দ্বি’লম্বর বিররণ 6:15 - Chakma Bible

¹⁵ কিত্যে তমা ভিদিরে তমার্‌ যে গোজেন লগেপ্রভু আঘে তে তার্‌ পাওনা ভোক্তি পৌইদ্যেনে অমকদ খুজি; দেব-দেবেদাগুনোর্‌ পিজেন্দি গেলে তমার বিরুদ্ধে তার্‌ রাগর্‌ আগুনান্‌ জুলি উদিবো, আর তে পিত্‌থিমীগান উগুরেত্তুন্‌ তমারে ভস্ত গুরি ফেলেব।

দ্বি’লম্বর বিররণ 6:15 ပူးပေါင်းရင်းမြစ်များ

পত্থম 7:4

মুই আর সাত দিন পরেদি পিত্‌থিমীগান উগুরে ঝড় ফেলেবার বেবস্থা গুরিম্‌। সেক্কে চোল্লিশ দিন আর চোল্লিশ রেত্‌ সং ঝড় পড়িবো। মুই মাদি উগুরে যিদুক্কুন পরান্‌‌বলা ‌বানেয়োং তারারে বেক্কুনোরে পিত্‌থিমীগান উগুরেত্তুন্ তুলি দিম।”

১ রাজাবলী 13:34

এ কামানি যারবিয়াম বংশর পক্ষেন্দি পাপ অলঅ যেনে তারা ভস্ত ওইনে পিত্তিমীর্‌ বুগোত্তুন্‌ উদি যান্দোই্‌।

২ বংশধর 36:16

মাত্তর্‌ গোজেনর পাদেয়্যে মানুচ্চুনোরে তারা ঘিনেদাক্‌, তা কধানি তুচ্ছো গুরিদাক্‌ আর তার্‌ ভাববাদীগুনোরে ঠাট্টা-তামাজা গুরিদো। যেরেন্দি লগেপ্রভুর রাগ্‌কান তার্‌ মানুচ্চুনোর্‌ বিরুদ্ধে জাগি উদিলো; তারার্‌ রোক্ষ্যে পেবার্‌ আর কনঅ পথ ন-এলঅ।

গীতসংহিতা 90:11

তর্ রাগর খেমতাগান কন্না বুঝি পারে? কয়জন মনত্ তর্ পাইদ্যে ভোক্তিগান আঘে, যেনে তারা তর্ রাগ্‌কান বুঝোন্?

গীতসংহিতা 90:7

তর্ রাগে আমি শেজ্ ওই যেই; তর্ অমকদ রাগ্‌কান আমি দোরেই।

যাত্রা 20:5

তুমি তারারে পূজোয়ো ন-গুরিবা, তারারে সেবায়ো ন-গুরিবা, কিত্তে বানা মুয়ই লগেপ্রভু তমার্‌ গোজেন। মর্‌ পাওনা ভোক্তিগান মুই চাং। যিগুনে মরে ঘিনেন্‌ তারার্‌ পাবর্‌ সাজা-মুই তারারে তিনোত্তুন্‌ ধুরি চের্‌ পুরুষ সং দুয়োং।

যাত্রা 32:12

কিত্তেই মিসরীয়গুনে এই কধাগান্‌ কবার্‌ সুযোগ্‌ পেবাক্‌, মুড়োমুড়ি চাগালা ভিদিরে আনিনে তারারে মারে ফেলেইনে পিত্‌থিমীর্‌ বুগোত্তুন্‌ তুলি দিবার্‌ ভান্ন্যেই আওজে তুই তারারে নিগিলেই আন্যচ্‌? তর্‌ এই জদবদে রাক্কান্‌ তুই থামা। দোয়্যে গর্‌, তঅ মানুচ্চুনো উগুরে তুই এই বিপদ্‌থান্‌ ন-আনিচ্‌।

যিরমিয় 28:16

সেনত্তে লগেপ্রভু কোইয়্যেদে, ‘মুই তরে পিত্‌থিমীর উগুরেত্তুন সোরেই দিবাত্তে যাঙর্। এ বজরত্ তুই মুরি যেবে, কিত্তে তুই লগেপ্রভুর বিরুদ্ধে উল্লোমির কধা ফগদাং গোজ্যস্।’ ”

