Santiago 3:17 - Chayahuita (Shahui)

¹⁷ Yosëso nipirinhuëꞌ, noꞌtëquën ayonquirinpoaꞌ. Ina catahuahuachinpoaꞌ, noyápiachin cancantarihuaꞌ. Co mantaꞌ noꞌhuitarihuahuëꞌ. Sanoanan quëran nontarihuaꞌ. Aꞌnapita pënënpachinpoaꞌ, noya natanarihuaꞌ. Piyapiꞌsaꞌ nosoroarihuaꞌ. Naporahuaton noyasáchin nisarëhuaꞌ. Co nisha nisha yonquiarihuahuëꞌ. Co nonpintarihuahuëꞌ. Yosëíchin catahuarinpoaꞌ ina pochin cancantacasoꞌ.

Santiago 3:17 ပူးပေါင်းရင်းမြစ်များ

1 Reyes 3:12

Napoaton natanancosoꞌ, carinquën quëtaranquën. Ca nohuanton aꞌnapita quëran yonqui yonquínahuan nisaran. Iráca quëran huarëꞌ co insonta quëma pochin nininhuëꞌ. Aꞌna tahuërinta yaꞌhuëpirinahuëꞌ co quëma pochin nisapihuëꞌ.

1 Reyes 3:28

Naporinso yaꞌipi israiroꞌsa natantopi. Ina natantatonaꞌ, paꞌyanpi huachi: “Tëhuënchachin Yosëri catahuarin. Napoaton yonquínahuan pochin noꞌtëquën shaꞌhuirin,” topi.

1 Reyes 3:9

Ina pochin nacionsoꞌ, co insonta nanitërinhuëꞌ inaora noya huaꞌanëntacasoꞌ. ¡Quëmari anitotohuatan tëhuënchinsoꞌ, noya camaitapon! Napoaton yonquínahuan nicaꞌhuaso marëꞌ catahuaco. Noya nininsoꞌ, co noyahuëꞌ, nininsoꞌ inapita nitochi. Inapita nitotohuato piyanënpita noya huaꞌanëntarahuë,” itërin.

Isaías 2:4

Nisha nisha nacionoꞌsa Siniorori coisë pochin nicaton noꞌtëquën shaꞌhuitarin. Nisha nisha piyapiroꞌsa ninoꞌhuirápirinahuëꞌ, acopitapon. Sahuëninënaꞌ, noꞌpaꞌ ohuërënanoꞌsa atarantaponaꞌ. Nansanënantaꞌ, yaquitonanoꞌsa atarantaponaꞌ. Co inso piyapiroꞌsa tërantaꞌ, niahuëcaiso marëꞌ ohuarapisopita macaponahuëꞌ. Naporahuatonaꞌ, co huachi niahuëcaiso marëꞌ niaꞌchintaponahuëꞌ.

Isaías 32:6

Co noyahuëꞌ nipisopitasoꞌ, naponin nonaponaꞌ. Yonquinënaquë co noyahuëꞌ nicacaisoꞌ yonquiapi. Mantanta nicatonaꞌ, co Yosë pënëntërinsoꞌ natëpihuëꞌ. Sinioropita yanonpinapipitërapi. Tanapisopita co aꞌcapihuëꞌ. Yamoropisopitantaꞌ, co yaoꞌshitopihuëꞌ.

Isaías 40:11

Huaꞌanëni ohuicanënpita aꞌpairin. Carniroaꞌhuaroꞌsaꞌ, iporahuaton quëparin. Nasha huaipisopita oshaquëran quëpaton aꞌcarin. Ina naporinso pochin canpoantaꞌ, Sinioro noya aꞌpaiarinpoaꞌ,” itocoꞌ.

Daniel 1:17

Yosë nohuanton inapita huiꞌnapiꞌsasoꞌ, yonqui yonquícharahuatonaꞌ, nitoto nitotócharapi. Nisha nananquë quiricaroꞌsa ninshitopirinahuëꞌ, inanta nitotaantapi. Yaꞌipi aꞌchintopiso nitotopi. Naporahuaton Nanirisoꞌ, maꞌsona tapon huaꞌnapisopitanta nitotërin. Huaꞌnarëso pochin niꞌpachinantaꞌ, maꞌsona tapon naporinso nitotërin.

