প্রেরিত্‌ 13:43 - Chakma Bible

⁴³ মানুচ্চুনে সমাজ ঘরত্তুন্ যানার্ পরেদি বোউত্ যিহূদী আর যিহূদী ধর্ম বিশ্বেজি গোজেনভক্ত অযিহূদী পৌল আর বার্ণবা সমারে সমারে গেলাক্। সেক্কে সেই মানুচ্চুনো সমারে পৌল আর বার্ণবা কধা কলাক্ আর তারারে উচ্চোমি তুলি দিলাক্ যেন তারা গোজেনর্ দোয়্যে ভিদিরে থির্ থান্।

প্রেরিত্‌ 13:43 ပူးပေါင်းရင်းမြစ်များ

মথি লেখ্যে গম্ হবর্ 23:15

ভণ্ড ধর্ম-মাষ্টর আর ফরীশীগুন, অভিশাব্ পোড়োক্ তমার্! বানা এক্কো মান্‌জ্যরে তমা ধর্ম-মজিম্ আনিবাত্তে তুমি দুনিয়ের্ কুদু ন-যঅ। আর তে যেক্কে তমা ধর্ম-মজিম্ এজে সেক্কে তুমি নিজোত্তুন্ তারে বোউত্ বেশ্ গুরি নরগত্ যগাজ্যে গরঅ।

প্রেরিত্‌ 11:23

গোজেনে যে কেধোক্ক্যেন্ গুরি আন্তিয়খিয়া মানুচ্চুনোরে দোয়্যে গোজ্জ্যে বার্ণবা এইনে সিয়েন দেগিনে অমকদ হুজি অলঅ। তারা যেন বেক্ মনান্ দিইনে প্রভু ইধু বিশ্বেজি থান্ সেনত্তে তে তারার্ বেক্কুনোরে উচ্চোমি দিয়্যে ধুরিলো।

প্রেরিত্‌ 13:50

মাত্তর্ যিহূদীগুনে গোজেনর্ উবোসনা গুরিয়্যে ভদ্র মিলেগুনোরে আর শঅরর্ আজল্ আজল্ মানুচ্চুনোরে ভেজেই দিলাক্। এবাবোত্যেগুরি তারা পৌল আর বার্ণবা উগুরে অত্যেচার্ গোরেইনে সেই চাগালাত্তুন্ তারারে নিগিলেই দিলাক্।

প্রেরিত্‌ 14:3

পৌল আর বার্ণবা সেই শঅরত্ বেশ্ কয়েক দিন থেলাক্ আর সাহচ্‌ গুরিনে প্রভুর কধানি কুয়ো ধুরিলাক্। প্রভুর দোয়্যে পৌইদ্যেনে তারা যিয়েনি ফগদাং গোজ্জ্যন্ সেই কধানি যে বিশ্বেজ্ গুরিবার প্রভু সিয়েনি প্রমাণ গুরিবাত্যে পৌল আর বার্ণবারে আমক্ আমক্ কাম্ গুরিবার খেমতা দিলো।

প্রেরিত্‌ 16:14

যিগুনে শুনোদন্ তারা ভিদিরে থুয়াতীরা শঅরর্ লুদিয়া নাঙে এক্কো মিলে এলঅ। তে বিগুনী রংয়র্ কাবর বেবসা গুরিদো। যিহূদী ন-অলেয়ো তে গোজেনর্ উবোসনা গুরিদো। প্রভু লুদিয়ার্ মনান্ এমন্‌ গুরিনে মিলি দিলো যাতে তে পৌলর কধা মন দিইনে শুনিনে বিশ্বেজ্ গরে।

প্রেরিত্‌ 17:17

তে সমাজ-ঘর ভিদিরে যিহূদীগুনো সমারে আর গোজেন-ভক্ত গ্রীক্‌‌কুনো সমারে তেম্মাং গরা ধুরিলো। ইগুন বাদে যিগুনে বাজারত্ এদাক্ তারা সমারেয়ো তে দিনোর্ পর্ দিন তেম্মাং গরা ধুরিলো।

প্রেরিত্‌ 17:34

কয়েক্কো মান্‌জ্যে পৌল সমারে মিজেলাক্ আর বিশ্বেজ্ গুরিলাক্। সেই বিশ্বেজিগুনো ভিদিরে দিয়নুষিয় নাঙে আরেয়পাগের সভার একজন, দামারিস্‌ নাঙে এক্কো মিলে আর তারা সমারে আরঅ কয়েকজন এলাক্।

প্রেরিত্‌ 17:4

এ কধাগান্ শুনিনে কয়েক্কো যিহূদী বিশ্বেজ্ গুরিনে পৌল আর সীল সমারে মিজেলাক্। ইগুন্ বাদে গোজেন-ভক্ত বোউত্ গ্রীক আর বোউত্ বিশেষ বিশেষ মিলেয়ো তারা সমারে মিজেলাক্।

