দ্বি’লম্বর বিররণ 1:17 - Chakma Bible

¹⁷ বিচেরর্‌ পৌইদ্যেনে তুমি কারঅ‌ পক্ষ ন নিবা আর চিগোন্‌-দাগর্‌ বেক্কুনোর্‌ কধা শুনিবা। বিচেরর্‌ কামান্‌ আজলে গোজেনর্; সেনত্তে কনঅ মান্‌জ্যরে তুমি ন দোরেবা। যুনি কনঅ বিচের্‌ তমা ইদু আগাত্যে বিলিনে মনে গরঅ সালে তুমি সিয়েন্‌ মইদু আনিবা, মুই সেই বিচেরান গুরিম্‌।

দ্বি’লম্বর বিররণ 1:17 ပူးပေါင်းရင်းမြစ်များ

পত্থম 18:25

ইয়েন্‌ তর্‌ পক্ষে সম্ভব নয়। গম্‌ আর ভান্ন্যেয় উগুরে এক বাবোত্যে বেবহার গুরিনে তারারে একলগে মারে ফেলানা তর্‌ পক্ষে এক্কুবারে সম্ভব নয়। গোদা পিত্‌থিমীয়ানর্‌ যিবে বিচেরর্ মালিক্‌ তে কি দোল্‌বিচের্‌ গুরি ন পারে?”

২ শমূয়েল 14:14

মাদিত্‌ পানি ঢালিলে যেন সিয়েন আর তুলি নেযেই ন-পারে সে বাবোত্যে গুরিনে দঅ আমি মুরিবোং। মাত্তর্‌ গোজেনে পরাণান্‌ কাড়ি ন-নেযায় বরং তে এমন্‌ বেবস্থা গুরিলো যেনে নিগিলেই দিয়্যে মানুচ্চুন্ তাত্তুন্‌ দূরোত্‌ ন-থান্।

২ বংশধর 19:5

তে দেজ ভিদিরে, অত্তাৎ যিহূদার পত্তি দেবাল-ঘিজ্যে আদাম আর শঅরত্‌ বিচেরগ্‌কুনোরে নেযেল।

২ বংশধর 19:6

তে বিচেরগ্‌কুনোরে কলঅ, “তুমি উজিয়ার্‌ ওইনে বেক্‌ কামানি গুরিবা, কিত্তে তুমি কনঅ মান্‌জ্যত্তে নয় বরং লগেপ্রভুত্তে বিচের্‌ গুরিবা। বিচেরর্‌ রায় দিবার্‌ অক্তত্‌ তে তমা লগে থেবঅ।

ইয়োব 31:34

সেনত্তে মুই মানুচ্চুনোরে ন-দোরেদুং, আর মঅ বংশর মানুচ্চুনোর ঘিনেনার দরে মুই ঘরত্ জুরো গুরি বুয়োই ন-থেদুং।

গীতসংহিতা 82:2

“আর কয়দিন তুমি অন্যেয়র শাজন্ চালেবা? কয়দিন পাজিগুনোর তপ্পে থেবে?

যাত্রা 18:18

সেক্কে তুই আর তঅ মানুচ্চুনে হামাক্কায়্‌ বল্‌পোজ্যে ওই যেবাক্‌। কামান্‌ এদক্‌ বেশ আগাত্যে যে, তর্‌ গায়্‌-গায়্‌ সিয়েন্‌ গরানা সম্ভব নয়।

যাত্রা 18:22

ইগুনেই আমিঝে মানুচ্চুনোর্‌ বিচের্‌ গুরিবাক্। চিগোন-চাগোন্‌ বেপারানি তারা বিচের্‌ গুরিবাক আর দাঙর্‌ দাঙর্‌ বেপারানি তইদু আনিবাক্। সেক্কে তর্‌ কামানি পাদল্‌ অবঅ‌ কিত্তে তারায়ো তর্‌ ভারান্‌ কিজু কমে দিবাক্।

যাত্রা 18:26

তারা আমিঝে মানুচ্চুনোরে বিচের্‌ গুরিদাক্। তারা আগাত্যে বেপারানি মোশি ইদু নেযেদাক, মাত্তর্‌ চিগোন-চাগন্‌ বেপারানি তারা নিজে নিজে সামেলেদাক্‌।

