১ শমূয়েল 17:46 - Chakma Bible

⁴⁶ লগেপ্রভু এচ্চ্যে দিনোত্‌ তরে মর্‌ আঢত্‌ তুলি দিবো। মুই তরে আঘাত গুরিম আর তর্‌ মাঢাবো কাবি নেযেম্‌। এচ্চ্যেই মুই পলেষ্টীয় সৈন্যগুনোর মরাকিয়্যেনি আগাজর পেক্কুনোরে আর পিত্‌থিমীর য়েমানুনোরে হেবাত্তে দিম। সিয়েনি দেগিনে পিত্‌থিমীর বেক্কুনে জানি পারিবাক্, ইস্রায়েলীয়গুনোর পক্ষে গোজেন বিলিনে একজন আঘে।

১ শমূয়েল 17:46 ပူးပေါင်းရင်းမြစ်များ

পত্থম 40:19

এই তিন দিনো ভিদিরে ফরৌণে তঅ মাদাবো কাবি নেযেইনে কিয়্যেগান্‌ গাজত্‌ টাঙেই রাগেব, আর পেক্কুনে এইনে তঅ কিয়্যেগানত্তুন্‌ যেরা খুদি খুদি হেবাক্।”

২ শমূয়েল 18:28

অহীমাস রাজারে জোরে ডাগিনে কলঅ, “বেক্কুনে গম্ অাগন্।” সে পরেন্দি তে রাজার মুজুঙোত্‌ আদু পাড়ি পড়িনে কলঅ, “তর্ গোজেন্‌ লগেপ্রভুর বাঈনী ওক্‌। মর্‌ গিরোজ মহারাজর্‌ বিরুদ্ধে যিগুনে আত্‌ তুল্যন তারারে তে আমা আঢত্‌ তুলি দিয়্যে।”

২ শমূয়েল 21:10

অয়ার ঝি রিস্পা বস্তা নেযেইনে এক্কো পাত্তর উগুরে নিজোত্তে বিজেই রাগেল। পত্তম ফসল কাবানার অক্তত্তুন্‌ ধুরি আরাম্ভ গুরিনে যেদকদিন সং সে কিয়্যেগানি উগুরে আগাজত্তুন্‌ ঝড় ন-পড়িলো সেদকদিন সং তে দিনোত্ পেক্কুনোরে আর রেদোত্‌ ঝাড়্‌বো য়েমানুনোরে সেই মরাকিয়্যেগানি রোক্ষ্যে গুরিলো।

১ রাজাবলী 8:43

সেক্কে তর্‌ থেবারঘর স্বর্গত্তুন্‌ তুই সিয়েনি শুনিচ্‌। তে যিয়েনি চায় তাত্তে সিয়েনি গুরিচ্‌ যেনে পিত্তিমীর বেক্‌ মানুচ্চুনে তরে হবর্ পান্‌ আর তঅ নিজোর মানুচ্‌ ইস্রায়েলীয়গুনো ধোক্ক্যেন তারায়ো তরে ভোক্তিগুরি দরান্‌ আর হবর্‌ পান, মর্‌ বানেয়্যে এ ঘরান্‌ তঅ ঘর্‌।

১ রাজাবলী 8:60

ইয়েন্দোই পিত্তিমীর্‌ বেক্‌ জাদ্‌তুনে হবর্‌ পেবাক, লগেপ্রভু গোজেন আর তে বাদে আর্‌ কনজন গোজেন নেই।

২ রাজাবলী 19:19

ইক্কিনে ও আমা গোজেন লগেপ্রভু, আসিরিয়ার রাজা আঢত্তুন্‌ তুই আমারে রোক্ষ্যে গর্‌ যেনে পিতথিমীর্‌ বেক্‌ রেজ্যগানিয়্যে কোই পারে, তুয়ই, ও লগেপ্রভু, বানা তুয়ই গোজেন।”

২ রাজাবলী 5:15

সেক্কে নামানে আর তা লগে যেইয়্যে বেক্‌ মানুচ্চুনে গোজেনর মানুচ্চুনোর্‌ ইদু ফিরি গেলাক্‌। নামানে তা মুজুঙোত্‌ থিয়্যেইনে কলদে, “মুই ইক্কিনে হবর্‌ পেলুং, বানা ইস্রায়েলর গোজেন বাদে গোদা দুনিয়েগানত্‌ আর কনঅ গোজেন নেই। ইক্কিনে তুই তঅ চাগের্‌বোত্তুন্‌ বক্‌শিস্‌ছান গুজি লঅ।”

গীতসংহিতা 31:8

তুই শত্রুগুনো আঢত্ মরে আক্‌সোই ন-রাগাচ্, বরং এক্কান খুলো জাগাত্ মরে থিয়্যেই রাগেয়োচ্।

গীতসংহিতা 46:10

লগেপ্রভু কয়দে, “তুমি থাম; তুমি এ কধাগান জানি লঅ, মুয়ই গোজেন; বেক্ জাদ্‌তুনে মরে বাঈনী গুরিবাক্, বাঈনী দান গুরিবো পিত্‌থিমীগানে।”

যাত্রা 9:16

মাত্তর্‌ মুই তরে বাজেই রাগেয়োং যেনে তরে মঅ বলান্‌ দেগেই পারং আর গোদা পিত্‌থিমীত্‌ যেন মঅ নাঙান্‌ ফগদাঙ্‌ অয়।

যিশাইয় 37:20

ইক্কিনে ও আমার গোজেন লগেপ্রভু, আসিরিয়ার রাজা আঢত্তুন্ তুই আমারে রোক্ষ্যে গর্, যেনে পিত্‌থিমীর বেক্ রেজ্যগানিয়ে জানি পারে, তুই, বানা তুয়ই লগেপ্রভু।”

