Tito 1:2 - Chayahuita (Shahui)

² Quisocristo imapatëhuaꞌ, aꞌna tahuëri inápaquë quëpantarinpoaꞌ. Yaꞌhuërinꞌpaꞌ yaꞌhuëmiatarihuaꞌ. “Ananpitaantarinpoaꞌ,” taꞌtëhuaꞌ, ina ninarëhuaꞌ. Yosë iráca coꞌhuara isoroꞌpaꞌ acoyátërasohuëꞌ, ninotonpoaꞌ yonquirinpoaꞌ. Inasoꞌ co onporontaꞌ nonpintërinpoahuëꞌ.

Tito 1:2 ပူးပေါင်းရင်းမြစ်များ

Isaías 1:20

Napoaponahuëꞌ, co natantochináchinhuëꞌ cancantápatamaꞌ, quiraquë taꞌhuantapomaꞌ,” tënin. Sinioro chachin ina pochin shaꞌhuitërinpoaꞌ.

Números 23:19

Yosëso co canpoa pochinhuëꞌ. Co nisha nisha nonaton nonpininhuëꞌ. Maꞌsona topachina, inachachin nisarin. Catahuatacaso shaꞌhuihuachina, catahuatërin.

Mateo 25:34

Ina quëran inchinanëhuë quëran acorahuësopita itarahuë: ‘Yaꞌipinquëmaꞌ huëcatomaꞌ, Yosë huaꞌanëntërinquë yaꞌconquicoꞌ. ¡Ma noyacha Tata Yosë nosororinquëma paya! Isoroꞌpaꞌ ninin quëran huarëꞌ yonquirinquëmaꞌ huaꞌanëntërinquë ayaꞌcoinquëmaso marëꞌ.

Mateo 25:46

Parisitopiquë paꞌsahuatonaꞌ, inaquë yaꞌhuëmiatapi huachi. Noya nipisopitaso nipirinhuëꞌ, Yosë pochin nanpimiatapi huachi,” itërin Quisosori.

Marcos 10:17

Ina quëran Quisoso yapaantarapirinhuëꞌ. Aꞌnara quëmapi taꞌaquirahuaton, isonquirin. —Quëmasoꞌ Maistro noyanquën. ¿Maꞌtaꞌ casoꞌ onpoꞌi nanpimiataꞌhuaso marëꞌ? Shaꞌhuitoco cantaꞌ noya nii, itiirin.

Marcos 10:30

Ca imamacoso marëꞌ napohuatamaꞌ, Yosë naꞌcon naꞌcon quëtantarinquëmaꞌ. Isoroꞌpaquë chachin pasaroꞌ aquëtë pochin pëiroꞌsaꞌ, iyaroꞌsaꞌ, oshiroꞌsaꞌ, mamaroꞌsaꞌ, huaꞌhuaroꞌsaꞌ, noꞌparoꞌsaꞌ inapita quëtarinquëmaꞌ. Noya cancantaramaꞌ. Napoaponahuëꞌ, aparisitarinënquëma antaꞌ. Aꞌna tahuëriso huachi Yosëꞌpaꞌ nanpimiataramaꞌ.

Juan 10:28

Ca nohuanto, nanpimiatapi. Co parisitopiquë paꞌsapihuëꞌ. Noya aꞌpaiarahuë. Co insontaꞌ osërëtarinacohuëꞌ.

Juan 17:2

Nani chiníquën nanan quëtëranco yaꞌipi piyapiꞌsaꞌ huaꞌanëntaꞌhuaso marëꞌ. Quëma nohuanton, aꞌnaquën imasarinaco. Inapitasoꞌ anoyacancantërahuë quëma nohuitatënën nanpimiatacaiso marëꞌ.

Juan 17:24

Quëma nohuanton Tata, isopitasoꞌ imasarinaco. Inapita nohuantërahuë carëꞌ yaꞌhuëcaisoꞌ. Iráca quëran huarëꞌ quëma nosororanco. Coꞌhuara isoroꞌpaꞌ yaꞌhuëyátërasohuëꞌ, nosoroatonco, nóya acoranco. Inatohuaꞌ inapitantaꞌ pantahuachinaꞌ, noya noya niꞌsarinaco. Ina naꞌcon nohuantërahuë.

Juan 5:39

Yosë quiricanën naꞌcon nontëramaꞌ. ‘Ina nontohuatëhuaꞌ, nanpimiatacaiso marëꞌ anitotarinpoaꞌ,’ tënamaꞌ. Napopiramahuëꞌ, co tëhuënchachin natëramahuëꞌ. Ina quiricaquë chachin ninorinaco.

