১ শমূয়েল 18:30 - Chakma Bible

³⁰ ইয়েনর্ পরেন্দি পলেষ্টীয়গুনোর সেনাপতিগুনে যুদ্ধো গুরিবাত্তে নিগিলি এজা ধুরিলাক্। যেদকবার্‌ তারা নিগিলি এলাক্ সেদকবারই শৌলর অন্য কামগুরিয়্যেগুনোত্তুন্‌ দায়ূদে বেশ্ বুদ্ধির পরিচয় দিইনে সফলতা লাভ গুরিলো। সেক্কে তার অমকদ সুনাম অলঅ।

১ শমূয়েল 18:30 ပူးပေါင်းရင်းမြစ်များ

২ শমূয়েল 11:1

জারকালত্‌ যেক্কে রাজাগুনে সচরাসর্‌ যুদ্ধো গুরিবাত্তে নিগিলিদাক্‌ সেক্কে দায়ূদেয়ো যুদ্ধো গুরিবাত্তে যোয়াবরে আর তার্‌ অন্য সেনাপতিগুনোরে আহ্ বেক্‌ ইস্রায়েলীয় সৈন্যগুনোরে পাধেই দিলো। তারা অম্মোনীয়গুনোরে ভস্ত গুরিনে রব্বা শঅরান্‌ ঘিরিলাক্‌। মাত্তর্‌ দায়ূদে যিরূশালেমদই থেলঅ।

২ শমূয়েল 7:9

তুই যেদক্কানি জাগাত্‌ যেইয়োচ্‌ মুইয়ো সিদু তঅ লগে যেইয়োং আর তঅ মুজুঙোত্তুন্‌ তর্‌ বেক্‌ শত্রুগুনোরে শেজ্‌ গুরি দুয়োং। মুই তঅ নাঙান্‌ পিত্তিমীর্ নাঙ্‌গিন্যে মানুচ্চুনোর নাঙানি ধোক্ক্যেন্‌ নাঙ্ তাই পাড়া গুরিম্।

২ রাজাবলী 1:13

ইয়েন পরেন্দি রাজা আর ইক্কো সেনাপতি আর তার্‌ পঞ্চাশজন সৈন্যরে পাধেই দিলো। এ তিন লম্বর সেনাপতিবো উগুরে উদিনে এলিয়ো মুজুঙোত্‌ মাঢা নিগিরিনে কোজোলী গুরি কলঅ, “ও গোজেন মানুচ্‌, তুই দোয়্যে গুরি আমা পঞ্চাশজন চাগর পরাণানি রোক্ষ্যে গর্‌।

গীতসংহিতা 116:15

লগেপ্রভু ইদু তার ভক্তগুনোর্ মরণান বোউত্ মংগা।

গীতসংহিতা 119:99

মর্ বেক মাস্তরুনোত্তুন্ বেশ্ মুই জ্ঞানবলা, কিত্তে তর্ বেক কধানিলোই মুই ধ্যান গরং।

গম্ উপদেজ্ 12:8

মান্‌জ্যে যেবাবোত্যেগুরি বুদ্ধি খাদান্ সেই মজিম্ নাঙ্ গিনেনাগান্ পান, মাত্তর্ কুজুরো মন মানুচ্চুনোরে ঈচ্ গরা অয়।

দানিয়েল 1:20

জ্ঞান আর বুদ্ধির পৌইদ্যেনে পত্তি পৌইদ্যেনে রাজা তারারে পুযোর্ গুরিনে বুঝি পারিলো যে, তারা তা গদা রেজ্যগানি ভিদিরে বেক্ যাদুগুরিয়্যে আর ভূতোর্ ওঝাগুনোত্তুন্ দশগুন গম্।

লূকে লেখ্যে গম্ হবর্ 21:15

কিয়া মুই তমারে এমন কধা আর এমন জ্ঞান যুগেই দিম্ যিয়েনর জোবত্ তমা শত্রুগুনে কিজু কোইয়ো ন-পারিবাক্ আর সিয়েন অস্বীগের্-অ গুরি ন-পারিবাক্।

ইফিষীয় 5:15

তুমি কেধোক্ক্যেন গুরি চলর্ সে পৌইদ্যেনে গমেডালে ভাবি চঅ। বুদ্ধি-নেইয়্যে মানুচ্চুনো ধোক্ক্যেন ন-চলিনে জ্ঞানীগুনো ধোক্ক্যেন চলঅ।