যিশাইয় 52:10

লগেপ্রভু বেক্ জাদ্‌তুনোর চোগো মুজুঙোত্ তার পবিত্র খেমতাবলা আঢ্‌‌তান ফগদাং গুরিবো, আর পিত্‌থিমীর বেক মানুচ্চুনে আমা গোজেনর্ উদ্ধোর কামানি দেগিবাক্।

যিশাইয় 56:9

মাদর্ আর ঝারর্ বেক এ্যামানুন্, তুমি এইনে হেই ফেলঅ।

যিরমিয় 19:7

এ জাগায়ানত্ মুই যিহূদা আর যিরূশালেমর মানুচ্চুনোর পরিকল্পনাগান বর্‌বাত গুরিম। যিগুনে তারার পরাণান নিবাত্তে চান তারার সেই শত্রুগুনোরে দিইনে যুদ্ধোর ভিদিরে মুই তারারে মারে ফেলেম আর তারার মরাকিয়্যেগানি আগাজর্ পেগ্‌‌‌‌কুনে আর ঝার য়েমানুনোর হানা ইজেবে দিম।‌

যিরমিয় 34:20

সেনত্তে যিগুনে তারারে মারে ফেলেবাত্তে চান সে শত্রুগুনো আঢত্ মুই তারারে তুলি দিম। তারার মরাকিয়্যেনি অবঅ আগাজর্ পেগ্‌কুনোর আর ঝার্‌‍‍‍বো য়েমানুনোর হানা। ‍

দানিয়েল 2:47

রাজা দানিয়েলরে কলঅ, “তমা গোজেনে ঘেচ্চেকগুরি দেবেদাগুনোর্ গোজেন আর রাজাগুনোর গিরোজ্। মুই বুঝিলুং তে গুমুরো বিষয়ে ফগদাং গরে, কিত্যেই তুই এ গুমুরো বিষয়ান ফগদাং গুরি পাজ্যস্।”

দানিয়েল 3:29

সেনত্তে মুই এ উগুমান দুয়োঙর্, কনঅ জাদর্, দেজর্ বা ভাষার মানুচ্ যুনি শদ্রক, মৈশক আর অবেদ্-নগোর গোজেন বিরুদ্ধে কিজু কন্ সালে তারে কট্টা কট্টা গুরিনে কাবি ফেলা অবঅ আর তার ঘরানি কাজর-কুড়্ বানা অবঅ, কিত্যে আর কনঅ দেবেদা এবাবোত্যেগুরি উদ্ধোর্ গুরি ন-পারে।”

মথি লেখ্যে গম্ হবর্ 24:28

যিয়েনত্ মরা কিয়্যে থেবঅ সিয়েনত্ শকুনুনে এইনে এক সমারে থুবেবাক্।

দ্বি’লম্বর বিররণ 28:26

তমার মরাকিয়্যেনি অবদে আগাজর পেখ্‌ আর পিত্‌থিমীর য়েমানুনোর হানা, আর তারারে ধাবেই দিবাত্তে কনজনে উজেই ন এবাক্।

দ্বি’লম্বর বিররণ 7:2

তে যেক্কে তারারে তমা আঢর্‌ মুদোত্‌ আনি দিবো আর তুমি তারারে অদেই দিবা সেক্কে তুমি তারারে এক্কুবারে ভস্ত গুরি ফেলেবা। তুমি তারা সমারে কনঅ চুক্তি ন-গুরিবা আর তারা উগুরে কনঅ মেইয়্যে ন-দেগেবা।

দ্বি’লম্বর বিররণ 7:23

তমা গোজেন লগেপ্রভু অমকদ যাগুলুগোত্ ফেলেইনে তমা আঢত্‌ তারারে তুলি দিবো যেদক্কন সং তারা এক্কুবারে ভস্ত ওই ন-যান।

যিহোশূয় 10:8

লগেপ্রভু যিহোশূয়রে কলঅ‌, “তুই তারারে ন-দোরেচ্‌; মুই তারারে তঅ‌ আঢত্‌ তুলি দুয়োং। তারা কনজনে তঅ মুজুঙোত্‌ থিয়্যেই ন-পারিবাক্‌।”

যিহোশূয় 4:24

তে এ কামান্‌ গোজ্যেদে যেনে পিত্‌থিমীর বেক্‌ জাদ্‌তুনে জানি পারন্‌, লগেপ্রভুর আত্তান্‌ বোলী আর যেনে তুমি আমিজে তমা গোজেন লগেপ্রভুরে ভক্তিবলা দোরেইনে চলঅ‌।”

১ শমূয়েল 14:6

যোনাথনে তার বন্দুক বোইয়্যে গাবুজ্যেবোরে কলদে, “আদঅ, আমি উই পারত্‌ সেই চুনুগুলোবো তনা ন-গোজ্যে মানুচ্চুনোর তাম্বুলোত্‌ যেই। অয়ত লগেপ্রভু আমাত্তে কিজু গুরিবো, কিত্যে তে তার নিজোর মনে মন্‌‌জক্কাগুরি কম মানুচ্চোই ওক্‌ বা বেশ্‌ মানুচ্চোই ওক্‌ জিদি যেই পারে।”

১ শমূয়েল 17:44

তে দায়ূদরে আরঅ কলঅ, “উজেই আয়; মুই তর্‌ কিয়্যের্‌ য়েরাগান আগাজর্‌ পেক্কুনোরে আর ঝারর্‌ য়েমানুনোরে হেবাত্তে দিম্‌।”