দ্বি’লম্বর বিররণ 6:2 - Chakma Bible

² সেক্কে তুমি, তমা ঝি-পূঅগুনে আর তারার্‌ বংশধরুনে তমা গোজেন লগেপ্রভুরে ভোক্তি গুরিনে তার্‌ দিয়্যে এ বেক্‌ সুদোমানি আর উগুমানি সারা জিংকানিবর্‌ পালেবা আর সেনত্তে ভালোক্‌ দিন সং বাঁঝি থেবা।

দ্বি’লম্বর বিররণ 6:2 ပူးပေါင်းရင်းမြစ်များ

পত্থম 18:19

মুই লগেপ্রভু এ আশালোই তারে বেঈ নেযেয়োং যেনে তে তার পুয়ো আর ঘরর্‌ অন্য বেক্কুনোরে গম্‌ আহ্ দোল্ কাম্‌ গুরিনে মর্‌ আওজ্ মজিম মানি চুলিবার্‌ উবদেজ্ দে। যুদি তারা অব্রাহাম কধা শুনিনে সেধোক্ক্যেন গুরি চলন্‌, সালে মুই লগেপ্রভু অব্রাহাম পৌইদ্যেনে যিয়েনি কোইয়োং সিয়েনি বেক্কানি গুরিম্‌।”

পত্থম 22:12

দূত্তো কলঅ, “পুয়োবোরে মারে ফেলেবাত্তে আত্‌ ন-তুলিচ্‌ বা তা উগুরে আর কিচ্ছু ন-গুরিচ্‌। তুই যে ‌গোজেন ভক্ত সিয়েন্‌ ইক্কিনে বুঝো গেলঅ, কিত্তে মঅ নাঙে তুই তঅ পুয়োবোরে, বানা এক্কো পুয়োরে উৎসর্ব গর্‌তে পিজেন্দি ন-আলাচ্‌।”

১ রাজাবলী 8:40

তুই সিয়েনি গুরিচ্‌ যেনে আমা পুরোণিমানুচ্চুনোরে তুই যে দেজ্‌ছান দুয়োচ্‌ সিয়েনত্‌ সারা জিংকানিবর্‌ তঅ মানুচ্চুনে তরে ভোক্তিবলা দোরেইনে চলন্‌।

ইয়োব 28:28

সে পরেদি তে মানুচ্চুনোরে কলঅ, ‘প্রভু উগুরে ভোক্তিবলা দরান্ অলঅ জ্ঞান, আর ভান্ন্যেয়ত্তুন্ সুরে যানাগানই অল বুদ্ধি।’ ”

গীতসংহিতা 111:10

লগেপ্রভু ইদু ভোক্তিপূর্ণ দরান অলঅ জ্ঞানান্; যিগুনে সে ইজেবে কাম গরন্ তারা গম্ বুদ্ধি পান্। লগেপ্রভুর নাঙ্ গিনেনাগান্ উমরত্তে থিদেবর্।

গীতসংহিতা 128:1

বর্ পেইয়্যে সেই মানুচ্চুন, যিগুনে লগেপ্রভুরে ভোক্তি গরন্ আর তা পধেদি চলন্।

গীতসংহিতা 91:16

বোউত্ আয়ুলোই মুই তারে হুজি গুরিম; মর্ উদ্ধোরর্ কামানি মুই তারে দেগেম।”

যাত্রা 20:12

তমার মা-বাবরে সর্মান গুরিনে চুলিবা। সেক্কে তমার গোজেন লগেপ্রভুর্‌ দিয়্যে দেজত্‌ তুমি ভালোক্‌ দিন বাঁজি থেবা।

যাত্রা 20:20

সেক্কে মোশি মানুচ্চুনোরে কলঅ‌, “তুমি ন-দোরেয়ো। গোজেনে তমারে পোরোক্ষেত্‌ ফেলেয়্যে যেনে তমার মনত্‌ ভক্তির্‌ মনভাব থায়্‌ আর সিয়েনর্‌ কারনে তুমি পাপ ন-গরঅ‌। সেনত্তেই তে এচ্চ্যে।”

গম্ উপদেজ্ 16:6

বিশ্বেজ্ আর সততালোই অন্যেয়ানি দূর্ গরা যায়; লগেপ্রভু উগুরে ভোক্তিবলা দরে মান্‌‌জ্যে ভান্ন্যেয়ত্তুন্ সুরি যান।

গম্ উপদেজ্ 3:16

তার্ ডেন্ আঢেদি আঘে বোউত্ আয়ু, বাঙ্ আঢেদি আঘে ধন আর সর্মান।

গম্ উপদেজ্ 9:11

গম্ বুদ্ধিগানে কয়, “মঅ মাধ্যমে তুই ভালোক্ দিন বাঁজি থেবে, তঅ আয়ুগান আরঅ ভালোক্ বজর বাড়িবো।

