দ্বি’লম্বর বিররণ 12:7 - Chakma Bible

⁷ সিয়োদোই তমার গোজেন লগেপ্রভুর মুজুঙোত্‌ তুমি আর তমার পরিবারর মানুচ্চুনে হানা-দানা গুরিবাক্ আর তার আশিদ্‌বাদ মজিম পাওনা তমার কামর্‌ খেতখেত্তিলেই তুমি ফুত্তি গুরিবা।

দ্বি’লম্বর বিররণ 12:7 ပူးပေါင်းရင်းမြစ်များ

১ বংশধর 29:22

সেদিন্যে তারা লগেপ্রভু মুজুঙোত্ অমকদ রংগ-ফুত্তি গুরিনে হানা-দানা গুরিলাক্‌। তারা দায়ূদো পুয়ো শলোমনরে এ দ্বিবার্‌ রাজা বিলিনে স্বীগের্‌ গুরিলাক্‌ আর তারে রাজা আর সাদোকরে ধর্মগুরু ইজেবে লগেপ্রভুর নাঙে অভিষেগ্ গুরিলাক্‌।

নহিমিয় 8:9

সে পরেন্দি শাজন্‌গুরিয়্যে নহিমিয়, ধর্মগুরু আর ধর্ম-মাস্টর্‌ ইষ্রা আর যে লেবীয়গুনে মানুচ্চুনোরে শিক্ষ্যে দেদন্‌ তারা বেক্‌ মানুচ্চুনোরে কলাক্কে, “এচ্ছ্যে এ দিন্নো তমার্‌ গোজেন্‌ লগেপ্রভুর নাঙে পবিত্র। তুমি আবিলেচ্‌ বা কানাকুদি ন-গুরিবা।” তে এ কধাগান কলঅ, কিত্যে মানুচ্চুনে বেক্কুনে রীদি-সুদোম কধানি শুনিনে কানদন্‌।

উপদেশক 3:12

মুই হবর্ পাং, মান্‌জ্য জিংকানিত্ হুজি আর গম কাম্ গরানা বাদে তাত্তেই আর গম্ কিচ্চু নেই।

উপদেশক 3:13

ইয়েন গোজেনর্ দান, বেক্ মানুচ্চুনে হানা-দানা গুরিবাক্ আর তার বেক্ কামানিত্তে হুজি অবাক্।

উপদেশক 5:18

সে পরেদি মুই বুঝিলুং, গোজেনে বেলান তলেদি মান্‌জ্যরে যে কয়দিন বাঁজি থেবাত্তে দিয়্যে সেনত্তে হানা-দানা গরানা আর তার্ জদবদে কাম্ গরানার্ মাধ্যমে ঈল্ অনা তার্ তপ্পে গম্ আর যগাজ্যে, কিত্তে সিয়েনই তার্ পাওনা।

যিশাইয় 23:18

মাত্তর্ তার লাভ আর আয় লগেপ্রভুর নাঙে যুদো গুরি রাগা অবঅ; সিগুন জোমেই রাগানা বা থুবোনা ন-অবঅ। যিগুনে লগেপ্রভু মুজুঙোত্ আঢাউদো গরদন্ তারার্ হানা-দানাত্তে আর দোল্ দোল্ কাবড়-চুগোরত্তে তার সে লাভ্‌‍‍‍পুন খরচ্ গরা অবঅ।

যিশাইয় 62:9

যিগুনে খেত্-খেত্তি কাবিনে তুবেবাক্ তারা সেই খেত্-খেত্তিগানি হেবাক্ আর লগেপ্রভুরে নাঙ্ গিনিবাক্। যিগুনে আংগুর তুবেবাক্ তারা মর্ সুদ্ধো-সাংগ জাগানর উদোনত্ তার রস্‌চান হেবাক্।” ‌‌‌

যিহিষ্কেল 44:3

বানা শাজন্‌গুরিয়্যেবো গেদো ভিদিরে বোইনে লগেপ্রভুর মুজুঙোত্ হেই পারিবো। তে শেজ্ গুদিবোদি গেদোত্ সোমেব আর একই পধেদি নিগিলিবো।”

যোয়েল 1:16

আমা চোগো মুজুঙোত্ হানা আর আমা গোজেন ঘরত্তুন্ রঙ্গ-ফুত্তি কি বন্ধ ওই ন-যায়?

যোয়েল 2:26

তুমি পেট্ ভুরি হেইনে ঈল্ অবঅ আর তুমি তমার্ গোজেন লগেপ্রভুর বাঈনী গুরিবা যিবে তমাত্তে আমক্ আমক্ অইদ্যে কাম গোজ্যে; মঅ মানুচ্চুনে আর কনদিন্‌অ ন-লাজেবাক্।

লেবীয় 23:40

পত্তম দিনোত্‌ তমার নিজোত্তে গাজর্‌ বেগত্তুন্‌ গম ফল, খাজোর গাজ পাদা, উইলো গাজ্‌ আর অন্য পাদালোই ভোজ্যে গাজর্‌ বাগল্‌ লোইনে এবা। সে পরেদি সাত দিন ধুরি তুমি তমার গোজেন লগেপ্রভুর্ মুজুঙোত্ ফুত্তি গুরিবা।

মালাখি 2:13

আর এক্কান ভান্ন্যেই কাম্ তুমি গুরি থাগঅ; সিয়েন অলঅ, চোগো পানিয়ে তুমি লগেপ্রভুর পূজোবো ভাজঅ। তুমি কানাকুদি আর বিলেপ্ গরঅ, কিত্যেই তুমি যিয়েনি দুয়ো সিয়েনি উগুরে তে আর মনযোগ্ ন-দে বা হুজি মনে তমা আঢত্তুন্ সিয়েনি গুজিয়ো ন-লয়।