গম্ উপদেজ্ 18:5

দুষি মান্‌জ্যর তপ্পে লনা ঠিগ্ নয়, সেক্কে নিদ্দুযিবো উগুরে অবিচের্ গরা অয়।

গম্ উপদেজ্ 24:23

ইয়েনিয়ো জ্ঞানীগুনোর কোইয়্যে কধা। বিচেরত্ কারঅ পক্ষ নেযানা গম্ নয়।

গম্ উপদেজ্ 28:21

বিচেরত্ কার তপ্পে নেযানা ঠিগ্ নয়; যে সিয়েনি গরে তে এক কট্টা রুটিত্তেয়ো অন্যেয় গুরি পারে।

গম্ উপদেজ্ 29:25

মান্‌‌জ্যরে যে দরায় সে দরানে তা তপ্পে ফাল্ অয়, মাত্তর্ যে লগেপ্রভু উগুরে বিশ্বেজ্ গরে তে গমেডালে থায়।

যিরমিয় 1:17

“তুই কমরত্ বানিনে থিয়্যে আর মুই তরে যিয়েনি কবাত্তে উগুম গুরিম্ সিয়েনি তুই তারারে কঅ। তারারে দেগিনে তুই ভাঙি ন-পড়িচ্, যুনি পড়চ্ সালে মুই এমন্ গুরিম যেনে তারা মুজুঙোত্ তুই এক্কুবারে ভাঙি পড়চ্।

লেবীয় 19:15

অন্যেয় গুরি বিচের্‌ গরানা ন-চলিবো। বিচেরত্‌ চিগোন-দাঙর্‌ কারঅ‌ পক্ষ নেযানা ন-চলিবো; তুমি বেক্কুনো উগুরে দোল্‌বিচের্‌ গুরিবা।

মালাখি 2:9

তুমি মঅ পধেদি ন-চলঅ বরং রীদি-সুদোম পৌইদ্যেনে মানুচ্চুনো সমারে তুমি এক মোক্ক্যে ওইয়ো। সেনত্তে বেক্ মানুচ্চুনো মুজুঙোত্ মুই তমারে ঈচ্ গরে পারা আর অসর্মান অই পারা গুরিম।”

মথি লেখ্যে গম্ হবর্ 22:16

তারা হেরোদ দলর্ কয়েক্কো মান্‌জ্য লগে নিজোর্ কয়েক্কো শিচ্চ্যরে যীশু ইধু পাধেলাক। তারা যীশুরে কলাক্, “মাষ্টরবাবু, আমি হবর্ পেই তুই এক্কো গম্ মানুচ্। গোজেন পথ্‌তান পৌইদ্যেনে তুই সত্য শিক্ষ্যে দি থাচ্। মান্‌জ্যে কি মনে গুরিবাক্ ন-গুরিবাক্ সিয়েনিলোই তর্ কি অয়, কিয়া তুই কারঅ মু চেইনে কিচ্ছু ন-গরচ্।

মার্ক 12:14

তারা যীশু ইধু এইনে কলাক্, “গুরু, আমি হবর্ পেই তুই এক্কো গম্ মানুচ্। মান্‌‌জ্যে কি মনে গুরিবাক্ ন-গুরিবাক্, সিয়েনিলোই তর্ কি অয়, কিয়া তুই কারঅ মুয়োন্ চেইনে কিচ্চু ন-গরচ্। তুই সত্যগুরিনে গোজেনর পথ্‌তান পৌইদ্যেনে শিক্ষ্যে দি থাচ্। ইক্কিনে তুই কঅ, মোশির সুদোম মজিম্ রোম-সম্রাটরে কি খাজানা দেনা উচিত?

লূকে লেখ্যে গম্ হবর্ 20:21

সেনত্তে তারা তারে কলাক্, “মাষ্টরবাবু, আমি হবর্ পেই, তুই যিয়েনি কচ্ আর শিক্ষ্যে দুয়োচ্ সিয়েনি ঠিগ্। তুই বেক্কুনোরে সং চোগেদি দেগচ্ আর সত্য গুরিনে গোজেনর্ পধ পৌইদ্যেনে শিক্ষ্যে দি থাচ্।

রোমীয় 2:11

ইয়েনত্ দেগা যায়, গোজেনর্ চোগেদি বেক্কুনে সং সং।

ইফিষীয় 6:9

তুমি যিগুনে গিরোজ্, তুমিয়ো তমার চাগরুনো উগুরে ঠিগ্ সেবাবোত্যে বেবহার গরঅ। তারারে দর্‌বুগ্ দেগানা বাদ্ দুয়ো, কিয়া তুমি দঅ কোই পারঅ যে, তারার্ আর তমার একই প্রভু আর তে স্বর্গত্ আঘে; তা চোগেদি বেক্কুনে সং সং।

