দ্বি’লম্বর বিররণ 16:16 - Chakma Bible

¹⁶ তমার গোজেন লগেপ্রভুর বেঈ লোইয়্যে জাগানত বজরে তিনপল্লা, অত্তাৎ সদাছাড়া পিদের পরবর্‌ সলাবোত্‌, সাত সাপ্তার্ পরবর্‌ সলাবোত্‌ আর নাদা মান্‌জ্যর-ঘরর পরবর্‌ সলাবোত্‌ তমার বেক্‌ মরদ্‌তুনে লগেপ্রভুর মুজুঙোত্‌ আঝিল্ উয়ো পুরিবো। কনজনে যেনে খালি আঢ্‌তোই লগেপ্রভুর মুজুঙোত্‌ আঝিল্ ন অয়।

দ্বি’লম্বর বিররণ 16:16 ပူးပေါင်းရင်းမြစ်များ

১ রাজাবলী 9:25

লগেপ্রভুর নাঙে শলোমনে যে ডালিঘরান্‌ বানেয়্যে সিয়েনত্‌ তে বজরে তিনবার পুজ্যে-উৎসর্ব আর উদোলোলি-উৎসর্বর অনুষ্ঠান গুরিদো। সে সমারে তে লগেপ্রভুর মুজুঙোত্‌ আগর্‌বাট্টিঅ জালেদ। সালে দেগা যাত্তে, শলোমনে তবনা-ঘরর্‌ বেক্‌ কামানি থুম্‌ গোজ্যে।

২ বংশধর 8:13

মোশির উগুম্‌ মজিম তে জিরেবার্‌ দিনোত্‌, আঙোস্যেত্‌ আর বজরর্‌ তিন্নো পরবত্‌, অত্তাৎ সদানেইয়্যে রুটির পরবত্‌, সাত-সাপ্তার পরবত্‌ আর নাদা মান্‌জ্যর-ঘরর্‌ পরবত্‌-সেই বেক্‌ দিনুনোর্‌ সুদোম মজিম উৎসর্বর অনুষ্ঠান গুরিদাক্‌।

ইষ্রা 3:1

ইস্রায়েলীয়গুনে নিজোর্ নিজোর্ আদামত্ আর শঅরত্ বজত্তি গরানা আরাম্ভ গরানার্ পরেদি সাত মাজত্ বেক মানুচ্চুনে একসমারে মিলিনে যিরূশালেমত্ এগত্তর্ অলাক্।

নহিমিয় 8:15

আর তারার্‌ আদামানিত্‌ আর যিরূশালেমত্‌ তারা এ কধাগান্‌ ফগদাঙ্‌ আর প্রচার্‌ গুরিবাক্‌, “যেধোক্কেন্‌ লেগা আঘে সেধোক্কেন্‌ তুমি মুড়োমুড়ি চাগালাত্‌ যেইনে নাদা মান্‌জ্যর-ঘর্‌ বানেবাত্তে জলপাই আর ঝার্‌বো জলপাই গাজ ডেলা আর গুলমেঁদি, খাজোর্‌ আর পাদালোই-ভোজ্যে গাজঅ ডেলা আনিবা।”

গীতসংহিতা 122:4

সিয়োদই বেক্ গুট্টিগুনে উদোন্দোই, লগেপ্রভু মানুচ্চুনোর বেক্ গুট্টিগুন; ইস্রায়েলরে দিয়্যে উগুম্ মজিম তারা উদোন্দোই লগেপ্রভুরে ভালেদি জানেবাত্তে।

গীতসংহিতা 84:7

যেবার পদত্ তারা বল উগুরে বল্ পান; তারা পত্তিজনে সিয়োনত্ গোজেনর মুজুঙোত্ আজিল্ অন।

গীতসংহিতা 84:8

ও লগেপ্রভু, বেগত্তুন খেমতাবলা গোজেন, মর্ তবনাগান শুন; ও যাকোবর গোজেন, মঅ কধাগান শুন।

গীতসংহিতা 96:8

তুমি স্বিগের্ গরঅ বেক্ বাঈনী পানাগান্ লগেপ্রভুর; উৎসর্বর পযাপিরালোই তা উদোনত্ এজঅ।

যাত্রা 34:20

মাত্তর্‌ গাধার্‌ পত্তম চেলা ছবোর্‌ বদলে এক্কো ভেড়াছাগল ছঅ‌ দিইনে গাধা ছবোরে ছাড়েই নেযেবা। সেই ছবোরে যুনি ছাড়েই নেযা ন-যায়্‌ সালে তার্‌ গত্তনাবো ভাঙি দিয়্যে পুরিবো। তমার পত্তি পত্তম পূঅবোরেয়ো ছাড়েই নেযা পুরিবো। “পরবর্‌ অক্তত্‌ কনজনে যেনে খালি আত্তোই মইদু ন-এজন্।”

