দ্বি’লম্বর বিররণ 7:24 - Chakma Bible

²⁴ তারার্‌ রাজাগুনোরে তে তমা আঢত্‌ তুলি দিবো আর তুমি তারার্‌ নাঙানি পিত্‌থিমীত্তুন্‌ পুজি ফেলেবা। কনজনে তমারে মানা গুরিনে রাগেই ন-পারিবাক্‌; তুমি তারারে ভস্ত গুরি ফেলেবা।

দ্বি’লম্বর বিররণ 7:24 ပူးပေါင်းရင်းမြစ်များ

গীতসংহিতা 9:5

তুই অন্য জাদ্‌তুনোরে ওদেই দুয়োচ্ আর পাজিগুনোরে ভস্ত গোজ্যস্; তারার্ নাঙানি তুই উমরত্যে বাদ্ দুয়োচ্।

যাত্রা 17:14

ইয়েনর্ পরেদি লগেপ্রভু মোশিরে কলঅ, “এই যুদ্ধোর্‌ কধাগান্‌ ম নত্‌ রাগেবাত্যেই তুই এক্কো বোইয়োত্‌ সিয়েনি লিগি রাগা আর যিহোশূয়রে কোই দে, পিত্‌থিমী উগুরেত্তুন্‌ অমালেকীয়গুনোর্‌ নাঙানি মুই এক্কুবারে ভস্ত গুরি দিম্‌।”

গম্ উপদেজ্ 10:7

গোজেন ভক্তগুনোর্ স্মৃতিগানিয়ে আশিদ্‌বাদ আনে, মাত্তর্ পাজিগুনোর নাঙানি পুযি যায়।

যিশাইয় 54:17

তর্ বিরুদ্ধে বানেয়্যে কনঅ আত্যের্ ন-টিগিবাক্; তরে দুষি গোজ্যে পত্তি মান্‌জ্যর যুক্তি খোন্দেইনে তুই তারারে দুষি গুরিবে। ইয়েনই অলঅ লগেপ্রভুর্ চাগরুনোর অধিকার আর তারার্ যগাজ্যে পাওনা।”

যিরমিয় 10:11

তুমি মানুচ্চুনোরে কঅ, এই দেব-দেবেদাগুনে আগাজ্‌‌‍‌‍চান আর পিত্‌‌‍‌‍‍‍থিমীগান ন-বানান; তারা আগাজ্‌চানত্তুন আর পিত্‌থিমীর বেক্ জাগানত্তুন্ ভস্ত ওই যেবাক্।‌‍‌‍‍‌‍‌‍‍

সফনিয় 1:4

“যিহূদার বিরুদ্ধে আর যিরূশালেমত্ বজত্তি গুরিয়্যে বেক্কুনো বিরুদ্ধে মুই মঅ আঢ্‌‌তানি তুলিম। মুই এ দেজত্তুন্ বাল দেবেদা পূজোর্ বেক্কানি আর মূত্তি পূজোগুরিয়্যে নানান্ পোজিশনর্ ধর্মগুরুগুনোরে শেজ্ গুরি ফেলেম।

রোমীয় 8:37

মাত্তর্ যিবে তমারে কোচ্‌পায়, তা মাধ্যমে ইয়েনির্ ভিদিরেদিয়ো আমি পুরোপুরি জিত্তেই।

১ করিন্হীয় 15:57

মাত্তর্ গোজেনরে ভালেদি জানেই, আমা প্রভু যীশু খ্রীষ্টর্ মাধ্যমে তে আমারে জয় দান গোজ্জ্যে।

দ্বি’লম্বর বিররণ 11:25

কনঅ মান্‌জ্যে তমা মুজুঙোত্‌ থিয়্যেই ন-পারিবাক্। তুমি সে দেজর্‌ যিয়েনত্ যেবা তমা গোজেন লগেপ্রভু তার্‌ এগেম্ মজিম সে জাগানর্ মানুচ্চুনোর মনত্‌ তমা পৌইদ্যেনে এক্কান দর্‌ গরেদে মনভাব আর গির্‌গিরেনি ধোরেই দিবো।

দ্বি’লম্বর বিররণ 25:19

তমার গোজেন লগেপ্রভু যে দেজ্‌ছান সোম্বোত্তি ইজেবে গজক্ গুরিবাত্তে তমারে দিবাত্তে যার্‌ সিয়েনত্‌ তমার চেরোকিত্তে শত্রুগুনো সমারে লাড়ে বাজানাত্তুন তে যেক্কে তমারে জিরেবাত্তে দিবো সেক্কে পিত্‌থিমী উগুরেত্তুন্‌ অমালেকীয়গুনোর চিহ্নোগান তমাত্তুন এক্কুবারে পুঝি ফেলা পুরিবো। এ কধাগান তুমি পুরি ন-ফেলেয়ো।

দ্বি’লম্বর বিররণ 29:20

লগেপ্রভু কনদিনঅ তারে ক্ষেমা গুরিবাত্তে রাজী ন-অবঅ। সে মানুচ্চো বিরুদ্ধে তার রাগ্‌কান জুলি উদিবো আর তার্‌ মনত্‌ তার পাওনা ভোক্তির আওজ্ জাগিই উদিবো। এই বোইবোত্‌ যেদক্কানি অভিশাবর কধা লেগা আঘে সিয়েনি বেক্কানি তা উগুরে পুরিবো। লগেপ্রভু পিত্‌থিমীত্তুন তার নাঙান্‌ পুঝি ফেলেব।

