Santiago 4:1 - Chayahuita (Shahui)

¹ ¿Onpoatomataꞌ ninoꞌhuitomaꞌ, yaniahuëramaꞌ? tënahuë, yonquiato. Canpitaora cancanëma quëran nisha nisha maꞌsha nohuantëramaꞌ niꞌton, co noyahuëꞌ cancantëramaꞌ. Nipaꞌyatacasoáchin yonquiramaꞌ. Napoaton ninoꞌhuiramaꞌ.

Santiago 4:1 ပူးပေါင်းရင်းမြစ်များ

Mateo 15:19

Co noyahuëꞌ yonquihuatamara, tëpatëramaꞌ, nitëhuananpitëramaꞌ, monshihuanacasoáchin yonquiramaꞌ, ihuatëramaꞌ, nonpintëramaꞌ, pinotëramaꞌ.

Juan 8:44

Sopai huaꞌan mini tataparinquëmasoꞌ. Ina pochin cancantatomaꞌ, inasáchin natëaramaꞌ. Iráca quëran huarëꞌ piyapiꞌsaꞌ tëpanaꞌpi inasoꞌ. Co noꞌtëquën nitononinhuëꞌ niꞌton, co piꞌpisha tërantaꞌ natëcasoꞌ yaꞌhuërinhuëꞌ. Paꞌpi nonpintëꞌ inasoꞌ. Inachin, nonpinacasoráchin cancantërin. Ina nohuanton, nonpinëꞌ.

Romanos 7:23

Aꞌna cancan nohuantërin. Aꞌna cancanso nipirinhuëꞌ, co nohuantërinhuëꞌ. Co noyahuëꞌ nicacasoáchin yonquirin. Ina canarinco niꞌton, co noyahuëꞌ ninahuë.

Romanos 7:5

Iráca, canpoara nipaꞌyatacasoáchin yonquirëhuaꞌ. Co noyahuëꞌ cancantërëhuaꞌ. Pënënpachinënpoara, aquë aquëtëꞌ co noyahuëꞌ yonquiatëhuaꞌ, co noyahuëꞌ ninëhuaꞌ. Ina marëꞌ chiminpatëhuaꞌ, parisitomiatacasoꞌ yaꞌhuërin.

Romanos 8:7

Co noyahuëꞌ nicacasoráchin paꞌyatohuatëhuaꞌ, Yosë inimicotarëhuaꞌ. Co Yosë pënëntërinsoꞌ natëcasoꞌ nohuantarëhuahuëꞌ. Co nanitarëhuahuëꞌ ina natëcasoꞌ.

Gálatas 5:17

Ispirito Santo noyasáchin ayonquiinpoasoꞌ nohuantopirinhuëꞌ, ipora huantaꞌ co noyahuëꞌ yonquirëhuaꞌ. Ispirito Santoso nipirinhuëꞌ pënëninpoaꞌ ama ina pochin cancantacaso marëhuëꞌ. Co noyahuëꞌ yonquihuatëhuaꞌ, co nanitërëhuahuëꞌ Ispirito Santo natëcasoꞌ. Catoꞌ cancan pochin yaꞌhuëtërinpoaꞌ. Itohuara capini nipatëtatë pochin nipi. Noya cancantacasoꞌ nohuantopirëhuahuëꞌ, canpoara co nanitërëhuahuëꞌ noya nicacasoꞌ.

Colosenses 3:5

Napoaton piꞌpian tërantaꞌ co noyahuëꞌ yonquihuatamaꞌ, aꞌnaroáchin naniantocoꞌ. Ama monshihuancosohuëꞌ. Ama taparoꞌ yonquicosohuëꞌ. Ama aꞌna sanapi sëꞌhuacamasoꞌ yonquicosohuëꞌ. Ama aꞌna quëmapi saꞌin noyapacosohuëꞌ. Ama nani maꞌsha nohuantapatocosohuëꞌ. Aꞌnaquënsoꞌ maꞌsha naꞌcon nohuantatonaꞌ, mamanshi moshapiso pochin niconpi.

2 Timoteo 2:23

Aꞌnaquën co Yosë yonquiatonahuëꞌ, nisha nisha ninontapi. Topinan quëran ninontatonaꞌ, ninoꞌhuiapi. Quëmaso nipirinhuëꞌ ama inapitarëꞌquën chiníquën ninontocosohuëꞌ.