Malaquías 2:9

Napoatoma co natëramacohuëꞌ. Naporahuaton aꞌchinpatamantaꞌ, co yaꞌipi piyapiꞌsa napopináchin niꞌnamahuëꞌ. Ina marëꞌ ca nohuanton, naní quëran apinapiroꞌsa pochin nicatënënquëmaꞌ, nocanaponënquëmaꞌ. Ca Sinioroco yaꞌipi nanitapato napotaranquëmaꞌ,” itaantarin.

Malaquías 3:3

Huënsëaton corto huaꞌanoꞌsa tapararin. Oro, prata, inapita pënquë asoquipiso pochin co noyahuëꞌ nipisopita inquitarin. Naporo huarëꞌ Nihui quëran pipipisopitasoꞌ, noꞌtën chachin ca marëꞌ maꞌsha quëpisoꞌ, aꞌnotaponaco.

Mateo 23:28

Inapochachin canpitasoꞌ ninamaꞌ. Piyapiꞌsaꞌ noya nicatënënquëmaꞌ: ‘Ma noya maistroꞌsaꞌ Yosë natëpi,’ topirinahuëꞌ. Acopoꞌ cancanëma quëranso nonpinatomaꞌ, paꞌpi co noyahuëꞌ cancantëramaꞌ.

Mateo 5:8

Yaꞌipi cancanëma quëran imapatamaꞌ, Yosë nohuitaramaꞌ. Naporahuaton, aꞌna tahuëri ina quënancontahuatamaꞌ, noyá nohuitaramaꞌ.

Mateo 5:9

Isoroꞌpaquë naꞌa piyapiꞌsaꞌ ninoꞌhuipirinahuëꞌ, canpitari catahuacoꞌ noya ninonchinaꞌ. Ina marëꞌ Yosë noya niꞌsarinquëmaꞌ. Huiꞌnin pochin cancantiarinquëmaꞌ.

Lucas 21:15

Catahuaranquëmaꞌ noya nonacamasoꞌ. Ca nohuanto, noya yonquiaramaꞌ. Inimiconënpita co nanitapihuëꞌ aꞌpaniinquëmasoꞌ.

Lucas 6:36

Tata Yosëri yaꞌipi piyapiꞌsaꞌ nosororin. Inapochachin canpitantaꞌ aꞌnapita nosorocoꞌ,” itërin.

Juan 1:14

Quisocristo isoroꞌpaquë nasitimarin. Yosë niponahuëꞌ, piyapi chachin nasitërin. Canpoarë chachin yaꞌhuërin. Quiyasoꞌ niꞌnai. Inasoꞌ nóya, tënai. Yosë pochachin ninin. Inaíchin huiꞌnin inasoꞌ. Inaora nohuanton nosororinpoaꞌ. Noꞌtëquën nontërinpoaꞌ.

Juan 1:47

Natanino yaꞌcarirahuasoꞌ, Quisosori quënanin. —Pasoꞌ quëmapi niꞌcoꞌ. Israiromia chachin inasoꞌ. Co piꞌpisha tërantaꞌ nonpininhuëꞌ, itërin Quisosori.

Hechos 9:36

Copëquë aꞌna sanapi Tapita itopisoꞌ yaꞌhuërin. Crico nananquë Torëcasa itopi. Inantaꞌ Quisoso imarin. Noya sanapi niꞌton, saꞌahuaroꞌsaꞌ nosoroaton, nani tahuëri catahuarin. Pahuantohuachinara, maꞌsha topinan nicanarin.

Romanos 12:18

Ama piyapiꞌsaꞌ noꞌhuicosohuëꞌ. Noꞌhuihuachinënquëmaꞌ, ama canpitarisoꞌ noꞌhuicosohuëꞌ. Onpopiontaꞌ nanan anoyatocoꞌ.

Romanos 12:9

Yaꞌipi piyapiꞌsaꞌ nosorocoꞌ. Cancanëma quëran huarëꞌ nosorocoꞌ. Co noyahuëꞌ ninamasopita aꞌpocoꞌ. Noyasáchin nicoꞌ.

Romanos 15:14

Canpitasoꞌ iyaroꞌsaꞌ, nóya piyapinquëmaꞌ. Yosë nanamën noya nitotëramaꞌ. Napoaton nipënënamasoꞌ nanitaramaꞌ, tënahuë.

1 Corintios 12:8

Ispirito Santo nohuanton, aꞌnaquën noyá nitotërin pënëntacasoꞌ. Noꞌtëquën yonquiaton, pënëntarin. Aꞌnaquëontaꞌ noya noya nitotaton, aꞌchinarin.

