Tito 2:13 - Chayahuita (Shahui)

¹³ Noya cancantatëhuaꞌ, Quisocristo ninarëhuaꞌ. Aꞌna tahuëri chiníquën nanantaton, oꞌmantararin. Inasoꞌ Yosë chachin niꞌton, huënaráchin huënaráchin yaꞌnoarin. Ina quënanpatëhuaꞌ, nóya cancantarihuaꞌ. Chiníquën nanantaton, noyá nichaꞌësarinpoaꞌ.

Tito 2:13 ပူးပေါင်းရင်းမြစ်များ

Mateo 16:27

Yosë quëran quëmapico niꞌto, aꞌna tahuëri oꞌmantararahuë. Tatahuë huënaratërinso pochin cantaꞌ huënaratarahuë. Anquëniroꞌsapitarëꞌco oꞌmantararahuë. Naporoꞌ coisë pochin noꞌtëquën shaꞌhuitarahuë huachi. Noya nipachinaꞌ, noya acoarahuë. Co noyahuëꞌ nipachinaꞌ, anaꞌintarahuë huachi.

Mateo 25:31

Ina quëran itaantarin: “Yosë quëran quëmapico niꞌto, aꞌna tahuëri oꞌmantararahuë huaꞌanëntaꞌhuaso marëꞌ. Yaꞌipi anquëniroꞌsapitarëꞌco chachin oꞌmantararahuë. Huënaráchin huënaráchin yaꞌnorahuato, huaꞌanëntaꞌhuasoꞌ shiraquë huënsëarahuë coisë pochin nicaꞌhuaso marëꞌ.

Mateo 26:64

—Ca mini inaco. Yosë quëran quëmapico niꞌto, aꞌna tahuëri niantaramaco. Inápaquë paꞌpato, Yosë inchinanën quëran ahuënsëarinco. Ina quëran chitoroꞌ huancana oꞌmantararahuë niantaramaco, itërin.

Marcos 14:62

—Ca mini inaco. Aꞌna tahuëri niꞌsaramaco. Yosë quëran quëmapico niꞌto, Yosë chiníquën nanantaton, inchinan quëran ahuënsëarinco. Ina quëran chitoroꞌ huáncana oꞌmantararahuë niantaramaco, itërin Quisosori.

Marcos 8:38

Ipora tahuëriꞌsaꞌ yaꞌhuëpisopita co noyahuëꞌ nipi. Nitëhuananpitopisopita pochin cancantopi. Tapayatomaco aꞌpohuatamaco, aꞌna tahuëri carimantaꞌ tapayatënquëmaꞌ, aꞌpoaranquëmaꞌ. Nanamëhuë aꞌpohuatamaꞌ, carimantaꞌ oꞌmantahuato, aꞌpoaranquëmaꞌ. Yosë quëran quëmapico niꞌto, aꞌna tahuëri oꞌmantararahuë. Tatahuë pochin huënaratahuato, noya anquëniroꞌsapitaroꞌco oꞌmantararahuë, itërin.

Hechos 24:15

“Yosë noꞌtëquën nontërinpoaꞌ,” taꞌto natërahuë. “Aꞌna tahuëri yaꞌipi piyapiꞌsaꞌ ananpitaantarahuë. Noya piyapiꞌsaꞌ, co noya piyapiꞌsahuëꞌ, yaꞌipi ananpitaantarahuë,” tënin Yosë. Ina tahuëri casoꞌ ninarahuë. Isopitantaꞌ ina ninarapi.

Romanos 15:13

Yosëíchin tëhuënchachin catahuarinpoaꞌ chiníquën cancantacasoꞌ. Canpitantaꞌ catahuainquëmaꞌ nóya cancantacamaso marëꞌ. Asanocancainquëmaꞌ. Inasáchin yonquihuatamaꞌ, catahuarinquëmaꞌ. Ispirito Santo yaꞌipi nanitaparin. Catahuahuachinquëmaꞌ, chini chiníquën cancantatomaꞌ, noya ninaramaꞌ.

Romanos 5:5

Inasáchin ninahuatëhuaꞌ, tëhuënchachin co naniantarinpoahuëꞌ niꞌton, co tapanarihuahuëꞌ. Ispirito Santo aꞌpatimarinpoaꞌ. Yaꞌcoancantohuachinpoaꞌ: “Ma noyacha Yosë nosororinpoa paya,” tarihuaꞌ. Ispirito Santo chachin Yosë nosororinpoasoꞌ anitotërinpoaꞌ.

