Santiago 5:16 - Chayahuita (Shahui)

¹⁶ Napoaton maꞌsona tërantaꞌ co noyahuëꞌ nipatëhuaꞌ, imarëhuasopita capini nishaꞌhuitahuaꞌ. “Ina marëꞌ casoꞌ oshahuanahuë,” nitahuaꞌ. Itohuaran capini Yosë nontahuaꞌ anoyachinpoaꞌ. Yaꞌipi co noyahuëꞌ yonquirëhuasopita naniantohuatëhuaꞌ, chiníquën ina nontohuatëhuaꞌ, naꞌcon catahuarinpoaꞌ.

Santiago 5:16 ပူးပေါင်းရင်းမြစ်များ

Génesis 19:29

Ina pochin, ina motopianaquë ninanoroꞌsa Yosëri ataꞌhuantërin. Noto yacapatërinso parti noyá ataꞌhuantërin. Notoso nipirinhuëꞌ, co ataꞌhuantërinhuëꞌ. Apraan yonquiaton, chaꞌëcaso marëꞌ ina quëran ocoirin.

Génesis 20:17

Ina quëran Apraan, Yosë nontërin Apimirico marëꞌ. Ina saꞌin, cosonanënpita, inapita marëntaꞌ, Yosë nontërin. Nontohuachina, Yosëri anoyatërin. Naquëranchin huaꞌhuasha yaꞌhuëtaantacaiso marëꞌ anoyatërin.

Génesis 20:7

Iporaso nipirinhuëꞌ, soꞌin chachin quëtaantaquëꞌ. Inaso pënëntonaꞌpi niꞌton, quëma marëꞌ nontarinco. Ama chiminamaso marëhuëꞌ, nontarinco. Coꞌsoꞌ quëtaantahuatanhuëꞌ, saꞌan, huiꞌnanpita, inapitarëꞌquën chachin, taꞌhuantaran,” itërin huëꞌënquë.

Génesis 32:28

Naporoꞌ ina quëmapirisoꞌ itapon: —Co huachi Cacopo itarinënhuëꞌ. Ipora quëran huarëꞌ Israiro itarinën. Yosë chinitëran, piyapiꞌsanta chinitëran. Chinitaton canatëran niꞌton, ina pochin nohuitarinën, itërin.

2 Samuel 19:19

Ina quëran itapon: —Caso piyapinënco nipirahuëꞌ, iꞌhua Quirosarin quëran pipisënquën noꞌhuiranquën. Napoaponahuëꞌ ina naniantaton, ama anaꞌintocosohuëꞌ. Naporahuaton ama huachi ina yonquiquësohuëꞌ.

Copo naporinso' 42:8

Noꞌhuiranquëmasoꞌ sanocaꞌhuaso marëꞌ, isopocoꞌ: Canchisë toro, nápo chachin carnironta quëpatomaꞌ, Copo niꞌconcoꞌ. Inari canpita marëꞌ inapita tëparahuaton yaꞌipi ahuiquitapon. Inapotahuaton canpita marëꞌ nontarinco. Nontohuachinco, noya natanahuato co maꞌsha onpotaranquëmahuëꞌ. Co noꞌtëquën yonquirapitomacohuëꞌ Copo shaꞌhuitëramaso marëꞌ, naꞌinamaꞌ. Napopiramahuëꞌ, co maꞌsha onpotaranquëmahuëꞌ. Coposoꞌ, noꞌtëquën yonquiarapitonco shaꞌhuirin,” itërin.

Salmos 34:15

Aꞌnapita maꞌshanëna noya nicatonaꞌ, co sëꞌhuahuachinahuëꞌ, Siniorori noya aꞌpaiarin. Maꞌsha onpoatona nontohuachinara, noya natanaton catahuararin.

Éxodo 17:11

Moisësë tanpaquën ihuëpachina, israiroꞌsa canatapi. Aꞌpamahuachinasoꞌ, amaricoroꞌsa canatapi.

Éxodo 9:33

Nani copirno nontohuachinara, ninano quëran pipirin huachi. Pipipon chachin, inápaquë anquirahuaton Yosë nontërin. Nani orahuachina naporo chachin, oꞌnan mëꞌtarin. Huira copi tënin. Ocaintaꞌ, co huachi anotërinhuëꞌ.

Proverbios 15:8

Co noyahuëꞌ nipisopita Yosë marëꞌ maꞌsha acopisoꞌ, Yosëri co noyahuëꞌ niꞌsarin. Noya nipisopitari nontohuachinasoꞌ, noya natanaton catahuarin.

Jeremías 15:1

Aꞌna tahuëri Sinioro nontatonco itaponco: “Israiroꞌsa nichaꞌëahuaso marëꞌ Moisësë, Samoiro, inapita nontopirinacohuë tërantaꞌ, co nosoroꞌitohuëꞌ. Shaꞌhuitëquë noꞌpanëhuë quëran pipiinaꞌ.