দ্বি’লম্বর বিররণ 9:14

না, তুই মরে মানা ন-গুরিচ্‌; মুই তারারে ভস্ত গুরি ফেলেম্‌ আর পিত্‌থিমীত্তুন্‌ তারার্‌ নাঙানি তুলি ফেলেম্‌। সে পরেন্দি তর্‌ মাধ্যমে মুই আরঅ বোলী আর দাঙর্‌ এক্কো জাদর্‌ সৃট্টি গুরিম্‌।

দ্বি’লম্বর বিররণ 9:3

মাত্তর্‌ তুমি এ কধাগান মনত্‌ রাগেয়ো, তমার গোজেন লগেপ্রভুই ভস্তগুরিয়্যে আগুনো ধোক্ক্যেন তমার আগে আগে যর্দন গাঙান্‌ পার্‌ ওইনে যার্‌। তে তারারে ভস্ত গুরি দিবো; তেয়ই তমা ইদু তারারে অদেই দিবো। তমা ইদু লগেপ্রভু যে আশ্বাজ্ দিয়্যে সেই মজিম তুমি তারারে ধাবেই দিবা আর কম্‌ সময়োর্‌ ভিদিরে তারারে শেজ গুরি ফেলেবা।

যিহোশূয় 1:5

তুই যেদকদিন বাঁজি থেবে কনঅ জনে তর্‌ বিরুদ্ধে থিয়্যেই ন-পারিবাক্‌। মুই যেধোক্ক্যেন গুরি মোশি লগে এলুং সেধোক্ক্যেন তঅ লগেয়ো থেম্‌; মুই কনঅ‌ দিনঅ‌ তরে ছাড়ি ন যেম্‌ বা ফেলেই ন-যেম্‌।

যিহোশূয় 10:23

সেক্কে সে গাত্তোত্তুন্‌ সে পাচজন রাজারে তারা নিগিলেনেই আনিলাক্‌। ইগুনে এলাক্‌ যিরূশালেম, হিব্রোণ, যর্মূত, লাখীশ আর ইগ্লোনর রাজা।

যিহোশূয় 10:40

এবাবোত্যেগুরি যিহোশূয় বেক্‌ চাগালাগান্‌ জিদি নেযেল। সে ভিদিরে এলদে অজল্‌ মুড়ো-মুড়ি চাগালা, নেগেভ, তলেদি মুড়ো-মুড়ি চাগালা আর মুড়ো-মুড়ির কামা জাগানি। তে সে চাগালার রাজাগুনোরেয়ো ওদেই দিলো আর সিদুগোর্ কাররে বাঁজেই ন-রাগেল। ইস্রায়েলীয়গুনোর গোজেন লগেপ্রভু যেধোক্ক্যেন্‌ উগুম গোজ্যে সেধোক্ক্যেন্‌ তে বেক্‌ জেদা পরাণবলাগুনোরে এক্কুবারে শেজ্‌ গুরি দিলো।

যিহোশূয় 10:42

এধোক্ক্যেনগুরি একবার যুদ্ধো গুরিবাত্তে নিগিলিলে যিহোশূয় এ বেক্‌ রাজাগুনোরে আর তারার দেজ্‌চানি জিদি নিলো, কিত্যে ইস্রায়েলীয়গুনোর গোজেন লগেপ্রভু তারার্‌ ওইনে যুদ্ধো গোজ্যে।

যিহোশূয় 10:8

লগেপ্রভু যিহোশূয়রে কলঅ‌, “তুই তারারে ন-দোরেচ্‌; মুই তারারে তঅ‌ আঢত্‌ তুলি দুয়োং। তারা কনজনে তঅ মুজুঙোত্‌ থিয়্যেই ন-পারিবাক্‌।”

যিহোশূয় 11:17

এক কধায় সেয়ীর মুড়োবো ইন্দি উদি যেইয়্যে হালক মুড়োত্তুন হর্মোণ মুড়োবোর্‌ তলেদি লেবানন কিজিঙোর্‌ বাল্‌গাদ সং বেক্‌ জাগায়ানি যিহোশূয় গজক্ গুরি নেযেল। তে বেক্‌ জাগায়ানির্‌ রাজাগুনোরে ধুরিনে মারে ফেলেল।

যিহোশূয় 21:44

তারার্‌ পূরোণিমানুচ্চুনো ইদু লগেপ্রভুর শমক্‌ মজিম্ তে চেরোকিত্তে বেক্‌ যুদ্ধোগানিত্তুন্‌ তারারে জিরেবাত্তে দিলো। কনঅ শত্রু তারার্‌ মুজুঙোত্‌ থিয়্যেই ন-পারে। লগেপ্রভু তারার্‌ বেক্‌ শত্রুগুনোরে তারা আদত্‌ তুলি দিলো।

যিহোশূয় 23:3

তমা গোজেন লগেপ্রভু তমাত্তে এ জাত্‌তো উগুরে যিয়েনি গোজ্যে সিয়েনি দঅ‌ তুমি নিজোর্‌ চোগেদি দেক্কো। তমা গোজেন লগেপ্রভু নিজেই তমার্‌ ওইনে যুদ্ধো গোজ্যে।

যিহোশূয় 23:9

দাঙর্‌ দাঙর্‌ আর বোলী জাদ্‌তুনোরে তমা মুজুঙোত্তুন্‌ লগেপ্রভু ধাবেই দিয়্যে। এচ্চ্যে সং কনঅ জনে তমা মুজুঙোত্‌ থিয়্যেই থেই ন-পারন্‌।

যিহোশূয় 6:2

লগেপ্রভু সেক্কে যিহোশূয়রে কলঅ‌, “চাহ্‌, মুই যিরীহো শঅ‌রান্‌, সিয়েনর্‌ রাজারে আর তার বেক্‌ বীর যোদ্ধাগুনোরে তঅ‌ আঢত্‌ তুলি দুয়োং।