প্রেরিত্‌ 14:17 - Chakma Bible

¹⁷ মাত্তর্ তো তে নিত্য নিজো পৌইদ্যেনে সাক্ষি দিয়্যে। তে আগাজত্তুন্ ঝড় দিইনে আর সময় মজিম ফসল দান গুরিনে তার্ দোয়্যে তমারে দেগেয়্যে। তে ভালোক্কানি হানা দান গুরিনে তমা মনানিরে হুজিয়্যে ভর্‌‌‌পুনোং গোজ্যে।”

প্রেরিত্‌ 14:17 ပူးပေါင်းရင်းမြစ်များ

১ রাজাবলী 18:1

ইয়েনর্‌ ভালোক্‌ দিন পরেন্দি, ঝড়্‌ ন-অনার্‌ তিন বজরত্‌ লগেপ্রভু এলিয়রে কলঅ, “তুই যেইনে আহাবরে দেগা দে। মুই দেজত্‌ ঝড়্‌ পাধেই দুয়োঙর্‌।”

নহিমিয় 9:25

তারা দেবাল্‌-ঘিজ্যে ভালোক্কানি শঅর্‌ আর বোল্‌বোল্যে ভূই গজক্‌ গোজ্যন্‌; তারা নানান্‌ বাবোত্যে গম্‌ গম্‌ জিনিজ্‌সোই ভোজ্যে ঘর্‌ আর আগেন্দি কুড়ো ওইয়্যে এধোক্কেন্‌ কূয়ো, আংগুর ক্ষেত্‌, জলপাইয়োর্‌ বাগান আর বোউত্‌ গুলোগুলি গাজ্‌ গজক্‌ গোজ্যন্‌। তারা হেইনে পেট্‌ ভুরিনে পক্তা-মোক্তা ওইয়োন্‌ আর তর্‌ দিয়্যে বোউত্‌ ভালেদি ভোগ গোজ্যন।

ইয়োব 36:31

ইয়েনিলোই তে পুরো জাত্‌তুনোরে শাজন্ গরে আর বোউত্ হানা যোগেই দে।

ইয়োব 37:6

তে তুষারানরে কইদ্যে, পিত্‌থিমীত্ পড়, আর ঝড়ানরে কইদ্যে, মাদিত্ পড়।

ইয়োব 5:10

তে পিত্‌থিমীত ঝড়্‌ দান গরে আর ভূইয়ো উগুরে পানি পাধেই দে।

গীতসংহিতা 145:9

লগেপ্রভু বেক্কুনোত্তে ভালেদিগুরিয়্যে; তার বানেয়্যে বেক্কানি উগুরে মেয়্যে আঘে।

গীতসংহিতা 4:7

বোউত্ গুলোগুলি আর নুয়ো আংগুর-রস পেলে মানুচ্চুনোর যেধোক্ক্যেন্ মনানি হুজি অয়, তাত্তুনো বেশ্ রঙ্গ-ফুত্তিলোই তুই মঅ মনান্ ভোরেই রাগেয়োচ্।

গীতসংহিতা 52:1

ও বোলীবন্ধ যোদ্ধা, কিত্তেই তুই ভান্ন্যেই বেপারানিলোই বার্‌বো গরর্? গোজেনর অমকদ কোচ্‌পানার দঅ শেজ্ নেই।

যিশাইয় 22:13

মাত্তর্ চঅ, সিয়েনত্ রঙ্গ ফুত্তি আর রঅ রঅ ছঅ ছঅ চলের্, আর গোরু ভেড়া কাবিনে আহ্ য়েরা আর আংগুর-রস হানা চলের্। তুমি কত্তে, “এজঅ, আমি হানা-দানা গুরিই, কিত্তে কেল্যে আমি মুরি যেবং।”

যিশাইয় 40:21

তুমি কি হবর্ ন-পঅ? তুমি কি ন-শুনো? পৌইল্যেত্তুন্ ধুরি কি তমারে সে কধানি কুয়ো ন-অয়? পিত্‌থিমী থিদেবর্ গুরিবার সময়ত্তুন্ ধুরি তুমি ন-বুঝো?

