Santiago 3:13 - Chayahuita (Shahui)

¹³ ¡Tëhuënchachin noya yonquihuatamaꞌ, noya nisaramaꞌ! Napoaton noya nicoꞌ aꞌnapitantaꞌ noya yonquiramasoꞌ nitochinaꞌ. “Co canpoara noya nitotërëhuahuëꞌ. Yosëíchin catahuarinpoaꞌ noya yonquicasoꞌ,” taꞌtomaꞌ, noya nicoꞌ.

Santiago 3:13 ပူးပေါင်းရင်းမြစ်များ

Salmos 107:43

Yonquínahuan nipatamasoꞌ, shaꞌhuitaranquëmasopita yonquicoꞌ. Yosë nóya nosororinpoasoꞌ, yonquirácoꞌ.

Salmos 122:8

Quëmopinëhuëpita inaquë yaꞌhuëpi. Amiconëhuëpitantaꞌ, inaquë yaꞌhuëpi. Inapita yonquiato: “Inaquë sano niꞌtona yaꞌhuëꞌinaꞌ,” tënahuë.

Isaías 60:6

Yaꞌipi noꞌpanëma nanirinquë chachin camiyo huëntonoꞌsa pëꞌpëtohuanáchin huëꞌsapiso niꞌsaramaꞌ. Matian parti quëran, Ipa parti quëran, ina quëranpita huëꞌsapi. Yaꞌipi camiyoroꞌsa Sapa parti yaꞌhuëpisontaꞌ, oro quësapi. Yonarin pochin nininsonta quësapi. “Sinioro maꞌsona nipachina, noya noya ninin,” taꞌcaiso marëꞌ napoapi.

Isaías 61:1

Sinioro piyapinën naporin: “Sinioro ispiritonën yaꞌcoancantërinco niꞌton, noya catahuarinco. Ina chachin acorinco popriyaroꞌsa noya nanan shaꞌhuitaꞌhuaso marëꞌ. Aparisitopisopita catahuacaꞌhuaso marëꞌ acorinco. Yaꞌhuëpi quëran quëparahuatona huaꞌanëntapirinahuëꞌ, yaꞌhuëpiquë chachin paantacaiso shaꞌhuitarahuë. Tashinan pëiquë pochin yaꞌhuëapisopitantaꞌ, ina quëran pipicaisoꞌ shaꞌhuitarahuë.

Jeremías 9:12

¿Inta yonquínahuan niꞌton, nanitërin onpoatonsona napopisoꞌ nitotacasoꞌ? ¿Inso pënëntonaꞌpita Yosëri anitotërin niꞌton, nanitërin onpoatonsona napopisoꞌ shaꞌhuitiinpoasoꞌ? Inotërosoꞌ, yaꞌshi yaꞌshin. Co insonta inaquëchin paꞌninhuëꞌ. ¿Onpoatonta iso noꞌpanënpoanta taꞌhuantaton, ina pochin ninin? tënahuë.

Jeremías 9:23

Sinioro chachin ina pochin shaꞌhuitërinpoaꞌ. Naquëranchin Sinioro taantapon: “Aꞌnaquëma nani maꞌsha nitotëramaꞌ. Napoapomarahuëꞌ: ‘Ma noyacha caso nitotërahuë paya,’ ama tocosohuëꞌ. Chiníquënquëma nipatamantaꞌ: ‘Ma noyacha caso chinirahuë paya,’ ama tocosohuëꞌ. Nani maꞌsha yaꞌhuëtohuachinquëmantaꞌ: ‘Ma noyacha caso nani maꞌsha yaꞌhuëtërinco paya,’ ama tocosohuëꞌ.

Daniel 2:21

Quëma nohuanton tahuëriroꞌsa nishatërin. Quëma nohuanton copirnoroꞌsanta yaꞌconpi. Quëmari chachin inapitanta ocoiran. Quëmari yonquinahuanoꞌsanta yonqui quëtëran.

Números 12:3

Moisësësoꞌ, yaꞌipi piyapiꞌsa quëran sano sano quëmapi ninin.

Mateo 11:29

Co carinquëmaꞌ nocananquëmahuëꞌ. Sanoanan quëran pënënanquëmaꞌ. Casáchin natanco aꞌchinchinquëmaꞌ. Nani tahuëri catahuaranquëmaꞌ noya cancantacamaso marëꞌ. Ina pochin imapatamaco, sano cancantarama huachi.