Tito 3:3

Iráca canpoantaꞌ co noyahuëꞌ cancantërëhuaꞌ. Coꞌhuara Yosë nanamën nitochatërarihuahuëꞌ, co yonquirëhuahuëꞌ. Co yanatërëhuahuëꞌ. Sopai nonpintërinpoaꞌ niꞌton, nisha nisha nicacasoꞌ nohuantërëhuaꞌ. Maꞌpitasona paꞌyatacasoáchin yonquirëhuaꞌ. Aꞌna piyapi maꞌshanënpita noyapatërëhuaꞌ. Ninoꞌhuitëhuaꞌ, co niquëꞌyarëhuahuëꞌ. Noꞌhuípiroꞌ ninëhuaꞌ. Inapoatëhuaꞌ, topinan quëran yaꞌhuërëhuaꞌ.

Tito 3:9

Aꞌnaquën co noyahuëꞌ yonquiatonaꞌ, nisha nisha nonpi. Cotio mashocoroꞌsaꞌ yonquiatonaꞌ, inahuara yonquinëna quëran nisha nisha aꞌchinpi. Cotioroꞌsaꞌ iráca pënëntopisoꞌ nisha nisha aꞌchinatonaꞌ, ninoꞌhuipi. Ama inapita natancosohuëꞌ. Ina pochin ninontohuachinara, topinan quëran ninontopi. Co mantaꞌ catahuarinpoahuëꞌ. Yosë nanamënáchin imacasoꞌ yaꞌhuërin.

Santiago 1:14

Canpoara nohuanton, co noyahuëꞌ cancantatëhuaꞌ, co noyahuëꞌ yonquirëhuaꞌ. Inachin inachin yonquihuatëhuaꞌ, chiniiꞌ quëparinposo pochin co noyahuëꞌ nicacasoꞌ yonquirëhuaꞌ.

Santiago 4:3

Aꞌnaquëmaꞌ Yosë nontohuatamara, maꞌsha nipiramahuëꞌ, co quëtërinquëmahuëꞌ. Canpitaora nipaꞌyatacamaso marëꞌ maꞌsha nohuantëramaꞌ niꞌton, co quëtërinquëmahuëꞌ.

1 Pedro 1:14

Huaꞌhuaroꞌsaꞌ noya nipachinara, paꞌpinaꞌ natëpi. Inapochachin canpitantaꞌ Yosëíchin natëcoꞌ. Iráca co Yosë nanamën nitotatomarahuëꞌ, co yonquiramahuëꞌ. Yanoꞌpihuatamara, noꞌpiramaꞌ. Co noyahuëꞌ yonquihuatamara, co noyahuëꞌ ninamaꞌ. Iporaso nipirinhuëꞌ ama inapocosohuëꞌ.

1 Pedro 2:11

Nosororanquëmaꞌ iyaroꞌsaꞌ niꞌton, pënënaranquëmaꞌ. Quisocristo imatomaꞌ, co isoroꞌpaquë yaꞌhuëmiataramahuëꞌ. Yosëꞌpaꞌ yaꞌhuëmiataramasoꞌ. Napoaton ama maꞌsha isoroꞌpaquë yaꞌhuërinsopitaráchin yonquicosohuëꞌ. Isoroꞌpaquë noꞌpiápi, monshihuanapi, taparosáchin nonatonaꞌ, capa cancantapi. Ama ina pochin cancantocosohuëꞌ. Ina pochin cancantohuatamaꞌ, sopai minsëarinquëmaꞌ, co Yosë pochin cancantaramahuëꞌ.

2 Pedro 2:18

Inahuara nipaꞌyatatonaꞌ, topinan quëran nontarinënquëmaꞌ. Nisha nisha yonquipi. Nasha yaꞌconpisopita aꞌnaroáchin nonpintopi. Ipora huarëꞌ co noyahuëꞌ yonquipisopita naniantapirinahuëꞌ. “Huëcoꞌ noꞌpiahuaꞌ. Noya noꞌpicasoꞌ. Noya monshihuanacasoꞌ,” itopi nonpintatonaꞌ.

2 Pedro 3:3

Isoꞌ naꞌcon yonquicoꞌ. Oꞌmantacasoꞌ tahuëri yaꞌcaritohuachin, co noyahuëꞌ piyapiꞌsaꞌ yaꞌhuaponaꞌ. Co Yosë natëtonaraihuëꞌ, maꞌsona yonquipisoꞌ nisapi. Co noyahuëꞌ cancantapi. Quisocristo shaꞌhuitërinpoasoꞌ tëhuaapi.