১ করিন্হীয় 12:28 - Chakma Bible

²⁸ গোজেনে মন্ডলীত্ পত্তম প্রচারক, দ্বি-লম্বরত ভাববাদী; তিন-লম্বরত্ মাষ্টর্ ইজেবে নেযেয়্যে। সে পরেদি এই বেক্ মানুচ্চুনোরে নেযা ওইয়্যে-যিগুনে আমক্ কাম গুরিবার খেমতা পেইয়োন, যিগুনে পীড়ে গম্ গুরিবার খেমতা পেইয়োন, যিগুনে সাহায্য গুরিবার খেমতা পেইয়োন, যিগুনে পরিচালনা গুরিবার খেমতা পেইয়োন, আর যিগুনে নানান্ ভাষা কবার খেমতা পেইয়োন। বেক্কুনে কি প্রচারক্?

১ করিন্হীয় 12:28 ပူးပေါင်းရင်းမြစ်များ

গণাণা 11:17

মুই সিয়েনত্‌ লামি এইনে তঅ সমারে কধা কোম্‌। তঅ উগুরে যে আত্মাগান্‌ আঘে মুই সিয়েনরে তারা উগুরেয়ো দিম্‌। মানুচ্চুনোর্‌ ভারান্‌ বুয়োই নিবাত্তে তারা তরে সাহায্য গুরিবাক। সেক্কে তত্তুন্‌ আর গায়্‌ গায়্‌ দায়িত্বোগান বুয়োই নেযা ন-পুরিবো।

মার্ক 16:17

যিগুনে বিশ্বেজ্ গরন্ তারা ইধু এ চিহ্নোগান্ দেগা যেবঅ-মঅ নাঙে তারা ভুদ্ ধাবেবাক্, তারা নুয়ো নুয়ো ভাষায় কধা কবাক্,

লূকে লেখ্যে গম্ হবর্ 6:14

তারা অলাক্ শিমোন, যিবেরে তে পিতর নাঙান্অ দিলো; শিমোন ভেই আন্দ্রিয়; যাকোব আর যোহন; ফিলিপ আর বর্থলময়;

প্রেরিত্‌ 11:27

ইয়েন ভিদিরে কয়েক্কো ভাববাদী যিরূশালেমত্তুন্ আন্তিয়খিয়াত্ এলাক্।

প্রেরিত্‌ 20:28

তুমি নিজো পৌইদ্যেনে উজিয়ার্ থাগঅ, আর পবিত্র আত্মা যে বিশ্বেজি দলর্ ভারান্ পরিচালগ্ ইজেবে তমা উগুরে দিয়্যে তারা পৌইদ্যেনেয়ো উজিয়ার্ থাগঅ। গরগ্‌কো যেবাবোত্যেগুরি তা ভেড়া পালুনোরে দেগাশুনো গরে ঠিগ্ সেবাবোত্যেগুরি তুমিয়ো গরগ্ ইজেবে গোজেন মন্ডলীর্ দেগাশুনো গরঅ। গোজেনে সেই মন্ডলীবোরে নিজো লো-গান্দোই কিন্যে।

১ করিন্হীয় 10:32

মুই যেবাবোত্যে গুরি বেক্‌ মান্‌জ্যরে নানান্ বাবোত্যে গুরি হুজি গুরিবাত্তে চেষ্টা গরং তুমিয়ো সেবাবোত্যে গরঅ; অত্তাৎ যিহূদী বা অযিহূদী বা গোজেন মন্ডলীর মানুচ্চুনোর পধত্ কাঙেলেত্যে ন-গোজ্জ্য। মুই নিজোর্ মংগল চেষ্টা ন-গুরিনে ভালোক জনর্ মংগলর্ চেষ্টা গরং যেন তারা পাপত্তুন্ উদ্ধোর্ পান্।

১ করিন্হীয় 12:18

গোজেনে যেবাবোত্যেগুরি চেইয়্যে ঠিগ্ সেবাবোত্যেগুরি কিয়্যের্ ভাগ্‌‌কানিরে তে এক এক গুরি কিয়্যেগান ইধু তে বোজেয়্যে।

১ করিন্হীয় 12:29

বেক্কুনে কি ভাববাদী? বেক্কুনে কি মাষ্টর্? বেক্কুনোর্ কি আমক্ কাম্ গুরিবার খেমতা আঘে?