2 Corintios 10:1

Ca Paonoco sanoanan quëran pënënanquëmaꞌ. Aꞌnaquën napopi: “Paono aquë quëran ninshitohuachinpoara, chiníquën nanan aꞌpatirinpoaꞌ. Isëquë chachin yaꞌhuapon, tëꞌhuatatonpoaꞌ, co chiníquën pënëninpoahuëꞌ,” topi natantërahuë. Quisocristosoꞌ chiníquën nanantaponahuëꞌ, co noꞌhuirinpoahuëꞌ. Sanoanan quëran pënëninpoaꞌ. Ina pochin cancantato, cantaꞌ sanoanan quëran pënënanquëmaꞌ.

2 Corintios 6:6

“Quisocristo imarai,” taꞌtoi, noyasáchin ninai. Yosë nanamën noya nitotërai. Maꞌsha onpotopirinacoihuëꞌ, co noꞌhuiraihuëꞌ, ahuantërai. Yaꞌipi piyapiꞌsaꞌ nóya nontatoi, catahuarai. Ispirito Santo yaꞌcoancantërincoi niꞌton, catahuarincoi noya nicaꞌhuaisoꞌ. Tëhuënchachin cancanëhuëi quëran huarëꞌ piyapiꞌsaꞌ nosororai.

2 Corintios 7:11

Canpitasoꞌ sëtatomaꞌ, naꞌcon naꞌcon Yosë yonquiramaꞌ. Ina quëran “Tëhuënchachin co noyahuëꞌ nicatëhuaꞌ, oshahuanëhuaꞌ. Co noyahuëꞌ ninëhuasopita naniantahuaꞌ, Yosë anaꞌintohuachinpoaꞌ,” tënamaꞌ. Cantaꞌ noya yonquiramaco. “Manóton Paono huëꞌin catahuainpoaso marëꞌ. Chiníquën cancantatëhuaꞌ, noꞌtëquën natëahuaꞌ,” tënamaꞌ. Oshahuanaꞌpi co noyahuëꞌ nininso marëꞌ anaꞌintëramaꞌ noya nicacaso marëꞌ. Yaꞌipi co noyahuëꞌ yonquiramasopita naniantatomaꞌ, noya cancantaantaramaꞌ.

2 Corintios 9:10

Niꞌcoꞌ. Yosë nohuanton, yaꞌpirin yaꞌhuërin shacacaso marëꞌ. Shaꞌpatëra, ina nohuanton, naꞌa papotërin capacaso marëꞌ. Inapochachin ina nohuanton, maꞌsha yaꞌhuëtarinquëmaꞌ. Aꞌnapita topinan quëtohuatamaꞌ, Yosë catahuarinquëmaꞌ noya noya cancantacamaso marëꞌ.

Efesios 5:9

Tahuëri pochin cancantohuatamaꞌ, nóya nisaramaꞌ. Noꞌtëquënáchin yonquiatomaꞌ, noyápiachin cancantaramaꞌ.

Filipenses 1:11

Quisocristo catahuahuachinquëmaꞌ, noyasáchin nisaramaꞌ. Ina quëran aꞌnapitantaꞌ nicatënquëmaꞌ, Yosë yonquiapi. “Ma noya Yosëri catahuarin niꞌton, noya nipi. Ma noyacha Yosëso paya,” tosapi.

Filipenses 4:8

Isoíchin iyaroꞌsaꞌ pënënaranquëmaꞌ. Noꞌtën nanansáchin yonquicoꞌ. Noya imatonaꞌ, noya nipisopita yonquicoꞌ. Ama nonpin nananoꞌsaꞌ natëtocosohuëꞌ. Noyápiachin cancantocoꞌ. Aꞌnapita noyasáchin yonquirapicoꞌ. Noya nahuininsoráchin yonquicoꞌ. Aꞌnapita noya nipisoꞌ yonquiatomaꞌ: “Ma noyacha Yosëri catahuarin paya,” itocoꞌ. Ina pochin yonquihuatamaꞌ, Yosë noya niꞌsarinquëmaꞌ.

Colosenses 1:10

Catahuaquëꞌ Sinioro quëma nohuantëranso chachin niinaꞌ. Inapohuachinaꞌ, noya noya niꞌsaran. Catahuaquëꞌ noyasáchin niinaꞌ. Naꞌcon naꞌcon nohuichinënquën.