প্রেরিত্‌ 18:7

ইয়েনর্ পরেদি পৌলে সমাজ-ঘরান্ ফেলেইনে তিতিয়-যুষ্ট নাঙে এক্কো মান্‌জ্য ঘরত্ গেলঅ। এ মানুচ্চো ঘরান্ সমাজ-ঘর কায়কুরে এলঅ আর তে অযিহূদী ওইনেয়ো গোজেনর্ উবোসনা গুরিদো।

প্রেরিত্‌ 2:10

ফরুগিয়া আর পাম্‌ফুলিয়া, মিসর আর কুরীণীর কায়কুরে লিবিয়ার কয়েক্কান জাগার মানুচ্চুন, রোম শঅরত্তুন্ যে যিহূদীগুন আর যিহূদী ধর্ম বিশ্বেজি অযিহূদীগুন এচ্চ্যন্ তারা,

প্রেরিত্‌ 28:23

তারা পৌল সমারে এগত্তর্ অবাত্যে এক্কো দিন ঠিগ্ গুরিলাক্। পৌলে যিধু থেদঅ সিধু তারা বাদে আরঅ ভালোক্জনে এলাক্। সেক্কে পৌলে বেন্ন্যেত্তুন্ ধুরি সাজোন্যে অয় সং গোজেন রেজ্যর্ পৌইদ্যেনে তারারে জানেল আর বুঝেল। মোশির আইন-কানুন্ আর ভাববাদীগুনোর্ বোইয়ো ভিদিরেত্তুন্ যীশু পৌইদ্যেনে দেগেইনে তা পৌইদ্যেনে তারারে বিশ্বেজ্ গোরেবাত্তে চেষ্টা গুরিলো।

প্রেরিত্‌ 6:5

দলর বেক্কুনোর এ কধাগান গম্ লাগিলো। বিশ্বেজে আর পবিত্র আত্মালোই ভরা স্তিফানরে তারা বেঈ ললাক্। ইয়েন বাদে তারা ফিলিপ, প্রখর, নীকানর, তীমোন, পার্মিনা আর আন্তিয়খিয়া শঅরর্ নিকলায়রেয়ো বেঈ ললাক্। এই নিকলায়ে অযিহূদী ওইনেয়ো যিহূদী ধর্ম পালেদ।

রোমীয় 11:6

গোজেনে যুনি দোয়্যে গুরিনে বেঈ রাগায় সালে দঅ সিয়েন কনঅ কামর্ ফল নয়। যুনি সিয়েন অদঅ সালে দোয়্যে আর দোয়্যে ন-থেদঅ।

রোমীয় 3:24

মাত্তর্ খ্রীষ্ট যীশু মান্‌জ্যরে পাপ আঢত্তুন্ উদ্ধোর্ গুরিবার্ বেবস্থা গোজ্জ্যে আর সেই উদ্ধোরর্ মাধ্যমে দোয়্যের্ দান ইজেবে বিশ্বেজিগুনোরে নিদ্দুজি বিলি মানি লুয়ো অয়।

রোমীয় 5:2

গোজেনর্ এই যে দোয়্যের্ পধেদি ইক্কিনে আমি চলির্ সিধু আমি খ্রীষ্টর্ মাধ্যমে বিশ্বেজ্‌চোই লুম্মেয়ি। গোজেনর্ মহিমা পেবার্ আজায় আমি ফুত্তি গুরির্।

রোমীয় 5:21

সেই দোয়্যেগান ইয়েনত্তে বাড়িলো যাতে মরণর্ মাধ্যমে যেবাবোত্যেগুরি পাপ্পান্ রাজাগিরি গোজ্জ্যে, সেবাবোত্যেগুরি মান্‌জ্যরে নিদ্দুজি বিলি মানি লনার্ মাধ্যমে ইক্কিনে তার্ দোয়্যেগানে রাজাগিরি গুরিই পারে; আর সিয়েনর্ ফল অলঅ আমা প্রভু যীশু খ্রীষ্টর্ মাধ্যমে উমর জিংকানি পানা।

২ করিন্হীয় 5:11

প্রভুরে দোরেই বিলিনে আমি নিজো পৌইদ্যেনে মান্‌জ্য মনত্ বিশ্বেজ্ জোর্মেবার চেষ্টা গুরিই। আমি যেবাবোত্যে, সিয়েন দঅ গোজেন ইধু খুলোমেলা আর মুই আজা গরং তমা বিবেগ ইধুয়ো সিয়েন খুলোমেলা।

২ করিন্হীয় 6:1

গোজেন সমারে কাম গুরিয়্যে ইজেবে আমি তমারে এ কোজোলিগান্ গুরির্, তুমি যেক্কে গোজেনর্ দোয়্যে পেইয়ো সেক্কে সিয়েন বিফল্ অবাত্তে ন-দুয়ো।

গালাতীয় 5:1

খ্রীষ্ট আমারে স্বাধীন গোজ্জ্যে যেন আমি স্বাধীন থেই পারিই। সেনত্যে তুমি থির্ থাগঅ, যেন কেঅ আরঅ তমারে চাগর্ বানেই ন-পারে।

গালাতীয় 5:4

তুমি যিগুনে রীতি-সুদোম্ পালেইনে গোজেনর্ মানি লোইয়্যে অবাত্যে চর্ তুমি দঅ খ্রীষ্টত্তুন্ জুদো ওই যেয়ো, গোজেন দোয়্যেত্তুন্ সুরি যেইয়ো।

