দ্বি’লম্বর বিররণ 4:25 - Chakma Bible

²⁵ তুমি আর তমার বংশধরুনে সে দেজত্‌ ভালোক্‌ দিন বজত্তি গরানার্‌ পরেন্দি যেক্কে তুমি ভান্ন্যেই পদথ্‌ যেইনে পূজোত্তে মূত্তি বানেবা আর তমার গোজেন লগেপ্রভুর চোগেদি যিয়েনি ভান্ন্যেই সিয়েনি গুরিনে তারে অখুজি গুরিবা,

দ্বি’লম্বর বিররণ 4:25 ပူးပေါင်းရင်းမြစ်များ

২ রাজাবলী 21:2

লগেপ্রভু ইস্রায়েলীয়গুনো মুজুঙেত্তুন্‌ যিদুক্কুন্‌ জাদরে ধাবেই দিয়্যে তারা ধোক্ক্যেন জঘন্য কাম্‌ গুরিনে মনঃশি লগেপ্রভুর চোগেন্দি যিয়েনি বজং সিয়েনি গুরিদো।

গীতসংহিতা 78:58

তারা মুড়ো উগুরে ডালিবাজা দিইনে তারে অখুজি গোজ্যন্; বানেয়্যে মুত্তি পূজো গুরিনে তা পাইদে ভক্তির আওজ্‌ছান বাড়েই দুয়োন।

যাত্রা 20:4

পূজো গুরিবার্‌ নাঙে তুমি কনঅ‌ মূত্তি ন-বানেবা, সিবে আগাজর্‌ কনকিজু ধোক্ক্যেন ওক্‌ বা মাদি উগুরে কনঅ‌ কিজু ধোক্ক্যেন ওক্‌ বা পানি ভিদিরেত্তুন্‌ কনঅ কিজু ধোক্ক্যেন ওক্।

যাত্রা 32:7

ইয়েনত্যে লগেপ্রভু মোশিরে কলঅ‌, “তুই তলেন্দি লামি যাহ্। তর্‌ সেই বেক্‌ মানুচ্চুনে যিগুনোরে তুই মিসর্‌ দেজত্তুন্‌ নিগিলেই আন্যচ্‌ তারা অমহদ বেশ্ ওইয়োন্‌।”

যিহিষ্কেল 8:10

সেনত্তে মুই ভিদিরে যেইনে রিনি চেলুং আর দেবালর্ বেক্ জাগানিত্ নানান্ বাবোত্যে বুগেদি-আঢি বেড়েয়্যে প্রাণি আর অসিজি এ্যামানর চেঙেরা আর ইস্রায়েলীয়গুনোর বেক মূত্তির চেঙারানি খোদাই গরা আগেদে দেগিলুং।

হোশেয় 9:17

মর্ গোজেনে তারারে এলাফেলা গুরিবো, কিত্যে তারা তার্ বাধ্য ন-অন্; তারা নানান্ জাদ ভিদিরে ঘুরি বেড়েবাক্।

হোশেয় 9:9

গিবিয়ার সময়োত্ যেবাবোত্যে এলঅ সেবাবোত্যে ইস্রায়েলীয়গুনে অন্যেয় ইধু ডুবি যেইয়োন। গোজেনে তারার্ পাজির্ কধানি ইদোত্ তুলিবো আর তারার্ পাপত্তে সাজা দিবো।

১ করিন্হীয় 10:22

ইয়েন গুরিনে কি আমি ঘেচ্চ্যেকগুরি প্রভুর মনর্ জ্বালা জাগেই তুলিবাত্তে চেইর্? আমি কি তাত্তুন্ বেশ্ খেমতাবলা?

দ্বি’লম্বর বিররণ 27:15

সে মানুচ্চো অভিশাব্ পেইয়্যে, যে ছাঝি ফেলায় বা তক্তা বা পাত্তর্‌ খুরিনে কনঅ মূত্তি বানায় আর পূজোত্তে সিয়েনি গুমুরো জাগাত থিদেবর্ গরে। এ বেক্ মূত্তিগুন লগেপ্রভুর ঘিনাইদে জিনিস, কালিগরর্‌ আদর কাম্‌ বানা। সেক্কে বেক্কুনে কবাক, আমেন।

দ্বি’লম্বর বিররণ 28:45

এদক্কানি অভিশাব্ তমা উগুরে লামি এবঅ। তুমি তমার গোজেন লগেপ্রভুর বাধ্য ন-অনার কারনে আর তে যেদক্কানি উগুম আর সুদোম দিয়্যে সিয়েনি ন-পালানার কারনে এদক্কানি অভিশাব তমার পিজেন্দি লোড়ে লোড়েই এবঅ আর তমারে ধুরি ফেলেব আহ্‌ যেরেন্দি তুমি শেজ্‌ ওই যেবা।

