Zacarías 9:12 - Chayahuita (Shahui)

¹² Naquëranchin Sinioro taantarin: “Naꞌaquëma nisha nisha parti quëpapirinënquëmahuëꞌ: ‘Sinioro nichaꞌësarinpoaꞌ,’ taꞌtoma ninaramaco. ¡Iporaso tahuëri nanirin niꞌton, Quirosarinquë chachin panantacoꞌ! Inasoꞌ, noyá niacorapiramaso ninanoꞌ. Nisha nisha parti paatoma naꞌcon parisitopiramahuëꞌ, naporama quëran naꞌcon naꞌcon catahuatënquëmaꞌ, noya noya acoantaponquëma huachi.

Zacarías 9:12 ပူးပေါင်းရင်းမြစ်များ

Copo naporinso' 42:10

Amiconënpita marëꞌ Copo Yosë nontohuachina, inaora chachinta noyatahuaton, noya noya yaꞌhuëantarin. Iꞌhua yaꞌhuëtërin quëran naꞌcon naꞌcon yaꞌhuëtaantarin.

Isaías 40:2

Noyasha nontatoma piyapinëhuëpita catahuaco chiníquën cancanchinaꞌ. Sontaro sirihuitërinso pochin nininsoꞌ, nani nanirin. Tëhuëpiso marëꞌ anaꞌintërahuësoꞌ, nani pahuërëtatë pochin nipi. Oshanëna marëꞌ nani naꞌcon naꞌcon parisitopi,” tënin.

Isaías 49:9

Minsërahuatona quëpapisopita, quëmari shaꞌhuitapon: ‘Ipora quëran huarëꞌ noya paco huachi,’ itaran. Tashinanquë pochin yaꞌhuëpisopitantaꞌ: ‘¡Yaꞌnoco huachi!’ itaran. Inapotohuatan, nani ira pirayan pastoroꞌsa quënanaponaꞌ. Tomaroꞌtë motopiroꞌsaquëntaꞌ, pëꞌtahuanëna cosharo yaꞌhuëtapon.

Isaías 52:2

Quirosarinquë yaꞌhuëramasopita, ¡huanico huachi! Sëtatoma amocanquë nitaꞌsatëramaꞌ. Inaporamasoꞌ, nipaꞌtancoꞌ. Tapan inquiaton, huaꞌanëntacaso shiranënquë huënsëpisopita pochin cancantocoꞌ. Quirosarinquë yaꞌhuëramasopita, huiꞌnapinquëma nipomarahuëꞌ, inimicoroꞌsa macatënënquëmaꞌ, naraquë tonpoconotërinënquëmaꞌ. Inapotërinënquëmasoꞌ, paꞌcoicoꞌ. Co huachi huaꞌanëntërinënquëmasohuëꞌ nitotacaiso marëꞌ, inapocoꞌ.

Isaías 61:7

Canpitasoꞌ inimiconëmapita naꞌcon naꞌcon noꞌhuitënëmaꞌ, taparo nitërinëmaꞌ. Paninanoꞌsa naꞌcon naꞌcon maꞌsha quëtopiso pochin nitërënëmaꞌ. Napoaton yaꞌhuëramaso noꞌpaquë chachin naꞌcon naꞌcon capa cancantomiatapomaꞌ. Paninanoꞌsa naꞌcon naꞌcon paꞌton nininsopita quëtopiso pochin nitaponëmaꞌ,” tënin.

Jeremías 14:8

Maꞌsha onporaiso tahuëriꞌsa nichaꞌërancoi niꞌton, quëmasáchin israiroꞌsacoisoꞌ ninarainquën. Naꞌhuëroꞌsa aꞌna tashiíchin huëꞌëpatërinso pochin ninan. ¡Ama ina pochin nicatonhuëꞌ, catahuacoi!

Jeremías 31:6

Co huaꞌquiya quëranhuëꞌ Iprain motopiaꞌhuaroꞌsaquë aꞌpaitoroꞌsa chiníquën shaꞌhuiponaꞌ: ‘Huëco paꞌahua Quirosarinquë niꞌtontaꞌahuaꞌ. Inaquë Sinioro chinotontaꞌahuaꞌ,’ tëcaponaꞌ,” tënin.

