আমোষ 4:10 - Chakma Bible

¹⁰ মিসরত্ যেবাবোত্যেগুরি পাদেয়োং সেবাবোত্যেগুরি মুই তমা ভিদিরে ভানা পাদেলুং। মুই যুদ্ধোর্ মাধ্যমে তমা গাবুজ্যেগুনোরে মারে ফেলেলুং আর তমা ঘোড়াগুন নেযেলুং। তমা তাম্বুলানির্ পজাবাজ্‌‌চান্ তমা নাগত্ ভোরেই দিলুং; তো তুমি মইদু ফিরি ন-এলা।

আমোষ 4:10 ပူးပေါင်းရင်းမြစ်များ

২ রাজাবলী 10:32

সে অক্তত্তুন্‌ ধুরি লগেপ্রভু ইস্রায়েল দেজর দুযিগান্‌ চিগোন্‌ গরা ধুরিলো। হসায়েলে ইস্রায়েলীয়গুনোর দেজর্‌ যর্দন গাঙর্‌ পূগেন্দি বেক্‌ জাগানিত্‌ তারারে ওদেই দিয়্যে ধুরিলো। সে জাগায়ান্‌ অলঅ অর্ণোন কিজিঙোর্‌ কায় অরোয়র সং পুরো গিলিয়দ আর বাশন দেজছান্‌। ইয়েন্‌ এলদে গাদ, রূবেণ আর মনঃশির চাগালাগান্‌।

২ রাজাবলী 13:3

সেনত্তে ইস্রায়েল বিরুদ্ধে লগেপ্রভুর রাগ্‌কান্‌ জুলি উদিলো; আর তে অরামর রাজা হসায়েল আর তা পুয়ো বিন্‌হদদ আঢত্‌ বার্‌ বার্‌ তারারে তুলি দিলো।

২ রাজাবলী 13:7

পঞ্চাশজন ঘোড়া সৈন্য, দশছান্‌ রথ আর দশ আজার আত্যের্‌বলা সৈন্য বাদে যিহোয়াহসর সৈন্যদলত্‌ আর কনজনে ন-এলাক্‌, কিত্তে অরামর রাজা বাদবাগি বেক্কুনোরে ভস্ত গুরি দিলো। তে তারারে মাদি ধোক্ক্যেন টেঙোই উজ্যে।

২ রাজাবলী 8:12

হসায়েলে পুযোর্‌ গুরিলো, “মঅ গিরোজ্‌সো কিত্তেই কানর্‌?” জোবত্‌ ইলীশায় কলঅ, “তুই ইস্রায়েলীয়গুনোরে কি ক্ষতি গুরিবে সিয়েন্‌ মুই হবর্‌ পাং। তুই তারার্‌ তাম্বুলানিত্‌ আগুন্‌ বাজেই দিবে, অসিলোই তারার্‌ গাবুজ্যে পূয়োগুনোরে মারে ফেলেবে, তারার্‌ চিগোন্‌ চিগোন্‌ পূয়ো-ঝিগুনোরে মাদিত্‌ আযার্‌ মারিবে আর তারার্‌ পিদিলী মিলেগুনোর্‌ পেটতুন্‌ ফাদি দিবে।”

যাত্রা 10:27

মাত্তর্‌ লগেপ্রভু ফরৌণ মনান্‌ দরঅ গুরি দিলো আর সেক্কে তারারে ইরি দেদে তে রাজী ন-অলঅ।

যাত্রা 10:3

মোশি আর হারোণে সেক্কে ফরৌণ ইধু যেইনে কলাক্, “ইব্রীয়গুনোর্‌ গোজেন লগেপ্রভু কত্তে, ‘আর কয়দিন্‌ তুই মঅ মুজুঙোত্‌ মাঢাবো লোঙেবাত্তে অস্বীগের্‌ গুরিবে? মরে তবনা গুরিবাত্যে মঅ মানুচ্চুনোরে যেবাত্তে দে।

যাত্রা 14:4

মুই ফরৌণর মনান্‌ দরঅ গুরি দিম্‌ আর তে তারা পিজেদি লোড়েব। মাত্তর্‌ ফরৌণে আর তার্‌ সৈন্যদলুনে মর্‌ বাঈনী ফগদাঙ্‌ গুরিবার্‌ পথ অবাক্। ইয়েনত্তুন্‌ মিসরীয়গুনে জানি পারিবাক্, মুই লগেপ্রভু।” ইস্রায়েলীয়গুনে লগেপ্রভুর্‌ কধা মজিম কাম্‌ গুরিলাক্।