1 Tesalonicenses 2:7

Quisocristo aꞌparincoi niꞌton, chiníquën nanan quëtërincoi. Napoaponahuëꞌ, co chiníquën nontërainquëmahuëꞌ. Co inso tërantaꞌ huaꞌan pochin camairaihuëꞌ natëinacoiso marëꞌ. Sanoanan quëran nontërainquëmaꞌ. Sanapi huaꞌhuinpita nosoroaton, noya nocomarinso pochin quiyarimantaꞌ niꞌnainquëmaꞌ.

1 Timoteo 5:21

Tata Yosë Quisocristorë chachin niꞌsarinpoaꞌ. Anquëniroꞌsaꞌ acorinsopitantaꞌ niꞌsarinënpoaꞌ. Napoaton api, yaꞌipiya noꞌtëquën pënënquëꞌ. Ama aꞌnaroáchin anaꞌintëquësohuëꞌ. Noya natantëquëꞌ noꞌtëquën nitotacaso marëꞌ. Ina quëran noꞌtëquën yonquiaton, pënënquëꞌ. Inso tërantaꞌ co noyahuëꞌ nipachina, pënënacasoꞌ yaꞌhuërin.

2 Timoteo 2:24

Sinioro piyapinënpoaꞌ nipatëhuaꞌ, co piyapiꞌsaꞌ noꞌhuicasoꞌ yaꞌhuërinhuëꞌ. Noya nontacasoꞌ yaꞌhuërin. Noya nitotatëhuaꞌ, aꞌchintahuaꞌ. Noꞌhuipirinpoahuëꞌ, ama noꞌhuiahuasohuëꞌ, ahuantahuaꞌ. Sanoanan quëran nontahuaꞌ.

Tito 1:15

Noyápiachin cancantohuatëhuaꞌ, yaꞌipiya noya yonquiarëhuaꞌ. Aꞌnaquënso nipirinhuëꞌ co yaimapihuëꞌ. Taparosáchin yonquipi. Co noyahuëꞌ cancantohuachinara, nisha nisha yonquipi. Noꞌtën nanan nitotaponaraihuëꞌ, co yanatëpihuëꞌ. Napoaton co huachi noꞌtëquën yonquipihuëꞌ. Nitapicancanatonaꞌ, co huachi nanitopihuëꞌ noya yonquicaisoꞌ.

Tito 3:2

Ama pinochinasohuëꞌ. Ama ninoꞌhuiinasohuëꞌ. Noya ninicatonaꞌ yaꞌhuëꞌinaꞌ. Yaꞌipi piyapiꞌsaꞌ noya nicatonaꞌ, sanoanan quëran nonchinaꞌ.

Hebreos 12:11

Aꞌna tahuëri Yosë nohuanton, maꞌsha onporëhuaꞌ. Naporahuaton, aꞌnapita maꞌsha onpotërinënpoaꞌ. Naporo chachinsoꞌ sëtërëhuaꞌ. Parisitacasoꞌ co nohuantopirëhuahuëꞌ, noya ahuantohuatëhuaꞌ, Yosë naꞌcon catahuarinpoaꞌ. Nirótëatëhuaꞌ, noya nisarëhuaꞌ. Inapoatëhua sano cancantarihuaꞌ.

Hebreos 12:14

Ama piꞌpian tërantaꞌ ninoꞌhuicosohuëꞌ. Naporahuaton, noya nicoꞌ. Co noya nipatamahuëꞌ, co mantaꞌ Yosë nohuitaramahuëꞌ.

Santiago 1:17

Yosësoꞌ noyasáchin yonquirinpoaꞌ. Noya noya cancantacaso marëꞌ catahuarinpoaꞌ. Inasáchin noya aꞌpintërinpoaꞌ noꞌtëquën yonquicaso marëꞌ. Piꞌi, yoqui, tayora, inapita inari acopirinhuëꞌ, co yaꞌipi tahuëri noya aꞌpininhuëꞌ. Aꞌna tashintaꞌ co mantaꞌ aꞌpininhuëꞌ. Yosëso nipirinhuëꞌ co ina pochin nininhuëꞌ. Nani tahuëriya nosoroatonpoaꞌ, catahuarinpoaꞌ.

