২ করিন্হীয় 8:9 - Chakma Bible

⁹ তুমি দঅ আমার্ প্রভু যীশু খ্রীষ্টর্ দোয়্যের্ কধানি কোই পারঅ, তে নিজে থাগোইয়্যে ওইনেয়ো তমাত্যে নাঢা অলঅ, যেন তার্ নাঢা অনার্ মাধ্যমে তুমি থাগোইয়্যে ওই পারঅ।

২ করিন্হীয় 8:9 ပူးပေါင်းရင်းမြစ်များ

যিশাইয় 53:2

তে তা মুজুঙোত্ নরম চারা ধোক্ক্যেন, শুগুনো মাঢিত্ লাগেয়্যে গাজ ধোক্ক্যেন দাঙর্ অলঅ। তার এ ধোক্ক্যেন দোল্ বা সয়সাগজ্যে নেই যে, তান্দি আমি ফিরি চেই; তা চেঙারাগান এমন্ দোল্ নয় যে, আমারে আকর্ষন গুরি পারে।

যিশাইয় 62:1

মুই সিয়োনর তপ্পে আঘং সেনত্তে জুরো গুরি ন-থেম্, যিরূশালেমর তপ্পে আঘং সেনত্তে বোই ন-থেম্, যেদক্কন সং তার সততাগান বেন্যেমাদান্ পহ্‌র ধোক্ক্যেন আর তার উদ্ধোরান জোল্ জোল্যে বম্বা ধোক্ক্যেন ওইনে দেগা ন-দে।‍‍

যিশাইয় 65:8

লগেপ্রভু কোইয়্যেদে, “আংগুরোর্ থুবোত্ রস আঘে দেগিনে মান্‌জ্যে কন্, ‘বর্‌বাত্ ন-গোজ্য, ইক্কিনেয়ো সিবে ভিদিরে গম্ জিনিস কিজু আঘে,’ সেবাবোত্যে মুই মঅ চাগর বেক্কুনোরে ভস্ত ন-গুরিম।‍‍ ‍

মথি লেখ্যে গম্ হবর্ 17:27

মাত্তর্ আমা বেবহারে খাজানা-তুলিয়্যেগুনে যেন অগমান্ ন-পান্ ইয়েনত্তে তুই সাগরত্ যেইনে বুড়্‌শি ফেলা, আর পত্তমে যে মাছ্‌‌চো উদিবো সিবের্ মুয়োন্ খুলিলে এক্কো রূবোর্ দীনার্ পেবে। সিবে লোইনে তর্ আর মর্ খাজানাগুন্ দি আয়।”

মথি লেখ্যে গম্ হবর্ 20:28

ইদোত্ রাগেয়ো, মান্‌জ্যপুয়োবো সেবা পেবাত্তে ন-এজে বরং সেবা গুরিবাত্তে এচ্চ্যে আর ভালোক্কুন্ মান্‌জ্যর্ উদ্ধোরর্ দাম্ ইজেবে তারা পরাণানির্ বদলে নিজো পরাণান্ দিবাত্তে এচ্চ্যে।”

মথি লেখ্যে গম্ হবর্ 8:20

যীশু তারে কলঅ, “শিয়েলর্ গাঢ্ আঘে আর পেগোর্ পেগোবা আঘে, মাত্তর্ মান্‌জ্য পুয়োবোর্ মাঢা থবার্ জাগা কনমিক্ক্যে নেই।”

মার্ক 6:3

ইবে কি সেই গাজ মিস্ত্রি নয়? ইবে কি মরিয়ম পুয়োবো নয়? যাকোব, যোষেফ, যিহূদা আর শিমোনর ভেই নয়? তা বোনুন্ কি আমা ইধু নেই?” এবাবোত্যেগুরি যীশুরে নিইনে মানুচ্চুনো মনত্ সন্দেহ এজা ধুরিলো।

লূকে লেখ্যে গম্ হবর্ 16:11

এ জগদর্ ধন-সোম্বোত্তি পৌইদ্যেনে যুনি তমারে বিশ্বেজ্ গরা ন-যায় সালে কন্না তমারে বিশ্বেজ্ গুরিনে আজল্ ধন্ দিবো?

