Tito 3:3 - Chayahuita (Shahui)

³ Iráca canpoantaꞌ co noyahuëꞌ cancantërëhuaꞌ. Coꞌhuara Yosë nanamën nitochatërarihuahuëꞌ, co yonquirëhuahuëꞌ. Co yanatërëhuahuëꞌ. Sopai nonpintërinpoaꞌ niꞌton, nisha nisha nicacasoꞌ nohuantërëhuaꞌ. Maꞌpitasona paꞌyatacasoáchin yonquirëhuaꞌ. Aꞌna piyapi maꞌshanënpita noyapatërëhuaꞌ. Ninoꞌhuitëhuaꞌ, co niquëꞌyarëhuahuëꞌ. Noꞌhuípiroꞌ ninëhuaꞌ. Inapoatëhuaꞌ, topinan quëran yaꞌhuërëhuaꞌ.

Tito 3:3 ပူးပေါင်းရင်းမြစ်များ

Génesis 38:9

Onansoꞌ Tamara macaponahuëꞌ: “Huiꞌnahuanpato, huaꞌhuaroꞌsa co caquën nisarinhuëꞌ. Irico huiꞌninpitaráchin pochin nisarin,” tënin yonquinënquë. Napoaton, Tamara tëcarihuachina, aipi aꞌpaconin. Ama iinco yaꞌhuërënamënpita, ina quëran yaꞌhuëcaso marëhuëꞌ naporin.

Génesis 39:16

Piyapinënpita napotahuaton, Cosi nisoꞌhuianatërinsoꞌ taparin. Soꞌin huëcaquë huarëꞌ taparin.

Proverbios 8:5

Naꞌaquëma huiꞌnapinquëma niꞌton, co noya yonquiátëraramahuëꞌ. Naponin yonquiramasopitantaꞌ, yonquínahuan nicacamasoꞌ nohuantocoꞌ.

Isaías 44:20

Napoatonaꞌ, inapitaso huariano caꞌpiso pochin nisapi. Nonpi nanan imatona napopi. Inapitasoꞌ co onporonta chaꞌësapihuëꞌ. Co nanitapihuëꞌ: “Iso mamanshisoꞌ, topinan quëran mosharahuë,” taꞌcaisoꞌ.

Mateo 21:29

“Inca tata, co yasacatërahuëꞌ,” itërin. Napotaponahuëꞌ, oshaquëran yonquiantarin. Noya cancantaton, sacatapon paꞌnin.

Lucas 21:8

Napotohuachinara: “Niꞌcona iyaroꞌsaꞌ nonpintochinënquëmaꞌ. Aꞌnaquën huëcatonaꞌ: ‘Casoꞌ Cristoco. Yosë chachin aꞌpairinco,’ tosapi. Aꞌnapitantaꞌ nonpin nanan shaꞌhuirapi. ‘Nani tahuëri naniriarin, nitotërai,’ tosapi. Ama inapita imacosohuëꞌ.

Juan 8:34

—Noꞌtëquën itëranquëmaꞌ. Co noyahuëꞌ nipatamaꞌ, sopai huaꞌan camaiarinquëmaꞌ. Piyapinënpita pochin nisaramaꞌ. Co canpitaora nanitaramahuëꞌ oshanëmaꞌ naniantamasoꞌ. Sopai camaihuachinquëmaꞌ, co noyahuëꞌ nisaramaꞌ.

Romanos 11:30

Iráca co canpitasoꞌ natëpiramahuëꞌ, co israiroꞌsaꞌ nohuantopihuëꞌ niꞌton, Yosë nosoroatënquëmaꞌ, catahuarinquëmaꞌ.

Romanos 6:12

Ama oshanëma huaꞌanëntatë pochin nitatënquëmaꞌ camayápainquëmaso nohuantocosohuëꞌ. Yaꞌipi co noyahuëꞌ yonquiramasopita naniantatomaꞌ, noyasáchin yonquicoꞌ.

Romanos 6:17

Iráca oshanëma natëtomaꞌ, co noyahuëꞌ nipiramahuëꞌ. Quisocristo nanamën aꞌchintohuachinënquëmara, noya natanamaꞌ. Yaꞌipi cancanëma quëran noya natëramaꞌ. Ina yonquiatëhuaꞌ, “Yosparinquën” itërëhuaꞌ Yosë.

Romanos 6:22

Iporaso nipirinhuëꞌ co huachi oshanëma huaꞌanëntërinquëmahuëꞌ. Yosë nichaꞌërinquëmaꞌ ama huachi oshahuanacamaso marëhuëꞌ. Ina chachin huaꞌanëntërinquëmaꞌ. Napoaton noyápiachin cancantaramaꞌ. Aꞌna tahuëri Yosëꞌpaꞌ nanpimiataramaꞌ.

Romanos 6:6

Catoꞌ cancan pochin yaꞌhuëtërinpoaꞌ. Aꞌna cancansoꞌ sopai yanatërin. Quisocristo imarëhuaꞌ niꞌton, co noyahuëꞌ cancantërëhuasoꞌ corosëquë patanantërëso pochin nitërëhuaꞌ. Ama huachi sopai natëcaso marëhuëꞌ napotërëhuaꞌ. Co noyahuëꞌ cancantërëhuasoꞌ chimininso pochin nitahuaꞌ.

2 Corintios 12:20

Canconpato, co noya niꞌsaranquëmahuëꞌ nimara. Canpitantaꞌ co noya niꞌsaramacohuëꞌ nimara. Napoaton sëtato, yonquiáranquëmaꞌ. Ipora huantaꞌ aꞌnaquëmaꞌ nimara ninoꞌhuiaramaꞌ, niaꞌpitaramaꞌ, iquianan quëran ninontaramaꞌ, nipinosaramaꞌ, ninocanaramaꞌ, nisha nisha yonquiaramaꞌ nimara, tënahuë yonquiato.