১ পিতর 2:4

এমন এক্কো জেদা পাত্তর্ আঘে যিবেরে গোজেনে বেঈ লোইয়্যে আর যিবে তা চোগেদি অমকদ মংগা, মাত্তর্ মান্‌জ্যে তারে এলাফেলা গোজ্জ্যন্। খ্রীষ্ট অলঅ সেই পাত্তর্‌বো; তুমি তাইধু এচ্চ্য বিলিনে জেদা পাত্তর ধোক্ক্যেন গুরি তমারে দিইনেয়ো গোজেনর্ থেবার ঘরান্ বানা অর্। সেনত্যে ধর্মগুরু ইজেবে গোজেনত্যে তমারে ফারগ্ গরা ওইয়্যে, যেন তুমি এমন্‌ আত্মিক উৎসর্বয়ানি গরঅ যিয়েনি যীশু খ্রীষ্টর্ দিইনে গোজেনর্ মানি লোইয়্যে অয়।

১ পিতর 2:7

ইয়েনত্যে তুমি বিশ্বেজ্ গোজ্জ্য বিলিনে তমা ইধু সেই পাত্তর্‌বো ভারী মংগা; মাত্তর্ যিগুনে বিশ্বেজ্ ন-গরন্ তারাত্যে পবিত্র বোইবোর্ এ কধাগান খাদে, রাজমিস্ত্রিগুনে যে পাত্তর্‌বো বাদ্ দি দুয়োন, সিবেই বেক্কুনোত্তুন্ দরকারী পাত্তর্ ওই উদিলো।

১ শমূয়েল 18:29

সেক্কে দায়ূদো উগুরে তার দরান্‌ আরঅ বাড়িলো।

১ শমূয়েল 18:5

শৌল দায়ূদোরে যিয়েনত্‌ পাধেদ দায়ূদে সিয়েনত্‌ যেদঅ আর বুদ্ধির পরিচয় দিইনে সফলতা লাভ গুরিদো। সেনত্যেই শৌল তারে সৈন্যদলর এক্কো সেনাপতি বানেল। সেক্কে বেক্‌ মানুচ্চুনে হুজি অলাক্ আর শৌলর কামগুরিয়্যেগুনেয়ো হুজি অলািক্।

১ শমূয়েল 19:8

সে পরেন্দি আরঅ যেক্কে যুদ্ধো আরাম্ভ ওই গেলঅ সেক্কে দায়ূদে নিগিলি এইনে পলেষ্টীয়গুনো সমারে যুদ্ধো গুরিবাত্তে গেলঅ। তে তারার্‌ এদক মান্‌জ্যরে মারে ফেলেল, তারা তার মুজুঙোত্তুন্‌ ধেই গেলাক্।

১ শমূয়েল 2:30

“সেনত্তেই ইস্রায়েলীয়গুনোর গোজেন লগেপ্রভু কত্তে, ‘মুই হামাক্কায় কোইয়োঙে, তর্‌ আর তর্‌ পুরোণি মানুচ্চুনোর বংশর মানুচ্চুনে সারা জিংকানিবর্‌ মর্‌ সেবা কাম গুরিবাক্’; মাত্তর্‌ ইক্কিনে লগেপ্রভু কত্তে, ‘সিয়েন আর ন-চলিবো। যিগুনে মরে সর্মান গুরিবাক্ মুই তারারে সর্মান গুরিম আর যিগুনে মরে ঈচ্ গুরিবাক্ তারারে ঈচ্ গরা অবঅ।

১ শমূয়েল 26:21

সেক্কে শৌল কলদে, “মুই পাপ গোজ্যং। বাবা দায়ূদ, তুই ফিরি আয়। এচ্চ্যে তুই মর্‌ জীংকানিগানর্‌ কদক্‌ দাম দিলে; মুই আর তরে ক্ষেতি গুরিবাত্যে চেট্ট্যা ন-গুরিম। সত্য সত্য এ দাঙর্‌ অন্যেয়ান গুরিনে মুই বেদমা কাম গোজ্যং।”

১ শমূয়েল 26:24

এচ্চ্যে মইদু তর্‌ জিংকানিগান যেধোক্ক্যেন দাঙর্ মূল্যবান অলঅ সেধোক্ক্যেন্‌ লগেপ্রভুর ইদুয়ো যেনে মর্‌ জিংকানিগান দাঙর্ মূল্যবান অয়। তে যেনে বেক্‌ দযাত্তুন্‌ মরে উদ্ধোর্ গরে।”