২ শমূয়েল 21:6 - Chakma Bible

⁶ তা বংশর সাতজন মরদরে আমা আাঢত্‌ তুলি দে। আমি লগেপ্রভুর বেঈ লোইয়্যে সে মানুচ্চুনোরে, অত্তাৎ শৌলর শঅর্‌ গিবিয়াতদ্‌ লগেপ্রভুরে সাক্ষী রাগেইনে তারারে মারে ফেলেবং আর বেক্কুনো মুজুঙোত্‌ তারার্‌ মরাকিয়্যেগানি ফেলেই রাগেবং।” সেক্কে রাজা কলঅ, “মুই তমা আঢত্‌ তারারে তুলি দিম্‌।”

২ শমূয়েল 21:6 ပူးပေါင်းရင်းမြစ်များ

পত্থম 40:19

এই তিন দিনো ভিদিরে ফরৌণে তঅ মাদাবো কাবি নেযেইনে কিয়্যেগান্‌ গাজত্‌ টাঙেই রাগেব, আর পেক্কুনে এইনে তঅ কিয়্যেগানত্তুন্‌ যেরা খুদি খুদি হেবাক্।”

পত্থম 40:22

মাত্তর্‌ রুটি বানেইয়্যে নেতাবো কিয়্যেগান্‌ তে গাজত্‌ টাঙেই রাগেল। যোষেফে তারা স্ববনর্‌ অত্তগান্‌ যেবাবোত্যে কোইয়্যে তারা উগুরে সিয়েন ঘুদিলো।

২ শমূয়েল 17:23

অহীথোফলে যেক্কে দেগিলো, তা সল্লা মজিম্‌ কাম গরা ন-অলঅ সেক্কে তে তা গাধাবো উগুরে গদিবো চাবিনে তা নিজো আদাম ঘরত্‌ গেলঅ। তা ঘরর্‌ বেক্কানি বেবস্থা গুরিনে তে গত্তনাত্‌ ধুরি বানিনে মুরিলো। তা বাব গোরবোত্‌ তারে গোর্ দিয়্যে অলঅ।

২ শমূয়েল 18:10

এক্কো মান্‌জ্যে সিয়েন দেগিনে যোয়াবরে যেইনে কলঅ, “মুই ইক্কিনে দেগিলুং অবশালোমে এক্কো এলোন গাজত্‌ টাঙেয়্যে রোইয়্যে।”

২ শমূয়েল 19:28

মঅ আজুর্‌ গুট্টিগুনে মঅ গিরোজ মহারাজ মুজুঙোত্ মরাণা উজিত্, মাত্তর্‌ তো তর্‌ যে মানুচ্চুনে তঅ টেবিলোত্‌ হেবাত্তে বোইনে তুই তর্‌ এ চাগর্‌‌বোরেয়ো তারা ভিদিরে এক্কান জাগা দুয়োচ্‌। সালে মহারাজ ইদু আর কোজোলি গুরিবার মর্‌ কি অধিকার আঘে?”

১ বংশধর 12:3

গিবিয়াতীয় শমায় পুয়ো অহীয়েষর আর যোয়াশ-ইগুনে নেতা এলাক্‌; অস্‌মাবত পুয়ো যিষীয়েল আর পেলট, বরাখা, অনাথোতীয় যেহূ;

ইষ্রা 6:11

মুই আরঅ উগুম দুয়োঙর্, যুুদি কেঅ এই উগুমান অমান্য গরে সালেন্ তা ঘরত্তুন্ এক্কান তক্তা নিগিলেই আনিনে সিয়েন্দোই তারে এফুর-উফুর্ গরা অবঅ। তার্ এই অন্যেয়ানত্যে তা ঘরান্ এক্কান আঢং-কজরার্ কুড় বানা অবঅ।

মথি লেখ্যে গম্ হবর্ 27:5

সেক্কে যিহূদা সেই রূবোর্ টেঙাগুন্ নিইনে উবোসনা-ঘর ভিদিরে মেলা মারিনে গেলগোই আর ফাঁস হেইনেই মুরিলো।