Romanos 8:18

Isoroꞌpaquë piꞌpian parisitarihuarahuëꞌ, ama ina yonquiaꞌahuasohuëꞌ. Ama ina marëꞌ sëtahuasohuëꞌ. Aꞌna tahuëri Yosëꞌpaꞌ noya noya yaꞌhuëcontarihuaꞌ. Ina yonquiatëhuaꞌ, nóya cancantahuaꞌ tënahuë.

1 Corintios 1:7

Canpitaora co nanitëramahuëꞌ Yosë pochin cancantacamasoꞌ. Nipirinhuëꞌ, Yosë ananitarinquëmaꞌ. Co mantaꞌ pahuantarinquëmahuëꞌ noya nicacamaso marëꞌ. Catahuarinquëmaꞌ niꞌton, noya cancantatomaꞌ, Sinioro Quisocristo oꞌmantacasoꞌ tahuëri ninaramaꞌ.

2 Corintios 4:4

Sopai nohuanton, co nanitopihuëꞌ noꞌtëquën yonquicaisoꞌ. Maꞌsha aꞌpintërëso pochin nanamën quëran Yosë anitotërinpoaꞌ Quisocristo nohuitacaso marëꞌ. Inasoꞌ Yosë chachin ninin. Inapitaso nipirinhuëꞌ somaraya pochin cancantatonaꞌ, co nanitopihuëꞌ natëtacaisoꞌ.

2 Corintios 4:6

Yaꞌnan isoroꞌpaꞌ acoapon yaꞌipi parti tashipirinhuëꞌ: “Niiꞌsohuanchin huachi,” tënin Yosë. Napohuachina, tahuëri yaꞌhuërin. Inapochachin iporasoꞌ cancanënpoaquë aꞌpintërinpoaꞌ ina nohuitacaso marëꞌ. Inasoꞌ noya noya. Quisocristo yaꞌpirin quëran aꞌpintërinpoaso pochin ninin. Ina yonquihuatëhuaꞌ, Yosë chachin anohuitarinpoa huachi.

Colosenses 1:23

Imamiatohuatamaꞌ, Yosë noya niꞌsarinquëma huachi. Noya nanan natanamaꞌ. “Nichaꞌësarinpoaꞌ,” taꞌtomaꞌ, natërama huachi. Natëmiatocoꞌ. Ama, iyaroꞌsaꞌ, nisha nisha yonquicosohuëꞌ. Ama piꞌpian tërantaꞌ aꞌpocosohuëꞌ. Yaꞌipi parti noya nanan chachin aꞌchinapi. Inachachin cantaꞌ aꞌchinarahuë.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

Colosenses 1:5

Iráca noya nanan natanamaꞌ. “Oshanënpoaꞌ inquitatonpoaꞌ, Quisocristo anoyacancantërinpoaꞌ,” itohuachinënquëmaꞌ, noꞌtëquën aꞌchintërinënquëmaꞌ. Aꞌchintohuachinënquëmaꞌ, natëramaꞌ. “Aꞌna tahuëri Yosëꞌpaꞌ noya ananpitaantarinpoaꞌ,” taꞌtomaꞌ, Quisocristo imaramaꞌ. Ina imatomaꞌ, ina tahuëri ninaramaꞌ.

Colosenses 3:4

Quisocristo chachin yaꞌcoancantërinpoaꞌ Yosë yonquicaso marëꞌ. Aꞌna tahuëri oꞌmantahuachin, noya noya yaꞌnoarin. Naporoꞌ inarëꞌquënpoaꞌ yaꞌhuërarihuaꞌ niꞌton, canpoantaꞌ noya noya acoarinpoaꞌ.

2 Tesalonicenses 2:16

Sinioro Quisocristo catahuainquëmaꞌ chiníquën cancantacamaso marëꞌ. Inaora nohuanton, Tata Yosëntaꞌ nosoroatonpoaꞌ, achinicancamiatërinpoaꞌ. Aꞌna tahuëri yaꞌhuërinquë chachin quëpantarinpoaꞌ. Shaꞌhuitërinpoaꞌ niꞌton, ina ninarëhuaꞌ.

2 Tesalonicenses 2:8

Yaꞌnohuachin, piyapiꞌsaꞌ aquë aquëtëꞌ co noyahuëꞌ cancantapi. Inari camaihuachin, notohuaroꞌ piyapiꞌsari natëapi. Ayaroꞌ tahuëriso nipirinhuëꞌ, Sinioro Quisosori anaꞌintarin. Huënaráchin huënaráchin oꞌmantahuachin, minsëarin. Topinan noncharapirinhuëꞌ, ataꞌhuantarin. Co huachi nanitarinhuëꞌ piyapiꞌsaꞌ nonpintacasoꞌ.

