২ করিন্হীয় 13:11 - Chakma Bible

¹¹ ভেইলগ্, এবেরা বিদেয়। তুমি তমার বেক্কানি ঠিগ্ গুরিনে খাটি অ। মঅ কধানি মনযোগ্ দুয়ো, তমার এক্কুই মনভাব ওক্‌, আর তুমি সুগে-শান্দিয়্যে থাগঅ। সালে কোচ্‌পেইয়্যে আর শান্তির্ গোজেনে তমা লগে থেবঅ।

২ করিন্হীয় 13:11 ပူးပေါင်းရင်းမြစ်များ

পত্থম 37:4

ভেইয়ুনে যেক্কে বুঝিলাক, বাব্‌পো তারাত্তুন্‌ যোষেফরে বেজ্ কোচ্‌পায় সেক্কে তারা তারে ইংসে গরা ধুরিলাক্। তারা কনঅ কধা তাল্লোই গমে ডালে ন-কদাক্‌।

পত্থম 45:24

এ বেবস্থাগানি গুরিনে তে তার্ ভেইয়ুনোরে পাধেই দিলো। যেবার অক্তত্‌ তে তারারে কোই দিলো, “তুমি পধথ্‌ কোল্‌-কোজ্যে ন-গোজ্য।”

মথি লেখ্যে গম্ হবর্ 1:23

“এক্কো গাবুজ্যে মিলে পিদিলী অবঅ, আর তার এক্কো পুয়ো অবঅ; তা নাঙান্ রাগা অবঅ ইম্মানূয়েল।” এ নাঙানর্ অত্ত অলঅ, আমা সমারে গোজেন।

মথি লেখ্যে গম্ হবর্ 5:48

ইয়েনত্তে কং, তমা স্বর্গর্ বাপ্পো যেবাবোত্যে খাটি তুমিয়ো সেবাবোত্যে খাটি অ।

মার্ক 10:49

যীশু থামেইনে কলঅ, “তারে ডাগঅ।” মানুচ্চুনে কান্ মানুচ্চোরে ডাগিনে কলাক্, “দর্ নেই, উঠ্। তে তরে ডাগের্।”

মার্ক 9:50

“নুন্ গম জিনিস, মাত্তর্ যুনি নুনোর্ সুয়োত্তান্ বর্‌‌বাদ্ ওই যায় সালে কেধোক্ক্যেন্‌‌‍ গুরিনে আরঅ নুন্‌‌‍যো গরা যেবঅ? তমা মন ভিদিরে নুন্ থঅ আর তুমি একজন আরেক্‌‌‍জন লগে সুগে-শান্দিয়্যে থাগঅ।”

লূকে লেখ্যে গম্ হবর্ 9:61

আর একজনে কলঅ, “মাষ্টরবাবু, মুই তঅ লগে যেইম্, মাত্তর্ আগে মঅ ঘরত্তুন্ মরে বিদেয় লোইনে এবাত্তে দে।”

যোহন 17:23

অত্তাৎ মুই তারা সমারে আগং আর তুই মঅ সমারে আগচ্, আর এবাবোত্যেগুরি যেন তারা গমেডালে এক ওই পারন্। সেক্কে জগদর্ মানুচ্চুনে কোই পারিবাক্ যে, তুয়ই মরে পাধেয়োচ্, আর মরে যেধোক্ক্যেন্ তুই কোচ্‌পাচ্ সেধোক্ক্যেন্ গুরি তারারেয়ো কোচ্‌পেয়োচ্।

প্রেরিত্‌ 15:29

সেই দরকারী বেপারানি অলঅ-তুমি মূর্ত্তি ইধু উৎসর্ব গোজ্যে হানা ন-হেবা, লো ন-হেবা, তদা চিবিনে মাজ্যে য়েমান য়েরা ন-হেবা আর কনঅ বাবোত্যে সিনেলী ন-গুরিবা। ইয়েনি গরানাত্তুন্ দূরোত্ থেলে তুমি গম্ গুরিবা। বিদায়।”

প্রেরিত্‌ 18:21

সালে সিয়োত্তুন যেবার্ অক্তত্ তে কলঅ, গোজেনর্ আওজ্ অলে মুই আরঅ ফিরি এইম্। সে পরেদি তে ইফিষত্তুন্ জাহাজত্ গুরি লদ্ দিলো।