Santiago 1:5

“¿Maꞌcha ipora niiya?” topatamaꞌ, Yosë nontocoꞌ noya anitochinquëmaꞌ. Onpopiontaꞌ Yosë nontacasoꞌ yaꞌhuërin. Co nosororinpoasoꞌ apiratërinpoahuëꞌ. Inaora nohuanton, catahuarinpoaꞌ. Nontërëhuaso marëꞌ co noꞌhuirinpoahuëꞌ. Catahuarinpoaꞌ noꞌtëquën yonquicaso marëꞌ.

Santiago 2:13

Co piyapiꞌsaꞌ nosorohuatamahuëꞌ, ayaroꞌ tahuëri Yosëntaꞌ co nosoroarinquëmahuëꞌ. Napoaton “Yosë naꞌcon nosororinpoaꞌ,” taꞌtëhuaꞌ, aꞌnapita nosoroaꞌhuaꞌ. Ina quëran ayaroꞌ tahuëri co anaꞌintarinpoahuëꞌ.

Santiago 2:4

¿Coꞌta ina pochin nipatamaꞌ, co napopianachin nosororamahuëꞌ? Cancanënpoa quëran huarëꞌ Yosë niꞌsarinpoaꞌ nipirinhuëꞌ, co ina pochin yonquiramahuëꞌ. Co noyahuëꞌ yonquiramaꞌ.

Santiago 3:15

Co Yosë nohuanton ina pochin cancantërëhuahuëꞌ. Piyapiꞌsaꞌ inahuara ina pochin yonquipi. Ninocanatonaꞌ, niapiratopi. Inachin yonquipi. Sopai nohuanton, ina pochin yonquipi.

Santiago 4:8

Nani tahuëri Yosë yonquihuatamaꞌ, inantaꞌ yonquiarinquëmaꞌ, naꞌcon catahuarinquëmaꞌ. Yaꞌipi co noyahuëꞌ yonquiramasopita naniantatomaꞌ, noya nicoꞌ. Ama huachi nisha nisha yonquicosohuëꞌ. Noyápiachin cancantocoꞌ.

1 Pedro 1:22

Yosë nanamënsoꞌ noꞌtën nanan. Ina natëhuatamaꞌ, yaꞌipi co noyahuëꞌ yonquiramasopita naniantaramaꞌ. Noyápiachin cancantaramaꞌ. Yosë anoyacancantërinquëmaꞌ ninosorocamaso marëꞌ. Napoaton imaramasopita capini noya ninosorocoꞌ. Tëhuënchachin cancanëma quëran huarëꞌ ninosorocoꞌ.

1 Pedro 2:1

Yaꞌipi co noyahuëꞌ yonquiramasopita naniantocoꞌ. Ama iyaroꞌsaꞌ ninonpintocosohuëꞌ. Aꞌnaquën noyasha nonaponaraihuëꞌ, poꞌoana quëran co noyahuëꞌ nipi. Ama ina pochin nicosohuëꞌ. Yaꞌipi cancanëma quëran noꞌtëquën ninontocoꞌ. Aꞌnapita noya yaꞌhuëhuachinaꞌ, ama noyapatocosohuëꞌ. Ama pinotocosohuëꞌ.

1 Pedro 2:18

Aꞌnaquëmaꞌ patron marëꞌ sacatëramaꞌ. Asacatohuachinquëmaꞌ, natëcoꞌ. Yosë niꞌsarinquëma niꞌton, noya natëcoꞌ. Aꞌnaquën patron noya. Nosororinquëmaꞌ. Aꞌnaquënso nipirinhuëꞌ yánoꞌhuitërin. Co noyahuëꞌ nipirinhuëꞌ, inapitantaꞌ natëcasoꞌ yaꞌhuërin.

1 Juan 3:18

“Yaꞌipi imapisopita nosororahuë,” topatëhuaꞌ, ama, apiaꞌhuaroꞌsaꞌ, topinan quëran napoaꞌhuasohuëꞌ. Cancanënpoa quëran huarëꞌ nosoroatëhuaꞌ, catahuahuaꞌ.

1 Juan 3:3

“Aꞌna tahuëri Quisocristo niꞌsarëhuaꞌ,” taꞌtëhuaꞌ, co noyahuëꞌ yonquirëhuasopita naniantarëhuaꞌ. Quisocristosoꞌ noyápiachin cancantërin niꞌton, canpoantaꞌ noyápiachin cancantacasoꞌ nohuantarihuaꞌ.