প্রেরিত্‌ 2:23 - Chakma Bible

²³ গোজেন, যিবে আগে-বাগে বেক্কানি কোই পারে, যীশুরে তমা আঢত্ দিয়্যে অবঅ। আর তুমিয়ো দঅ পাজি মানুচ্চুনোরে দিইনে তারে ক্রুশোত্ দিইনে মারে ফেলেয়ো।

প্রেরিত্‌ 2:23 ပူးပေါင်းရင်းမြစ်များ

পত্থম 50:20

তুমি মর্ অমংগল চেইয়ো, মাত্তর্‌ গোজেনে সিয়েনর্ ভিদিরেদি মংগল গুরিবার সল্লা গোজ্যে যেন ভালোক্কুন মান্‌জোর্ পরাণ রোক্ষ্যে পায়; আর এচ্চ্যে সিয়েনোই অর্‌।

গীতসংহিতা 76:10

ঘেচ্চেক্‌গুরি মান্‌জ্যর রাগর্ কারনে তর্ নাঙ্ গিনে অয়; সেই রাগর বাদ্‌বাগি ভাগ্‌কান্দোই তুই নিজোরে সাজা।

যিশাইয় 37:26

তুই কি ন-শুনোচ্, বোউত্ আগে মুই সিয়েনি ঠিগ্ গুরি রাগেয়োং, বোউত্ আগেদি মুই সিয়েনির পরিকল্পনা গোজ্যং? আর ইক্কিনে মুই সিয়েনি ঘোদেলুং। সেনত্তে দঅ তুই দেবাল্-ঘিজ্যে শঅরানি পাত্তরর কুর্ গুরি পাজ্যস্।

দানিয়েল 4:35

পিত্‌‌‌‌থিমীর বেক্ মানুচ্চুন তাইদু কিচ্চু নয়। তে স্বর্গদূত্তুনোরে আর পিত্‌‌‌‌থিমীর মানুচ্চুনোরে নিইনে তা আওজ্ মজিম কাম গরে। এমন কনজন নেই যে, তার আঢ্‌‌‌‌তানি থামেই দি পারে বা তারে কোই পারে, ‘তুই কি গরর্?’ ”

মথি লেখ্যে গম্ হবর্ 20:19

তারা তা বিচের্ গুরিনে তারে মরণর যোগাজ্যে বিলি থির্ গুরিবাক্। তারা তারে ঠাট্টা-মশকারী গুরিবাক্ আর চাবুক্ মারিবাক্ আর ক্রুশোত্ দিবাত্তে অযিহূদীগুনো আঢত্ দিবাক্; পরেদি তিন দিনোত্ তে মরণত্তুন্ জেঈ উদিবো।”

মথি লেখ্যে গম্ হবর্ 26:24

মান্‌জ্য পুয়োবো পৌইদ্যেনে পবিত্র বোইয়োত্ যেবাবোত্যেগুরি লেগা আঘে ঠিগ্ সেবাবোত্যেগুরি তে মুরি যেবঅ ঠিগ্, মাত্তর্ কি দর্‌‍গরেপারা সেই মানুচ্চো, যে মান্‌জ্য পুয়োবো লগে বেঈমানী গরে! তে মান্‌জ্যর্ জর্ম ন-অলে বরং তাত্যেই গম্ অদঅ।”

মথি লেখ্যে গম্ হবর্ 27:35

যীশুরে ক্রুশোত্ দেনার্ পরেদি সৈন্যগুনে চাম্বা চেইনে তা লাম্বা সিলুম্মো তারা ভাগাভাগি গুরি নিলাক্।

মার্ক 15:24

ইয়েনর্ পরেদি তারা যীশুরে ক্রুশোত্ দিলাক্ আর সৈন্যগুনে চাম্বা চেইনে যীশুর লাম্বা সিলুম্মো তারা নিজো ভিদিরে ভাগাভাগি গুরিলাক্, সিলুম্মো উগুরি লুঙি মারিনে কা ভাগ্যত্ কি পড়ে সিয়েন যগা চাদন্।

লূকে লেখ্যে গম্ হবর্ 22:22

গোজেনে যেধোক্ক্যেন গুরি ঠিগ্ গুরি থোইয়্যে সেধোক্ক্যেন গুরি মান্‌জ্য পুয়োবো মুরি যেবঅ ঠিগ্; মাত্তর্ কি দর্‌‍‍গরেপারা সেই মানুচ্চো, যে তাল্লোই বেঈমানী গোজ্যে!”