প্রেরিত্‌ 23:30

যেক্কে মুই হবর্ পেলুং মানুচ্চুনে পৌল বিরুদ্ধে কুজুরোমি গত্তন্ সেক্কে মুই তারে তইধু পাধেলুং। যিগুনে তারে দুষী বানেয়োন তারারেয়ো মুই উগুম্ দিলুং যেন তারা ইবের্ দুষো পৌইদ্যেনে তইধু কন্।”

রোমীয় 12:16

তমার্ একজন উগুরে অন্যর্ মনভাব্ যেন এক্কুই অয়। দাঙর্ মান্‌জ্যর্ ভাব্ ন-দেগেইনে বরং যিগুনে দাঙর্ মানুচ্‌ নয় তারা সমারে মিজেয়ো। নিজোরে জ্ঞানী মনে ন-গোজ্য।

রোমীয় 12:18

তমা ইন্দিত্তুন্ যিদ্দুর্ পারঅ বেক্‌ মানুচ্চুনো সমারে সুগে-শান্দিয়্যে বজত্তি গরঅ।

রোমীয় 14:19

ইয়েনত্যে যিয়েন গুরিলে শান্তি অয় আর যিয়েনর মাধ্যমে আমি একজন আরেকজনরে শিগেইনে তুলি পারিই, এজঅ, আমি সিয়েনর্ চেট্ট্যা গুরিই।

রোমীয় 15:13

যিবে আজা দান গরে সেই গোজেনে তমা বিশ্বেজর্ মাধ্যমে অমকদ হুজিয়ে আর সুগে-শান্দিয়্যে তমারে ভর্‌পুনোং গোরোক্। সালে পবিত্র আত্মার্ খেমতালোই তমা মনানিত্ আজা পুড়েব।

রোমীয় 15:33

শান্তিদিয়্যে গোজেনে তমা বেক্কুনো সমারে সমারে থোক্। আমেন।

রোমীয় 16:20

শান্তিদিয়্যে গোজেনে যাদিমাদি শদানরে তমা টেঙ তলেদি ফেলেনে নিগুজ্ গুরিবো। আমা প্রভু যীশুর্ দোয়্যে তমা উগুরে থোগ্।

১ করিন্হীয় 1:10

ভেইলগ্, আমা প্রভু যীশু খ্রীষ্টর্ ওইনে মুই তমারে বিশেজ্ গুরিনে কোজোলি গরঙর্, তুমি বেক্কুনে এক্ অ। তমা ভিদিরে কনঅ দলাদুলি ন-থোক্, মাত্তর্ তুমি একমন আর এককধার মানুচ্ অ।

২ করিন্হীয় 1:4

আমার্ বেক্‌ দুঘোত্ তে সান্তনা দান গরে, যেন তাত্তুন্ পেইয়্যে সান্তনা আমি অন্যগুনোর্ দুঘোত্অ দি পারিই।

২ করিন্হীয় 13:14

আমার্ প্রভু যীশু খ্রীষ্টর্ দোয়্যে, গোজেনর্ কোচ্‌পানা আর পবিত্র আত্মালোই উদো লো-লি তমার্ বেক্কুনোর্ রিবেঙত্ থোক্।

২ করিন্হীয় 13:9

যেক্কে আমি মেরা মেরা ওই আর তুমি বোলী অ সেক্কে আমি হুজী ওই। আর আমি তবনা গুরিই যেন তুমি বেক্কানি ঠিগ্ ওইনে খাটি অ।

ইফিষীয় 4:12

তে ইগুনোরে নেযেল যেন গোজেনর বেক মানুচ্চুনে তারে সেবা গুরিবাত্যে যুক্কোল্ অন্ আর এবাবোত্যেগুরি খ্রীষ্টর কিয়্যেগান গাঢেই তুলো অয়।

ইফিষীয় 4:3

যে শান্তিগানে আমারে একসমারে এগত্তর্ গোজ্জ্যে সেই শান্তিগান্দোই সুদ্ধো-সাংগ আত্মাগানে দিয়্যে যদা অনাগান্ রোক্ষ্যে গুরিবাত্যে জদবদে চেট্ট্যা গরঅ।