Mateo 5:5

Sano piyapi nipatamaꞌ, Yosë noya niꞌsarinquëmaꞌ. Naporahuaton, aꞌna tahuëri nasharoꞌpaquë yaꞌhuëmiataramaꞌ.

Mateo 7:24

Ina quëran pënëntaantarin: “Naꞌaquëmaꞌ natanamacoso marëꞌ huëꞌnamaꞌ. Natëhuatamaco, aꞌna quëmapi pochin nisaramaꞌ. Ina quëmapisoꞌ, natëricho quëran yapëirin. Yapëihuachina, noya yonquiaton, noya pëiaquë yonirin. Naꞌpitëꞌ quënanahuaton, inaquë noya pëirin.

1 Corintios 6:5

Tapanacamaso marëꞌ pënënaranquëmaꞌ. ¿Co aꞌnaya tërantaꞌ niyontonamaquë noya yonquinaꞌpi yaꞌhuërinhuëꞌ ti? ¡Yaꞌhuërin mini, tënahuë! Nanan yaꞌhuëhuachin, inari anoyachin.

2 Corintios 10:1

Ca Paonoco sanoanan quëran pënënanquëmaꞌ. Aꞌnaquën napopi: “Paono aquë quëran ninshitohuachinpoara, chiníquën nanan aꞌpatirinpoaꞌ. Isëquë chachin yaꞌhuapon, tëꞌhuatatonpoaꞌ, co chiníquën pënëninpoahuëꞌ,” topi natantërahuë. Quisocristosoꞌ chiníquën nanantaponahuëꞌ, co noꞌhuirinpoahuëꞌ. Sanoanan quëran pënëninpoaꞌ. Ina pochin cancantato, cantaꞌ sanoanan quëran pënënanquëmaꞌ.

2 Corintios 8:24

Inapita cantonpachinquëmaꞌ, noya nontocoꞌ. Ina quëran coriqui pahuantërinsopita marëꞌ yontonamasoꞌ quëtohuatamaꞌ, noya niꞌsarinënquëmaꞌ. “Paono noꞌtëquën nontërinpoaꞌ. Corintoquë imapisopitasoꞌ pahuantopisopita nosoropi mini,” tosapi. Ina quëran yaꞌhuëpiquë chachin paantahuachinaꞌ, shaꞌhuirapi antaꞌ. Yaꞌipi imapisopita nitotapi huachi.

Gálatas 5:23

Ispirito Santo natëhuatëhuaꞌ: “Casoꞌ noya noyaco,” co tëcarihuahuëꞌ. Sano piyapi nicarihuaꞌ. Co noyahuëꞌ nicacasoꞌ yonquipirëhuahuëꞌ, ina catahuarinpoaꞌ naniantacasoꞌ. Inapohuatëhuaꞌ, Yosë noya niꞌsarinpoaꞌ. Co pënëinënpoasoꞌ yaꞌhuaponhuëꞌ.

Gálatas 6:1

Ispirito Santo natëtomaꞌ noya cancantohuatamaꞌ, aꞌnapitantaꞌ catahuacoꞌ ina pochin cancanchinaꞌ. Aꞌnasoꞌ co noyahuëꞌ nipachin, ama noꞌhuicosohuëꞌ. Sanoanan quëran pënënatomaꞌ, catahuacoꞌ co noyahuëꞌ yonquirinsopita nanianchin. Niꞌcona canpitantaꞌ sopai minsëchinquëmaꞌ.

Gálatas 6:4

Ama aꞌnapita napopisoꞌ nicatomaꞌ, nitantiacosohuëꞌ. Quëmaora naporanso yonquiaton, nitantiaquëꞌ. Noya cancantohuatan, Yosë noya niꞌsarinquën. Ina quëran “Yosë noya niꞌsarinco,” taꞌton, capa cancantaran.

Efesios 4:2

“Yosëíchin catahuarinpoaꞌ noya nicacasoꞌ,” taꞌtomaꞌ, ama aꞌnapita nocancosohuëꞌ. Sanoanan quëran nontatomaꞌ, ama noꞌhuicosohuëꞌ. Aꞌnapita maꞌsha onpotohuachinënquëmaꞌ, ama yaiꞌhuërëtocosohuëꞌ. Co noyahuëꞌ nipirinahuëꞌ, nosoroatomaꞌ noya nontocoꞌ.