Juan 6:54

Insosona nonëhuë caꞌnëso pochin nipachinaꞌ, huënainëhuëntaꞌ oꞌorëso pochin nipachinaꞌ, nanpimiatarin. Ayaroꞌ tahuëri ananpitaantarahuë.

Juan 6:68

—Co Sinioro aꞌpoarainquënhuëꞌ. Co aꞌna yaꞌhuërinhuëꞌ imacaꞌhuaisoꞌ. Quëma nóya aꞌchintarancoi Yosë nohuitatoi nanpimiataꞌhuaiso marëꞌ.

Hechos 15:18

tënin Yosë. Iráca quëran huarëꞌ yonquirin nisha nisha piyapiꞌsaꞌ nichaꞌëcasoꞌ. Ina yonquiaton, anitotërinpoaꞌ,” tënin pënëntonaꞌpi.

Romanos 1:2

Coꞌhuara Quisocristo oꞌmayatërasohuëꞌ, ina nanan chachin Yosë shaꞌhuitërinpoaꞌ. Quiricanën quëran anitotërinpoaꞌ, iráca ninshitopisoꞌ. Ina nohuanton, naꞌa pënëntonaꞌpiroꞌsaꞌ ninopi.

Romanos 16:25

Nani tahuëriya Yosë chinotahuaꞌ. Yaꞌipi nanitaparin. Ina achinicancaninquëmaꞌ imamiatacamaso marëꞌ. Nanamën tëninso pochachin catahuarinquëmaꞌ. Ina nanan chachin aꞌchintëranquëmaꞌ. Quisocristo nanamën inasoꞌ. Iráca quëran huarëꞌ co nanamën nitotopirinahuëꞌ, iporasoꞌ Yosë anitotërinpoaꞌ.

Romanos 2:7

Noyasáchin nipatëhuaꞌ, noya niꞌsarinpoaꞌ. Yosë yonquiatëhuaꞌ, noya acoinpoaso marëꞌ naꞌcon nohuantohuatëhuaꞌ, ananpitaantarinpoaꞌ. Inarëꞌquënpoaꞌ yaꞌhuëmiatarihuaꞌ.

Romanos 5:2

Quisocristo cancanënpoa quëran natëhuatëhuaꞌ, nichaꞌësarinpoaꞌ. Nosoroatonpoaꞌ, ipora huantaꞌ catahuarinpoaꞌ noya imacaso marëꞌ. Aꞌna tahuëri Yosëꞌpaꞌ paꞌpatëhuaꞌ, Yosë pochin nisarëhuaꞌ. Ina yonquiatëhuaꞌ, nóya cancantarihuaꞌ.

Romanos 5:21

Oshahuanëhuaꞌ niꞌton, chiminpatëhuaꞌ, parisitomiatacasoꞌ yaꞌhuëpirinhuëꞌ. Yosësoꞌ inaora nohuanton, nosoroatonpoaꞌ, catahuarinpoaꞌ. Sinioro Quisocristo anoyacancantohuachinpoaꞌ, nanpimiatarihuaꞌ.

Romanos 5:4

Noya ahuantohuatëhuaꞌ, chini chiníquën cancantarihuaꞌ niꞌton, Yosë noya niꞌninpoaꞌ. “Co naniantarinpoahuëꞌ,” taꞌtëhuaꞌ, inasáchin ninarihuaꞌ.

Romanos 6:23

Piyapi asacatohuatëra, pahuërërëꞌ. Inapochachin co noyahuëꞌ nipatëhuaꞌ, chiminpatëhuaꞌ parisitomiatarihuaꞌ. Yosëso nipirinhuëꞌ, inaora nohuanton nosororinpoaꞌ. Quisocristo imapatëhuaꞌ, ina nohuitatëhuaꞌ, nanpimiatarihua. Inasoꞌ huaꞌanënpoaꞌ. Inasáchin natërëhuaꞌ.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

1 Tesalonicenses 2:15

Iráca cotioroꞌsari pënëntonaꞌpiroꞌsaꞌ noꞌhuitonaꞌ, tëpapi. Ina quëran Sinioro Quisocristo chachin oꞌmahuachina, inantaꞌ tëpaantapi. Quiyantaꞌ aparisitatonacoi, aꞌparinacoi. Napopiso marëꞌ Yosëri co noyahuëꞌ niꞌnin. Tëhuënchachin co yaꞌipi piyapiꞌsaꞌ nosoropihuëꞌ.