উপদেশক 12:13

ইক্কিনে বেক্কানি দঅ শুনো অলঅ; মাত্তর্ শেজ্ কধাগান্ ইয়েন্, গোজেনরে ভোক্তিগুরিনে দোরেবার্ আর তা উগুমানি পালানার্ মাধ্যমে মান্‌জ্যর্ বেক কামানি পালা অয়।

যিরমিয় 32:39

মুই তারারে এমন মন আর স্বভাব দিম যিগুনে বানা মইন্দি এগামনে এগাচিত্তে থেবাক্; সেক্কে তারা নিজোর আর তারার পরেদি তারার ঝি-পুয়োগুনোর ভালেদিত্তে নিত্য মরে ভোক্তি গুরিনে দোরেবাক্।

যিহিষ্কেল 20:19

মুই তারারে আরঅ কলুং, মুয়ই তারার্ গোজেন লগেপ্রভু, সেনত্তে মর্ সুদোমানি যেন তারা পালান্ আর মর্ রীদি-সুদোমানি মানি চলন।

লূকে লেখ্যে গম্ হবর্ 12:5

কারে দোরেবা মুই তমারে সিয়েন্ কোই দোঙর্। তমারে মারে ফেলেবার্ পরেদি নরগত্ ফেলে দিবার্ খেমতা যার্ আঘে তারেই দোরেয়ো। অয়, মুই তমারে কঙর্, তারেই দোরেয়ো।

দ্বি’লম্বর বিররণ 10:20

তুমি তমার্‌ গোজেন লগেপ্রভুরে ভোক্তি গুরিবা আর তারে সেবা গুরিবা; তারেই আজাবোদে ধুরি থেবা আর তার্‌ নাঙেই শমক্‌ গুরিবা।

দ্বি’লম্বর বিররণ 13:4

তমার গোজেন লগেপ্রভুর কধা মজিম্ তমাত্তুন্‌ চলা পুরিবো আর তারে ভোক্তি গরা পুরিবো। তুমি তার উগুমানি পালেবা আর তার বাধ্য ওইনে চলিবা; তুমি তারে সেবা গুরিবা আর তারে আজাবোদে ধুরি থেবা।

দ্বি’লম্বর বিররণ 22:7

তুমি ছগুন নেযেই পার মাত্তর্‌ মাবোরে হামাক্কায় তমাত্তুন ইরি দিয়্যে পুরিবো। সেক্কে তমার ভালেদি অবঅ আরঅ তুমি ভালোক্‌ দিন বাঁজি থেবা।

দ্বি’লম্বর বিররণ 30:19

“তমা বিরুদ্ধে দাঙর্‌ আগাজ্‌ আর পিত্‌থিমীগানরে সাক্ষী রাগেইনে মুই কঙত্তে, এচ্চ্যে মুই তমা মুজুঙোত্‌ জীংকানি বা মরণর আর আশিদ্‌বাদর বা অভিশাব্‌পানি তুলি ধুরিলুং। তুমি জীংকানিগানরে বেঈ নেযঅ, যেনে তুমি আর তমার ঝি-পূঅগুনে বাঁজি থান্‌ আর তমার গোজেন লগেপ্রভুরে কোচ্‌পঅ, তার কধানি শুনো আর তারে আজাবোদে ধুরি রাগঅ, কিত্যে ইগুনো ভিদিরে আগে তমার জীংকানিগান। যে দেজ্‌ছান দিবার শমক্ তে তমার পুরোণি মানুচ্‌ অব্রাহাম, ইসহাক আর যাকোব ইদু গোজ্যে সিয়েনত্ ইয়েন ভিদিরে আঘে তমার আয়ুগান।”

দ্বি’লম্বর বিররণ 4:10

তুমি সে দিনোর্‌ কধা মনত্‌ তুল্য যেদিন্যে তুমি হোরেবত্‌ তমার্‌ গোজেন লগেপ্রভুর মুজুঙোত্‌ আঝিল্ ওইয়ো। সেদিন্যে তে মরে কোইয়্যেদে, মঅ কধানি শুনিবাত্তে তুই মানুচ্চুনোরে মঅ মুজুঙোত্‌ এগত্তর্‌ গর্‌ যেনে তারা এ পিত্‌থিমীত্‌ সারা জিংকানিবর্‌ মরে ভোক্তি গুরি চুলিনে শিগি পারন্‌ আর তারার্‌ ঝি-পূঅগুনোরে মর্‌ উগুমোর্‌ কধাগানি শিক্ষ্যে দি পারন্‌।

