় 41:24

মাত্তর্ আজলে তুমি কিচ্চু নয়, আর তমা কামানিয়ো কিচ্চু নয়; যে তমারে বেঈ লোইয়্যে তে ঈচ্ গরা হেইয়্যে।

যিহিষ্কেল 11:18

“তারা সিদু ফিরি যেইনে বেক্ বাজে মূত্তি আর জঘন্য মূত্তিগুন দূর্ গুরি দিবাক্।

যিহিষ্কেল 14:7

কনঅ ইস্রায়েলীয় বা ইস্রায়েল দেজত্ বজত্তি গুরিয়্যে কনঅ বিদেশী যুনি মত্তুন্ ফারগ্ ওই যান আর তা মনত্ মূত্তি থিদেবর্ গুরিনে পাপত্ পড়েদে ধোক্ক্যেন জিনিস তা মুজুঙোত্ রাগায় আর সে পরেদি মইধু পুযোর্ গুরিবাত্তে কনঅ ভাববাদী ইধু এজন্, সালে মুই লগেপ্রভু নিজেই তারে জোব্ দিম।

হোশেয় 14:8

ও ইফ্রয়িম, মূত্তিগুন লগে তর্ আর কনঅ সম্পর্ক নেই। মুয়ই তর্ তবনার্ জোব্‌‌‌‌‌পান দিম আর তর্ যত্তন্ নেযেম। মুয়ই তেল্‌‌‌‌‌তেল্যে বেরস গাজ ধোক্ক্যেন; তর্ ফলুন মত্তুন্ এজে।”

সখরিয় 5:4

বেগত্তুন্ খেমতাবলা লগেপ্রভু কত্তে, ‘মুই সেই অভিশাব্‌পান্ পাদেম্ আর তা চুরুনো ঘরত্ আহ্ মঅ নাঙে মিজে শমক্ হেইয়্যেগুনোর্ ঘরত্ যেইনে সুমিবাক্ আর তারা ঘরত্ থেইনে তক্তা আর পাত্তর্ সুদ্ধো ভস্ত গুরি ফেলেবাক্।’ ”

রোমীয় 2:22

তুই কোই থাচ্, “বেগেয়্যে ন-গোজ্জ্য,” মাত্তর্ তুই নিজেই কি বেগেয়্যে ন-গরর্? তুই দঅ মূত্তি ঘিনাচ্, মাত্তর্ তুই কি নিজেই মন্দিরোত্ যেইনে চুর্ ন-গরর্?

দ্বি’লম্বর বিররণ 13:16

সিদুগোর্ বেক্‌ লুদেয়্যে পযাপিরানি তুমি শঅরর-সংমোধ্যে নেযেইনে বেক্‌ পযাপিরানি আর সেই আদাম বা শঅরানি তুমি তমার লগেপ্রভুর নাঙে পুজ্যে-উৎসর্ব ধোক্ক্যেন গুরি বেক্কানি পুড়ি দিবা। সে জাগায়ান উমরত্তে যেনে এক্কান ভস্তর কুড়্ ওইনে পড়ি থায়; আর কনদিনঅ যেনে সিয়েনি বানানা ন-অয়।

দ্বি’লম্বর বিররণ 13:17

লগেপ্রভু যেনে তার দর্‌গরেপারা রাগত্তুন্‌ ফিরি এজে সেনত্যে তমা আদত্‌ যেনে এই বেক্‌ পযাপিরানির এক্কানঅ দেগা ন-যায়, কিত্যে সিয়েনি উগুরে আঘেদে ভস্ত অনার্ অবিশাব। সালে তে তমারে দোয়্যে আর মেইয়্যে গুরিবো আর তমার পুরোণি মানুচ্চুনো ইদু শমক্‌ খেইয়্যে এগেম্ মঝিম তমার বংশগুন বাড়েই দিবো,

দ্বি’লম্বর বিররণ 13:18

কিত্যে এচ্চ্যে মুই তমারে যেদক্কানি উগুম দুয়োঙর্‌ সিয়েনি পালন গরঅ আর তার চোগেদি যিয়েনি গম্‌ সিয়েনি গরঅ তুমি তমার গোজেন লগেপ্রভুর বাধ্য ওইয়ো।