ইফিষীয় 6:23

বাবা গোজেনে আর প্রভু যীশু খ্রীষ্ট ভেইয়ুনোরে শান্তি, বিশ্বেজ্ আর কোচ্‌পানা দান গোরোক্।

ফিলিপীয় 1:27

বেগত্তুন্ দাঙর্ কধাগান অলঅ, তুমি এন্‌ গুরিনে তমার জিংকানিগান কাদঅ যিয়েন খ্রীষ্ট পৌইদ্যেনে গম হবরর্ যগাজ্জ্যে। সালে মুই নিজে এইনে তমারে দেগংগি বা দূরোত্তুন্ তমা কধা শুনোং, মুই হবর্ পেম্‌‌বে, তুমি মনে-পরাণে এক ওইনে থির্ গুরিনে থিয়্যেই আঘঅ আর যে বিশ্বেজ্‌‌চান গম্ হবরর্ মাধ্যমে এজে সিয়েনত্যে এক সমারে কাম গরর্।

ফিলিপীয় 3:16

যিয়েন ওক্‌, আমি যেবাবোত্যে অবস্থানত্ লুম্মেয়ি সেই মজিম চলানা উচিত।

ফিলিপীয় 4:2

উবদিয়া আর সুন্তখী, মুই তমারে বিশেষ গুরিনে এ কোজোলিগান গরঙর্-প্রভুর্ লগে মিজেইয়ো বিলিনে তমা মনানি যেন এক অয়।

ফিলিপীয় 4:4

প্রভু সমারে মিজেয়ো বিলিনে তুমি নিত্য হুজি থাগঅ। মুই আরঅ কং, তুমি হুজী থাগঅ।

ফিলিপীয় 4:9

তুমি মঅ ইধু যিয়েনি শিগ্‌কো আর গম্ বিলিনে মানি লোইয়ো আর মইধু যিয়েনি দেক্ক্য আহ্ মঅ মুয়োত্তুন্ যিয়েনি শুন্ন্য, সিয়েনিলোই নিজোরে কামত্ রাগঅ। সেক্কে শান্তিদিয়্যে গোজেনে তমা সমারে সমারে থেবঅ।

১ থিষলনীকীয় 3:10

আমি দিন-রেত্ গোজেন ইধু রিবেঙত্তুন্ কোজোলি গুরির্ যেন আমি তমারে চেই পারিই আর তমার বিশ্বেজ্ ভিদিরে যে অভাব আঘে সিয়েন পুরেই দি পারিই।

১ থিষলনীকীয় 4:1

আরঅ কং ভেইলগ্, গোজেনরে হুজি গুরিবাত্যে কেধোক্ক্যেন গুরি চলানা উচিত সেই শিক্ষ্যেগান্ দঅ তুমি আমাত্তুন্ পেইয়ো, আর ঘেচ্চ্যেকগুরি তুমি সেবাবোত্যে গুরি চলর্। তো প্রভু যীশুর্ ওইনে আমি তমারে কোজোলি গুরির্ আর উপদেচ্‌ দিত্তে যেন তুমি আরঅ বেশ্ গুরিনে সেবাবোত্যেগুরি চলঅ।

১ থিষলনীকীয় 4:18

সেনত্যে তুমি এ কধানি কোইনে একজন আরেকজনরে সান্তনা দুয়ো।

১ থিষলনীকীয় 5:13

তারা যিয়েনি গত্তন্ সিয়েনিত্যে কোচ্‌পানার মনভাব্‌‌পোই তারারে তুমি বিশেষ গুরিনে শ্রদ্ধা গরঅ। তুমি নিজো ভিদিরে শান্তিয়ে থেইয়ো।

১ থিষলনীকীয় 5:16

নিত্য হুজিয়ে থেইয়ো,

১ থিষলনীকীয় 5:23

শান্তিদিয়্যে গোজেনে নিজেই তমারে পুরোপুরি গুরিনে পবিত্র গোরোক্, আর আমার প্রভু যীশু খ্রীষ্ট এবার্ সময়োত্ তমার পুরো কিয়্যেগান-আত্মাগান-মনান নিদ্দুজি রাগেয়ো।