ইফিষীয় 2:8

গোজেনর্ দোয়্যেই বিশ্বেজর্ মাধ্যমে তুমি পাপত্তুন্ উদ্ধোর্ পেয়ো। ইয়েন তমার্ নিজোর্ মাধ্যমে ন-অয়, সিয়েন গোজেনর্ দান।

ফিলিপীয় 3:16

যিয়েন ওক্‌, আমি যেবাবোত্যে অবস্থানত্ লুম্মেয়ি সেই মজিম চলানা উচিত।

ফিলিপীয় 4:1

মর্ ভেইয়ুন, তমারে মুই কোচ্‌পাং আর তমারে রিনি চেবাত্যে চাং। তুমিই মর্ হুজী, মর্ মকুট। তুমি প্রভুর লগে মিজেইনে থির্ থাগঅ।

কলসীয় 1:23

খালিক্ ইয়েনত্যে খ্রীষ্ট পৌইদ্যেনে গম হবরানত্তুন্ যে ঘেচ্চ্যেকগুরি আজাগান তুমি পেয়ো সিয়েনত্তুন্ দূরোত্ সুরি ন-যেইনে তমার বিশ্বেজে থির্ থা পড়িবো। সেই গম হবরান সারা জগদত্ প্রচার গরা ওইয়্যে আর তুমি সিয়েন শুন্ন্য। মুই পৌল এ গম হবরানর্ প্রচারক ওইয়োং।

কলসীয় 1:28

আর সেই খ্রীষ্ট পৌইদ্যেনে আমি প্রচার গুরিই, অত্তাৎ গোজেনর্ দিয়্যে ন-ফুরেইয়্য জ্ঞান লগে আমি পত্তিজনরে উজিয়ার্ গুরিই আর শিক্ষ্যে দিই, যেন পত্তিজনরে আমি খ্রীষ্টর্ মাধ্যমে যগাজ্জ্যে গুরি তুলিই পারি।

তীত 2:11

গোজেনর্ যে দোয়্যেলোই পাপত্তুন্ উদ্ধোর্ পাহ্ যায় সিয়েন বেক্‌ মানুচ্চুনো ইধু ফগদাং পেয়্যে।

ইব্রীয় 12:15

চঅ, কেঅ যেন গোজেনর্ দোয়্যেত্তুন্ বাদ্ ন-পড়ন্। চঅ, বিষ্‌বলা তিদে গাজ শিঙোর ধোক্ক্যেন্ গেজেই উদিনে কেঅ যেন দুঘ্ বাড়েইনে ভালোক্ জনরে অসিজি ন-গরন্।

ইব্রীয় 13:9

নানান্ বাবোত্যে নূয়ো নূয়ো শিক্ষ্যেলোই যেন তমারে ভুল্ পধেদি ন-নেযান্। আমা মনানি উৎসর্বর হানা উগুরে ন-থেইনে যেন গোজেন দোয়্যে উগুরে থির্ ওইনে বজে। যিগুনে সেই হানাগান উগুরে নির্ভর্ গুরিনে চলিদাক্, সেই হানাগানত্তুন্ তারার্ কনঅ লাভ্ ন-অয়।

১ পিতর 5:12

সীল, যিবেরে মুই মর্ বিশ্বেজি ভেই মনে গরং, তারে দিইনে এই চিধিগান মুই কম কধালোই তমা ইধু লিগিলুং, যেন মুই তমারে উচ্চোমি দি পারং আর গোজেনর্ ঘেচ্চ্যেকগুরি দোয়্যের্ সাক্ষি দি পারং। তুমি গোজেনর্ এই দোয়্যেলোই থির্ থেইনে বজত্তি গরঅ।

২ পিতর 3:14

কোচ্‌পেইয়্যে ভেইয়ুন, তুমি ইক্কিনে ইয়েনি বেক্কানিত্যে বাজ্জেই আঘঅ বিলিনে মনেপরাণে চেষ্টা গরঅ যেনে তে এইনে তমারে থুদো নেইয়্যে ওইনে নিদ্দুজি অবস্থায় সুগে-শান্দিয়্যে বজত্তি গত্তে দেগেগি।

১ যোহন 2:28

পুয়োলগ্, সেনত্যে কঙর্, তুমি খ্রীষ্ট সমারে থাগঅ যেনে তে যেক্কে ফগদাং অবঅ সেক্কে আমার সাহচ্‌ থায় আর তে যেক্কে এবঅ সেক্কে তা মুজুঙোত্ আমার্ লাজে মুয়োনি লুগো ন-পরে।

২ যোহন 1:9

যিগুনে খ্রীষ্টর্ দিয়্যে শিক্ষ্যে ন-পালান্ আর সেই শিক্ষ্যেলোই থিদেবর্ ন-থান তারা মনভিদিরে গোজেনে নেই। মাত্তর্ যে সেই শিক্ষ্যেলোই থির্ গুরি থায় তা মনভিদিরে বাবে আর পুয়োবো দ্বিয়োজনে আঘন্।