1 Timoteo 1:1

Ca Paonoco ninshitaranquën, niꞌquëꞌ. ¿Noya, yaꞌhuaran? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Yosë chachin anoyacancantërinpoaꞌ. Oshanënpoaꞌ inquitatonpoaꞌ, nichaꞌërinpoaꞌ. Quisocristo imatëhuaꞌ, ina ninarëhuaꞌ. Aꞌna tahuëri inápaquë quëpantarinpoaꞌ.

2 Timoteo 1:2

Timotionquën ninshitaranquën. Nosoroatënquën, huiꞌnahuë pochin niꞌnanquën. Tata Yosë inaora nohuanton, catahuainquën. Noya nosoroꞌinquën. Nani tahuëri asanocancainquën. Quisocristontaꞌ inachachin catahuainquën. Inasoꞌ huaꞌanënpoaꞌ niꞌton, inasáchin natërëhuaꞌ.

2 Timoteo 4:1

Yosë niꞌsárinpoa niꞌton, pënënaranquën. Quisocristontaꞌ niꞌsárinpoa niꞌton, “nanamën aꞌchináquëꞌ,” tënahuë. Aꞌna tahuëri inasoꞌ oꞌmantararin isoroꞌpaꞌ huaꞌanëntacaso marëꞌ. Naporoꞌ chiminpisopita, nanpirëhuasopita, yaꞌipinpoaꞌ coisë pochin noꞌtëquën shaꞌhuitarinpoaꞌ. Oshahuanoꞌsaꞌ anaꞌintarin. Natërëhuasopitasoꞌ noya acoarinpoaꞌ. Napoaton Yosë marëꞌ noya sacatëquëꞌ.

2 Timoteo 4:8

Napoaton Yosëꞌpaꞌ acanaarinco. Quisocristo oꞌmantahuachin, coisë pochin nicaton, noꞌtëquën shaꞌhuitarinpoaꞌ. Naporoꞌ noya ninahuëso marëꞌ acanaarinco. Co casáchin acanaarincohuëꞌ. Aꞌnapitantaꞌ Quisocristo nosoroatonaꞌ, “Manóton oꞌmantaꞌin,” topisopitantaꞌ Yosëꞌpaꞌ canaapi.

Tito 1:2

Quisocristo imapatëhuaꞌ, aꞌna tahuëri inápaquë quëpantarinpoaꞌ. Yaꞌhuërinꞌpaꞌ yaꞌhuëmiatarihuaꞌ. “Ananpitaantarinpoaꞌ,” taꞌtëhuaꞌ, ina ninarëhuaꞌ. Yosë iráca coꞌhuara isoroꞌpaꞌ acoyátërasohuëꞌ, ninotonpoaꞌ yonquirinpoaꞌ. Inasoꞌ co onporontaꞌ nonpintërinpoahuëꞌ.

Tito 1:4

Titonquën ninshitaranquën. Aꞌchintohuatënquëna natëton, imaran niꞌton, tëhuënchachin huiꞌnahuë pochin niꞌnanquën. Tata Yosë inaora nohuanton, catahuainquën. Asanocancainquën. Quisocristontaꞌ inachachin catahuainquën. Inasoꞌ nichaꞌësarinpoaꞌ.

Tito 3:4

Yosëso nipirinhuëꞌ nosoroatonpoaꞌ, catahuarinpoaꞌ. Inasoꞌ noya niꞌton, huiꞌnin aꞌpaimarin nichaꞌëinpoaso marëꞌ.

Hebreos 9:28

Quisocristontaꞌ aꞌnaroíchin chiminin oshanënpoaꞌ inquitinpoaso marëꞌ. Ina quëran inápaquë panantarin. Nani oshanënpoaꞌ inquitohuachinpoaꞌ, aꞌna tahuëri oꞌmantararin. “¡Ma noyacha Quisocristosoꞌ niꞌton, nichaꞌërinpoa paya!” taꞌtëhuaꞌ, ina ninarëhuaꞌ. Oꞌmantahuachin, imarëhuasopita maquimarinpoa huachi.

1 Pedro 1:3

Ma noyacha Tata Yosëso paya. Quisocristo paꞌpin inasoꞌ. Naꞌcon nosoroatonpoaꞌ, nasitantarëso pochin nasha cancan quëtërinpoaꞌ ina nohuitacaso marëꞌ. Quisocristo huaꞌanëntërinpoaꞌ. “Chiminaponahuëꞌ, nanpiantarin niꞌton, canpoantaꞌ nanpiantarihuaꞌ,” taꞌtëhuaꞌ, noya ninarëhuaꞌ. Natëtomiatërëhuaꞌ.