দ্বি’লম্বর বিররণ 28:61

ইয়েনি বাদে লগেপ্রভু এদক্কানি পিড়ে আর আঘাত তমা উগুরে আনিবো যিয়েনির কধা এ রীদি-সুদোমর্ বোইবো ভিদিরে লেগা নেই, আর যেরেন্দি তুমি শেজ্‌ ওই যেবা।

দ্বি’লম্বর বিররণ 30:18

মাত্তর্‌ এচ্চ্যে মুই তমারে কোই দুয়োঙর্‌, তুমি হামাক্কায় ভস্ত ওই যেবা। যর্দন গাঙান্‌ পার ওইনে যে দেজ্‌ছান তুমি গজক্ গুরিবাত্তে যর্‌ সিয়েনত্ তুমি ভালোক্ দিন বাঁজি ন-থেবা।

দ্বি’লম্বর বিররণ 30:19

“তমা বিরুদ্ধে দাঙর্‌ আগাজ্‌ আর পিত্‌থিমীগানরে সাক্ষী রাগেইনে মুই কঙত্তে, এচ্চ্যে মুই তমা মুজুঙোত্‌ জীংকানি বা মরণর আর আশিদ্‌বাদর বা অভিশাব্‌পানি তুলি ধুরিলুং। তুমি জীংকানিগানরে বেঈ নেযঅ, যেনে তুমি আর তমার ঝি-পূঅগুনে বাঁজি থান্‌ আর তমার গোজেন লগেপ্রভুরে কোচ্‌পঅ, তার কধানি শুনো আর তারে আজাবোদে ধুরি রাগঅ, কিত্যে ইগুনো ভিদিরে আগে তমার জীংকানিগান। যে দেজ্‌ছান দিবার শমক্ তে তমার পুরোণি মানুচ্‌ অব্রাহাম, ইসহাক আর যাকোব ইদু গোজ্যে সিয়েনত্ ইয়েন ভিদিরে আঘে তমার আয়ুগান।”

দ্বি’লম্বর বিররণ 31:29

মুই হবর্‌ পাংগে যে, মর্‌ মরাণার পরেন্দি তুমি এক্কুবারে ভান্ন্যেই ওই যেবা আর যে পদেন্দি মুই তমারে চলিবার উগুম দুয়োঙর্‌ তুমি সিয়েনত্তুন সোরেই যেবা। আগামিদি তমা উগুরে দযা লামি এবঅ, কিত্যে লগেপ্রভুর চোগোত্‌ যিয়েনি ভান্ন্যেই তুমি সিয়েনি গুরিবা আর তমার নিজোর আঢ্‌তোই বানেয়্যে মূত্তিলোই তুমি তারে অখুজি গুরিবা।”

দ্বি’লম্বর বিররণ 32:5

তা উগুরে তার মানুচ্চুনে ভান্ন্যেই বেবহার গোজ্যন্‌। তারার মনর্ কুজুরোমিত্যেই সিগুনে আর তার পূঅ নয়।

দ্বি’লম্বর বিররণ 4:16

যেনে তুমি ভান্ন্যেই পদথ্‌ যেইনে পূজোর্‌ নাঙে কনঅ মূত্তি ন-বানঅ বা কনঅ চেঙেরার্‌ মূত্তি ন বানঅ-সিবে মরদর্‌ বা মিলের্‌ ওক্‌,

দ্বি’লম্বর বিররণ 4:23

তমা গোজেন লগেপ্রভু তমাত্তে যে সুদোমানি থিদেবর্ গোজ্যে, উজিয়ার্‌, সিয়েনি তুমি ভুলি ন যেইয়ো। তমা গোজেন লগেপ্রভুর্‌ মানা গোজ্যে কনঅ কিচ্ছুলোই মূত্তি বানানা তমার্‌ ন-চলিবো,

যিহোশূয় 24:20

তুমি যুনি লগেপ্রভুরে ছাড়িনে দেব-দেবেদারে সেবা গরঅ সালে তে তমা ইন্দিত্তুন্‌ ফিরিবো আর যুনিয়ো তে আগেন্দি তমারে ভালেদি গোজ্যে মাত্তর্‌ সেক্কে তমা উগুরে অমংগল আনিনে তমারে শেজ্‌ গুরি দিবো।”