দ্বি’লম্বর বিররণ 26:17 - Chakma Bible

¹⁷ এচ্চ্যে তুমি খাম্‌ খেলাদে, লগেপ্রভু তমার গোজেন আর তার পধন্দি তুমি চলিবা। তুমি খাম খেলাদে যে, তার সুদোমানি, উগুমানি আর হুকুমানি তুমি পালন গুরিবা আর তার কধামজিম্‌ চলিবা।

দ্বি’লম্বর বিররণ 26:17 ပူးပေါင်းရင်းမြစ်များ

পত্থম 28:21

যুদি মুই আরঅ মঅ বাবঅ ঘরত্‌ গমে-ডালে ফিরিনে এ পারং, সালে এ লগেপ্রভুরে মুই মর্‌ গোজেন বিলিনে মানিম।

২ বংশধর 34:31

রাজা তার্‌ নিজোর্‌ জাগানত্‌ থিয়্যেইনে লগেপ্রভুর পধেন্দি আদিবাত্তে আর বেক্‌ মনান্‌-পরাণান্‌ দিইনে তার্‌ বেক্‌ উগুমানি, সুদোম্‌ আর হুকুমানি মানি চলিবাত্তে, অত্তাৎ এ বোইবো ভিদিরে লেখ্যে সুদোমর্‌ বেক্‌ কধানি পালেবাত্তে লগেপ্রভুর মুজুঙোত্‌ শমক্‌ খেলঅ।

গীতসংহিতা 48:14

এ গোজেনেয়ই আমা উমরর্ গোজেন; তে আমারে মরণ সং পথ দেগেইনে যেবঅ।

যাত্রা 15:2

লগেপ্রভুই মর্‌ বল্‌, তেয়ই মর্‌ গীদ্; মর্‌ উদ্ধোরান্ তা ভিদিরে আঘে। লগেপ্রভুই‌ মর্‌ গোজেন; মুই‌ তাঁরই‌ বাঈনী গরেদে-গীদ্ গেইম্। তে মর্‌ বাবার্‌ গোজেন; মুই তাঁর মহিমার্ গীদ্ গেইম্‌।

যাত্রা 19:8

এই কধানি শুনিনে বেক্‌ মানুচ্চুনে এক সমারে কলাক্কে, “লগেপ্রভু যিয়েনি কোইয়্যে আমি সিয়েনি বেক্কানি গুরিবোং।” মানুচ্চুনে যিয়েনি কলাক্‌ মোশি যেইনে সিয়েনি লগেপ্রভুরে জানেল।

যাত্রা 20:19

তারা মোশিরে কলাক্, “তুই আমা লগে কধা কঅ‌, আমি শুনিবোং; মাত্তর্‌ গোজেনে যুনি আমা লগে কধা কয়্‌ সালে আমি মারা পুড়িবোং।”

যাত্রা 24:7

সে পরেদি তে সুদোম-লেখ্যে বোইবো নেযেইনে মানুচ্চুনোরে পোড়েই শুনেল। ইয়েনর জোবত্‌ মানুচ্চুনে কলাক্, “আমি বাধ্য থেবং আর লগেপ্রভু যিয়েনি যিয়েনি কোইয়্যে সিয়েনি বেক্কানি পালন গুরিবোং।”

যিশাইয় 12:2

ঘেচ্চেক্‌গুরি, গোজেনে মর্ উদ্ধোরগুরিয়্যে; মুই তা উগুরে বিশ্বেজ্ গুরিম, ন-দোরেম্। লগেপ্রভু, লগেপ্রভু মর্ বল্ আর মর্ গান; তেয়ই মর্ উদ্ধোরগুরিয়্যে ওইয়্যে।”

যিশাইয় 44:5

একজনে কবঅ, তে লগেপ্রভুর্; আর একজনে যাকোব নাঙে নিজোর্ পরিচয়ান্ দিবো; অন্য আর একজনে নিজো আঢ উগুরে লিগিবো, তে লগেপ্রভুর্, আর তে ইস্রায়েল নাঙান্ মানি লবঅ।’ ”

