Santiago 1:25 - Chayahuita (Shahui)

²⁵ Nipirinhuëꞌ, natëhuatamaꞌ, noya nisaramaꞌ. Nasha nanansoꞌ nóya. Canpitaora nohuanton, ina natëhuatamaꞌ, co sopai camaiarinquëmahuëꞌ. Nani tahuëri Yosë nanamën yonquicoꞌ. Natanpatamaꞌ, ama naniantocosohuëꞌ. Noya natëhuatamaꞌ, Yosë catahuarinquëmaꞌ noya nicacamaso marëꞌ.

Santiago 1:25 ပူးပေါင်းရင်းမြစ်များ

Lucas 11:28

Inaso napopirinhuëꞌ, Quisosori itapon: —Yosë nanamën natanahuatona natëpisopita tëhuënchinsoꞌ, noya noya cancantaponaꞌ tënahuë, itërin.

Juan 13:17

Nani nitotëramaꞌ ipora. Ca pochin nipatamaꞌ, nóya cancantaramaꞌ.

Juan 8:36

Yosë huiꞌninco niꞌto, catahuahuatënquëmaꞌ, chaꞌësaramaꞌ. Co huachi insontaꞌ camaiantarinquëmahuëꞌ.

Hechos 13:43

Piyapiꞌsaꞌ noquitopirinahuëꞌ, naꞌa cotioroꞌsari Paono imasapi. Nisha piyapiꞌsantaꞌ cotioroꞌsa pochin Yosë chinotopisopita imasapi. Imapachinara, Paono, Pirnapi catoari chachin aꞌchintantapi. ‘Yosë inaora nohuanton, nosororinpoaꞌ,’ taꞌtomaꞌ, imamiatocoꞌ,” itopi.

Hechos 2:42

Caꞌtanoꞌsa aꞌchinpachinara, paꞌyatopi natanacaisoꞌ. Noya natanatonaꞌ, natëpi. Noya niniꞌtonaꞌ, yaꞌhuërapi. Quisoso chimininsoꞌ yonquiatonaꞌ, coshatapatapi. Naporahuatonaꞌ, apira apira Yosë nontapi.

Hechos 26:22

Yosësoꞌ catahuarinco, chaꞌërahuë. Napoaton ipora huantaꞌ natëarahuë. Yaꞌipi piyapiꞌsaꞌ huaꞌanoꞌsa quëran huarëꞌ shaꞌhuitarahuë. Moisësë, pënëntonaꞌpiroꞌsaꞌ, inapita ninopiso chachin aꞌchinarahuë:

Romanos 11:22

Ma noyacha Yosësoꞌ nosororinpoa paya. Co natëpisopitasohuëꞌ nipirinhuëꞌ, chiníquën anaꞌintarin. Inasáchin imapatamaꞌ, nosoromiatarinquëmaꞌ. Nipirinhuëꞌ naniantohuatamaꞌ, anaꞌintarinquëmaꞌ canpitantaꞌ.

Romanos 2:13

Cotioroꞌsasoꞌ Moisësë pënëntërinsoꞌ natanaponaraihuëꞌ, co natëtopihuëꞌ. Napoaton co Yosëri noya niꞌninhuëꞌ. Noꞌtëquën natëpi naporini, Yosëri noya niꞌitonhuëꞌ.

Romanos 7:12

Yosë chachin pënëninpoaꞌ. Shaꞌhuitërinpoasoꞌ nóya. Noꞌtëquën nonin.

Romanos 8:15

Iráca Yosë tëꞌhuatëramaꞌ. Iporaso nipirinhuëꞌ Ispirito Santo yaꞌcoancantërinpoaꞌ niꞌton, co huachi mantaꞌ tëꞌhuatacasoꞌ yaꞌhuërinhuëꞌ. Huiꞌninpita pochachin Yosë niꞌninpoaꞌ. Ina nontohuatëhuara, “Tata,” itërëhuaꞌ.

