Santiago 5:11 - Chayahuita (Shahui)

¹¹ Noya ahuantopi niꞌton, Yosëri nóya niꞌnin, tënëhuaꞌ. Copontaꞌ paꞌpi parisitërin, nitotëramaꞌ. Naꞌcon parisitaponahuëꞌ, chiníquën cancantaton, ahuantërin. Maꞌsha onpoaponahuëꞌ, Yosëri catahuarin noya noya pipicasoꞌ. Ina nohuanton, napoin quëran noya noya yonquirin. Yosë nosoroatonpoaꞌ naꞌcon catahuarinpoaꞌ, tënahuë. Napoaton chiníquën cancantatomaꞌ, ahuantocoꞌ.

Santiago 5:11 ပူးပေါင်းရင်းမြစ်များ

Nehemías 9:17

Quëmarisoꞌ naꞌcon catahuapiranhuëꞌ, co ina yayonquipihuëꞌ. Co natëtënënhuëꞌ Iquipitoquë chachin panantacaisoꞌ yonquiantapi. Ina marëꞌ huaꞌan yonípi. Iquipitoroꞌsari camaiantacaiso marëꞌ yatahuërëantapi. Napopirinahuë tërantaꞌ, co ataꞌhuantëranhuëꞌ. Noyápiachin cancantaton, aꞌnaroáchin yanosorotëran. Co aꞌnaroáchin noꞌhuitëranhuëꞌ. Piyapinënpita nosoromiatëran niꞌton, co aꞌporanhuëꞌ.

Nehemías 9:31

Napoaponahuëꞌ nosoromiataton, co aꞌpomiatëranhuëꞌ. Co ataꞌhuantëranhuëꞌ. Noyápiachin cancantaton, nosorochináchin cancantëran niꞌton, naporan.

Copo naporinso' 1:1

Oso parti itopiquë aꞌnara quëmapi yaꞌhuërin, Copo itopisoꞌ. Inasoꞌ noyasáchin nicaton, co manta tëhuërinhuëꞌ. Yosë noꞌtëquën natëton, co manta piyapiꞌsa maꞌsha onpotërinhuëꞌ.

Copo naporinso' 1:2

Shonca huiꞌninpita yaꞌhuëtërin. Canchisë quëmapi, cara sanapi. Notohuaroꞌ pëꞌtahuatërin: Canchisë huaranca ohuicaroꞌsaꞌ, cara huaranca camiyoroꞌsaꞌ, aꞌnatërápo pasa moraroꞌsaꞌ, inapita pëꞌtahuarin. Noꞌpaꞌ ohuërërinsopitanta toronënpitarë chachin aꞌnatërápo pasa yaꞌhuëtërin. Naporahuaton piyapinënpitantaꞌ, huaꞌhuayátërahuë camairin. Napoaton aꞌnapita piꞌi pipirinso parti yaꞌhuëroꞌsa quëran, maꞌhuan maꞌhuan inasoꞌ.

Copo naporinso' 2:10

—¡Coꞌchi quëmasoꞌ noꞌtëquën yonquiranhuë paya! Noya nininsopita Yosë quëtohuachinpoaꞌ, maꞌparëhuaꞌ. Co noyahuëꞌ nininsopitaso quëtohuachinpoaꞌ: ¿Co maꞌpacaso yaꞌhuërinhuëꞌ ti? ¡Inanta mini maꞌpacaso yaꞌhuërin! itërin. Inapoaton Coposoꞌ, parisitaponahuëꞌ ahuantërin. Co piꞌpian tëranta Yosë noꞌhuiton, oshahuaninhuëꞌ.

Salmos 103:13

Ina noya nicatëhua natëhuatëhuaꞌ, nosoroarinpoaꞌ. Quëmapi huiꞌnin nosororinso pochin nitarinpoaꞌ.

Salmos 103:8

Siniorosoꞌ noyápiachin cancantërin. Aꞌnaroáchin yanosorotërin. Co aꞌnaroáchin noꞌhuitërinhuëꞌ. Piyapinënpoapita nosoromiatërinpoaꞌ.

Salmos 116:5

Siniorosoꞌ nosorotochináchin cancantërin. Noya coisë pochin paꞌpoyatërin. Noyápiachin cancantërin.

Salmos 119:132

Nosororinënquënsopitasoꞌ, noya nicaton nosororan. Ina pochin cantaꞌ, noya nicatonco nosoroco.

Salmos 145:8

Siniorosoꞌ noyápiachin cancantërin. Aꞌnaroáchin yanosorotërin. Co aꞌnaroáchin noꞌhuitërinhuëꞌ. Naporahuaton nosoromiatërinpoaꞌ.