Filipenses 1:27

Iporasoꞌ iyaroꞌsaꞌ nóya nicoꞌ. Quisocristo nanamën yonquiatomaꞌ, ina pochachin cancantocoꞌ. Yosë huëntonënquë yaꞌconamaꞌ niꞌton, ina pochin cancantacasoꞌ yaꞌhuërin. Nicaponquëmaꞌ paꞌsamarahuë. Co aꞌnaꞌ nanitapohuëꞌ nimara. Ina niponahuëꞌ, nani tahuëri noya nicoꞌ noya nanan natanchi. Yaꞌipinquëmaꞌ, iyaroꞌsaꞌ, imamiatocoꞌ. Ama aꞌnayanquëma tërantaꞌ nisha yonquicosohuëꞌ. Napopináchin yonquiatomaꞌ, Quisocristo nanamën aꞌchinácoꞌ. Inapohuatamaꞌ, natantohuato, nóya cancantarahuë huachi.

Colosenses 3:12

Yosë nosoroatonpoaꞌ, huayoninpoaꞌ noya nicacaso marëꞌ. Napoaton yaꞌipi piyapiꞌsaꞌ nosoroatomaꞌ, noya nontocoꞌ. Nasha aꞌmorëso pochin noyápiachin cancantocoꞌ. Ama nocantocosohuëꞌ. Nani tahuëriya yonquicoꞌ aꞌnapita catahuacaso marëꞌ. Sano nicatomaꞌ, noya nontocoꞌ. Maꞌsha onpoapomarahuëꞌ, ahuantocoꞌ.

1 Timoteo 4:12

Co mashonquënhuëꞌ niponahuëꞌ, noya pënëntëquëꞌ mashoroꞌsantaꞌ natëinënquën. Yaꞌipi piyapiꞌsaꞌ noya nontëquëꞌ. Nosoroaton, catahuaquëꞌ. Cancanën quëran huarëꞌ Yosë natëquëꞌ. Sano yonquiaton, noyápiachin cancantëquëꞌ. Noyasáchin niquëꞌ imapisopita nonainënquënso marëꞌ.

1 Timoteo 6:11

Quëmaso nipirinhuëꞌ api Yosë imaran niꞌton, ama coriquiráchin yonquiquësohuëꞌ. Noya nicacasoáchin yonquiquëꞌ. Cancanën quëran huarëꞌ Yosë chinotëquëꞌ. “Inasoꞌ nosoroatonco, catahuarinco,” taꞌton, noya natëquëꞌ. Naporahuaton, yaꞌipi piyapi nosoroquëꞌ. Maꞌsha onpoaponahuëꞌ, chiníquën cancantëquëꞌ. Sano piyapi niquëꞌ.

2 Timoteo 2:25

Nisha nanan imapachina, oshaquëran pënëanhuanꞌ. Ama noꞌhuitatëhuahuëꞌ, aꞌchintahuaꞌ. Yosëri catahuahuachin, oshaquëran co noyahuëꞌ yonquipisopita naniantatonaꞌ, noꞌtëquën yonquiaponaꞌ nimara.

Tito 3:2

Ama pinochinasohuëꞌ. Ama ninoꞌhuiinasohuëꞌ. Noya ninicatonaꞌ yaꞌhuëꞌinaꞌ. Yaꞌipi piyapiꞌsaꞌ noya nicatonaꞌ, sanoanan quëran nonchinaꞌ.

Hebreos 13:5

Ama coriquiráchin paꞌyatocosohuëꞌ. Co naꞌcon maꞌsha yaꞌhuëtopirinquëmahuëꞌ, sano cancantocoꞌ. Ama naꞌcon naꞌcon nohuantocosohuëꞌ. Yosë chachin nani shaꞌhuitërinpoaꞌ. “Co onporontaꞌ pataranquëmahuëꞌ. Co naniantaranquëmahuëꞌ,” itërinpoaꞌ.