Romanos 8:2

Oshanënpoa natëhuatëhuaꞌ, co noyahuë ninëhuaꞌ. Inapohuatëhuaꞌ, chiminpatëhuaꞌ, anaꞌintarinpoaꞌ. Nipirinhuëꞌ, Quisocristo imapatëhuaꞌ, Ispirito Santo catahuarinpoaꞌ nanpimiatacaso marëꞌ. Naporahuaton, co huachi oshanënpoa natëcasoꞌ yaꞌhuërinhuëꞌ.

1 Corintios 15:58

Napoaton iyaroꞌsaꞌ chiníquën cancantocoꞌ. Nosororanquëmaꞌ niꞌton, pënënaranquëmaꞌ: Ama nisha nisha yonquicosohuëꞌ. Naporahuaton, paatomaꞌ aꞌnapita aꞌchintëraꞌpiacoꞌ. Sinioro catahuahuachinquëmaꞌ, co onporontaꞌ topinan quëran aꞌchinaramahuëꞌ. Aꞌchinpatamaꞌ, Yosëri nohuantërinsopita imasapi huachi.

2 Corintios 13:5

Canpitaso nipirinhuëꞌ nitantiacoꞌ. Canpitaora yonquinëma quëran yonquicoꞌ. Aꞌnaquëmaꞌ co cancanëma quëran huarëꞌ imashatëraramahuëꞌ nimara. Yaꞌipi cancanëma quëran imapatamaꞌ, Quisocristo yaꞌcoancantërinquëmaꞌ. ¿Co ina nitotëramahuëꞌ ti? Aꞌnaquëmaso nipirinhuëꞌ co tëhuënchachin imamaranquëmahuëꞌ.

Gálatas 2:4

Aꞌnaquën cotioroꞌsaso nipirinhuëꞌ, “Quiyantaꞌ imarai,” taponaraihuëꞌ, co Quisocristoráchin imapihuëꞌ. Iráca pënëntërinsontaꞌ imapi. Yashaꞌhuirapitonacoi, niyontonpiso pëiquë yaꞌconpi Quisocristo imatoi naporaisopita nicacaiso marëꞌ. “Iráca pënëntërinsontaꞌ natëcasoꞌ yaꞌhuërin,” taꞌtonaꞌ, yaanishacancantërinacoi nisha nisha natëcaꞌhuaiso marëꞌ.

Gálatas 5:1

Quisocristo nichaꞌërinpoaꞌ inasáchin yonquiatëhuaꞌ noya cancantacaso marëꞌ. Ina imapatëhuaꞌ, catahuarinpoaꞌ noya nicacasoꞌ. Napoaton ama naquëranchin iráca pënëntërinsoꞌ imahuasohuëꞌ. Quisocristoráchin yonquiaꞌahuaꞌ.

Gálatas 6:2

Yaꞌipinpoaꞌ aꞌna tahuëri maꞌsha onporëhuaꞌ. Aꞌna tahuërintaꞌ sopai yanonpintërinpoaꞌ co noyahuëꞌ nicacaso marëꞌ. Napoaton nicatahuahuaꞌ noya yonquicaso marëꞌ. Panca pëꞌpëto nicatahuarëso pochin catahuahuaꞌ. Inapohuatëhuaꞌ, Quisocristo natëarihuaꞌ. “Ninosorocoꞌ,” itërinpoaꞌ.

Colosenses 1:23

Imamiatohuatamaꞌ, Yosë noya niꞌsarinquëma huachi. Noya nanan natanamaꞌ. “Nichaꞌësarinpoaꞌ,” taꞌtomaꞌ, natërama huachi. Natëmiatocoꞌ. Ama, iyaroꞌsaꞌ, nisha nisha yonquicosohuëꞌ. Ama piꞌpian tërantaꞌ aꞌpocosohuëꞌ. Yaꞌipi parti noya nanan chachin aꞌchinapi. Inachachin cantaꞌ aꞌchinarahuë.