Salmos 37:37

Noya nicaton noꞌtëquënáchin imarinsoꞌ, niꞌquëꞌ. Inasoꞌ co paꞌyan paꞌyan tëcatonhuëꞌ, sano cancantapon.

Salmos 51:1

Quëmasoꞌ Sinioro noyanquën niꞌton, nosoroco. Nosoromiatatonco oshanëhuë inquitoco.

Éxodo 34:6

Moisësë naꞌhuëtapon pochin chiníquën nonsarin: —¡Caso Sinioroco! ¡Caso Sinioroco! Caso Yosëco noyápiachin cancantërahuë. Aꞌnaroáchin yanosorotërahuë. Co aꞌnaroáchin noꞌhuitërahuëꞌ. Piyapinëhuëpita nosoromiatërahuë. Noꞌtëquënáchin nonahuë.

Isaías 63:7

Onpopinsona Sinioro nosorotërinso yonquiato, shaꞌhuiarahuë. Maꞌpitaquësona catahuarinpoaso yonquiato, cantarahuë. Israiro huënton nosoromiatërinso marëꞌ napoarahuë. Paꞌpi nosoroaton catahuarinso marëꞌ inapoarahuë.

Daniel 9:9

Quëmaso napoaponahuëꞌ, Yosënëhuëinquën niꞌton, nosorocoi. Nosoroatoncoi nichaꞌëcoi. Quiyasoꞌ co natëtëinquënhuë, pënënancoisopita co natanaihuë pochin ninai. Pënëntonaꞌpiroꞌsa quëran aꞌchintopirancoihuëꞌ, co natëraihuëꞌ.

Joel 2:13

Sinioro chachin tahuërëtaantacoꞌ. Inaso Yosënënpoaꞌ. Co napion sëtohuatamara, motoꞌ sëꞌmoramaꞌ. Ina pochin cancantatomaꞌ, oshanëma marëꞌ sëtocoꞌ. Siniorosoꞌ, noyápiachin cancantaton, aꞌnaroáchin yanosorotërin. Co aꞌnaroáchin noꞌhuitërinhuëꞌ. Nosoromiatërinpoaꞌ. Inasoꞌ, co insonta anaꞌintacaso nohuantërinhuëꞌ. Naporin.

Miqueas 7:18

Siniorosoꞌ noya niꞌton, ina nontato: “¡Quëmaíchin Yosënquën. Co aꞌna quëma pochin yaꞌhuërinhuëꞌ! Piyapiꞌsa co noyahuëꞌ nipirinahuëꞌ, oshanëna marëꞌ sëtatona nontërinën niꞌton, nichaꞌëran. Caraya israiroꞌsacoi quëparitëraisopita, co natantochináchinhuëꞌ cancantatoi tëhuëtërainquën. Inapopiraihuëꞌ nontërainquën niꞌton, tëhuëtërainquënsoꞌ naniantëran. Noꞌhuípiro nipiraihuëꞌ nosororancoi niꞌton, noꞌhuitëransoꞌ asanoran. Inapoaton catahuantarancoi.

Números 14:18

“Caso co aꞌnaroáchin noꞌhuitërahuëꞌ. Piyapinëhuëpita nosoromiatërahuë. Co noyahuëꞌ nipirinahuëꞌ, oshanëna inquitato nanan anoyatërahuë. Co natëtonacohuëꞌ oshahuanpachinantaꞌ, inapotërahuë. Tëhuëhuachinaso napoaponahuëꞌ, onpopionta anaꞌintarahuë. Huiꞌninpita, shinpita, inapitanta anaꞌintarahuë. Shiparina shinpita nicoantarinquë huarënta anaꞌintápo,” tënan.

Mateo 10:22

Imaramaco niꞌton, naꞌa piyapiꞌsaꞌ noꞌhuiarinënquëmaꞌ. Nipirinhuëꞌ, co aꞌpohuatamacohuëꞌ, nichaꞌësaranquëma huachi.

Lucas 1:50

Iráca chinotopisopitantaꞌ nosororin. Ipora huantaꞌ ina chinotohuatëhuaꞌ, nosoroarinpoaꞌ.

Lucas 11:10

Tëhuënchachin maꞌsha nitohuatamaꞌ, quëtarinquëmaꞌ. Huaꞌquiꞌ maꞌsha yonípatamaꞌ, quënanaramaꞌ. Yaꞌcoana piꞌnirëso pochin nipatamaꞌ, iꞌsoatarinquëmaꞌ.

Lucas 6:36

Tata Yosëri yaꞌipi piyapiꞌsaꞌ nosororin. Inapochachin canpitantaꞌ aꞌnapita nosorocoꞌ,” itërin.