দ্বি’লম্বর বিররণ 10:17

তমা গোজেন লগেপ্রভু বেগ্‌ দেব-দেবেদাগুনো উগুরে আর তে প্রভুগুনোর্‌ প্রভু। তে দাঙর্‌, খেমতাবলা আর ভোক্তিপূর্ণ দর্‌ জাগেয়্যে গোজেন। তে কারঅ পক্ষ ন-নেযায় আর ঘুষঅ ন-খায়।

দ্বি’লম্বর বিররণ 16:19

তুমি অন্যেয়গুরিনে বিচের ন গুরিবা বা কারঅ পক্ষ ন নেযেবা। তুমি ঘুষ ন নেযেবা, কিত্যে ঘুষ জ্ঞানী মানুচ্চুনোর চোক্কুন কান্‌ গুরি দে আর নিদ্দুষী মানুচ্চুনোর কধাত্‌ প্যাঁচ লাগেই দে।

দ্বি’লম্বর বিররণ 24:17

বিদেশী বাসিন্দা বা অসহায় উগুরে অন্যেয় বিচের অবাত্তে ন-দুয়ো। কনঅ রানিমিলেত্তুন বন্ধক ইজেবে তার্‌ কিয়্যের্‌ কাবড়ান্ ন-নেযেয়ো।

দ্বি’লম্বর বিররণ 25:1

যুনি মানুচ্চুনো ভিদিরে কোল্-কোজ্যে দেগা যায় আর সিয়েন আদালদত্‌ নেযা অয় সালে বিচারক্কুনে তার্‌ বিচের গুরিনে নিদ্দুজীবোরে নিদ্দুজী আর দুজীবোরে দুজী বিলিনে রায় দিবাক।

কলসীয় 3:25

যে অন্যেয় গরে তে তার্ ফল পেবঅ। প্রভুর্ চোগেদি বেক্কুনে সং সং।

১ থিষলনীকীয় 2:4

বরং যগাজ্জ্যে মনে গুরিনে গম হবর্ জানেবার ভারান্ গোজেনে আমা উগুরে দিয়্যে বিলিনে আমি সে ইজেবে কধা কোর্। মান্‌জ্যরে হুজী গুরিবাত্যে আমি এ কধানি ন-কোর্, মাত্তর্ যিবে আমার রিবেঙানি যাচাই গুরি চায় সেই গোজেনরে হুজি গুরিবাত্যে কোর্।

যাকোব 2:9

মাত্তর্ তুমি যুনি বেক্কুনোরে সং চোগেদি ন-চঅ সালে তুমি পাপ গরর্। এই সুদোমানে সেক্কে তমারে সুদোম-অমান্যগুরিয়্যে বিলিনে দুষি গরে।

১ পিতর 1:17

বাবা গোজেনে পত্তি মান্‌জ্যর কাম ধগে তার্ বিচের্ গরে, কারঅ মুয়োদি চেইনে সিয়েন ন-গরে। ইয়েনত্যে যুনি তারে তুমি বাবা বিলিনে ডাগঅ সালে এ পিত্‌থিমীত্ যেদকদিন বিদেশী ইজেবে আঘঅ সেদকদিন তা উগুরে ভোক্তিবলা দরে তমা জিংকানিগানি কাদঅ।

১ শমূয়েল 16:7

মাত্তর্‌ লগেপ্রভু শমূয়েলরে কলঅ, “তার চেঙারাগান কেধোক্ক্যেন বা তে কু্‌দ্দুর লাম্বা সিয়েন তুমি চেবাত্তে ন-যেয়ো, কিত্যে মুই তারে এলাফেলা গোজ্যং। মান্‌জ্যে যিয়েন দেগিদাক সাৎ সিয়েন্দোই কিচ্ছু ন-অবঅ, কিত্যে মান্‌জ্যে দেগন্দে বারেন্দি চেঙারাগান্‌ মাত্তর্‌ লগেপ্রভু চাইদে মনান্‌।”

১ শমূয়েল 2:25

মান্‌‌জ্যে যুনি মান্‌জ্য বিরুদ্ধে পাপ গরন্‌ সালে গোজেনে সিয়েনর মীমাংসা গুরি দি পারে; মাত্তর্‌ মান্‌জ্যে যুনি লগেপ্রভুর বিরুদ্ধে পাপ গরন্‌ সালে তাত্তে কনা কোজোলী গুরি পারিবো?” মাত্তর্‌ তারা তারার বাবর্‌ কধালোই কান ন-পাদিলাক্, কিত্যে লগেপ্রভু তারারে মারে ফেলেব বিলি ঠিগ্ গোজ্যে।