লূকে লেখ্যে গম্ হবর্ 22:37

পবিত্র বোইবোত্ লেগা আঘে, ‘তারে পাপীগুনো সমারে গুণো অলঅ।’ মুই তমারে কঙর্, এ কধাগান্ মঅ মাধ্যমে পূরোণ্ ওয়া পুরিবো, কিয়া মঅ পৌইদ্যেনে যিয়েন্ লেগা আঘে সিয়েন্ পূরোণ্ অবাত্তে যার্।”

লূকে লেখ্যে গম্ হবর্ 23:33

যে জাগানরে কুলো চারা কুয়ো অদঅ সিয়েনত্ লুমিনে তারা যীশুরে আর সে দ্বিজন্ দুষিরে ক্রুশোত্ দিলাক্-এক্কোরে যীশুর্ ডেনেদি আর এজজনরে বাঙেদি।

লূকে লেখ্যে গম্ হবর্ 24:20

আমা আঝল্ ধর্মগুরুগুনে আর ধর্ম-নেতাগুনে তারে রোমীয়গুনো আঢত্ ধুরি দুয়োন্ যাতে তারা তা বিচের্ গুরিনে তারে মরণর্ সাজা দুয়োন্। পরেদি সে যিহূদী নেতাগুনে তারে ক্রুশোত্ দুয়োন্।

যোহন 19:18

সিয়েনত্ তারা যীশুরে ত্রুুশোত্ দিলাক্-যীশুরে সংমধ্যে আর তা দ্বিধাগেদি অন্য দ্বিজনরে দিলাক্।

যোহন 19:24

সিয়েন্ দেগিনে সৈন্যগুনে একজন আরেক্ জনরে কলাক্, “ইবে ন-ফাদিনে বরং ভাগ্য পোরোক্ষ্যে গুরি চেই ইবে কার্ অবঅ।” ইয়েন্ ঘোট্যে যেন পবিত্র বোইবোর্ এ কধাগান্ পূরোণ অয়, তারা নিজো ভিদিরে মঅ কাবড়-চুগোড়ানি ভাগ্ গত্তন্, আর মঅ কাবড়ানিত্ত্যে তারা ভাগ্য পোরোক্ষ্যে গত্তন্। আর ঘেচ্চ্যেক্‌‌গুরি সৈন্যগুনে ইয়েনি বেক্কানি গুরিলাক্।

প্রেরিত্‌ 13:27

যিরূশালেম মানুচ্চুন আর তারার্ নেতাগুনে যীশুরে ন-চিনোন্। ইয়েন বাদেয়ো ভাববাদীগুনোর্ যে কধানি পত্তি জিরেবার্ দিনোত্ পড়া অয় সেই কধানি তারা ন-বুঝোন্; সেনত্তে তারা যীশুরে দুষী গুরিনে সেই কধাগান পূরোণ্ গোজ্জ্যন্।

প্রেরিত্‌ 15:18

ভালোক্ দিন আগেত্তুন্ ধুরি ইবে তা মনঅ ভিদিরে এলঅ।”

প্রেরিত্‌ 2:36

“ইয়েনত্যে গোদা ইস্রায়েল জাদ্‌‌তো এ কধাগান ঘেচ্চ্যেকগুরি জানদোক্ যে, যিবেরে তুমি ক্রুশোত্ দুয়ো গোজেনে সেই যীশুরে প্রভু আর মশীহ এ দ্বিয়েন পোজিশনত্ নেযেয়্যে।”

প্রেরিত্‌ 3:18

মাত্তর্ গোজেনে ভালোক্ দিন আগে বেক্‌ ভাববাদীগুনোর মাধ্যমে কোইয়্যেদে তার মশীহর কষ্ট ভোগ গরা পুরিবো; আর সে কধাগান গোজেনে এবাবোত্যে গুরি পূরেই দিবো।

প্রেরিত্‌ 4:28

তর্ খেমতালোই আর আওজ্‌সোই যিয়েনি ঘুদিবো বিলি তুই আগে ঠিগ্ গুরি থোইয়োচ্ তারা সিয়েনই গোজ্যন্।

প্রেরিত্‌ 5:28

“সে মানুচ্চো পৌইদ্যেনে শিক্ষ্যে ন-দিবাত্যে আমি তমারে কড়া উগুম দিয়্যেই, মাত্তর্ তুমি তমা শিক্ষ্যেলোই যিরূশালেমান্ পুরেইয়ো আর সে মানুচ্চোর্ মরণত্যে আমারে দায়ী গুরিবাত্তে চর্।”

প্রেরিত্‌ 5:30

যিবেরে তুমি ক্রুশোত্ টাঙেইনে মারে ফেল্ল্য আমা পূরোণি মানুচ্চুনোর গোজেন সেই যীশুরে মরণত্তুন্ জেদা গুরি তুল্ল্যে।