১ করিন্হীয় 12:30

বেক্কুনোর্ কি পীড়ে গম গুরিবার্ খেমতা আঘে? বেক্কুনে কি নানান্ ভাষায় কধা কন্? বেক্কুনে কি সিয়েনির অত্তগান বুঝেই দুয়োন্? খামাক্কায় নয়!

১ করিন্হীয় 14:2

অন্য কনঅ ভাষায় যে মানুচ্চো কধা কয় তে মান্‌জ্য ইধু কধা ন-কয় মাত্তর্ গোজেন ইধু কধা কয়, কিয়া কেঅ সিয়েন বুঝি ন-পারন্। তে আত্মালোই গুমুরো সত্যর্ কধা কয়।

১ করিন্হীয় 14:4

অন্য কনঅ ভাষায় যে মানুচ্চো কধা কয় তে নিজোরে গড়েই তুলে, মাত্তর্ ভাববাদী ইজেবে যে কধা কয় তে মন্ডলী মানুচ্চুনোরে গড়েই তুলে।

১ করিন্হীয় 14:5

মুই চাং যেন তুমি বেক্কুনে নানান্ ভাষায় কধা কোই পারঅ, মাত্তর্ আরঅ বেশ্ গুরি চাং যেন তুমি ভাববাদী ইজেবে কধা কোই পারঅ। অন্য কনঅ ভাষায় যে মানুচ্চো কধা কয়, মন্ডলীর্ মানুচ্চুনোরে গড়েই তুলিবাত্যে যুনি তে তার্ কধানির্ অত্তগান বুঝেই ন-দে, সালে তাত্তুন্ ভাববাদী ইজেবে যে কধা কয় তে-ই বরং দাঙর্।

ইফিষীয় 2:20

প্রচারক আর ভাববাদীগুনে অলাক্ গড়াগান্ আর সেই গড়াগানর্ আজল্ পাত্তর্‌বো খ্রীষ্ট যীশু নিজে। সেই গড়াগান উগুরে তমারে তুল ওইয়্যে।

ইফিষীয় 3:5

সেই গুমুরো উদ্দেচ্চ্যগান পবিত্র আত্মালোই ইক্কিনে যেবাবোত্যেগুরি তার্ পবিত্র প্রচারক আর ভাববাদীগুনো ইধু ফগদাং ওইয়্যে, আগদি বেক্‌ যুগোর্ মানুচ্চুনো ইধু সেবাবোত্যেগুরি ফগদাং ন-অয়।

১ তীমথিয় 5:17

মন্ডলীর যে আজল্ নেতাগুনে গমেডালে মন্ডলীর পরিচালনা গরন্, বিশেষ গুরি যিগুনে গোজেনর্ কধা প্রচার আর শিক্ষ্যে দান গুরিবাত্যে কাম গরন্, তারার্ পাওনা দ্বিগুন অনা উচিত।

ইব্রীয় 13:17

তমা নেতাগুনোর্ কধানি মানি চোল্ল্য আর তারার্ বাধ্য ওইয়ো, কিয়া যিগুনে গোজেন ইধু ইজেব দিবাক্ সেবাবোত্যে মানুচ্‌ ইজেবে দঅ তারা তমারে দেগাশুনো গরন্। তারার্ বাধ্য ওইয়ো যেনে তারা তারার্ কামানি হুজি গুরিনে গুরি পারন, দুঘ্ পেইনে নয়। যুনি দুঘ্ পেইনে গরা পরে সালে সিয়েনত্যে তমার কনঅ লাভ্ ন-অবঅ।

ইব্রীয় 13:24

তমার বেক্‌ নেতাগুনোরে আর গোজেন মানুচ্চুনোরে আমার ভালেদি জানেইয়ো। ইটালী দেজর্ গোজেনর্ মানুচ্চুনে তমারে ভালেদি জানাদন্।