Santiago 1:22 - Chayahuita (Shahui)

²² Noꞌtëquën yonquicoꞌ. Yosë nanamën aꞌchintohuachinënquëmaꞌ, ama topinan quëran natancosohuëꞌ. Yaꞌipi cancanëma quëran huarëꞌ natëcoꞌ.

Santiago 1:22 ပူးပေါင်းရင်းမြစ်များ

Isaías 44:20

Napoatonaꞌ, inapitaso huariano caꞌpiso pochin nisapi. Nonpi nanan imatona napopi. Inapitasoꞌ co onporonta chaꞌësapihuëꞌ. Co nanitapihuëꞌ: “Iso mamanshisoꞌ, topinan quëran mosharahuë,” taꞌcaisoꞌ.

Mateo 12:50

Yosë natëpisopita iyahuëpita pochin niꞌnahuë. Sanapiꞌsantaꞌ Yosë nanamën natëhuachinaꞌ, oshihuëpita pochin niꞌnahuë. Payaroꞌsantaꞌ Yosë imapachinaꞌ, mamahuë pochin niꞌnahuë, itërin.

Mateo 28:20

Ina quëran yaꞌipi shaꞌhuitëranquëmasoꞌ aꞌchintocoꞌ natëinaco. Insëquësona paꞌpatamaꞌ, carinquëmaꞌ caꞌtanaranquëmaꞌ. Nani tahuëri catahuaranquëmaꞌ. Ayaroꞌ tahuëri naniquë huarëꞌ caꞌtanaranquëmaꞌ. Co onporontaꞌ pataranquëmahuëꞌ, itërin Quisosori. Nani huachi.

Lucas 11:28

Inaso napopirinhuëꞌ, Quisosori itapon: —Yosë nanamën natanahuatona natëpisopita tëhuënchinsoꞌ, noya noya cancantaponaꞌ tënahuë, itërin.

Juan 13:17

Nani nitotëramaꞌ ipora. Ca pochin nipatamaꞌ, nóya cancantaramaꞌ.

Romanos 2:13

Cotioroꞌsasoꞌ Moisësë pënëntërinsoꞌ natanaponaraihuëꞌ, co natëtopihuëꞌ. Napoaton co Yosëri noya niꞌninhuëꞌ. Noꞌtëquën natëpi naporini, Yosëri noya niꞌitonhuëꞌ.

1 Corintios 15:33

Ama ina pochin yonquicosohuëꞌ. Niꞌcona aꞌnapita anishacancantochinënquëmaꞌ. “Co noyahuëꞌ nipisopitarëꞌquëmaꞌ nipayahuatamaꞌ, canpitantaꞌ nitapicancanaramaꞌ. Inapita nonanpatamaꞌ, co huachi noyápiachin cancantaramahuëꞌ,” topi iráca. Noꞌtëquën napopi.

1 Corintios 3:18

Ama inquëma tërantaꞌ isoroꞌparáchin yonquiatomaꞌ, ninonpintocosohuëꞌ. “Caora noya noya nitotërahuë,” co taꞌcasoꞌ yaꞌhuërinhuëꞌ. Ama ina pochin yonquicosohuëꞌ. “Caora co noꞌtëquën yonquirahuëꞌ. Catahuaco Sinioro noya yonquiꞌi,” topatamaꞌ, Yosë catahuarinquëmaꞌ noya noya yonquicasoꞌ.

1 Corintios 6:9

Co noyahuëꞌ nipisopita co Yosë huaꞌanëntërinquë yaꞌcoanpihuëꞌ. ¡Nani ina nitotëramaꞌ ipora! Ama ninonpintocosohuëꞌ. Aꞌnaquën co Yosë natëtonahuëꞌ, monshihuanapi. Mamanshi moshapi. Saꞌinaꞌ yaꞌhuëtopirinahuëꞌ, aꞌna sanapi sëꞌhuapi. Quëmapi capini nisëꞌhuapi. Taparosachin yonquipi. Inapita pochin nipisopitasoꞌ, co Yosëꞌpaꞌ paꞌsapihuëꞌ.

Gálatas 6:3

“Casoꞌ noya piyapico,” topatan, quëmaora ninonpintaran, co noꞌtëquën yonquiranhuëꞌ. Co insontaꞌ Yosë pochachin cancantërinhuëꞌ. Co Yosë catahuarinpoahuëꞌ naporini, co mantaꞌ noya niitërihuahuëꞌ.

Gálatas 6:7

Niꞌcona sopai nonpintochinquëmaꞌ. Co Yosë tëhuacasoꞌ yaꞌhuërinhuëꞌ. Co insoari tërantaꞌ nanitërinhuëꞌ Yosë nonpintacasoꞌ. Noꞌtëquën yonquicoꞌ. Maꞌsha shaꞌpatëra, inachachin nitërin. Co nisha nitërinhuëꞌ.

Filipenses 4:8

Isoíchin iyaroꞌsaꞌ pënënaranquëmaꞌ. Noꞌtën nanansáchin yonquicoꞌ. Noya imatonaꞌ, noya nipisopita yonquicoꞌ. Ama nonpin nananoꞌsaꞌ natëtocosohuëꞌ. Noyápiachin cancantocoꞌ. Aꞌnapita noyasáchin yonquirapicoꞌ. Noya nahuininsoráchin yonquicoꞌ. Aꞌnapita noya nipisoꞌ yonquiatomaꞌ: “Ma noyacha Yosëri catahuarin paya,” itocoꞌ. Ina pochin yonquihuatamaꞌ, Yosë noya niꞌsarinquëmaꞌ.

