দ্বি’লম্বর বিররণ 21:23 - Chakma Bible

²³ মাত্তর্‌ বেন্যেমাদান্ সং তার্‌ কিয়্যেগান গাজত্‌ টাঙেই রাগে ন-পারিবো। সেদিন্যে তারে গোর্ দিয়্যে পুরিবো, কিত্যে গাজত্‌ টাঙেই রাগাইদে মানুচ্চো গোজেনর অভিশাব পেইয়্যে। সোম্বোত্তি ইজেবে যে দেজ্‌ছান তমারে গোজেন লগেপ্রভু তমারে দিবাত্তে যার্‌ সিয়েন তুমি অসিজি ন-গুরিবা।

দ্বি’লম্বর বিররণ 21:23 ပူးပေါင်းရင်းမြစ်များ

২ শমূয়েল 21:10

অয়ার ঝি রিস্পা বস্তা নেযেইনে এক্কো পাত্তর উগুরে নিজোত্তে বিজেই রাগেল। পত্তম ফসল কাবানার অক্তত্তুন্‌ ধুরি আরাম্ভ গুরিনে যেদকদিন সং সে কিয়্যেগানি উগুরে আগাজত্তুন্‌ ঝড় ন-পড়িলো সেদকদিন সং তে দিনোত্ পেক্কুনোরে আর রেদোত্‌ ঝাড়্‌বো য়েমানুনোরে সেই মরাকিয়্যেগানি রোক্ষ্যে গুরিলো।

২ শমূয়েল 21:6

তা বংশর সাতজন মরদরে আমা আাঢত্‌ তুলি দে। আমি লগেপ্রভুর বেঈ লোইয়্যে সে মানুচ্চুনোরে, অত্তাৎ শৌলর শঅর্‌ গিবিয়াতদ্‌ লগেপ্রভুরে সাক্ষী রাগেইনে তারারে মারে ফেলেবং আর বেক্কুনো মুজুঙোত্‌ তারার্‌ মরাকিয়্যেগানি ফেলেই রাগেবং।” সেক্কে রাজা কলঅ, “মুই তমা আঢত্‌ তারারে তুলি দিম্‌।”

২ রাজাবলী 10:8

সেক্কে এক্কো মান্‌জ্যে এইনে যেহূরে কলঅ, “সিগুনে তারার্‌ মাধাগুন্‌ আন্ন্যন্‌।” সেক্কে যেহূ উগুম্‌ দিলো, “সিগুন্‌ দ্বিকুড়্ গুরি শঅর্‌-গেদোত্‌ সুমিবার পথ্‌তানত্‌ বেন্যেমাদন্ সং রাগেই দুয়ো।”

যিহিষ্কেল 39:12

ইস্রায়েলীয়গুনে সাত মাস সং তারার্ গোরত্ দিইনে দেজ্‌‌চান সিজি গুরিবাক্।

লেবীয় 18:25

ইয়েনত্তে তারার্‌ দেজ্‌চানঅ ফি-বলা ওই যেইয়্যে। সেনত্তে অন্যেয়র্‌ কারনে দেজ্‌চানরে মুই সাজা দুয়োঙর্‌ আর দেজ্‌চানেয়ো তা মানুচ্চুনোরে উগুলিনে ফেলেই দিবাত্তে যার্‌।

গণাণা 25:4

লগেপ্রভু মোশিরে কলঅ, “তুই বেক্‌ ইস্রায়েলীয় নেতাগুনোরে ধুরিনে মারে ফেলা আর দিনো পহ্‌রত্‌ মঅ মুজুঙোত্‌ তারার্‌ কিয়্যেনি ফেলে রাগেচ্‌। সেক্কে ইস্রায়েলীয়গুনো উগুরেত্তুন্‌ মর্‌ সেই রাক্কান্‌ দূর অবঅ।”

যোহন 19:31

সে দিন্নো এলঅ পরবর্ জুগোলোনার্ দিন। যেরেদি দিন্নো এলঅ জিরেবার্ দিন, আর সেই জিরেবার্ দিন্নো এক্কো বিশেষ দিন এলঅ বিলি যিহূদী নেতাগুনে চেইয়োন্ যেন সে দিন্ন্যে কিয়্যেগানি ত্রুুশো উগুরে ন-থায়। ইয়েনত্যে তারা পীলাত ইধু কোজোলি গুরিলাক্ যেন ত্রুুশোত্ যিগুনে আঘন্ তারা টেঙানি ভাঙিনে ত্রুুশোত্তুন্ তারারে সোরেই ফেলা অয়।