যাত্রা 15:26

তে কোইয়্যেদে, “তুমি যুদি তমা গোজেন লগেপ্রভুর্‌ কধা মানিনে তা চোগেদি যিয়েন্‌ দোল্‌ সিয়েনোই গরঅ‌ আর তাঁর্‌ উগুমোত্‌ কান্‌ পাদঅ আর তাঁর্‌ দিয়্যে বেক্‌ সুদোমানি পালন্‌ গরঅ, সালে মিসরীয়গুনো উগুরে মুই যেদক্কানি পীড়ে আন্যং সিয়েনি তমা উগুরে ন-আনিম। মুই লগেপ্রভু তমারে সুগেই রাগেম্‌।”

যাত্রা 8:19

এ অবস্থা দেগিনে যাদুগুরিয়্যেগুনে ফরৌণরে কলাক্‌, “ইয়েনত্‌ গোজেন আঙুলো দাগ্‌ আঘে।” মাত্তর্‌ তো ফরৌণ মনান্‌ দর-মর ওই রলঅ; তে মোশি আর হারোণ কধা ন-শুনিলো। লগেপ্রভু যিয়েনি কোইয়্যে সিয়েনই অলঅ।

যাত্রা 9:12

মাত্তর্‌ লগেপ্রভু ফরৌণ মনান্‌ দরঅ গুরি দিলো। সেক্কে লগেপ্রভু যিয়েনি কোইয়্যে সিয়েনি অলঅ। মোশি আর হারোণ কধা ফরৌণে ন-শুনিলো।

যাত্রা 9:17

তুই এজঅ মঅ মানুচ্চুনো বিরুদ্ধে নিজোরে অদে অদে রাগেয়োচ্‌ আর তারারে যেবাত্তে ন-দুয়োর্‌।

যিশাইয় 34:3

তারার্ মুরি যেইয়্যে মানুচ্চুনোরে বারেদি ফেলেই দিয়্যে অবঅ। তারার্ মরা কিয়্যেনিত্তুন্ পজাবাজ্ নিগিলিবো আর তারার্ লোগানিলোই মুড়ো-মুড়ি ধোই যেবঅ।

যিশাইয় 50:11

মাত্তর্ তুমি যিগুনে আগুন জ্বালেয়ো আর বম্বালোই নিজো বেবস্থাগান গোজ্য, তুমি বেক্কুনে যেইনে তমা আগুনো পহর্‌‌‌‌লোই আর বম্বাগুনো পহ্‌‌‌‌রান্দোই আঢ। মঅ আঢত্তুন্ তুমি যিয়েনি পেবা সিয়েনি অলঅ, পিড়েলোই তুমি পড়ি থেবা।

যিশাইয় 9:12

পূগেত্তুন্ ধুরি অরামীয়গুনে আর পোজিমেত্তুন্ ধুরি পলেষ্টীয়গুনে মুয়োনি আ গুরিনে ইস্রায়েলরে গিলি ফেলেব। ইয়েনি অলেয়ো তা রাগ্‌কান ন-থামেব। এজঅ সং তা আঢ্‌‌‌‌তান তুল্যে আঘে।‌

যিশাইয় 9:13

মাত্তর্ যিবে তারারে আঘাত্ গোজ্যে তাইদু মানুচ্চুনে ফিরি ন-এজন্, বেগত্তুন্ খেমতাবলা লগেপ্রভুর আওজ্ মজিম ন-চলে।

যিশাইয় 9:17

সেনত্তে প্রভু গাবুজ্যেগুনোরে নিইনে কনঅ ফুত্তি ন-পেবঅ, আর মা-বাপ নেইয়্যেগুনোরে, রানি মিলেগুনো উগুরে তে কনঅ দোয়্যে ন-গুরিবো; কিত্তে বেক্কুনে গোজেন উগুরে ভোক্তি নেইয়্যে আর পাজি, বেক্কুনে বজং কধা কন্। ইয়েনি অলেয়ো তা রাগ্‌কান ন-থামেব; এজঅ সং তা আঢ্‌তান তুল্যে আঘে।‌‌