1 Tesalonicenses 5:8

Canpoaso nipirinhuëꞌ tahuëri pochin cancantacasoꞌ yaꞌhuërin. Napoaton noya yonquiatëhuaꞌ, Yosë imamiatahuaꞌ. Niꞌcoꞌ iyaroꞌsaꞌ. Inimicoroꞌsaꞌ huëꞌpachinara, sontaroꞌsaꞌ co topinan paꞌpihuëꞌ. Coton huaꞌna quëran nininsoꞌ aꞌmopi. Cascontaꞌ huaꞌna quëran nininsoꞌ yancopi ama inimicori ohuanacaso marëhuëꞌ. Noya nitapahuachinara, co inimicori minsërinhuëꞌ. Huaꞌna aꞌmopiso pochin canpoantaꞌ Yosë natëahuaꞌ catahuainpoaꞌ. Ina natëtëhuaꞌ, noya ninosoroaꞌahuaꞌ. “Yosë aꞌpaiarinpoaꞌ. Oꞌmahuachin, noyá nichaꞌësarinpoaꞌ,” taꞌtëhuaꞌ noya ninahuaꞌ.

1 Timoteo 6:12

Iráca imapisopita niyontonpachinara, chiníquën cancantaton, “Casoꞌ Quisocristo imarahuë,” itëran. Napoaton “Yosë catahuarinco,” taꞌton, sopai minsëquëꞌ. Yosë nani huëntonënquë ayaꞌconinquën niꞌton, imamiatëquëꞌ. Ina quëran aꞌna tahuëri inápaquë nanpimiataran.

1 Timoteo 6:19

Inapohuatamaꞌ, Yosëꞌpaꞌ canamiataramaꞌ. Inaquë noya noya nanpimiatarama,” itëquëꞌ.

2 Timoteo 1:1

Ca Paonoco ninshitaranquën. ¿Noya quëmantaꞌ yaꞌhuaran? Noya cantaꞌ isëquë yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Quisocristo imapatëhuaꞌ, Yosë nohuitatëhuaꞌ, nanpimiatarihuaꞌ.

2 Timoteo 1:9

Yosë chachin anoyacancantërinpoaꞌ. Oshanënpoaꞌ inquitatonpoaꞌ, acorinpoaꞌ nóya nicacaso marëꞌ. Inaora nohuanton, nosororinpoaꞌ. Co noyahuëꞌ nipirëhuahuëꞌ, nosoroatonpoaꞌ, catahuarinpoaꞌ. Coꞌhuara isoroꞌpaꞌ acoyátërasohuëꞌ, ninotonpoaꞌ, nosororinpoaꞌ. Naporoꞌ chinotërin Quisocristo aꞌpaimacasoꞌ. Ina imapatëhuaꞌ, anoyacancantërinpoaꞌ.

2 Timoteo 2:10

“Yosë nohuanton, huayoninsopita oshaquëran imasapi,” taꞌto, yaꞌipiya ahuantërahuë. Quisocristo imapachinaꞌ, nichaꞌësarin. Oshanënaꞌ inquitahuaton, anoyacancantarin niꞌton, aꞌna tahuëri Yosëꞌpaꞌ nanpiantarapi. Inatohuaꞌ noya noya yaꞌhuëcontapi. Co onporontaꞌ pipiapihuëꞌ.

2 Timoteo 2:13

Co noꞌtëquënáchin imapirëhuahuëꞌ, inasoꞌ noꞌtëquën nontërinpoaꞌ niꞌton, noya aꞌpaiarinpoaꞌ. Nani shaꞌhuitërinpoaꞌ niꞌton, co nanitërinhuëꞌ nonpintinpoasoꞌ. Co onporontaꞌ nisha cancantarinhuëꞌ.

2 Timoteo 2:15

Noyasáchin niquëꞌ Yosë noya niꞌinquën. Yosë nanamën maꞌsona tapon naporinsopita noya nitotaton, noꞌtëquën aꞌchinquëꞌ. Ina marëꞌ noya sacatohuatan, co Yosëꞌpaꞌ tapanaranhuëꞌ.

Tito 2:13

Noya cancantatëhuaꞌ, Quisocristo ninarëhuaꞌ. Aꞌna tahuëri chiníquën nanantaton, oꞌmantararin. Inasoꞌ Yosë chachin niꞌton, huënaráchin huënaráchin yaꞌnoarin. Ina quënanpatëhuaꞌ, nóya cancantarihuaꞌ. Chiníquën nanantaton, noyá nichaꞌësarinpoaꞌ.