Números 11:2

Ina niꞌsahuatonaꞌ, chiníquën Moisësë nontopi. Moisësënta inahua marëꞌ Sinioro nontohuachina, ina nohuanton aꞌnaroáchin pën tacopirin.

Mateo 21:22

Yosë nontohuatamaꞌ, noya natëcoꞌ. “Tëhuënchachin Yosë catahuarinco,” topatamaꞌ, naꞌcon catahuarinquëmaꞌ. Maꞌsona tërantaꞌ nipatamaꞌ, acotarinquëmaꞌ, tënin.

Marcos 1:5

Inaquë notohuaroꞌ piyapiꞌsaꞌ huëꞌpi natanaponaꞌ. Quirosarin quëran huëꞌpi. Yaꞌipi Cotia parti quëran huëcatonaꞌ, natanapi. “Tëhuënchachin co noyahuëꞌ nicatoi, oshahuanai. Catahuacoi Sinioro ina nanianchii,” topachinara, Cortaniquë Coanshari aporintërin.

Lucas 9:6

Ina quëran caꞌtanoꞌsanënpitari paꞌsahuatonaꞌ, noya nanan aꞌchinaꞌpiapi. Nisha nisha ninanoquë pënënaꞌpiapi. Naꞌa caniaꞌpiroꞌsaꞌ anoyatopi.

Juan 9:31

Oshahuanoꞌsari Yosë nontohuachina, co natanatonhuëꞌ, co catahuarinhuëꞌ. Nipirinhuëꞌ, Yosë chinotohuatëhuaꞌ, noya natëhuatëhuaꞌ, natanarinpoaꞌ. Ina nitotërëhuaꞌ.

Hechos 10:38

Ina piquëran Yosëri chachin Quisocristo acorin, Nasaritoquë yaꞌhuërinsoꞌ. Yosë nohuanton, Ispirito Santori noyá yaꞌcoancantërin. Napoaton nani maꞌsha nanitaparin nicacasoꞌ. Nisha nisha parti paaton, nóya ninin. Naꞌa caniaꞌpiroꞌsaꞌ aꞌnaroáchin anoyatërin. Aꞌnaquën sopairi yaꞌcoancantërin niꞌton, chiníquën parisitopirinahuëꞌ, inari anoyatërin. Yosëri catahuarin niꞌton, aꞌnaroáchin anoyatërin.

Hechos 19:18

Ina quëran naꞌamiáchin Quisoso imapisopita huëꞌpi. “Quiyantaꞌ pënotopiraihuëꞌ. Co noyahuëꞌ ninaisoꞌ aꞌpoarai,” itopi.

Hechos 8:24

—Canpitari Yosë nontocoꞌ ama ina pochin anaꞌinchincosohuëꞌ, itërin. Chiníquën paꞌyanaton, naporin.

Romanos 3:10

Yosë quiricanënquë tapon: “Yaꞌipi piyapiꞌsaꞌ co noyahuëꞌ nipi. Co aꞌnaya tërantaꞌ noya nininhuëꞌ.

Romanos 5:19

Aꞌnaíchin co Yosë natërinhuëꞌ niꞌton, yaꞌipinpoaꞌ oshahuanëhuaꞌ. Aꞌnaso nipirinhuëꞌ Yosë natëton, chiminin. Ina marëꞌ naꞌaquënpoaꞌ anoyacancantërinpoaꞌ.

Colosenses 1:9

Naporo quëran huarëꞌ canpita yonquiatëinquëmaꞌ, Yosë nontërai. Nani tahuëriya nontatoi, itërai: “Quëmasoꞌ Sinioro tëhuënchachin anitotërancoi noꞌtëquën natëcaꞌhuainquënso marëꞌ. Corosasëquë imarinënsopita naꞌcon catahuaquëꞌ. Yaꞌipi nohuantëransoꞌ anitotëquëꞌ. Ispirito Santori catahuain noꞌtëquën yonquiꞌinaꞌ.

1 Tesalonicenses 5:17

Apira apira Yosë nontocoꞌ. Ama aꞌna tahuëri tërantaꞌ pahuancosohuëꞌ.

1 Tesalonicenses 5:23

Yosëíchin asanocancaninpoaꞌ. Canpita marëꞌ ina nontarahuë noyásha anoyacancanchinquëmaꞌ. “Catahuaquëꞌ Sinioro, yaꞌipi cancanëna quëran noyápiachin yonquiꞌinaꞌ. Naporahuaton, yaꞌipi yonquinëna quëran noya nininsopitaráchin nohuanchinaꞌ. Quëma nohuanton, yaꞌipi nonëna quëran huarë noyasáchin niinaꞌ,” itërahuë. Ina quëran Sinioro Quisocristo oꞌmantahuachin, nóya niꞌsarinquëmaꞌ.