যিরমিয় 11:22

মুই বেগত্তুন্ খেমতাবলা লগেপ্রভু কঙর্, মুই তারারে সাজা দিম। তারার গাবুজ্যেগুনে যুদ্ধোত্ আর তারার ঝি-পুয়োগুনে ভাদ রাদে মুরি যেবাক্।

যিরমিয় 15:3

লগেপ্রভু কোইয়্যেদে, মুই তারা বিরুদ্ধে চের্ বাবোত্যে ভস্তগুরিয়্যেরে পাধেই দিম। সিয়েনি অলঅ, মারে ফেলেবাত্তে তলোয়ার, টানি লোই যেবাত্তে কুগুর, হেই ফেলেবাত্তে আর ভস্ত গুরিবাত্তে আগাজর্ পেগ আর ঝার য়েমান।

যিরমিয় 18:21

সেনত্তে তুই তারার পুয়ো-ছাগুনোরে ভাদরাদর্ আঢত্ ছাড়ি দে; তলোয়ার আঢত্ তারারে তুলি দে। তারার মোগ্‌কুনে পুয়ো-ছা নেইয়্যে আর রানিমিলে ওক্; তারার মরদ পুয়োগুনে ভানালোই মুরি যাদোক্, আর যুদ্ধোত্ তলোয়ারর কুবোত্ তারার গাবুজ্যে পুয়োগুনে কাবা কাদোক্।‌‌‍‍‍‍

যিরমিয় 48:15

মোয়াব্‌পান্ ভস্ত অবঅ আর তা শঅরানি আক্রমণ গরা অবঅ; তার মূলুক্ মূলুক্ গাবুজ্যেগুনে গদ্দন্ দিবার জাগানত্ লামিবাক্।” যিবের্ নাঙান বেগত্তুন্ খেমতাবলা লগেপ্রভু সেই রাজাবো এ কধাগান কোইয়্যেদে,

যিরমিয় 49:26

মুই বেগত্তুন্ খেমতাবলা লগেপ্রভু কঙর্, তার গাবুজ্যে পুয়োগুনে হামাক্কায় শঅরর খুলো জাগাত্ মুরিনে পড়ি থেবাক্; সেদিন্যে তার বেক্ শেজ্ গুরি দিয়্যে অবঅ।

যিরমিয় 5:3

ও লগেপ্রভু, তুই কি সত্যগান দেগিবাত্তে ন-চাজ্? তুই তারারে আঘাত্ গুরিলেয়ো তারা পিড়ে ন-পান; তুই তারারে গুড়ি গুরিলেয়ো তারা সংশোধনান্ এলাফেলা গোজ্যন্। তারার মুয়োনি তারা পাত্তরত্তুন্‌অ বেশ্ দর গুরিনে মনান ফিরেদে অস্বিগের্ গোজ্যন।

যিরমিয় 6:11

মাত্তর্ মুই লগেপ্রভুর রাগে গুল্ ওইয়োং; মুই আর সিয়েন মঅ ইধু ধুরি রাগেই ন-পারঙর্। লগেপ্রভু জোবত্ কোইয়্যেদে, তুই সিয়েন পধত্ ঝি-পুয়োগুনো উগুরে আর এক সমারে এগত্তর্ ওইয়্যে গাবুজ্যেগুনো উগুরে ঢালি দে। নেগে-মোগে সিয়েন ভিদিরে ধরা পড়িবাক্, আর বুড়োগুনে আর অমকদ লুঙুর্ বুড়োগুনে রেহাই ন-পেবাক্।

যিরমিয় 9:22

লগেপ্রভু মরে এ কধাগান কবাত্তে কলদে, “মানুচ্চুনোর মরা কিয়্যেগানি গবর ধোক্ক্যেন খুলো মাদত্ পড়ি থেবঅ; যিগুনে খেত্-খেত্তি কাবন্ তারা পিজেদি কাবিনে ফেলে রাগেয়্যে শোজ্য ধোক্ক্যেন সিগুন পড়ি থেবাক্, কনজনে তারারে ন-কুড়েবাক্।”

হোশেয় 11:5

ইস্রায়েলীয়গুন মন ফিরেদে রাজী ন-অন্ বিলি তারা মিসরত্ ফিরি ন-যেবাক্, বরং আসিরিয়া তারা উগুরে রাজাগিরি গুরিবো।