Tito 2:7

Quëmantaꞌ api, noyasáchin niquëꞌ aꞌnapita nonanainquënso marëꞌ. Noya cancantaton, Yosë nanamën noꞌtëquën aꞌchinquëꞌ. Yaꞌipi yonquinën quëran huarëꞌ aꞌchinquëꞌ.

Tito 3:7

Napoaton iporasoꞌ Yosë noya niꞌninpoaꞌ. Iráca oshahuanpirëhuahuëꞌ, inaora nohuanton, nosoroatonpoaꞌ, nanan anoyatërinpoaꞌ. “Huëntonënquë ayaꞌconinpoaꞌ niꞌton, aꞌna tahuëri yaꞌhuërinꞌpaꞌ yaꞌhuëcontarihuaꞌ,” taꞌtëhuaꞌ, ninarëhuaꞌ. Inatohuaꞌ nanpimiatarihuaꞌ.

1 Juan 2:25

Quisocristo chachin shaꞌhuitërinpoaꞌ: “Imamiatohuatamaco, Yosë nohuitatomaꞌ, nanpimiataramaꞌ,” itërinpoaꞌ.

1 Juan 5:20

Yosë huiꞌnin chachin oꞌmaton, noꞌtëquën Yosë anohuitërinpoaꞌ. Inasáchin noꞌtëquën yonquirin. Yosë nohuitatëhuaꞌ, yonquirinsoráchin imasarëhuaꞌ. Quisocristo nohuitërëhuaꞌ niꞌton, catahuarinpoaꞌ noꞌtëquën yonquicaso marëꞌ. Inaíchin Yosësoꞌ niꞌton, chinotacasoꞌ yaꞌhuërin. Ina nohuitohuatëhuaꞌ, nanpimiatarihuaꞌ.

Judas 1:21

Inapotatomaꞌ, nani tahuëri nóya cancantocoꞌ Yosë nosoroꞌinquëmaꞌ. Ina naꞌcon nohuantocoꞌ. Quisocristo yonquiatomaꞌ, oꞌmantacasoꞌ tahuëri ninacoꞌ. Oꞌmantahuachin, nosoroatonpoaꞌ, chimirin quëran nichaꞌësarinpoaꞌ. Yosëꞌpaꞌ nanpimiatarihuaꞌ.

Apocalipsis 13:8

Huaꞌhuayatërahuëꞌ piyapiꞌsari natëapi. Carniroaꞌhua imapisopitaíchin co ina chinotapihuëꞌ. Inasoꞌ aꞌna quirica yaꞌhuëtërin. Nanpirin quirica itopisoꞌ. Inaquë nininënpita nani ninshitërin. Isoroꞌpaꞌ ninin quëran huarëꞌ imapisopita ninoton, inaquë ninshitërin. “Canpoa marëꞌ Carniroaꞌhua chiminin,” taꞌtonaꞌ, ina imasapi. Aꞌnapitaso nipirinhuëꞌ co nanpirin quiricaquë nininënpita yaꞌhuërinhuëꞌ niꞌton, maꞌsha marë quëran pipirinsoꞌ chinotapi.

Apocalipsis 17:8

Iráca isoroꞌpaquë yaꞌhuërin. Iporasoꞌ co yaꞌhuërinhuëꞌ. Aꞌna tahuëriso nipirinhuëꞌ yaꞌnoantarin. Acoporoꞌ quëran huëantarin. Ayaroꞌ tahuëri nanihuachin, parisitopiquë paꞌsarin. Nipirinhuëꞌ, coꞌhuara paꞌshátërasohuëꞌ, aꞌnanaya yaꞌnoantahuaton, piyapiꞌsaꞌ aꞌpayanarin. Co Quisoso imapihuëꞌ niꞌton, paꞌyanapi. Quisoso imapi naporini, iráca quëran huarëꞌ nininënpita nanpirin quiricaquë ninshichitonhuëꞌ.

1 Samuel 15:29

Yosëso noya noya niꞌton, israiroꞌsanpoa chinotërëhuaꞌ. Co inaso nonpininhuëꞌ. Maꞌsona nicacaso yonquirinsoꞌ, noꞌtëquën nisarin. Inaso co piyapihuë niꞌton, co nisha nisha yonquirinhuëꞌ, itërin.