যিরমিয় 7:6

যুনি বিদেশি, মা-বাপ নেইয়্যে বা রানিমিলেগুনোরে অত্যেচার ন-গোজ্য আর এ দেজত্ নিদ্দুযিগুনোর লো ন-ঝোরেয়ো আর দেব-দেবেদাগুনোর পিজেদি যেইনে নিজোরে খেতি ন-গোজ্য,

আমোষ 3:2

“পিত্‌থিমীর্ বেক জাদ্‌‌‌‌‌‌‌‌‌তুনো ভিদিরেত্তুন্ মুই বানা তমারে বেঈ লোইয়োং; সেনত্তে তমার্ বেক পাপ্‌‌‌‌‌পানিত্তে মুই তমারে সাজা দিম।”

আমোষ 9:8

মঅ চোগ্‌‌কুন ঘেচ্চেকগুরি এই পাপে ভরা রেজ্যগান উগুরে রোইয়োন। পিত্‌‌থিমীর বুগোত্তুন্ মুই সিয়েন ভস্ত গুরি দিম; তো মুই যাকোবর বংশবোরে পুরোপুরি গুরিনে ভস্ত ন-গুরিম।

গণাণা 35:34

তুমি যে দেজত্‌ থেবা মুইয়ো সিদু থেম্‌ বিলি সেই দেজ্‌ছান ফি-বলা গুরি ন-পারিবা। মুই লগেপ্রভু ইস্রায়েলীয়গুনো ভিদিরে বজত্তি গরঙর্‌।”

১ করিন্হীয় 10:22

ইয়েন গুরিনে কি আমি ঘেচ্চ্যেকগুরি প্রভুর মনর্ জ্বালা জাগেই তুলিবাত্তে চেইর্? আমি কি তাত্তুন্ বেশ্ খেমতাবলা?

দ্বি’লম্বর বিররণ 11:17

সেক্কে তমা উগুরে লগেপ্রভুর রাগর্‌ আগুনান জুলি উদিবো আর তে আগাজর্‌ দোরান বন্ধ গুরি দিবো, যিয়েনর্‌ কারনে ঝড়্অ ন-অবঅ আর ভূইয়োত্‌ ক্ষেত ক্ষেত্তিয়ো ন-অবঅ। যে দোল্‌ দেজ্‌ছান লগেপ্রভু তমারে দের্‌ সিয়েনত্তুন্‌ তুমি কম্‌ সময়োর্‌ ভিদিরে শেজ্ ওই যেবা।

দ্বি’লম্বর বিররণ 4:24

কিত্যে তমা গোজেন লগেপ্রভু অলদে বেক্কানি পুড়ি ফেলেই দিয়্যে আগুন; তার্‌ পাওনা ভোক্তি পৌইদ্যেনে তে অমকদ খুজি।

দ্বি’লম্বর বিররণ 5:9

তুমি তারারে পূজোয়ো ন-গুরিবা, তারারে সেবায়ো ন-গুরিবা, কিত্যে বানা মুয়ই লগেপ্রভু তমার গোজেন। মর্‌ পেবার্‌ ভোক্তিগান মুই চাং। যিগুনে মরে ঘিনান্‌ তারার্‌ পাপর্‌ সাজা মুই তারার্‌ তিন আর চের্‌ বংশ সং দি থাং।

দ্বি’লম্বর বিররণ 7:4

কিত্যে সে মিলেগুনে তমা পূঅগুনোরে মত্তুন্‌ দূরোত্‌ সোরেই নেযেবাক্ আর দেব-দেবেদাগুনোর্‌ পূজো গুরিবাক। সেক্কে লগেপ্রভুর রাগর্‌ আগুনান্‌ তমার বিরুদ্ধে জুলি উদিবো আর লগে লগে তমারে ভস্ত গুরি ফেলেব।

যিহোশূয় 23:12

মাত্তর্‌ এ জাদ্‌তুনো ভিদিরে যিদুক্কুন্‌ মানুচ্‌ পরাণে বাঁজি যেইনে তমা ভিদিরে আগন্‌ তুমি যুনি লগেপ্রভুরে ছাড়িনে তারা সমারে মিজো, বা তারা সমারে বৌ দেনার কুদুম্মোগান্ থিদে গরঅ, বা তারা সমারে মিজো,