যোয়েল 2:20

“মুই উত্তোরেত্তুন্ এচ্চ্যে সৈন্যদল্লোরে তমাত্তুন্ দূর্ গুরি দিম; শুগুনো আর ভস্ত ওই যেইয়্যে ধূল্যেচর-চাগালাত্ তারারে ধাবেই দিম। তারার্ মুজুঙেদি ভাগ্‌কান পূগেদি সাগরত্ আর পিজেদি ভাগ্‌‌‌‌‌কান পোজিমে সাগরত্ ধাবেই দিম। তারার্ পজাবাজ্ উগুরেদি উদিবো আর সিয়েনত্তুন্ পজাবাজ্ নিগিলিবো, কিত্যেই তারার্ কামানি অলদে অমকদ বাড়্‌বো‌‌‌লোই ভরা।”

লেবীয় 26:16

সালে মুই তমা উগুরে যিয়েন্‌ গুরিম সিয়েন্‌ এই-মুই তমা উগুরে অদাদৎ কনঅ কিয়্যে ক্ষয় যাইদে রুগ্‌ আর সাংগাদিক জ্বর্ আনিম। এদক্কানি রুগ্‌কোই তমার্‌ চেবার্‌ খেমতা আর কিয়্যের্‌ বল্‌ কমা ধুরিবো। সেক্কে তুমি বীজ ফেলেলেয়ো কনঅ লাভ ন-অবঅ, তমার ফসলানি শত্রুগুনেই হেবাক্।

লেবীয় 26:25

মর্‌ সুদোম ভাঙানাত্যে মুই তমা উগুরে যুদ্ধো আনিম। শত্রুগুনে দেগিনে যেক্কে তুমি শঅরত্‌ যেইনে চুমিবা সেক্কে তমা ইধু মুই ভানা পাদেই দিম, আর সেক্কে তুমি শত্রুর আঢত্ যেইনে পুরিবা।

আমোষ 4:6

“মুই আরঅ কঙর্, পত্তি শঅরত্ মুই তমারে খালি পেদে রাগেলুং আর পত্তি আদামত্ রুটির অভাব দিলুং; তো তুমি মইদু ফিরি ন-এলা।

আমোষ 8:3

সেদিন্যে রাজঘরত্ গান বদলে এই আবিলেচ্‌‌‌চান অবঅ, ‘বোউত্, বোউত্ মরাকিয়্যে; সিয়েনি বেক্ জাগানি ইধু লুঙি মারিনে ফেলা ওইয়্যে। জুড়ো অ।’ ”

হগয় 2:17

মুই খেত-খেত্তি শুগেই যেইয়্যে রুগ্ আর ছুমো রুগ্ আর শিলো ঝড়ে তমা আঢর্ বেক কামানিরে আঘাত্ গোজ্যং, মাত্তর্ তো তুমি মইন্দি ন-ফিরো।

দ্বি’লম্বর বিররণ 28:21

তুমি যে দেজ্‌ছান গজক্ গুরিবাত্তে যর্‌ লগেপ্রভু সিয়েনত্ এমন্‌ গুরিবো যেনে তমা ভিদিরে সাজুরেদে পিড়ে লাগি থায় আর যেরেন্দি তুমি দেজত্তুন এক্কুবারে শেজ্‌ ওই যঅ।

দ্বি’লম্বর বিররণ 28:22

ক্ষয় যাইদে পিড়ে, তিন বাবোত্যে জদবদে জ্বর, যুদ্ধো, গরম শুগুনো বোইয়্যের্‌ আর হরান্যেগান্-এই বেক্কানি লগেপ্রভু তমা উগুরে আনিবো আর তমারে দুখ্‌ দিবো যেদক্কন সং তুমি ভস্ত ওই ন-যঅ।

দ্বি’লম্বর বিররণ 28:60

মিসর দেজত্‌ যেদক্কানি পিড়ে দেগিনে তুমি দোরেদা, তে সেই বেক্কানি তমা উগুরে আনিবো আর সিয়েনি তমারে ন-ছাড়িবো।

দ্বি’লম্বর বিররণ 7:15

লগেপ্রভু বেক্‌ পিড়েনিত্তুন্‌ তমারে উদ্ধোর্‌ গুরিবো। মিসরত্‌ যেদক্কানি অমকদ পিড়ে তুমি দেক্কো সিয়েনি তে তমা উগুরে অবাত্তে ন-দিবো, মাত্তর্‌ যিগুনে তমারে ঘিনান্‌ তারা উগুরে সিয়েনি অবাত্তে দিবো।