1 Pedro 1:7

Maꞌsha onpohuatëhuaꞌ, Yosë catahuararinpoaꞌ yaꞌipi cancanënpoa quëran imacaso marëꞌ. Oro tapacaiso marëꞌ aꞌirotopiso pochin nitarinpoaꞌ. Oro inapotohuachinara, noyápiachin pipirin. Yaꞌipi nëꞌhuë huiquitahuaton, orosachin ninin. Inapochachin iporasoꞌ Yosë nohuanton, pënquë ahuiquitërëso pochin maꞌsha onpotërinpoaꞌ noya noya acoinpoaso marëꞌ. Oro paꞌton niponahuëꞌ, co yaꞌhuëmiatërinhuëꞌ. Canpoaso nipirinhuëꞌ, Yosë natëhuatëhuaꞌ, nanpimiatarihuaꞌ. Napoaton naꞌcon yonquiaꞌahuaꞌ cancanënpoa quëran huarëꞌ natëcasoꞌ. Ina Yosë nohuantërinsoꞌ. Natëmiatohuatëhuaꞌ, Yosë noya noya niꞌsarinpoaꞌ. Quisocristo oꞌmantahuachin, noya noya acorarinpoaꞌ. Ina pochin yaꞌnoarihuaꞌ.

2 Pedro 1:1

Ca Simon Pitroco ninshitaranquëmaꞌ, niꞌcoꞌ. ¿Noya yaꞌhuaramaꞌ? Noya cantaꞌ yaꞌhuarahuë. Quisocristoíchin huaꞌanëntërinco niꞌton, inasáchin natërahuë. Ina acorinco nanamën aꞌchinaꞌhuaso marëꞌ. Yosë nohuanton, canpitantaꞌ Quisocristo natëramaꞌ. Quiya pochin imaramaꞌ niꞌton, canpitantaꞌ nichaꞌësarinquëmaꞌ. Ma noyacha Quisocristo anoyacancantërinpoa paya, tënëhuaꞌ. Inasoꞌ Yosë niꞌton, chinotërëhuaꞌ. Oshanënpoaꞌ inquitatonpoaꞌ, nóya niꞌninpoaꞌ. Napopianachin nosororinpoaꞌ niꞌton, catahuarinquëmaꞌ canpitantaꞌ cancanëma quëran huarëꞌ natëcamasoꞌ.

2 Pedro 3:18

Canpitaso nipirinhuëꞌ, Sinioro Quisocristoíchin yonquicoꞌ. Inaora nohuanton, nosororinquëmaꞌ niꞌton, nani tahuëri yacatahuarinquëmaꞌ. Inasáchin yonquihuatamaꞌ, oshaquëran noya noya nohuitaramaꞌ. Inasoꞌ nichaꞌësarinpoaꞌ. Yaꞌipi piyapiꞌsari chinochinaꞌ. Ayaroꞌ tahuëriquë huarëꞌ inasáchin yonquiaꞌahuaꞌ. Amen. Nani ninshitëranquëma huachi. Pitro

1 Juan 4:14

Tata Yosëri huiꞌnin isoroꞌpaquë aꞌpaimarin nichaꞌëinpoaso marëꞌ. Quiyarisoꞌ niꞌnai. Nani tahuëri piyapiꞌsaꞌ shaꞌhuitárai.

Judas 1:21

Inapotatomaꞌ, nani tahuëri nóya cancantocoꞌ Yosë nosoroꞌinquëmaꞌ. Ina naꞌcon nohuantocoꞌ. Quisocristo yonquiatomaꞌ, oꞌmantacasoꞌ tahuëri ninacoꞌ. Oꞌmantahuachin, nosoroatonpoaꞌ, chimirin quëran nichaꞌësarinpoaꞌ. Yosëꞌpaꞌ nanpimiatarihuaꞌ.

Apocalipsis 1:7

Niꞌcochi. Quisocristo oꞌmantararin. Aꞌna tahuëri chitororë chachin oꞌmantararin. Naporoꞌ yaꞌipi piyapiꞌsari niꞌsapi. Iráca ohuanpisopitarintaꞌ niꞌsapi. Nisha nisha piyapiꞌsaꞌ sëtatonaꞌ, naꞌnërapi. “¿Onpoatëhuacha co natërëhuahuë paya?” tosapi. Tëhuënchachin naporapi. Amen.