Santiago 1:21

Napoaton yaꞌipi co noyahuëꞌ yonquiramasopita naniantocoꞌ. Ama huachi oshahuancosohuëꞌ. Yosë nanamën nani aꞌchintërinënquëmaꞌ. “Caora Sinioro co nanitërahuëꞌ noya nicaꞌhuasoꞌ. Catahuaco,” taꞌtomaꞌ, nanamën yonquirácoꞌ. Ina yonquihuatamaꞌ, nichaꞌësarinquëmaꞌ.

Santiago 2:18

Aꞌnaquëmaꞌ tapomaꞌ nimara: “Quëmasoꞌ ‘Yosë imarahuë,’ taꞌton, chinotëran. Caso nipirinhuëꞌ noya ninahuë. Quëmasoꞌ Yosë chinotaponahuëꞌ, co noya nipatanhuëꞌ, topinan quëran nonsaran. Caso nipirinhuëꞌ, noya ninahuëso marëꞌ natërahuësoꞌ yaꞌnoarin,” tapomaꞌ.

Santiago 3:1

Ama iyaroꞌsaꞌ naꞌanquëmaꞌ cortoquë pënëntocosohuëꞌ. Piyapiꞌsaꞌ pënënpirëhuahuëꞌ co canpoa tërantaꞌ noya nipatëhuahuëꞌ, aquëtë chachin Yosë anaꞌintarinpoaꞌ.

Santiago 3:17

Yosëso nipirinhuëꞌ, noꞌtëquën ayonquirinpoaꞌ. Ina catahuahuachinpoaꞌ, noyápiachin cancantarihuaꞌ. Co mantaꞌ noꞌhuitarihuahuëꞌ. Sanoanan quëran nontarihuaꞌ. Aꞌnapita pënënpachinpoaꞌ, noya natanarihuaꞌ. Piyapiꞌsaꞌ nosoroarihuaꞌ. Naporahuaton noyasáchin nisarëhuaꞌ. Co nisha nisha yonquiarihuahuëꞌ. Co nonpintarihuahuëꞌ. Yosëíchin catahuarinpoaꞌ ina pochin cancantacasoꞌ.

1 Pedro 1:15

Tata Yosë noyasáchin ninin. Huëntonënquë ayaꞌconinquëmaꞌ niꞌton, canpitantaꞌ ina pochin cancantocoꞌ.

1 Pedro 2:12

Co imapisopitahuëꞌ pinorinënquëmaꞌ. “Co noyahuëꞌ nipi,” topi. Ina nipirinhuëꞌ, noyasáchin nicoꞌ niꞌinënquëmaꞌ. Ina quëran aꞌna tahuëri Yosëri catahuarin niꞌton, noꞌtëquën yonquihuachinaꞌ, yonquiarinënquëmaꞌ. “Ma noyacha Yosëri catahuarin niꞌton, noya nipi paya,” tosapi.

1 Pedro 2:9

Imarëhuasopitaso nipirinhuëꞌ nohuantërinpoaꞌ. Huayoninpoaꞌ ina nohuitacaso marëꞌ. Inasáchin huaꞌanëntërinpoaꞌ. Nani acorinpoaꞌ corto huaꞌanoꞌsa pochin nicatëhuaꞌ, ina marëꞌ sacatacasoꞌ. Noyápiachin cancan quëtërinpoaꞌ. Yosë piyapinënpoaꞌ ninëhuaꞌ. Iráca tashi pochin cancantopirëhuahuëꞌ, Yosë nichaꞌërinpoaꞌ tahuëri pochin cancantacaso marëꞌ. Acorinpoaꞌ Yosë noya nosororinpoasoꞌ shaꞌhuicaso marëꞌ.

1 Pedro 3:4

Quisocristo imapatamaꞌ, ama aipi yaꞌnorinsoráchin yonquicosohuëꞌ. Noyápiachin cancantacamasoꞌ naꞌcon naꞌcon yonquicoꞌ. Yosë pochin yonquicasoꞌ yaꞌhuërin. Nitaparamasoꞌ co yaꞌhuëmiatarinhuëꞌ. Cancanënpoa quëran yonquirëhuasopitaso nipirinhuëꞌ, yaꞌhuëmiatarin. Napoaton imoyaroꞌsaꞌ sano cancantocoꞌ. Ama piꞌpian tërantaꞌ noꞌhuitocosohuëꞌ. Nóya cancantohuatamaꞌ, Yosë noya niꞌsarinquëmaꞌ.