Zacarías 9:16 - Chayahuita (Shahui)

¹⁶ Maton maꞌsharoꞌsari ohuica huëntonën yamapachina, huaꞌanëni paꞌpoyarinso pochin ina tahuëri nanihuachin, Sinioronta piyapinënpita nichaꞌësarin. Ina quëran yaꞌhuëpiquë chachin yaꞌhuëantahuachinaꞌ, noya noya yaꞌhuëantaponaꞌ. Yancotë paꞌton naꞌpiraꞌhuaroꞌsa acotohuachinara, huënáporinso pochin noya noya yaꞌnoponaꞌ.

Zacarías 9:16 ပူးပေါင်းရင်းမြစ်များ

Salmos 100:3

Yosëíchin chini chiníquën nanantërin. Ina nitotoco canpitantaꞌ. Inaso nininpoa niꞌton, huaꞌanëntërinpoaꞌ. Ina piyapinënpoa canpoasoꞌ. Ohuicaroꞌsa huaꞌanëni aꞌpairinso pochin noya aꞌpairinpoaꞌ.

Isaías 40:10

Chiníquën nanantaton oꞌmararin. Yaꞌipi minsërahuaton, piyapinënpita isëquë chachin quëantarin. Nisharoꞌsari huaꞌanëntopirinahuëꞌ, inapita quëran nichaꞌërin.

Isaías 54:12

Torinënpitantaꞌ, nopi itopisoꞌ naꞌpi quëran, acoarahuë. Yaꞌcoananënpitantaꞌ, piriro itopiso naꞌpiroꞌsa quëran acoarahuë. Pairanënpitanta nisha nisha paꞌton nininsopita naꞌpiroꞌsa quëran acoarahuë.

Isaías 60:14

Aparisitërinëmaso shinpita huëcapairahuatënëmaꞌ, nosorochináchin nontaponëmaꞌ. Yaꞌipi nocaninëmasopitantaꞌ, isonahuatona moshaponëmaꞌ. Quirosarintaꞌ, ‘Sinioro ninanonën,’ itaponaꞌ. Siniorosoꞌ noyasáchin ninin niꞌton, israiroꞌsari inaquë chinotopi.

Isaías 60:3

Noyasáchin nicatomaꞌ, tahuëri pochin nisaramaꞌ. Napoaton nisha nisha piyapiꞌsa huëcapayaponëmaꞌ. Tahuërianpitërëso pochin cancantëramaso marëꞌ, nisha nisha copirnoroꞌsa huëcapaiarinëmaꞌ.

Jeremías 23:3

Huaꞌqui quëran napoaponahuëꞌ, piyapinëhuëpita ayontoantarahuë. Nisha nisha parti aꞌparahuë quëran huënantaponaꞌ. Ohuicaroꞌsa pastonënquë chachin quënantahuatëra, naꞌantarinso pochin inapitanta nitarahuë.

Jeremías 31:10

Naquëranchin Sinioro taantarin: “Nisha nisha nacionquë yaꞌhuëramasopitantaꞌ, natanco Sinioro nontarinquëmaꞌ: Ina quëran marë soꞌtonoꞌsaquë áquë yaꞌhuëpirinahuëꞌ, shaꞌhuitoncoꞌ: ‘Sinioro nohuanton israiroꞌsa yanquëëpi. Inapotopirinhuëꞌ, ayontoantarahuaton noya aꞌpaiantapon. Aꞌpairinsoari ohuicaroꞌsa noya aꞌpairinso pochin noya aꞌpaiantapon,’ itoncoꞌ.

Jeremías 31:11

Siniorori Cacopo quëran pipipisopita nichaꞌërin. Chiníquën nanantërinsoꞌ nacioni huaꞌanëntopirinhuëꞌ, nichaꞌërin.

Ezequiel 34:11

Naquëranchin Sinioro taantarin: “Ca Sinioroco shaꞌhuitaranquëmaꞌ. Huaꞌanoꞌsanquëmaꞌ. Canpitaso piyapinëhuëpita co noya aꞌpairamahuë niꞌton, cari chachin aꞌpaiarahuë huachi.

Ezequiel 34:12

Noya huaꞌanënsoꞌ, ohuicanënpita yanquëëhuachina, co napion cancantërin. Inapochachin cantaꞌ, piyapinëhuëpita nichaꞌëantaꞌhuaso marëꞌ co napion cancantarahuëꞌ. Inapitasoꞌ paꞌpi tashirotaton huiraitërinso tahuëri itohua itohua yanquëëpi.

Miqueas 5:4

Ina copirno huaꞌanëntohuachinpoasoꞌ, ohuicaroꞌsa huaꞌanëni aꞌpaiaton noya quëparinso pochin nitarinpoaꞌ. Sinioroso Yosënën niꞌton, inari chiníquën nanan quëtapon. Naporahuaton noya noya huaꞌanëntacaso catahuapon. Naporoꞌ israiroꞌsanpoasoꞌ, sano cancantarihua huachi. Sinioronta yaꞌipi isoroꞌpaquë yaꞌhuëpisopitari tëꞌhuatatona natëpona niꞌton, napoarihuaꞌ.

Lucas 12:32

Naquëranchin itaantarin: —Ama iyaroꞌsaꞌ paꞌyancosohuëꞌ. Ohuica pëꞌtahuanaꞌpi pochin nicato aꞌpaiaranquëmaꞌ. Caraichinquëmaꞌ nipomarahuëꞌ, Yosë noya niꞌninquëmaꞌ. Huaꞌanëntërinquë chachin ayaꞌconinquëmaꞌ.

Juan 10:27

Casoꞌ ohuica pëꞌtahuanaꞌpi pochin ninahuë. Imarinacosopita ohuicanëhuëpita pochin niꞌnahuë. Nohuitërahuë. Noya nataninaco. Nontohuatëra, natëtonaco, imarinaco.