Gálatas 6:3

“Casoꞌ noya piyapico,” topatan, quëmaora ninonpintaran, co noꞌtëquën yonquiranhuëꞌ. Co insontaꞌ Yosë pochachin cancantërinhuëꞌ. Co Yosë catahuarinpoahuëꞌ naporini, co mantaꞌ noya niitërihuahuëꞌ.

Colosenses 1:21

Iráca canpitasoꞌ co Yosë yonquiramahuëꞌ. Co noyahuëꞌ cancantatomaꞌ, Yosë inimicotëramaꞌ. Co noyahuëꞌ ninamaꞌ.

Colosenses 3:7

Iráca canpitantaꞌ co noyahuëꞌ cancantatomaꞌ, co noyahuëꞌ ninamaꞌ.

2 Timoteo 3:13

Co noyahuëꞌ nipisopita, nonpintëroꞌsaꞌ, inapitasoꞌ aquë aquëtëꞌ co noyahuëꞌ nisapi. Naꞌcon piyapiꞌsa nonpintopi quëran, aꞌnapitarintaꞌ nonpintapi.

2 Timoteo 3:6

Naꞌa piyapiꞌsaꞌ anishacancantapi. Aꞌnaya aꞌnaya pëiquë paatonaꞌ, sanapiꞌsaꞌ nonpintopi. Nonpintatonaꞌ, aꞌchintapirinahuëꞌ, aꞌnaquënsoꞌ noya natanpi. “Oshahuanco niꞌton, anaꞌintincosoꞌ yaꞌhuërin,” taꞌtonaꞌ, co chiníquën cancantopihuëꞌ. Nani maꞌsha nohuantatonaꞌ, co sano yonquipihuëꞌ niꞌton, aꞌnaroáchin natëtopi.

Tito 1:16

“Yosë nohuitërahuë,” topirinahuëꞌ, co noyahuëꞌ nipi. Ina marëꞌ co tëhuënchachin imapihuëꞌ, tënahuë. Co Yosëri noya niꞌninhuëꞌ. “Napoonpi,” tënin. Co mantaꞌ yanatëpihuëꞌ. Yosë aꞌpoatonaꞌ, co piꞌpisha tërantaꞌ nanitopihuëꞌ noya nicacaisoꞌ.

Tito 2:12

Nosoroatonpoaꞌ, pënëninpoaꞌ yaꞌipi co noyahuëꞌ yonquirëhuasopita naniantacaso marëꞌ. Ama maꞌsharáchin nohuantahuasohuëꞌ. Co monshihuanacasoꞌ yaꞌhuërinhuëꞌ. Sano yaꞌhuatëhuaꞌ, nóya yonquiaꞌahuaꞌ. Yosë yonquirinsoráchin imahuaꞌ. Nani tahuëri Yosë chinotatëhuaꞌ, noyasáchin niahuaꞌ. Ina marëꞌ pënëninpoaꞌ.

Santiago 1:26

“Cantaꞌ noya Yosë imarahuë,” topi aꞌnaquën. Nipirinhuëꞌ, nisha nisha nonin. Co noyahuëꞌ nonpachina, topinan quëran nonsarin, inaora ninonpintarin. Co tëhuënchachin imarinhuëꞌ.

1 Pedro 1:14

Huaꞌhuaroꞌsaꞌ noya nipachinara, paꞌpinaꞌ natëpi. Inapochachin canpitantaꞌ Yosëíchin natëcoꞌ. Iráca co Yosë nanamën nitotatomarahuëꞌ, co yonquiramahuëꞌ. Yanoꞌpihuatamara, noꞌpiramaꞌ. Co noyahuëꞌ yonquihuatamara, co noyahuëꞌ ninamaꞌ. Iporaso nipirinhuëꞌ ama inapocosohuëꞌ.

Apocalipsis 12:9

Inapotatonaꞌ, panca yaꞌhuan pochin nininsoꞌ inápa quëran tëꞌyatopi. Inasoꞌ sopai chachin, Satanasë itopisoꞌ. Yaꞌipi piyapiꞌsaꞌ yanonpintërin. Ina minsërahuatonaꞌ, anquëninënpitarë chachin isoroꞌpaquë tëꞌyatopi.

Apocalipsis 13:14

Nisha nisha acoarin, sacaiꞌ nininsoꞌ. Maꞌsha paꞌpi tëꞌhuatoroꞌ nininsoꞌ niꞌtonënquë naporin. Piyapiꞌsari niꞌpachinaꞌ: “Tëhuënchachin inasoꞌ Yosë,” tosapi. Notohuaroꞌ piyapiꞌsaꞌ nonpintarin. Ina quëran itapon: “Panca mamanshi niahuaꞌ. Sahuëniquë ahuëatonaꞌ shitëpapirinahuëꞌ, noyataantarinsoꞌ nonanatëhuaꞌ chinotahuaꞌ,” itohuachinaꞌ, nisapi.

Apocalipsis 18:2

Oꞌmarahuaton, chiníquën nonin. “Nani huachi Papironia taꞌhuantarin. Panca ninanoꞌ niponahuëꞌ, taꞌhuantarin. Inaquë nisha nisha sopairoꞌsaꞌ yaꞌhuaponaꞌ. Nisha nisha chanaroꞌ caꞌtëroꞌsantaꞌ inaquë paꞌsapi.