রোমীয় 9:3

মঅ ভেইয়ুনো বদলে, অত্তাৎ যিগুনে মঅ জাদর্ মানুচ্‌ তারার্ বদলে যুনি সম্ভব অদঅ সালে মুই নিজেই খ্রীষ্ট কায়-কুরেত্তুন দূর্ ওই যেবার্ অভিশাব্ মানি লোদুং।

১ করিন্হীয় 16:22

যুনি কেঅ প্রভুরে কোচ্‌ ন-পায় সালে তা উগুরে অভিশাব্ পোড়োক্। আমা প্রভু এজোক্।

২ করিন্হীয় 5:21

যীশু খ্রীষ্ট ইধু কনঅ পাপ্ ন-এলঅ; মাত্তর্ গোজেনে আমা পাপ্‌পানি যীশু উগুরে তুলি দিইনে তারে পাপ জাগানত্ দিলো, যেন খ্রীষ্ট সমারে মিজেইনে গোজেনর্ পবিত্রতাগান্ আমার পবিত্রতাগান্ অয়।

গালাতীয় 3:13

রীতি-সুদোম্ অমান্য গরানার ফলে যে অভিশাব্‌পান আমা উগুরে এলঅ, খ্রীষ্ট সে অভিশাব্‌পান নিজো উগুরে লোইনে আমারে উদ্ধোর্ গোজ্জ্যে। পবিত্র বোইবোত্ এ কধাগান্ লেগা আঘে, “যিবেরে গাজত্ টাঙা অয় তে অভিশাব্ পেইয়্যে।”

দ্বি’লম্বর বিররণ 25:19

তমার গোজেন লগেপ্রভু যে দেজ্‌ছান সোম্বোত্তি ইজেবে গজক্ গুরিবাত্তে তমারে দিবাত্তে যার্‌ সিয়েনত্‌ তমার চেরোকিত্তে শত্রুগুনো সমারে লাড়ে বাজানাত্তুন তে যেক্কে তমারে জিরেবাত্তে দিবো সেক্কে পিত্‌থিমী উগুরেত্তুন্‌ অমালেকীয়গুনোর চিহ্নোগান তমাত্তুন এক্কুবারে পুঝি ফেলা পুরিবো। এ কধাগান তুমি পুরি ন-ফেলেয়ো।

দ্বি’লম্বর বিররণ 4:21

তমাত্তে লগেপ্রভু মঅ উগুরে বেজার্‌ অলঅ। তে শমক্‌ খেইনে কোইয়্যেদে, সোম্বোত্তি ইজেবে যে অমকদ দোল্‌ দেজ্‌ছান তমার গোজেন্‌ লগেপ্রভু তমারে দিবাত্তে যার্‌, যর্দন গাঙান্‌ পার্‌ ওইনে মর্‌ সিদু যানা ন-অবঅ।

দ্বি’লম্বর বিররণ 7:26

কনঅ ঘিনাইদে জিনিস তমা ঘরত্‌ ন-আনিবা। সিয়েনি তুমি মনে-পরাণে ঘিনেবা আর ঈচ্ গুরিবা, কিত্যে সিগুনো উগুরে আগেদে ভস্ত অবার্‌ অভিশাব। সিয়েনি যুনি তুমি ঘরত্‌ আনঅ সালে তমা উগুরেয়ো ভস্তর্‌ অভিশাব লামি এবঅ।

যিহোশূয় 7:12

সেনত্তেই ইস্রায়েলীয়গুনে তারার্‌ শত্রুগুনোর মুজুঙোত্‌ থিয়্যেই ন-পাত্তন্‌; তারা পিচ্ছো ফিরিনে ধেই যাদন্‌, কিত্যে তারা ভস্তর্ অভিশাবর তলে ওই পোজ্যন্‌। ভস্তর্ অভিশাবর তলে কদক্কানি জিনিস তমা ইদু আঘে। যুনি তুমি সিয়েনি ভস্ত গুরি ন-ফেলঅ‌ সালে মুই আর তমা লগে ন-থেম্‌।

যিহোশূয় 8:29

তে অয় শঅরর্‌ রাজাবোরে মারে ফেলেইনে সাজোন্যে সং গাজত্‌ টাঙেই রাগেল। সাজোন্যে অক্তত্‌ তে তার কিয়্যেগান্‌ গাজত্তুন লামেইনে শঅরর্‌ গেদোত্‌ চমিবার পথ্‌তানত্‌ ফেলে দিবাত্তে উগুম্‌ দিলো। মানুচ্চুনে তা উগুরে পাত্তর দিইনে এক্কো দাঙর্‌ কুড়্ গুরি রাগেলাক্‌। সিবে এজঅ‌ আঘে।