দানিয়েল 8:10 - Chakma Bible

¹⁰ সিবে দাঙর্ অদে অদে স্বর্গর্ তারাগুনো সং যেইনে লুমিলো আর কয়েক্কো তারা মাদিত্ ফেলেইনে সিগুনোরে টেঙোই উরিলো।

দানিয়েল 8:10 ပူးပေါင်းရင်းမြစ်များ

যিশাইয় 14:13

তুই মনে মনে কোইয়োচ্চ্যে, মুই স্বর্গত্ উদিম্, গোজেন তারাগুনো উগুরে মঅ সিংহাসনান্ তুলিম্; যিয়েনত্ দেবেদাগুনে এগত্তর্ অন্ উত্তোরেদি সে মুড়োবো উগুরে মুই সিংহাসনত্ বুজিম্।

যিরমিয় 48:26

মোয়াবরে মাত্তল্ গরঅ, কিত্তে তে মঅ বিরুদ্ধে নিজোরে দাঙর্ গুরি দেগেয়্যে। তে তা ওগোল্যে উগুরে এগুড়্-উগুড়্ হেবঅ; মান্‌জ্যে তারে আজি- ঠাট্টার মানুচ্ কবাক্।

দানিয়েল 11:28

উত্তর রাজা বোউত্ ধন-সোম্বোত্তি নিইনে তার নিজো দেজ ইন্দি যেবঅ, মাত্তর্ তা মনান্ পবিত্র সুদোমর্ বিরুদ্ধে থেবঅ। তে তার্ নিজো আওজ্ মজিম কাম্ গুরিবো আর সে পরেদি নিজো দেজত্ ফিরি যেবঅ।

দানিয়েল 11:30

সাইপ্রাস দ্বিপোর্ জাহাজ্‌‌‌চানিয়ে তারে মানা গুরিবো আর তা মনান্ ভাঙি যেবঅ। সেক্কে তে ফিরিনে রাগ গুরি পবিত্র সুদোমর্ বিরুদ্ধে নিজো আওজ্ মজিম কাম গুরিবো। তে ফিরি এইনে যিগুনে সেই পবিত্র সুদোমানি বাদ দিবাক্ তারা উগুরে মনযোগ দিবাক্।

দানিয়েল 7:7

রেদোত্ মর্ সেই স্ববনত্ মুই চের্ লম্বর য়েমান্নো দেগিলুং। সিবে অলদে দর্‌‌‌‌গরেপারা, দর্ লাগেয়্যে আর অমকদ বোলী। তার দাঙর্ দাঙর্ লুয়োর্ দাত্ এলাক্। তা শিগের্‌‌‌‌বোরে তে কট্টা গুরি গিলি ফেলেল আর যিয়েন বাগি রলঅ সিয়েন টেঙোই উরিলো। ইবে আগ য়েমান্নোত্তুন্ যুদো এলঅ আর তার দোশ্‌‌‌‌‌চুয়ো শিং এলাক্।

দানিয়েল 8:7

মুই দেগিলুং ছাগল্লো সেই ভেড়াবোরে অমকদ আঘাত্ গুরিনে তার শিং দ্বিবে ভাঙি ফেলেল। তা মুজুঙোত্ ভেড়াবোর থিয়্যেবার কনঅ খেমতা ন-রলঅ; ছাগল্লো তারে মাদিত্ ফেলেইনে টেঙোই উরো ধুরিলো। তা আঢত্তুন্ ভেড়াবোরে উদ্ধোর্ গুরি পারে এবাবোত্যে কনজন ন-এলঅ।

ফগদাং পেইয়্যে 12:4

তা লেজ্‌চান্দোই তে আগাজর্ তিন ভাগর্ এক ভাগ তারা টানি আনিনে পিত্‌থিমীত্ লুঙি মারি দিলো। যে মিলেবোর পুয়ো অদ যার্ দানপ্পো তা মুজুঙোত্ থিয়্যেই এলঅ যেন পুয়োবোর জর্ম অলে তে হেই ফেলেই পারে।