দ্বি’লম্বর বিররণ 4:40

তমার্‌ আর তমার পরেন্দি তমা ঝি-পূঅগুনোর্‌ যেনে ভালেদি অয় আর তমার গোজেন লগেপ্রভু যে দেজ্‌ছান উমরত্তে তমারে দের্‌ সিয়েন্দোই যেনে তুমি ভালোক্‌ দিন বাঁজি থেই পার সেনত্যে মুই যেদক্কানি রীদি-সুদোম আর উগুম এচ্চ্যে তমারে দুয়োঙর্‌ সিয়েনি তুমি মানি চলিবা।”

দ্বি’লম্বর বিররণ 4:9

যেদক্‌দিন তুমি বাঁজি থেবা সেদকদিন সং তুমি গমেডালে থেবা আর নিজো উগুরে কড়া নজর্‌ রাগেবা যেনে তুমি চোগেন্দি যিয়েনি দেগর্‌ সিয়েনি ভুলি ন-যঅ আর তমার্‌ মনত্তুন্‌ সিয়েনি বাদ ন-যায়। এ বেক্কানি তুমি তমার্‌ ঝি-পূঅগুনোর্‌ আর সিগুনোর্‌ পরেন্দি তারার্‌ ঝি-পূঅগুনোরে শিগেবাক্‌।

দ্বি’লম্বর বিররণ 5:16

তমা গোজেন লগেপ্রভুর্ উগুমানি মানিনে তুমি তমার্‌ মা-বাবরে সর্মান গুরি চলিবা। সেক্কে তমা গোজেন লগেপ্রভুর দিয়্যে দেজত্‌ তুমি ভালোক্‌ দিন বাঁজি থেবা আর তমার্‌ ভালেদি অবঅ।

দ্বি’লম্বর বিররণ 5:33

যেনে তুমি বাঁজি থেই পার আর তমার্‌ ভালেদি অয় আর যে দেজ্‌ছান তুমি গজক্ গুরিবা সিদু ভালোক্‌ দিন বাঁজি থেই পার সেনত্যে তমার গোজেন লগেপ্রভু যে পথ্‌তানন্দি তমারে চলিবাত্তে উগুম্‌ দিয়্যে তুমি সে পথ্‌তান ইন্দি চুলিবা।

দ্বি’লম্বর বিররণ 6:1

তমা গোজেন লগেপ্রভু এ বেক্‌ উগুমানি, নিয়ম আর হুকুমানি তমারে শিগেবাত্তে মরে উগুম্‌ দিয়্যে, যেনে যর্দন গাঙান্‌ পার্‌ ওইনে যে দেজ্‌ছান তুমি গজক্ গুরিবাত্তে যর্‌ সিদু তুমি সিয়েনি পালন গুরিনে চলিবা।

দ্বি’লম্বর বিররণ 6:24

এচ্চ্যে ধোক্ক্যেন যেন আমিঝে আমার্‌ ভালেদি অয় আর আমি বাঁঝি থেই পারিই সেনত্যে লগেপ্রভু আমারে এ বেক্‌ সুদোমানি পালন গুরিবাত্তে আর আমা গোজেন লগেপ্রভুরে ভোক্তি গুরিবাত্তে উগুম্‌ দিয়্যে।

দ্বি’লম্বর বিররণ 6:7

তমার ঝি-পূঅগুনোরে তুমি বার্‌ বার্‌ সিয়েনি শিগেবা। ঘরত্‌ বৈ থেবার্‌ অক্তত্‌, পধন্দি যেবার্‌ অক্তত্‌, ঘুমেবার্‌ অক্তত্‌ আর বিচ্ছোনত্তুন্‌ উদিবার্‌ অক্তত্‌ তুমি এ বেপারানিলোই তেম্মাং গুরিবা।

যিহোশূয় 4:24

তে এ কামান্‌ গোজ্যেদে যেনে পিত্‌থিমীর বেক্‌ জাদ্‌তুনে জানি পারন্‌, লগেপ্রভুর আত্তান্‌ বোলী আর যেনে তুমি আমিজে তমা গোজেন লগেপ্রভুরে ভক্তিবলা দোরেইনে চলঅ‌।”

১ পিতর 1:17

বাবা গোজেনে পত্তি মান্‌জ্যর কাম ধগে তার্ বিচের্ গরে, কারঅ মুয়োদি চেইনে সিয়েন ন-গরে। ইয়েনত্যে যুনি তারে তুমি বাবা বিলিনে ডাগঅ সালে এ পিত্‌থিমীত্ যেদকদিন বিদেশী ইজেবে আঘঅ সেদকদিন তা উগুরে ভোক্তিবলা দরে তমা জিংকানিগানি কাদঅ।