Ezequiel 37:11

Naporoꞌ Sinioro nontaantatonco: “Israiroꞌsasoꞌ, nansëroꞌsa niꞌnanso pochin nipi. Ninontohuachinara: ‘Nansëquënpoasoꞌ, noyá yanirinso pochin niconin. Co huachi maꞌmarë tëranta paꞌtërëhuahuëꞌ. Co huachi nimiriohuanhuë pochin niconëhuaꞌ,’ niitopi.

Oseas 2:15

Israiroꞌsa iráca Iquipitoquë yaꞌhuëpi. Naporo tahuëriꞌsasoꞌ, ipora huarëꞌ nanontatë pochin nisapi. Ina quëran ocoiapo, inapitaso piyapinëhuëpita. Canta inapita Yosënënaco. Inapochachin aꞌna tahuërinta niantapon. Yaꞌhuëpiso noꞌpaquë chachin, oparoroꞌsa quëtaantarahuë. Acoro itopisoꞌ motopiana, anishatarahuë. Inaquë shaꞌtohuachina, paꞌpi notohuaroꞌ nitërinsoꞌ macaponaꞌ. Napohuachina: ‘Noya yaꞌhuëáparihuaꞌ,’ tëcaponaꞌ.

Joel 3:16

Quirosarin quëran ca Sinioroco camaitato, huira tënëntërinso pochin nisarahuë. Yaꞌipi isoroꞌpaꞌ nacon nacontapon. Piꞌiroꞌtënta nacon nacontapon. Israiroꞌsaso nipirinhuëꞌ, piyapinëhuëpita niꞌton, cari chachin noya paꞌpoyapo.

Miqueas 4:8

Quirosarinquë yaꞌhuëpisopitasoꞌ, Sion motopiquë noyá niacorapipi. Inapoaton ohuica aꞌpainaꞌpiroꞌsa torinën pochin ninin. Inaquë chachin canta huënsëato huaꞌanëntarahuë niꞌton, iráca pochachin niantapon,” tënin.

Hebreos 6:18

Yosë chachin shaꞌhuitërinpoaꞌ. Naporahuaton “Casoꞌ Yosëco niꞌto, noꞌtëquën nontëranquëmaꞌ,” itomantarinpoaꞌ. Napoaton co onporontaꞌ nonpintarinpoahuëꞌ. Co piꞌpian tërantaꞌ nishataponhuëꞌ, tënëhuaꞌ. Ina yonquiatëhuaꞌ, chiníquën cancantahuaꞌ. Iráca Yosëíchin imarëhuaꞌ catahuainpoaso marëꞌ. “Nichaꞌësarinpoaꞌ,” taꞌtëhuaꞌ, yaꞌipi cancanënpoa quëran imahuaꞌ.

Hebreos 6:19

Niꞌcoꞌ. Nanchaquë paꞌpachinara, aꞌna tahuëri panca ihuan nacapipi. Chiníquën coꞌsacaitërin. Naporoꞌ huaꞌna quëquën nininsoꞌ aꞌsonahuatonaꞌ, tëꞌyaitopi. Acopoiꞌ noꞌpaquë niꞌtoromahuachina, sano yanponin. Co coꞌsacairi tërantaꞌ chiꞌhuincarinhuëꞌ. Inapochachin canpoantaꞌ aꞌna tahuëri maꞌsha onporëhuaꞌ, parisitërëhuaꞌ, sëtërëhuaꞌ, naporëhuaꞌ. Inapohuatëhuaꞌ, Yosë yonquiaꞌahuaꞌ. “Inasoꞌ noꞌtëquën nontërinpoaꞌ. Nichaꞌësarinpoaꞌ. Co onporontaꞌ naniantarinpoahuëꞌ,” topatëhuaꞌ, sano cancantarihuaꞌ. Yosësoꞌ co quënanarihuarahuëꞌ, inápaquë yaꞌhuárin. Ina yonquiatëhuaꞌ, ninarëhuaꞌ.