যিশাইয় 5:6

মুই সিয়েন এক্কান ভস্তর্ জাগা বানেম্; সিয়েনর্ লুদিগান কাবায়ো ন-অবঅ আর তার ভূইয়ান্‌অ চাজ্ গরা ন-অবঅ, আর সিয়েনত্ জোর্মেব বানা কাদাঝুপ্ আর কাদাগাজ্। মুই মেঘ্‌কানরে উগুম দিম্ যেন তে ঝড়্ ন-পেলায়।”

যিরমিয় 14:22

জাদ্‌তুনোর বাজে মূত্তিগুনে কি ঝড় আনি পারন? আগাজ্‌চানে নিজে নিজে কি এক লেজা ঝড় দি পারে? ও আমার গোজেন লগেপ্রভু, বানা তুয়ই সিয়েন পারচ্। সেনত্তে তঅ উগুরে আমি আজা রাগেই, কিত্তে তুয়ই ইয়েনি গুরি থাচ্।‍‍‍‍‍‌‍‍‍‍‍‌

যিরমিয় 5:24

তারা মনে মনেয়ো ন-কন্দে, এজঅ, আমা গোজেন লগেপ্রভুরে আমি ভোক্তি সহকারে দোরেইনে চলিই, যিবে অক্ত মজিম্ শরৎ আর বসন্ত কালত্ ঝড় দে, যিবে আমাত্তে খেত্ কাবিবার যগাজ্যে গুরি সময়ান রোক্ষ্যে গরে।

যিহিষ্কেল 34:26

মুই তারারে বর্ দিম আর মর্ মুড়োগুনোর্ চেরোকিত্তে জাগানিরে বর্ দিম। মুই ঠিগ্ সময়োত্ ঝড়্ পাদেম; সিয়েন অবঅ বর্ পানার্ ঝড়।

যোয়েল 2:23

ও সিয়োনর্ মানুচ্চুন, হুজি অ, তমা গোজেন লগেপ্রভুরে নিইনে ফুত্তি গরঅ, কিত্যে তার্ সততার্ কারনে তে তমারে শরৎকালর্ ঝড় দিয়্যে। তে তমারে বোউত্ ঝড় পাধেই দের্, আগ ধোক্ক্যেন শরৎ আর বসন্তকালর্ ঝড় দের্।

মথি লেখ্যে গম্ হবর্ 5:45

যেনে মান্‌জ্যে দেগন্ তুমি ঘেচ্চেকগুরি তমা স্বর্গীয় বাবার্ পুয়ো। তে দঅ গম্-বজং বেক্কুনো উগুরে তা বেলান্ দে আর গম্ আর বজং মানুচ্চুনো উগুরে ঝড়্ দে।

লূকে লেখ্যে গম্ হবর্ 6:35

মাত্তর্ তুমি তমা শত্রুগুনোরে কোচ্‌পেয়ো আর তারারে মংগল্ গরঅ। কিজু ফেরৎ পেবার্ আজা ন-রাগেনে উদোর্ দুয়ো। সালে তমাত্তে দাঙর্ বক্‌শিজ্ আঘে, আর তুমি দাঙর্ গোজেনর্ পুয়ো অবা, কারন তে অকৃতজ্ঞ আর পাজিগুনোরেয়ো দোয়্যে গরে।

প্রেরিত্‌ 14:18

এই বেক্‌ কধানি কলেয়ো তারা ইধু য়েমান উৎসর্ব গরানাত্তুন্ মানুচ্চুনোরে থামাদে তারার্ অমকদ দুঘ্ অলঅ।

প্রেরিত্‌ 17:26

তে এক্কো মান্‌‌‌জ্যত্তুন্ বেক্‌ জাদর্ মানুচ্চুন বানেয়্যে যেন তারা গোদা পিত্‌থিমীগানত্ বজত্তি গরন্। তারা কক্কে কুধু বজত্তি গুরিবাক্ সিয়েন্অ তে ঠিগ্ গুরি দিয়্যে।

দ্বি’লম্বর বিররণ 11:14

সিয়েন গুরিলে লগেপ্রভু ঠিগ্ সময়োত্‌, অত্তাৎ শরৎ আর বসন্তকালত্‌ তমার দেজ উগুরে ঝড়্ দিবো যেনে তুমি ভালোক্কুন শোজ্য, নুয়ো আংগুরো-রস আর তেল পেবা।

দ্বি’লম্বর বিররণ 28:12

তমা দেজত্‌ অক্ত মজিম ঝড়্‌ দিইনে তমার আঢর্ বেক্‌ কামানিত্‌ আশিদ্‌বাদ গুরিবাত্তে লগেপ্রভু তার দানর ভান্ডাল্, অত্তাৎ আগাজ্‌ছান খুলি দিবো। তুমি নানান্‌ জাদরে কজ্জ দি পারিবা, মাত্তর্‌ কারত্তুন্‌ তমার কজ্জ নেযা ন পুরিবো।

১ তীমথিয় 6:17

যিগুনে এ জগদত্ থাগোইয়্যে তারারে এ উগুমান দে যেন তারা দেমাগ্ ন-গরন আর কানগ্‌‌কন্ন্যে ধন উগুরে নির্ভর ন-গুরিনে গোজেন উগুরে নির্ভর গরন। তেয়ই ভোগ্ গুরিবাত্যে বেক্ জিনিস্‌‌চানি খুলো আঢে আমারে দান গরে।