২ থিষলনীকীয় 2:16

আমা প্রভু যীশু খ্রীষ্ট নিজে আর আমা বাবা গোজেনে তমা মনানত্ উচ্চোমি দুয়োক্ আর বেক্‌ গম কামানিত্ আর কধানিত তমারে থির্ রাগোক্। তেয়ই আমারে কোচ্‌পেইয়্যে আর দোয়্যে গুরিনে জদবদে উচ্চোমি আর হুজিয়ে ভরা আজা দান গোজ্জ্যে।

২ থিষলনীকীয় 3:1

শেজদি কং ভেই-বোনলগ্, আমাত্যে তবনা গরঅ যেন প্রভুর কধানি তমা ইধু যেবাবোত্যেগুরি যাদিমাদি ছিদি পোজ্জ্যে সেবাবোত্যেগুরি সিয়েনি ছিদি পড়ানাত্ আর বাঈনী পানাত্ থায়।

২ থিষলনীকীয় 3:16

শান্তিদিয়্যে প্রভু নিজে নিত্য তমারে শান্তি দান গোরোক্। প্রভু তমার বেক্কুনো সমারে থোক্।

২ তীমথিয় 2:22

গাবুজ্জ্যে কালর্ ভান্ন্যেই কামনা-বাসনাত্তুন্ তুই ধেই যাগোই আর যিগুনে খাটি মনে প্রভুরে ডাগন্ তারা সমারে সৎ জিংকানি, বিশ্বেজ্, কোচ্‌পানা আর শান্তিত্যে আয়োজি অ।

ইব্রীয় 12:14

বেক্‌ মানুচ্চুনো সমারে সুগে-শান্দিয়্যে থাগদে আর পবিত্র অবাত্যে আয়োজি অ।

ইব্রীয় 13:20

যে লো-গান্দোই শান্তি দিয়্যে গোজেনর্ উমর বেবস্থাগান অদে অদে ওইয়্যে সিয়েন্দোই গোজেনে আমা প্রভু যীশু খ্রীষ্টরে, অত্তাৎ ভেড়াগুনোর্ সেই দাঙর্ পালক্‌‌কোরে মরণত্তুন্ জেদা গুরি তুল্যে।

যাকোব 1:4

সেই ধৈয্যগুণানরে তমা জিংকানিত্ পুরোপুরি গুরিনে কাম গুরিবাত্যে দুয়ো, যেনে তুমি পাগানা আর থুদো নেইয়্যে ওইনে উদি পারঅ, অত্তাৎ তমা খাচ্চ্যদ ভিদিরে যেন কনঅ বাবোত্যে অভাব ন-থায়।

১ পিতর 3:11

ভান্ন্যেই কামত্তুন্ তে দূরোত্ থোক্, আর গম কাম গোরোক্; সুগ-শান্দিত্যে আওজি ওইনে তে তার্ পিজেদিগান ন-ছাড়োক্।

১ পিতর 3:8

শেজদি কং, তমার বেক্কুনো মনানি যেন একবাবোত্যে অয়। তুমি একজন আরেকজনর্ দুঘে দুঘ্ পঅ, ভেইয়ো ধোক্ক্যেন কোচ্‌‌পানার মনভাব রাগঅ আর দোয়্যেলু আহ্ চিদে অ।

১ পিতর 5:10

যিবে বেক্কানিন্দি দোয়্যে গুরিবার গোজেন তে তার্ উমরর্ মহিমার ভাগী অবাত্যে তমারে ডাক্ক্যে, কিয়া খ্রীষ্ট সমারে তুমি এগত্তর্ ওইয়ো। তুমি কয়েকদিন দুঘ্ ভুগোনার্ পরেদি গোজেনে নিজেই তমারে খাটি গুরিবো আর থির্ রাগেব, খেমতা দিবো আর দরমর গড়াগান উগুরে তমারে থিয়্যেই রাগেব।

ফগদাং পেইয়্যে 22:21

প্রভু যীশুর্ আশিদ্‌‌বাদ্ গোজেনর্ বেক্‌ মানুচ্চুনো সমারে থোক্। আমেন।