সখরিয় 13:9

এই তিন লম্বর্ ভাগ্‌‌‌‌‌‌কো মুই আগুনো ভিদিরেদি নেযেম; রূবো খাটি গরেদে ধোক্ক্যেন্ গুরি মুই তারারে খাটি গুরিম আর সনা যাচাই গরেদে ধোক্ক্যেন্ তারারে যাচাই গুরিম। তারা মরে ডাগিবাক্ আর মুই তারারে জোব্ দিম; মুই কোম্, ‘ইগুনে মঅ মানুচ্,’ আর তারা কবাক্, ‘লগেপ্রভুই আমা গোজেন।’ ”

প্রেরিত্‌ 27:23

মুই যিবের্ মানুচ্‌ আর মুই যিবেরে সেবা গরং সেই গোজেনর্ এক্কো দূত্ গেল্লে রেদোত্ মঅ কায়কুরে থিয়্যেইনে কলঅ,

রোমীয় 6:13

কিয়্যেগানর্ কনঅ জিনিজোরে অন্যেয় কাম্ গুরিবার্ আত্যের্ ইজেবে পাপ আঢত্ তুলি ন-দুয়ো। মরণত্তুন্ জেদা ওইয়্যে মানুচ্ ইজেবে তুমি বরং গোজেন আঢত্ নিজোরে তুলি দুয়ো আর গম্ কাম্ গুরিবার আত্যের্ ইজেবে তমা পুরো কিয়্যেগানরে গোজেনরে দি দুয়ো।

২ করিন্হীয় 8:5

আমার্ আজাত্তুন্-অ বেচ্‌ তারা দান গোজ্জ্যন্-তারা নিজোরে পত্তমে প্রভু ইধু আর পরেদি গোজেনর্ আওজ্ মজিম আমা ইধু দি দুয়োন্।

দ্বি’লম্বর বিররণ 13:18

কিত্যে এচ্চ্যে মুই তমারে যেদক্কানি উগুম দুয়োঙর্‌ সিয়েনি পালন গরঅ আর তার চোগেদি যিয়েনি গম্‌ সিয়েনি গরঅ তুমি তমার গোজেন লগেপ্রভুর বাধ্য ওইয়ো।

দ্বি’লম্বর বিররণ 27:10

তুমি তার বাধ্য ওইনে চলিবা। এচ্চ্যে মুই যেদক্কানি উগুম আর সুদোম তমারে দুয়োঙর্‌ সিয়েনি তুমি পালেবা।”

দ্বি’লম্বর বিররণ 29:12

তমার গোজেন লগেপ্রভু তমাত্যে এচ্চ্যে ঘেচ্চ্যেকগুরি অবদে শমক্‌ গুরিনে যে সুদোমান থিদেবর্ গোজ্যে সেই শমক্ আর সুদোমানি মানি নিবাত্তে তুমি ইয়েনত্ এইনে থিয়্যেইয়ো।

দ্বি’লম্বর বিররণ 30:16

এচ্চ্যে তমা ইদু মর্‌ উগুম ইয়েন, তুমি তমার গোজেন লগেপ্রভুরে কোচ্‌পেবা, তার পদেন্দি চলিবা আর তার উগুমানি, সুদোমানি আর হুকুমানি মানি চলিবা। সালে তুমি বাঁজিবা আর সোংখ্যেন্দি বাড়িই উদিবা, আর যে দেজ্‌ছান তুমি গজক্ গুরিবাত্তে যর্‌ সিয়েনত্ তমার গোজেন লগেপ্রভু তমারে আশিদ্‌বাদ গুরিবো।

যিহোশূয় 22:5

মাত্তর্‌ যেদক্কানি উগুম্‌ আর রীদি-সুুদোম লগেপ্রভুর্‌ চাগর্‌ মোশি তমারে দি যেইয়্যে সিয়েনি পালেবাত্তে মন্‌ দুয়ো। তমা গোজেন লগেপ্রভুরে কোচ্‌পেইয়ো, তা পথ্‌তানন্দি আদঅ‌, তার্‌ বেক্‌ উগুমানি পালঅ‌, তারে আজাবোদে ধরঅ‌ আর তমার্‌ বেক্‌ মনান্‌ আর পরাণান্‌ দিইনে তার সেবা গরঅ।”

যিহোশূয় 24:22

সেক্কে যিহোশূয় কলঅ, “এ কধাগান্দোই তুমি নিজোরে নিজেই সাক্ষী ওই থেলা, লগেপ্রভুরে তুমি সেবা গুরিবাত্তে বেঈ লোইয়ো।” জোবত্‌ তারা কলাক্‌, “অয়, আমি সাক্ষী রলং।”