প্রেরিত্‌ 2:46

তারা পত্তিদিন উবোসনা ঘরত্ একসমারে থুবেদাক্, আর যুদো যুদো ঘরত্ হুজিয়্যে আর সরল মনে একসমারে হানা-দানা গুরিদাক্।

দ্বি’লম্বর বিররণ 12:12

সিয়েনত্ তমার গোজেন লগেপ্রভুর মুজুঙোত্‌ তুমি, তমার ঝি-পূঅগুনে, তমার চাগর আর চাগরানীগুনে আর তমার আদাম্মে আর শঅরর লেবীয়গুনে যিগুনোর নিজোর বিলিনে কনঅ জাগা-জোমিন বা সোম্বোত্তি নেই তুমি বেক্কুনে ফুুত্তি গুরিবা।

দ্বি’লম্বর বিররণ 12:18

তমার গোজেন লগেপ্রভুর বেঈ লোইয়্যে জাগানত্‌ তা মুজুঙোত্‌ ইয়েনি তমাত্তুন্‌ খা পুরিবো। তুমি, তমার ঝি-পূঅগুন, তমার চাগর-চাগরানীগুন আর তমার আদাম্মে আর শঅরর লেবীয়গুনে সিয়েনি হেই পারিবাক্ আর তমার কামর ফলুন নেযেইনে তমার গোজেন লগেপ্রভুর মুজুঙোত্‌ ফুত্তি গুরিবা।

দ্বি’লম্বর বিররণ 12:8

তমার গোজেন লগেপ্রভু গমেডালে বজত্তি গুরিবাত্তে যে সোম্বোত্তিগানি তমারে দিবাত্তে যার্‌ তুমি এজঅ সিদু ন-লুমোগোই। তুমি সে দেজছানত্‌ যানার পরেন্দি আমি যেন্‌ এচ্চ্যে ইয়েনত্‌ যার্‌ চোগেদি যিয়েনি গম্‌ সিয়েনোই গুরির্‌ তুমি সিদু সিয়েনি ন-গুরিবা।

দ্বি’লম্বর বিররণ 14:23

তমা গোজেন লগেপ্রভুরে যেনে তুমি ভোক্তি গুরিবাত্তে শিগো সেনত্যে তমার শোজ্য, নুয়ো আংগুরো-রস আর তেলর দশ ভাগর এক ভাগ আর তমা পালর গোরু-ভেড়া-ছাগলর পত্তম ছঅবোর্‌ য়েরাগান তমার গোজেন লগেপ্রভুর মুজুঙোত্‌ তমাত্তুন্‌ এনজান্‌ জাগাত খা পুরিবো যে জাগাগানত তে নিজোরে ফগদাং গুরিবাত্তে তার থেবার জাগা ইজেবে বেঈ নেযেব।

দ্বি’লম্বর বিররণ 14:26

সে টেঙাগুন্দোই তুমি তমার আওজ্ মজিম জিনিস কিনিবা, যেন গোরু-ছাগল-ভেড়া, আংগুরো-রস, অন্য বাবোত্যে মদ বা তমার আওজ্ মজিম আর কিজু। সে পরেন্দি তুমি তমার পরিবারুন লোইনে তমার গোজেন লগেপ্রভুর মুজুঙোত্‌ হানা-দানা গুরিনে ফুত্তি গুরিবা।

দ্বি’লম্বর বিররণ 15:20

তমার গোজেন লগেপ্রভুর বেঈ লোইয়্যে জাগানত্‌ পত্তি বজর তুমি তমার ঘোর্‌বোগুন নেযেইনে তা মুজুঙোত্‌ সিগুনোর য়েরানি হেবা।

দ্বি’লম্বর বিররণ 26:11

তমার আর তমার গিরিবোরে তমার গোজেন লগেপ্রভু যেদক্কানি গম্‌ গম্‌ জিনিস দিইনে আশিদ্‌বাদ গোজ্যে সিয়েনি লোইনে তুমি, লেবীয়গুনে আর তমা ভিদিরে বিদেশী বাসিন্দাগুনে ফুত্তি গুরিবা।

দ্বি’লম্বর বিররণ 27:7

সিয়েনত তুমি উদোলোলি-উৎসর্বরঅ অনুষ্ঠান গুরিবা আর সেই উৎসর্বর জিনিস্‌ছানি খেইনে তমার গোজেন লগেপ্রভুর মুজুঙোত্‌ ফুত্তি গুরিবা।

দ্বি’লম্বর বিররণ 28:47

সুদিনোত্‌ খুজি মনে আর খুজি সমারে তমার গোজেন লগেপ্রভুরে সেবা ন-গরানার কারনে হানা-উরোনার অভাব, পানি খাস্‌ আর অমকদ অভাব ভিদিরে তুমি সে বেক্‌ শত্রুগুনোরে সেবা গুরিবা যিগুনোরে লগেপ্রভু তমার বিরুদ্ধে পাধেই দিবো। তে তমার গত্তনাত্‌ লুয়োর জুঙোল্‌ চাপি রাগেব যেদক্কন সং তুমি শেজ্‌ ওই ন-যঅ।

ফিলিপীয় 4:4

প্রভু সমারে মিজেয়ো বিলিনে তুমি নিত্য হুজি থাগঅ। মুই আরঅ কং, তুমি হুজী থাগঅ।