1 Tesalonicenses 5:25

Quiya marëntaꞌ iyaroꞌsaꞌ Yosë nontocoꞌ.

Hebreos 11:4

Iráca Apiri Yosë natërin. “Yosë catahuarinco,” taꞌton, maꞌsha tëparahuaton, Yosë chinotërin. Inapotohuachina, noya niꞌnin. “Noya natërinco,” tënin. Cainoso nipirinhuëꞌ co ina pochin cancantërinhuëꞌ. Napoaton Apiri nani chiminpirinhuëꞌ, ipora huantaꞌ “Ma noya Apiri natëtërin,” tënëhuaꞌ.

Hebreos 11:7

Iráca Nointaꞌ yaꞌhuëpirinhuëꞌ, aꞌna tahuëri Yosëri itapon: “Co huaꞌqui quëranhuëꞌ maꞌsha onpoaramaꞌ. Co niꞌchinamasohuëꞌ niꞌsaramaꞌ. Naporoꞌ yaꞌipi oshahuanoꞌsaꞌ iiꞌ quëran ataꞌhuantarahuë,” itërin. Coꞌhuara oꞌnayantërasohuëꞌ napotopirinhuëꞌ: “Yosë noꞌtëquën nontërinco,” taꞌton, Noi natëtërin. Shaꞌhuitohuachina, natëton, panca nancha ninin. Ina quëran saꞌin, huiꞌninpitarë chachin chaꞌëpi. Aꞌnapitasoꞌ natanaponaraihuëꞌ, co yanatëpihuëꞌ. Napoaton naꞌinpi. Noiso nipirinhuëꞌ, yaꞌipi cancanën quëran natëtërin. “Noꞌtëquën nontërinco,” topachina, Yosëri noya niꞌnin.

Hebreos 12:13

Yosë iranën noꞌtëquën imapatamaꞌ, co pëshonaramahuëꞌ. Yosë catahuarinquëmaꞌ noya noya yonquicamaso marëꞌ. Aꞌnapitantaꞌ nicatënquëmaꞌ, chiníquën cancantapi. Co huachi sonpacha pochin cancantapihuëꞌ.

Hebreos 13:18

Quiya marëꞌ Yosë nontocoꞌ. Noya nisarai, taꞌtoi, noyápiachin cancantërai. Yaꞌipi cancanëhuëi quëran Yosë yanatërai.

Josué 10:12

Sinioro nohuanton israiroꞌsari amororoꞌsa canapi. Naporo tahuëri chachin Cosoi Yosë nontërin. Sontaronënpita natantonënquë Sinioro nontaton, tapon: “Piꞌi, Capaon ninanoquë tachitëquëꞌ. Quëmanta yoqui, Acaron motopianaquë tachitëquëꞌ,” itërin.

1 Pedro 2:24

Quisocristo isoroꞌpaquë oꞌmaton, piyapi chachin nasitimarin. Oshanënpoa marëꞌ corosëquë chiminin. Inaora yaꞌhuërëtërinpoaꞌ. Yaꞌipi co noyahuëꞌ yonquirëhuasopita naniantatëhuaꞌ noya nicacaso marëꞌ chiminin. Corosëquë parisitaton, anoyacancantërinpoaꞌ.

1 Juan 3:22

Yosë pënëninpoasoꞌ natëhuatëhuaꞌ, noya natanarinpoaꞌ. Ina nohuantërinsoáchin yonquihuatëhuaꞌ, catahuarinpoaꞌ. Ina pochin cancantohuatëhuaꞌ, maꞌpitaso nipatëhuaꞌ, quëtarinpoaꞌ.

1 Samuel 1:12

Ina pochin huaꞌqui Sinioro nontërin. Iri corto huaꞌansoꞌ, Ana nanamën niꞌsárin.

1 Samuel 12:17

Ipora tahuëriꞌsa trico macacaso tahuëri niꞌton, ¿co oꞌnaninhuëꞌ paꞌ? Napopirinhuë Yosë nontohuato, ina nohuanton huira, oꞌnan, inapita anotarin. Inapohuachin, Sinioro yonquirapirinquëmasoꞌ, nitotaramaꞌ: “Copirno acotiinpoaso natanatëhuaꞌ, paꞌpi co noyahuëꞌ ninëhuaꞌ,” tosaramaꞌ, itërin.

1 Samuel 12:18

Ina tosahuaton Samoirosoꞌ Sinioro nontërin: Nontohuachina, naporo chachin ina nohuanton huira, oꞌnan, inapita anotërin. Naporoꞌ israiroꞌsasoꞌ, Sinioro paꞌpi tëꞌhuatopi. Samoironta tëꞌhuatopi.