দ্বি’লম্বর বিররণ 31:3 - Chakma Bible

³ তমার গোজেন লগেপ্রভু নিজে গাঙান্ পার্ ওইনে তমার আগে আগে যেবঅ। তমা মুজুঙোত্তুন সেই বেক্‌ জাদ্‌তুনোরে তেয়ই ভস্ত গুরি দিবো আর তুমি তারার দেজ্‌ছান গজক্ গুরি নেযেবা। লগেপ্রভুর কধা মজিম যিহোশূয় গাঙান পার্ ওইনে তমার আগে আগে যেবঅ।

দ্বি’লম্বর বিররণ 31:3 ပူးပေါင်းရင်းမြစ်များ

পত্থম 48:21

সে পরেদি ইস্রায়েলে যোষেফরে কলঅ, “চাহ্, মর্‌ মরণর্‌ অক্ত প্রায় গোণেই এচ্চ্যে। মাত্তর্‌ গোজেনে তমা লগে থেবঅ আর তমা পুরোণি মানুচ্চুনো দেজত্‌ তমারে ফিরেই নেযেব।

প্রেরিত্‌ 7:45

আমা পূরোণি মানুচ্চুনে সে তাম্বুলান্ পেইনে তারার্ নেতা যিহোশূয়র অধীনোত্ সিয়েন নিজো সমারে আমা এ দেজত্ আন্ন্যন্। গোজেনে সেক্কে তারা মুজুঙোত্ থেইনে অন্য জাদ্‌তুনোরে ধাবেই দিয়্যে আর তারা এ দেশ্‌‌চ‌ান গজক্ গোজ্জ্যন্। দায়ূদোর সময় সং সেই তাম্বুলান্ এ দেজত্ এলঅ।

দ্বি’লম্বর বিররণ 1:30

তমার গোজেন লগেপ্রভু তমা আগে আগে যার্‌। তে তমার্‌ চোগো মুজুঙোত্‌ মিসর্‌ দেজত্‌ আর ধূল্যেচর-চাগালাত্ যেধোক্ক্যেন তমার্‌ ওইনে যুদ্ধো গোজ্যন্‌ ইক্কিনেয়ো সেধোক্ক্যেন গুরিবাক্‌। তুমি দঅ দেখ্য, বাপ্পো যেধোক্ক্যেন পূঅবোরে করত্‌ গুরি নেযায় সেধোক্ক্যেন গুরি এই জাগানত্‌ ন লুমোনা সং তমার গোজেন লগেপ্রভুয়ো গোদা পথতান্‌ তমারে বুয়োই আন্যে।

দ্বি’লম্বর বিররণ 3:28

যিহোশূয়রে কি গরা পুরিবো সিয়েন্‌ তুমি তারে কোই দুয়ো; তারে উচ্ছোমি আর সাহস দুয়ো, কিত্যে তেয়ো আগে আগে যেইনে মানুচ্চুনোরে পার্‌ গুরি নেযেব আর যে দেজ্‌ছান তুই চেবাত্তে যর্‌ সিয়েন্‌ তারারে দিইনে অধিকার্‌ গুরিবে।

দ্বি’লম্বর বিররণ 31:14

ইয়েনর্ পরেন্দি লগেপ্রভু মোশিরে কলঅ, “তর্‌ মরণর দিন্নো ঘোনেই এস্যে। যিহোশূয়রে ডাগি নেযেইনে তুই মিলন-তাম্বুলোত যাহ্। সিয়েনত্ মুই তারে তার্‌ কামর্‌ ভারান্‌ দিম্‌।” সেনত্যেই মোশি আর যিহোশূয় মিলন-তাম্বুলোত্‌ লগেপ্রভুর মুজুঙোত্‌ আঝিল্ অলাক্‌।

দ্বি’লম্বর বিররণ 31:23

নূনোর পূঅ যিহোশূয়রে লগেপ্রভু এ উগুমান দিলো, “তুই বোলী অ আর মনত্‌ বুক্‌ বান্‌। যে দেজ্‌ছান দিবার এগেম মুই শমক্‌ গুরিনে ইস্রায়েলীয়গুনো ইদু গোজ্যং সিয়েনত্ তুমি তারারে নেযেবা। মুই নিজে তঅ সমারে থেম্‌।”

দ্বি’লম্বর বিররণ 31:4

ইমোরীয়গুনোর রাজা সীহোন আর ওগ আর তারার দেজ্‌ছান যেধোক্ক্যেন লগেপ্রভু ভস্ত গুরি দিয়্যে সেধোক্ক্যেন গুরি তে সেই বেক্‌ জাদ্‌তুনোরে ভস্ত গুরি দিবো।