যাত্রা 34:24

দেজ ভিদিরে বেক্‌ জাদ্‌তুনোরে মুই তমা মুজুঙোত্তুন্‌ ধাবেই দিম্‌ আর তমার দেজর্‌ দুযিবো বাড়েই দিম্‌। বজরে তিনবার্‌ গুরি যেক্কে তুমি তমার্‌ গোজেন লগেপ্রভুর্‌ মুজুঙোত্‌ আঝিল্ অবাত্তে যেবা সেক্কে কনজনে তমা জাগা-জোমিগানি উগুরে লুভ্‌ ন-গুরিবাক্‌।

যিশাইয় 23:18

মাত্তর্ তার লাভ আর আয় লগেপ্রভুর নাঙে যুদো গুরি রাগা অবঅ; সিগুন জোমেই রাগানা বা থুবোনা ন-অবঅ। যিগুনে লগেপ্রভু মুজুঙোত্ আঢাউদো গরদন্ তারার্ হানা-দানাত্তে আর দোল্ দোল্ কাবড়-চুগোরত্তে তার সে লাভ্‌‍‍‍পুন খরচ্ গরা অবঅ।

যিশাইয় 33:20

আমার বেক্ পরব্‌পুন পালেয়্যে শঅর্ সিয়োন ইন্দি রিনি চাহ্। তঅ চোগ্‌‌কুনে দেগিবাক্ যিরূশালেমানরে, এক্কান সুগ্-শান্দিয়্যে ভরা থেবার জাগানরে, এক্কান তাম্বুলোরে যিয়েন্ সরা ন-অবঅ। তার খুদোগুন্ কনদিন্অ তুলো ন-অবঅ আর সিয়েনর কনঅ দুড়িয়ো ন-ছিনিবো।

যিহিষ্কেল 36:38

যিরূশালেমত্ ঠিগ্ পরবর্ সময়োত্ যেবাবোত্যে উৎসর্বর ভেড়ালোই ভরি যান্ সেবাবোত্যে ভস্ত ওই যেইয়্যে শঅরানি বোউত্ মানুজে ভরি যেবাক্। সেক্কে তারা হবর্ পেবাক্ যে, মুয়ই লগেপ্রভু।”

হগয় 1:9

“তুমি বোউত্ ফসল পেবার্ আজা গোজ্য, মাত্তর্ কম পেইয়ো। তুমি যিয়েনি ঘরত্ আন্য সিয়েনি মুই উড়েই দুয়োং। কিত্তে দুয়োং? মঅ ঘরত্তে সিয়েনি গোজ্যং, কিত্যে সেই ঘরান ভস্ত ওই পড়ি আঘে আর ইন্দি তুমি পত্তিজনে নিজো নিজো ঘর্‌লোই কামত্ আগঅ।‌

মার্ক 12:3

মাত্তর্ সেই চাষাবলাগুনে সেই চাগরবোরে ধুরিনে মারিলাক্ আর সুদো আঢে পাধেই দিলাক্।

যোহন 7:2

সেক্কে যিহূদীগুনোর্ তাম্বুল-ঘর পরবর্ অক্‌ত প্রায় ওইয়েগি।

দ্বি’লম্বর বিররণ 16:15

তমার গোজেন লগেপ্রভু যে জাগায়ান বেঈ নেযেব সিয়োদোই তুমি তার নাঙে সাত দিন সং এই পরপ্পো পালন গুরিবা, কিত্যে তমার তুল্যে বেক্‌ খেদ্‌তানি আর বেক্‌ কামানিত্‌ তমার গোজেন লগেপ্রভু তমারে আশিদ্‌বাদ গুরিবো আর তমার ফুত্তিগানি পূরেব।

দ্বি’লম্বর বিররণ 16:17

তমা গোজেন লগেপ্রভু তমারে যে পরিমাণে আশিদ্‌বাদ গোজ্যে সিয়েন বুঝিনে তমাত্তুন বেক্কুনে যেন কিজু না কিজু লোই আনন্‌।

১ শমূয়েল 1:3

ইল্‌কানা পত্তি বজর তা শঅরত্তুন শীলোত যেদঅ। তে সিদু যেইনে গোদা সংসারানর গিরোজ্ লগেপ্রভুর তবনা আর তা নাঙে য়েমান উৎসর্ব গুরিদো। সেক্কে সিদু ধর্মগুরু এলির দ্বিবে পূঅ লগেপ্রভুর ধর্মগুরু এলাক্। তারার নাঙানি এলদে হফ্‌নি আর পীনহস।

১ শমূয়েল 6:3

তারা কলাক্, “তুমি যুনি ইস্রায়েলীয়গুনোর গোজেনর সুন্দুক্কো পাধেই দুয়ো সালে সুদোগুরি পাধেই নদুয়ো। তুমি হামাক্কাই তাইদু এক্কান দুষ-স্বীগের্ গোজ্যে লেগা পাধেই দিবা। সালে তুমি গম্‌ অবা আর জানি পারিবাদে, কিত্তে তার দরঅ আত্তান্‌ তঅ উগুরেত্তুন সোরেই ন-যার্‌।”