Romanos 2:4

Yosë nosororinpoasoꞌ co noꞌtëquën yonquiramahuëꞌ. “Co aꞌnaroáchin noꞌhuirinpoahuëꞌ,” taꞌtomaꞌ, co noyahuëꞌ ninamaꞌ. Tëhuënchachin co aꞌnaroáchin anaꞌintërinquëmahuëꞌ. “Oshaquëran co noyahuëꞌ yonquipisopita naniantaponaꞌ nimara,” taꞌton, ninarárin.

Efesios 1:6

Huiꞌnin naꞌcon nosororin. Ina imapatëhuaꞌ, canpoantaꞌ naꞌcon nosoroarinpoaꞌ. Ina yonquiatëhuaꞌ, “Ma noyacha Tata Yosësoꞌ niꞌton, inaora nohuanton, nosororinpoa paya,” tosarëhuaꞌ.

Efesios 2:4

Yosëso nipirinhuëꞌ naꞌcon nosororinpoaꞌ. Nosoroatonpoaꞌ, yanichaꞌërinpoaꞌ.

Hebreos 10:39

Insosona aꞌpohuachinaꞌ, parisitopiquë paꞌsapi. Canpoaso nipirinhuëꞌ, co aꞌpoarihuahuëꞌ. Natërëhuaꞌ niꞌton, nichaꞌësarinpoa huachi.

Hebreos 3:14

Iráca Quisocristo natërëhuaꞌ. Chiminaquë huarëꞌ noya imahuaꞌ. Co aꞌpohuatëhuahuëꞌ, Quisocristorëꞌquënpoaꞌ yaꞌhuëcontarihuaꞌ.

Hebreos 3:6

Quisocristoso nipirinhuëꞌ co inpriatohuëꞌ. Yosë huiꞌnin chachin niꞌton, chini chiníquën nanantërin. Paꞌpin natëton, nóya huaꞌanëntarinpoa huachi. Napoaton chiníquën cancantatëhuaꞌ, chiminaquë huarëꞌ Quisocristo natëahuaꞌ. “Co naniantarinpoahuëꞌ,” taꞌtëhuaꞌ, noya cancantahuaꞌ. Imamiatohuatëhuaꞌ, piyapinënpita chachin nisarihuaꞌ.

Santiago 1:12

Yaꞌipinpoaꞌ maꞌsha onporëhuaꞌ. Caniorëhuaꞌ, parisitërëhuaꞌ, naporëhuaꞌ. Noya ahuantohuatëhuaꞌ, nóya cancantarihuaꞌ. “Parisitaponaraihuëꞌ, nóya imasarinaco,” taꞌton, Yosë noya niꞌsarinpoaꞌ. Ina marëꞌ inápaquë noya acanararinpoaꞌ. Nanpimiatarihuaꞌ. “Tëhuënchachin nosorohuatamaco, ananpitaantaranquëmaꞌ,” itërinpoaꞌ. Shaꞌhuitërinpoaꞌ niꞌton, co onporontaꞌ nonpintarinpoahuëꞌ.

Santiago 1:2

Nisha nisha maꞌsha onpoapomarahuëꞌ iyaroꞌsaꞌ, ama sëtocosohuëꞌ. Noya cancantocoꞌ.

1 Pedro 1:13

Napoaton chiníquën cancantatomaꞌ, yonquicoꞌ noya nicacamasoꞌ. Sano yonquicoꞌ. Quisocristo oꞌmantahuachin, inaora nohuanton, nichaꞌësarinpoaꞌ. Ina ninatomaꞌ, noya cancantocoꞌ.

1 Pedro 3:14

Aꞌna tahuëriso nipirinhuëꞌ imaramaso marëꞌ aparisitohuachinënquëmaꞌ, ama tëꞌhuatocosohuëꞌ. “Quisocristo marëꞌ parisitarëhuaꞌ,” taꞌtomaꞌ, noya cancantocoꞌ. Yosë noya catahuarinquëmaꞌ niꞌton, ama paꞌyancosohuëꞌ.

2 Pedro 2:9

Inapochachin ipora Quisocristo imapatëhuaꞌ, Yosë nanitërin catahuainpoasoꞌ. Sopai yaminsëpirinpoahuëntaꞌ, Yosë catahuarinpoaꞌ chaꞌëcaso marëꞌ. Oshahuanoꞌsaso nipirinhuëꞌ anaꞌintarin. Nani yonquirin chiníquën anaꞌintacasoꞌ. Ayaroꞌ tahuëri nanihuachin, noꞌtëquën anaꞌintaton, parisitopiquë aꞌpararin.