1 Timoteo 2:15

Sanapiꞌsaso nipirinhuëꞌ huaꞌhuinpita noya asoꞌsohuachinaꞌ, Yosëri noya niꞌsarin. “Yosë catahuarinco,” taꞌtonaꞌ, imamiachinaꞌ. Piyapiꞌsaꞌ noya nosoroꞌinaꞌ. Noyasáchin niꞌinaꞌ. Sano yonquiꞌinaꞌ. Inapohuachinaꞌ, nichaꞌësarin.

1 Timoteo 4:16

Nani tahuëri yonquiquëꞌ nóya imacamaso marëꞌ. Naporahuaton, noꞌtëquën aꞌchinquëꞌ. Inapohuatan, Yosë catahuarinquën imamiataton chaꞌëcaso marëꞌ. Aꞌnapitantaꞌ natanpachinquën, chaꞌësapi.

Hebreos 12:15

Yosë inaora nohuanton nosoroatonpoaꞌ, yacatahuarinpoaꞌ. Aꞌnaquëniso nipirinhuëꞌ, co yatahuërëtopihuëꞌ. Inahuara yonquipisoáchin imatonaꞌ, co Yosë yonquicaisoꞌ nohuantopihuëꞌ. Ama inapita pochin cancantocosohuëꞌ. Co Yosëíchin yonquihuatamahuëꞌ, oshaquëran nitapicancanaramaꞌ. Ina quëran pënanin aꞌnaroáchin sëꞌcotëtërinso pochachin aꞌnapitantaꞌ atapicancanaramaꞌ.

Santiago 2:12

Quisocristo imapatëhuaꞌ, nasha nanan shaꞌhuitërinpoaꞌ. Nichaꞌërinpoaꞌ niꞌton, nanitërëhuaꞌ nóya nicacasoꞌ. Ina nanan chachin yonquiaton, aꞌna tahuëri Yosë coisë pochin nontarinpoaꞌ. Niꞌton, piyapi nosoroatomaꞌ, noya nicoꞌ, noya nontocoꞌ.

1 Pedro 2:16

“Yosë nichaꞌërinpoaꞌ,” taꞌtomaꞌ, noya yonquicoꞌ. Iráca nanan co natëcasoꞌ yaꞌhuëpirinhuëꞌ, ama ina yonquiatomaꞌ tëhuëcosohuëꞌ. Yosë huaꞌanëntërinquëmaꞌ niꞌton, ina nohuantërinsoáchin natëcoꞌ.

1 Juan 2:24

Yaꞌnan imapomaꞌ, noꞌtëquën aꞌchintërainquëmaꞌ. Ina chachin imamiatocoꞌ. Ina imapatamaꞌ, cancanëma quëran Tata Yosë nohuitaramaꞌ. Huiꞌniontaꞌ noya nohuitarama huachi.

Apocalipsis 14:13

Ina quëran inápa quëran noninsoꞌ natanahuë: —Apira shaꞌhuichinquën ninshitëquëꞌ: Insosona Sinioro imarinso marëꞌ chiminpachina, noya cancanchinaꞌ, tënin. Ina quëran Ispirito Santo tapon: —Tëhuënchachin Yosëꞌpaꞌ paꞌpachinaꞌ, chinotapi. Yosë marëꞌ sacatopi niꞌton, inápaquë canapi huachi, tënin.

Apocalipsis 22:14

Huënainën quëran anoyacancantërinsopita nóya cancantaponaꞌ. Aꞌmopisoꞌ pëꞌsarëso pochin noyápiachin cancantapi. Inapitasáchin nanan yaꞌhuëtopi nanpirin nara nitërinsoꞌ capatonaꞌ, nanpimiatacaisoꞌ. Naporahuaton, nasha Quirosarinquë noya yaꞌconapi.

1 Samuel 12:14

Sinioro noya nicatoma natëcoꞌ. Inasáchin chinotatomaꞌ, nohuantërinsoꞌ natancoꞌ. Camaitërinsopita noꞌtëquën natëtocoꞌ. Inapoatomaꞌ, copirnonëmarëꞌquëma chachin Sinioro nohuantërinso nicoꞌ. Inaso Yosënënpoa niꞌton, inapocoꞌ. Inapohuatamaꞌ, noya yaꞌhuaramaꞌ.