প্রেরিত্‌ 13:21

সে পরেদি মানুচ্চুনে রাজা মাগিলাক্। সেক্কে তে তারারে বিন্যামীন গুট্টির কীশর পুয়ো শৌলরে দিলো। শৌলে চল্লিশ বজর্ সং রাজাগিরি গোজ্যে।

দ্বি’লম্বর বিররণ 21:22

যুনি কনঅ মানুচ্‌ মরণর সাজা পাইদ্যে ধোক্ক্যেন কনঅ দুজ্‌ গরে আর তারে মারে ফেলেইনে গাজত্‌ টাঙেনে রাগা অয়,

যিহোশূয় 10:26

সে পরেন্দি যিহোশূয় সে রাজাগুনোরে মারে ফেলেইনে পাচ্চো গাজত্‌ তারারে টাঙেই দিলো। বেল্যেমাদান্ সং তারার কিয়্যেনি গাজত্‌ টাঙেয়্যে রলঅ।

যিহোশূয় 8:29

তে অয় শঅরর্‌ রাজাবোরে মারে ফেলেইনে সাজোন্যে সং গাজত্‌ টাঙেই রাগেল। সাজোন্যে অক্তত্‌ তে তার কিয়্যেগান্‌ গাজত্তুন লামেইনে শঅরর্‌ গেদোত্‌ চমিবার পথ্‌তানত্‌ ফেলে দিবাত্তে উগুম্‌ দিলো। মানুচ্চুনে তা উগুরে পাত্তর দিইনে এক্কো দাঙর্‌ কুড়্ গুরি রাগেলাক্‌। সিবে এজঅ‌ আঘে।

১ শমূয়েল 10:1

সে পরেন্দি শমূয়েলে এক্কো তেলর শিঝিরি নেযেইনে শৌলর মাদাবো উগুরে তেল ঢালি দিলো। তে তারে গালত্‌ চুমিনে কলঅ, লগেপ্রভু তা মানুচ্চুনো উগুরে তরে নেতা ইজেবে অভিষেগ্ গুরিলো।

১ শমূয়েল 10:24

শমূয়েলে সেক্কে বেক্কুনোরে কলদে, “তুমি কি লগেপ্রভুর বেঈ নেযেয়্যে মানুচ্চোরে দেগর্‌? গোদা মানুচ্চুনো ভিদিরে তা ধোক্ক্যেন আর কনজন নেই।” সেক্কে মানুচ্চুনে কলাক্, “রাজাবো জিংকানিবর্‌ বাঁজোক্‌।”

১ শমূয়েল 10:26

শৌলেয়ো গিবিয়াতদ্‌ তার নিজোর ঘরত্‌ ফিরি গেলঅ। যিদুক্কুন বীর পুরুষোর মনত্‌ গোজেনে সাড়া জাগেয়ে তারায়ো তা সমারে গেলাক্।

১ শমূয়েল 11:4

মানুচ্চুনে যেক্কে হবর্ দিবাত্তে শৌলর নিজো শঅর্‌ গিবিয়াদত্‌ যেইনে সিদুগোর্ মানুচ্চুনোরে সেই বেক্‌ কধানি কলাক্ সেক্কে মানুচ্চুনে কিজেক্‌ কারিনে কাঁনা ধুরিলাক্।

১ শমূয়েল 24:21

সেনত্যেই ইক্কিনে তুই লগেপ্রভুর নাঙে মইদু এ শমক্তান্‌ গর্‌, তুই মর্‌ পরেন্দি মর্‌ বংশধরুনোরে ভস্ত ন-গুরিবে আর মঅ বাবর্‌ বংশত্তুন্‌ মর্‌ নাঙানঅ ফুযি ন-ফেলেবে।”

১ শমূয়েল 24:22

দায়ূদে শৌলর ইদু সেই শমক্তান্‌ গুরিলো। ইয়েনর পরেন্দি শৌল ঘরত্‌ ফিরি গেলঅ, আর দায়ূদে তার মানুচ্‌জন নেযেইনে তার সেই লুগি থেই পারেদে জাগানত্‌ উদি গেলগোই।