লূকে লেখ্যে গম্ হবর্ 2:7

সিধু তার্ পত্তম পুয়োবোর্ জর্ম অলঅ, আর তে পুয়োবোরে কাবড়ত্ বেড়েইনে য়েমানর্ হের খাজাবোত্ থলঅ, কিয়া হোটেলত্ তারাত্তে কনঅ জাগা ন-এলঅ।

লূকে লেখ্যে গম্ হবর্ 8:3

রাজা হেরোদ চাগর্ কূষর মোগ্ যোহানা; শোশন্না আহ্ আরঅ বোউত্ মিলে। যীশু আর তা শিচ্চ্যগুনোরে সেবা-যত্তন্ গুরিবাত্তে ইগুনে বেক্কুনে নিজো টেঙা-পৌইজ্যেত্তুন্ খরচ্ গুরিদাক্।

লূকে লেখ্যে গম্ হবর্ 9:58

যীশু তারে কলঅ, “শিয়েলর্ গাঢ্ আঘে আর পেগোর্ পেগোবা আঘে, মাত্তর্ মান্‌জ্য পুয়োবোর্ মাঢা থবার্ জাগা কনমিক্ক্যে নেই।”

যোহন 1:10

তে পিত্‌থিমীত্ এলঅ আর পিত্‌থিমীগান্ তা মাধ্যমে সৃট্টি ওইয়্যে, তো জগদর্ মানুচ্চুনে তারে ন-চিনিলাক্।

যোহন 1:14

সে কধাগানই মানুচ্‌ ওইনে জর্মেল আর আমা ভিদিরে বজত্তি গুরিলো। বাবা গোজেনর্ বানা এক্কো গুরি পুয়ো ইজেবে তার্ যে মহিমা সে মহিমাগান্ আমি দেক্ক্যেই। তে দোয়্যে আর সত্যলোই ভরা।

যোহন 1:17

মোশির্ মাধ্যমে রীদি-সুদোম দিয়্যে ওইয়্যে, মাত্তর্ যীশু খ্রীষ্টর্ মাধ্যমে দোয়্যে আর সত্য এচ্চ্যে।

যোহন 12:30

সেক্কে যীশু কলঅ, “এ কধাগান্ মত্যে কুয়ো ন-অয়, মাত্তর্ তমাত্যে কুয়ো ওইয়্যে।

যোহন 17:19

তারাত্যে তর্ নাঙে মুই নিজোরে যুদো গোজ্যং যেন সত্যলোই তারারেয়ো ফারগ্ গরা অয়।

রোমীয় 11:12

সালে দেগা যায়, যিহূদীগুনোর পাপর্ কারনে জগদ মানুচ্চুনোর্ বোউত্ লাভ অলঅ, অয়, তারার ক্ষতির্ কারনে অযিহূদীগুনোর্ বোউত্ লাভ অলঅ। সেনত্যে যিহূদীগুনো উগুরে গোজেনর্ পুরো আশিদ্‌বাদ্‌তান যেলক্কে লামি এবঅ, সেলক্কে তা সমারে আরঅ কত্তমান বেচ্‌ আশিদ্‌বাদ এবঅ।

রোমীয় 15:3

খ্রীষ্টয়ো নিজোরে হুজি ন-গরে। পবিত্র বোইবোত্ লেগা আঘে, “যিগুনে তরে অগমান্ গরন্ সিগুনোর্ গোজ্জ্যে বেগ্ অগমানানি মঅ উগুরে পোজ্জ্যে।”

রোমীয় 5:8

মাত্তর্ গোজেনে যে আমারে কোচ্‌পায় সিয়েনর্ প্রমাণ্ ইয়েন্, আমি পাপী থাগদে খ্রীষ্ট আমাত্যে পরাণান্ দিয়্যে।

রোমীয় 8:32

গোজেনে নিজোর্ পুয়োবোরেয়ো রেহাই ন-দিলো বরং আমা বেক্কুনোত্ত্যে তারে মরণর্ আঢত্ তুলি দিলো। সালে তে কি পুয়োবো সমারে আর বেক্কানিয়ো আমারে দান ন-গুরিবো?

১ করিন্হীয় 1:4

মুই নিত্য তমাত্তে মঅ গোজেনরে ভালেদি জানাং, কিয়া খ্রীষ্ট যীশু সমারে মিজেনেই তুমি গোজেনর্ দোয়্যে পেইয়ো।

১ করিন্হীয় 15:47

মাত্তর্ দ্বি লম্বরত্ মানুচ্চো স্বর্গত্তুন্ এচ্চ্যে।

২ করিন্হীয় 13:14

আমার্ প্রভু যীশু খ্রীষ্টর্ দোয়্যে, গোজেনর্ কোচ্‌পানা আর পবিত্র আত্মালোই উদো লো-লি তমার্ বেক্কুনোর্ রিবেঙত্ থোক্।

২ করিন্হীয় 6:10

আমি বোউত্ দুঘ্ পেইর্, তো আমার মনানি নিত্য হুজীয়ে ভরা। আমি নিজে নাঢা, তো আমি ভালোক্ জনরে থাগোইয়্যে গুরির্। আমার কিচ্চু নেই, তো আমি বেক্কানির্ অধিকারী। এবাবোত্যেগুরি আমি প্রমাণ গুরির্ যে, আমি গোজেনর্ সেবা গুরিয়্যে।

