দ্বি’লম্বর বিররণ 10:20 - Chakma Bible

²⁰ তুমি তমার্‌ গোজেন লগেপ্রভুরে ভোক্তি গুরিবা আর তারে সেবা গুরিবা; তারেই আজাবোদে ধুরি থেবা আর তার্‌ নাঙেই শমক্‌ গুরিবা।

দ্বি’লম্বর বিররণ 10:20 ပူးပေါင်းရင်းမြစ်များ

২ রাজাবলী 18:6

লগেপ্রভুরে তে আজাবোদে ধুরি রাগেয়্যে আর নিত্য তা পধেন্দি চলিদো। লগেপ্রভু মোশিরে যেদক্কানি উগুম দিয়্যে সিয়েনি তে পালেদ।

গীতসংহিতা 63:11

মাত্তর্ রাজা গোজেনরে লোইনে ফুত্তি গুরিবো; যিগুনে গোজেনর নাঙে শমক্ খান তারা বেক্কুনে তাল্লোই বার্‌বো গুরিবাক্; মাত্তর্ মিজেকধা কোইয়্যেগুনোর মুয়োনি বানি দিয়্যে অবঅ।

যাত্রা 20:7

কনঅ‌ ভান্ন্যেই আশাই তুমি তমার গোজেন লগেপ্রভুর্‌ নাঙান্‌ ন-গিনিবা। যিবে সিয়েন্‌ গুরিবো তারে লগেপ্রভু সাজা-দিবো।

উপদেশক 12:13

ইক্কিনে বেক্কানি দঅ শুনো অলঅ; মাত্তর্ শেজ্ কধাগান্ ইয়েন্, গোজেনরে ভোক্তিগুরিনে দোরেবার্ আর তা উগুমানি পালানার্ মাধ্যমে মান্‌জ্যর্ বেক কামানি পালা অয়।

যিশাইয় 45:23

মুই নিজো নাঙে শমক্ গোজ্যং, মর্ ন্যায্যতালোই মুই এ কধাগান কোইয়োং, আর সিয়েন বাদ্ ন-যেবঅ। সে কধাগান অলঅ, মঅ মুজুঙোত্ বেক্কুনে আঢু পাদিবাক্ আর মর্ অধীনতাগান স্বিগের্ গুরিবাক্।

যিরমিয় 4:2

যুনি তুই সত্যলোই, ন্যায়লোই আর সততালোই ‘জেদা লগেপ্রভুর নাঙে’ শমক্ খাচ্, সালে মুই অন্য জাদ্‌তুনোরে বর্ দিম্ আর তারা মরে নিইনে বাঈনী গুরিবাক্।”‌‍‌

মথি লেখ্যে গম্ হবর্ 4:10

সেক্কে যীশু তারে কলঅ, “দূর্ অ, শদান্। পবিত্র বোইবোত্ লেগা আঘে, তুই তর্ প্রভু গোজেনরে ভোক্তি গুরিবে, বানা তারে সেবা গুরিবে।”

লূকে লেখ্যে গম্ হবর্ 4:8

যীশু তারে জোব্ দিলো, “পবিত্র বোইবোত্ লেগা আঘে, ‘তুই তর্ প্রভু গোজেনরে ভোক্তি গুরিবে, বানা তারে সেবা গুরিবে।’ ”

প্রেরিত্‌ 11:23

গোজেনে যে কেধোক্ক্যেন্ গুরি আন্তিয়খিয়া মানুচ্চুনোরে দোয়্যে গোজ্জ্যে বার্ণবা এইনে সিয়েন দেগিনে অমকদ হুজি অলঅ। তারা যেন বেক্ মনান্ দিইনে প্রভু ইধু বিশ্বেজি থান্ সেনত্তে তে তারার্ বেক্কুনোরে উচ্চোমি দিয়্যে ধুরিলো।

রোমীয় 12:9

কোচ্‌পানা ভিদিরে ভন্ডামি ন-থোক্। যিয়েন ভান্ন্যেই সিয়েন ঈচ্ গরঅ; যিয়েন গম্ সিয়েন দরমর গুরি ধুরি রাগঅ।

দ্বি’লম্বর বিররণ 11:22

তমার গোজেন লগেপ্রভুরে কোচ্‌পেবার, তার্‌ পদেন্দি চলিবার আর তারে আজাবোদে ধুরি রাগেবার্‌ যেদক্কানি উগুম্‌ মুই তমারে দিলুং সিয়েনি তুমি গমেডালে পালেবা।

দ্বি’লম্বর বিররণ 13:4

তমার গোজেন লগেপ্রভুর কধা মজিম্ তমাত্তুন্‌ চলা পুরিবো আর তারে ভোক্তি গরা পুরিবো। তুমি তার উগুমানি পালেবা আর তার বাধ্য ওইনে চলিবা; তুমি তারে সেবা গুরিবা আর তারে আজাবোদে ধুরি থেবা।

দ্বি’লম্বর বিররণ 4:4

মাত্তর্‌ তুমি যিগুনে তমা গোজেন লগেপ্রভুরে আজাবোদে ধোজ্য, তুমি বেক্কুনে এজঅ বাঁঝি আগঅ।

দ্বি’লম্বর বিররণ 5:11

কনঅ ভান্ন্যেই আজালোই তুমি তমার গোজেন লগেপ্রভুর নাঙান ন-নেযেবা। যে সেধোক্ক্যেন গুরিবো তারে লগেপ্রভু সাজা দিবো।

দ্বি’লম্বর বিররণ 5:29

মরে ভোক্তি গুরিবার্‌ আর মর্‌ উগুমানি পালেইনে চলিবার্‌ এই মনান্‌ যেনে তারার্‌ আমিঝে থায়। সেক্কে তারার্‌ আর তারার্‌ পূঅগুনোর্‌ উমরত্তে ভালেদি অবঅ।

দ্বি’লম্বর বিররণ 6:13

তমার গোজেন লগেপ্রভুরে তুমি ভোক্তি গুরিবা, বানা তারেই সেবা গুরিবা আর তার্‌ নাঙেই শমক্‌ গুরিবা।

যিহোশূয় 23:7

যে জাদ্‌তুন্‌ তমা ভিদিরে রোইয়োন্‌ তারা সমারে ন-মিজেয়ো; তারার্‌ দেব-দেবেদাগুনোর্‌ নাঙানি মুয়োত্‌ ন-আন্য বা তারার্‌ নাঙে শমক্‌ ন-গোজ্য। সিগুনোর পূজো ন-গোজ্য বা তারার্‌ মুজুঙোত্ মাদা ন-নিগিজ্য।

যিহোশূয় 23:8

তুমি তমার্‌ গোজেন লগেপ্রভুরে আজাবোদে ধুরি রাগঅ‌, যেধোক্ক্যেনগুরি এচ্চ্যে সং তুমি গুরি এজর্‌।

১ শমূয়েল 7:3

সেক্কে শমূয়েলে বেক্‌ ইস্রায়েলীয়গুনোরে কলঅ, “যুনি তুমি তমার বেক্‌ মনান্দোই আরঅ লগেপ্রভুর ইদু ফিরি এবাত্তে চঅ, সালে তমা ভিদিরেত্তুন অন্য জাদ্‌তুনোর্ দেব-দেবেদা আর অষ্টারোৎ দেবেদার মূত্তিগুন সোরেই দুয়ো আর লগেপ্রভুর ইন্দি নিজোর মনান্‌ ঠিগ্ গুরিনে বানা তারে সেবা গরঅ। সালে তে পলেষ্টীয়গুনোর আঢত্তুন তমারে উদ্ধোর গুরিবো।”