দ্বি’লম্বর বিররণ 34:9

নূনর পূঅ যিহোশূয় উগুরে মোশি আঢ্ বাজেয়্যে বিলিনে তে জ্ঞানদান গুরিয়্যে পবিত্র আত্মালোই পরিপূরোণ ওইয়্যে। সেনত্যে ইস্রায়েলীয়গুনে তার কধামজিম যাহ্ ধোজ্যন্‌ আর মোশির মাধ্যমে লগেপ্রভু তারারে যে উগুমান দিয়্যে সিয়েনি পালন গরা ধোজ্যন্‌।

দ্বি’লম্বর বিররণ 7:1

তুমি যে দেজ্‌ছান গজক্ গুরিবাত্তে যর্‌ সিদু তমার্‌ গোজেন লগেপ্রভু তমারে নেযেব আর নানান্‌ জাদরে তমা মুজুঙোত্তুন্‌ ধাবেই দিবো। এ জাদ্‌তুনে অলাক্‌ হিত্তীয়, গির্গাষীয়, ইমোরীয়, কনানীয়, পরিষীয়, হিব্বীয় আর যিবূষীয়। এ সাত্তো জাদ মান্‌জ্যর সোংখ্যেন্দি আর বলেদি তমাত্তুন্‌ দাঙর্‌।

দ্বি’লম্বর বিররণ 9:3

মাত্তর্‌ তুমি এ কধাগান মনত্‌ রাগেয়ো, তমার গোজেন লগেপ্রভুই ভস্তগুরিয়্যে আগুনো ধোক্ক্যেন তমার আগে আগে যর্দন গাঙান্‌ পার্‌ ওইনে যার্‌। তে তারারে ভস্ত গুরি দিবো; তেয়ই তমা ইদু তারারে অদেই দিবো। তমা ইদু লগেপ্রভু যে আশ্বাজ্ দিয়্যে সেই মজিম তুমি তারারে ধাবেই দিবা আর কম্‌ সময়োর্‌ ভিদিরে তারারে শেজ গুরি ফেলেবা।

ইব্রীয় 4:8

যুনি যিহোশূয় ইস্রায়েলীয়গুনোরে সেই জিরেবার জাগানত্ নেযেদ সালে গোজেনে পরেদি আর এক্কান সময়োর্ কধা ন-কদঅ।

যিহোশূয় 1:2

মঅ চাগর্‌ মোশি মুরি যেইয়্যে। সেনত্তে ইক্কিনে তুই আর বেক্‌ ইস্রায়েলীয়গুনে যর্দন গাঙান্‌ পার ওই যেবাত্তে যুক্কোল্‌ অ আর যে দেজ্‌চান মুই ইস্রায়েলীয়গুনোরে দিবাত্তে যাঙর্‌ সিয়েনত্‌ যঅ‌।

যিহোশূয় 11:15

লগেপ্রভু তা চাগর্‌ মোশিরে যেদক্কানি উগুম দিয়্যে মোশি যিহোশূয়রে সিয়েনি জানেইয়্যে, আর যিহোশূয় সে বেক্‌ উগুমানি পালেয়্যে। লগেপ্রভু মোশিরে যেদক্কানি উগুম দিয়্যে যিহোশূয় সিয়েনির্‌ এক্কান অমান্য ন-গরে।

যিহোশূয় 3:7

সেক্কে লগেপ্রভু যিহোশূয়রে কলঅ‌, “এচ্চ্যেত্তুন ধুরি বেক্‌ ইস্রায়েলীয়গুনোর চোগোত্‌ মুই তঅ সর্মানান্‌ বাড়েবাত্তে আরাম্ভ গুরিম্‌, যেনে তারা বুঝি পারন্‌, মুই যেধোক্ক্যেন গুরি মোশি লগে এলুং সেধোক্ক্যেন তঅ‌ লগেয়ো আগঙ্‌।

যিহোশূয় 4:14

সেদিন্যে লগেপ্রভু বেক্‌ ইস্রায়েলীয়গুনোর চোগোত্‌ যিহোশূয়রে সর্মান গুরিলো। সিয়েনত্তে মানুচ্চুনে মোশি ধোক্ক্যেন্‌ গুরিনে যিহোশূয়র পুরো জীংকানিগান ধুরিনে তারে ভোক্তি গুরিলাক্‌।