১ থিষলনীকীয় 4:4 - Chakma Bible

^4-5 আর যিগুনে গোজেনরে ন-জানন্ সেই অযিহূদীগুনো ধোক্ক্যেন কিয়্যের্ কামনার্ লগে ন-চলিনে তুমি পত্তিজনে নিজোর্ কিয়্যেগানরে পবিত্র গুরি সর্মানর সমারে দোঙেই রাগেবাত্যে শিগো।

১ থিষলনীকীয় 4:4 ပူးပေါင်းရင်းမြစ်များ

প্রেরিত্‌ 9:15

মাত্তর্ প্রভু অননিয়রে কলঅ, “তুই যাহ্, কিয়া অযিহূদীগুনোর আহ্ তারার্ রাজাগুনোর আর ইস্রায়েলীয়গুনো ইধু মঅ পৌইদ্যেনে ফগদাং গুরিবাত্যে মুই এ মানুচ্চোরে বেঈ লোইয়োং।

রোমীয় 1:24

ইয়েনত্যে গোজেনে মান্‌জ্যরে তার্ মনর্ কামনা-বাসনা মজিম্ জঘন্য কাম্ গুরিবাত্তে ইরি দিয়্যে। যেরেদি তারা একজন আরেক জন লগে জঘন্য কাম্ গুরিনে নিজো কিয়্যেগানিরে অসর্মান গোজ্যন্।

রোমীয় 12:1

সালে ভেইলগ্, গোজেনর্ এ বেক্‌ দোয়্যের্ কারনে মুই তমারে বিশেষ গুরিনে কোজোলি গরঙর্, তুমি তমার্ কিয়্যেগানরে জেদা, পবিত্র আর গোজেনর্ মানি লোইয়্যে উৎসর্ব ইজেবে গোজেন আঢত্ তুলি দুয়ো। সিয়েনই অবঅ তমার্ যগাজ্যে সেবা।

রোমীয় 6:19

মান্‌জ্যর্ দুর্বলতার্ কারনে মুই কধানি মান্‌জ্যে যেবাবোত্যেগুরি বুঝিবাক্ সেবাবোত্যেগুরি কঙর্। আগে তুমি যেবাবোত্যে আরঅ বেশ্ গুরিনে অন্যেয় কাম্ গুরিবাত্তে নিজো কিয়্যেগানরে অপবিত্র আহ্ অন্যেয়র্ চাগর্ বানেয়ো, ঠিগ্ সেবাবোত্যেগুরি ইক্কিনে পবিত্রতালোই ভর্ পুনোং অবাত্তে তমা কিয়্যেগানরে ন্যায় কামর্ চাগর্ বানঅ।

১ করিন্হীয় 6:15

তুমি কি কোই ন-পারঅ যে, তমা কিয়্যেগান খ্রীষ্ট কিয়্যেগানর্ ভাগ্? সালে মুই কি খ্রীষ্ট কিয়্যেগান ভাগ্‌কান্দোই বেশ্যে কিয়্যেগান সমারে এগত্তর্ গুরিম? কনদিনঅ নয়।

১ করিন্হীয় 7:2

মাত্তর্ চেরোকিত্তে বোউত্ বেভিচের্ অর্, সেনত্তে পত্তি মরদর্ নিজোর্ মোক্ থোক্ আর পত্তি মিলের্ নিজোর্ নেক্ থোক্।

১ করিন্হীয় 7:9

মাত্তর্ যুনি তারা নিজোরে দোঙেই ন-পারন্ সালে নেক্ লোদোক্, কিয়া কিয়্যেগানর্ কামনায় জ্বলিনে-পুড়িনে মরানাত্তুন্ বরং নেক্ লনা বোউত্ গম্।

২ করিন্হীয় 4:7

মাত্তর্ এই ধন মাত্ত্যা পিলেত্ থুয়ো ওইয়্যে; আর আমিই সেই মাত্ত্যা পিলাগুন্। মাত্ত্যা পিলেত্ সিয়েন থুয়ো ওইয়্যে যেন মান্‌জ্যে বুঝি পারন্ যে, এ অসাধারণ দাঙর্ খেমতাগান আমা নিজোত্তুন্ ন-এজে বরং গোজেনত্তুনই এচ্চ্যে।

ফিলিপীয় 4:8

যেরেদি কং, ভেইলগ্, যিয়েন সত্য, যিয়েন যগাজ্জ্যে, যিয়েন গম্, যিয়েন খাটি, যিয়েন-দোল্, যিয়েন সর্মান পেবার যগাজ্জ্যে, আজল্ কধা যিয়েন গম্ আর নাঙ্ গিনিবার্, সিন্দি তুমি মনানি দুয়ো।

ইব্রীয় 13:4

পত্তিজনে যেন জড়া সুগুলোং বানানা বেপারান্ সর্মানর্ চোগেদি দেগন্। নেক্-মোগোর্ ভিদিরে জড়া সুগুলোং বানানা বেপারান পবিত্র রাগানা উজিত্, কিয়া যে কনঅ বাবোত্যে পর্‌পাগোল্যে অদঅ সাৎ, যিগুনে সেই দুষে দুষী গোজেনে তারারে সাজা দিবো।

১ পিতর 3:7

ঠিগ সেবাবোত্যে গুরি তুমি যিগুনে নেক্, তুমি বুদ্ধি বিবেচনা গুরিনে মোগো সমারে বজত্তি গরঅ। তারা তমার দুর্বল সমাজ্জ্যে, আর তারায়ো তমা সমারে গোজেনর্ দোয়্যের্ দান ইজেবে জিংকানি পেবাক্। সেনত্যে তারারে সর্মান গরঅ যেন তমার তবনাগানি লবাদোস্যে ন অয়।

১ শমূয়েল 21:5

দায়ূদে কলঅ, “আমার সুদোম্ মজিম আমি সত্য সত্য কনঅ মিলে ইদু ন-যেই। সৈন্যগুনোরে নেযেইনে মুই যেক্কে কনঅ সামান্য কামত্‌ নিগিলোং সেক্কেয়ো মর্‌ সৈন্যগুনে সিজি থান্‌। মাত্তর্‌ এচ্চ্যে তারা কদক্‌ সিজি আগন্‌।”