প্রেরিত্‌ 7:52

এমন্‌ কনঅ ভাববাদী আঘে কি, যিবেরে তমা পূরোণি মানুচ্চুনে অত্যেচার্ ন-গরন্? এমন্‌ কি, যিগুনে সেই গম্ মান্‌‌জ্যর্, অত্তাৎ খ্রীষ্ট এবার্ কধাগান আগে কোইয়োন তারারেয়ো তারা মারে ফেল্ল্যন্। আর ইক্কিনে তুমি যীশুরে শত্রুগুনো আঢত্ ধুরি দিইনে তারে খুন্ গোরেইয়ো।

রোমীয় 2:12

মোশির রীদি-সুদোমর্ বারেদি থেইনে যিগুনে পাপ্ গরন্ তারা রীদি-সুদোম বাদে ভস্ত অবাক্। মাত্তর্ যিগুনে রীদি-সুদোম ভিদিরে থেইনে পাপ্ গরন্ তারার্ বিচের্ রীদি-সুদোমবোই অবঅ।

রোমীয় 4:17

পবিত্র বোইবোত্ যেবাবোত্যে লেগা আঘে, “মুই তরে ভালোক্ জাদর্ পূরোণিবাপ বানেয়োং,” সেই মজিম্ গোজেন চোগেদি অব্রাহামে আমার্ বেক্কুনোর্ বাপ্। যিবে মরা মান্‌জ্যরে জিংকানি দে আর যিয়েন নেই সিয়েন আঘে বিলিনে ফগদাং গরে সেই গোজেনরে অব্রাহামে বিশ্বেজ্ গোজ্জ্যে।

১ থিষলনীকীয় 2:15

সেই যিহূদীগুনে প্রভু যীশুরে আর ভাববাদীগুনোরে মারে ফেল্ল্যন, আর আমা উগুরেয়ো তারা অত্যেচার্ গোজ্জ্যন্। তারা গোজেনরে বেজার্ গরন্, আর বেক্‌ মানুচ্চুনো উগুরে তারার্ শত্রু-ভাব আঘে।

১ পিতর 1:2

বাবা গোজেনে তার্ পরিকল্পনা মজিম তমারে বেঈ লোইয়্যে, আর তার্ নাঙে পবিত্র আত্মা তমারে যুদো গুরি থোইয়্যে। ইয়েনর্ উদ্দেশ্য অলঅ, যেনে তুমি যীশু খ্রীষ্টর বাধ্য অ আর তার লো-গান ছিদেনার্ মাধ্যমে তমারে সিজি গরা অয়। গোজেনে তমারে বেশ্ গুরি দোয়্যে আর শান্তি দান গোরোক্।

১ পিতর 1:20

পিত্‌থিমীগান বানেবার আগেদি গোজেনে ইয়েনত্যে তারে ঠিগ্ গুরি থোইয়্যে, মাত্তর্ এই থুমো সময়োত্ তমাত্যে তে ফগদাং ওইয়্যে।

১ পিতর 2:8

আরঅ বোইবোর্ এ কধাগান্অ খাদে, সিবে এমন্‌ পাত্তর্ যিবেত্ মান্‌জ্যে উজোত্ হান্, আর যিবেত্ মান্‌জ্যর্ উজোত্ হেবার কারন অবঅ। মান্‌জ্যে গোজেনর্ কধানি অমান্য গরন্ বিলিনে উজোত্ হান্ আর ইয়েনত্যে তারা ঠিগ্ ওইনে আঘন্।

যিহূদা 1:4

ইয়েনর্ দরকার আঘে, কিয়া যে মানুচ্চুনোর্ সাজা পৌইদ্যেনে আগেদি বোইবোত্ লেগা ওইয়্যে তারা তমা ভিদিরে চুবেচুবে সোমেয়োন্দি। গোজেন উগুরে এ মানুচ্চুনোর ভোক্তি নেই; আমার গোজেনর্ দোয়্যেগানরে তারা ভান্ন্যেই এক্কান তালি দেনা মনে গরন আর যিবে আমার এক্কো গুরি গিরোজ্ আর প্রভু সেই যীশু খ্রীষ্টরে তারা অস্বীগের্ গরন্।

ফগদাং পেইয়্যে 13:8

যিগুনে এ পিত্‌থিমীর, অত্তাৎ যিগুনোর্ নাঙান্ ভেড়া-ছবোর্ জিংকানি-বোইবোত্ লেঘা নেই তারা বেক্কুনে সেই য়েমান্নোরে গোজেনর্ সর্মান দিইনে সালাম গুরিবাক্। এই ভেড়া-ছবোরে পিত্‌থিমীগান সৃট্টি গুরিবার আগে মারে ফেলেবাত্যে ঠিগ্ গরা ওইয়্যে।