ইফিষীয় 2:7

তে এই কামান্ গোজ্জ্যেদে যেন তে তার্ অমকদ দোয়্যেগান্ আগামিদি যুগ্ যুগ্ ধুরি দেগেই পারে। তে খ্রীষ্ট যীশুর্ মাধ্যমে আমা উগুরে দোয়্যে গুরিনে যিয়েনি গোজ্জ্যে সিয়েনিলোই তার্ এই দোয়্যেগান ফগদাং পেইয়্যে।

ইফিষীয় 3:19

খ্রীষ্টর্ সেই কোচ্‌পানাগান বুদ্ধিলোই হবর্ ন-পায়; তো মুই তবনা গরং যেন তুমি সেই কোচ্‌পানাগান বুঝি পারঅ, যেন গোজেনর্ বেক্‌ পূর্ণতাগান্দোই তুমি ভর্‌পুনোং অ।

ইফিষীয় 3:8

গোজেনর্ বেক্‌ মানুচ্চুনো ভিদিরে মত্তুন্ তলে আর কেঅ নেই, তো খ্রীষ্টর্ যে সম্পদর কধা পুরোপুরি গুরি বুঝি পারা ন-যায়, অযিহূদীগুনো ইধু সেই সম্পদর গম্ হবরান জানেবার কামান্ গোজেনে দোয়্যে গুরিনে মরে দিয়্যে।

কলসীয় 1:24

মুই তমাত্যে যে দুঘ্ ভুগোঙর্ সিয়েনত্যে মুই হুজি। খ্রীষ্টর্ কিয়্যেগানর্, অত্তাৎ মন্ডলীত্যে তার্ যে দুঘোত্ ভুগোনা এজঅ বাগী আঘে সিয়েন মুই মঅ কিয়্যেগান্দোই পূরেই দুয়োং।

১ তীমথিয় 6:18

থাগোইয়্যেগুনোরে উগুম দে যেন তারা অন্যগুনোরে উপকার্ গরন, সৎ কামত থান্, খুলো আঢে দান গরন্ আর তারার্ ধন-সোম্বোত্তির্ ভাগ অন্যগুনোরেয়ো দুয়োন।

ইব্রীয় 1:2

মাত্তর্ এ দিনুনোর্ শেজদি তে তার্ পুয়োবোরে দিইনে আমা ইধু কধা কোইয়্যে। গোজেনে তা পুয়োবোরে বেক্কানির অধিকারী অবাত্যে বেঈ লোইয়্যে। পুয়োবোরে দিইনে তে বেক্কানি সৃট্টি গুরিলো।

যাকোব 2:5

মর্ কোচ্‌‌পেইয়্যে ভেইয়ুন্, শুনো। এই জগদর্ চোগেদি যিগুনে নাঢা মানুচ্, বিশ্বাজে তাগোয়্যে অবাত্যে গোজেনে কি তারারে বেঈ ন-লয়? যিগুনে গোজেনরে কোচ্‌পান সিগুনোরে তে যে রেজ্যগান দিবার্ এগেম্ গোজ্জ্যে সেই রেজ্যগানর্ অধিকারী অবাত্যে এই নাঢা মানুচ্চুনোরে কি তে বেঈ ন-লয়?

ফগদাং পেইয়্যে 2:9

তর্ দুঘ্ আর রাদ কালর্ কধা মুই কোই পারং, মাত্তর্ তো তুই থাগোইয়্যে। নিজোরে যিহূদী কলেয়ো যিগুনে যিহূদী নয় বরং শদানর্ দলর মানুচ্‌, তারা তঅ বিরুদ্ধে যিয়েনি কন্ সিয়েনি মুই হবর্ পাং।

ফগদাং পেইয়্যে 21:7

যে জিদিবো তে ইয়েনি বেক্কানির অধিকারী অবঅ। মুই তার্ গোজেন ওম্ আর তে মর্ পুয়ো অবঅ।

ফগদাং পেইয়্যে 3:18

সেনত্যে মুই তরে এ উপদেচ্‌‌চান দোঙর-তুই মত্তুন্ আগুনোত্ পুজ্জ্যে খাটি সনা কিনি লঅ যেন তুই থাগোইয়্যে ওই পারচ্। মত্তুন্ ধূব্ কাবর কিনিনে পিন্‌ যেন তর্ লাংদা থানার লাজ্‌চান দেগা ন-যায়। মত্তুন্ চোগোত্ দিবার মলম কিনি লঅ যেন তুই দেগচ্।