Colosenses 3:17

Maꞌsona tërantaꞌ yanipatamaꞌ, Sinioro Quisoso yonquiatomaꞌ, nicoꞌ. Ina yonquiatomaꞌ, noya noncoꞌ. Quisoso catahuarinquëmaꞌ niꞌton, “Yosparinquën,” Tata Yosë itocoꞌ.

2 Timoteo 3:13

Co noyahuëꞌ nipisopita, nonpintëroꞌsaꞌ, inapitasoꞌ aquë aquëtëꞌ co noyahuëꞌ nisapi. Naꞌcon piyapiꞌsa nonpintopi quëran, aꞌnapitarintaꞌ nonpintapi.

Tito 3:3

Iráca canpoantaꞌ co noyahuëꞌ cancantërëhuaꞌ. Coꞌhuara Yosë nanamën nitochatërarihuahuëꞌ, co yonquirëhuahuëꞌ. Co yanatërëhuahuëꞌ. Sopai nonpintërinpoaꞌ niꞌton, nisha nisha nicacasoꞌ nohuantërëhuaꞌ. Maꞌpitasona paꞌyatacasoáchin yonquirëhuaꞌ. Aꞌna piyapi maꞌshanënpita noyapatërëhuaꞌ. Ninoꞌhuitëhuaꞌ, co niquëꞌyarëhuahuëꞌ. Noꞌhuípiroꞌ ninëhuaꞌ. Inapoatëhuaꞌ, topinan quëran yaꞌhuërëhuaꞌ.

Santiago 1:26

“Cantaꞌ noya Yosë imarahuë,” topi aꞌnaquën. Nipirinhuëꞌ, nisha nisha nonin. Co noyahuëꞌ nonpachina, topinan quëran nonsarin, inaora ninonpintarin. Co tëhuënchachin imarinhuëꞌ.

Santiago 4:11

Ama iyaroꞌsaꞌ nipinocosohuëꞌ. Ama coisë pochin cancantatomaꞌ, aꞌnapita noꞌhuicosohuëꞌ. Piꞌpisha tërantaꞌ nanan yaꞌhuëhuachin, ama apancatahuatomaꞌ, nishaꞌhuirapicosohuëꞌ. Quisocristo imaramaꞌ niꞌton, iyaparin pochachin ninosorocasoꞌ yaꞌhuërin. Pinopatamaꞌ, co nosoroaramahuëꞌ. Yosë pënënpirinpoahuëꞌ. “Yaꞌipi piyapiꞌsaꞌ nosorocoꞌ,” itopirinpoahuëꞌ, “Co nosorocasoꞌ yaꞌhuërinhuëꞌ,” taꞌtomaꞌ, pinoramaꞌ. Canpitaora yonquinëma quëran pinotatomaꞌ, co Yosë natëramahuëꞌ.

Santiago 4:17

Yosë yonquicamasoꞌ nitotapomarahuëꞌ, co yonquihuatamahuëꞌ, oshahuanaramaꞌ. Maꞌsona tërantaꞌ noya nicacasoꞌ nitotapomarahuëꞌ, co ina nipatamahuëꞌ, ina marëntaꞌ oshahuanaramaꞌ.

2 Pedro 2:13

Piyapiꞌsaꞌ anishacancantopi niꞌton, aꞌna tahuëri inahuantaꞌ parisitapi. Isoroꞌparáchin yonquiatonaꞌ, capa cancantacaisoáchin yonquipi. Aꞌmorëso mancharinso pochin nicatonaꞌ, nitapicancanpi. Imaramasopita niyontonpatamara, “Quiyantaꞌ imarai,” taꞌtonaꞌ, yaꞌconpi. Nonpintatënënquëmaꞌ, ichicoshatapirinënquëmahuëꞌ, inahuasoꞌ co noyahuëꞌ nicatona taparoꞌ nipi.

1 Juan 1:8

“Co oshahuancohuëꞌ,” topatëhuaꞌ, canpoara ninonpintërëhuaꞌ. Co noꞌtëquën yonquirëhuahuëꞌ, co tëhuënchachin imarëhuahuëꞌ.

1 Juan 2:3

Yosë nohuitohuatëhuaꞌ, pënëninpoasoꞌ natëarëhuaꞌ. Noꞌtëquën natëcasoꞌ nohuantarihuaꞌ. Ina natëhuatëhuaꞌ, tëhuënchachin Yosë nohuitërëhuaꞌ.

1 Juan 3:7

Niꞌcona, apiaꞌhuaroꞌsaꞌ, nisha aꞌchinaꞌpiroꞌsaꞌ nonpintochinënquëmaꞌ. Noya nipatëhuaꞌ, noya cancantarëhuaꞌ. Quisocristo noya niꞌton, ina pochin cancantacasoꞌ yaꞌhuërin.

3 Juan 1:11

Ama iya co noyahuëꞌ nipisopita nonanquësohuëꞌ. Noya nipisopita nonanquëꞌ. Noya nipatëhuaꞌ, tëhuënchachin Yosë imarihuaꞌ. Co noyahuëꞌ nipatëhuaꞌ, co Yosë nohuitarihuahuëꞌ.

Apocalipsis 12:9

Inapotatonaꞌ, panca yaꞌhuan pochin nininsoꞌ inápa quëran tëꞌyatopi. Inasoꞌ sopai chachin, Satanasë itopisoꞌ. Yaꞌipi piyapiꞌsaꞌ yanonpintërin. Ina minsërahuatonaꞌ, anquëninënpitarë chachin isoroꞌpaquë tëꞌyatopi.

Apocalipsis 22:7

Quisoso chachintaꞌ naporin: “¡Tëhuënchachin co huaꞌquiya quëranhuëꞌ oꞌmantararahuë! Nani maꞌsha anitotëranquën ninshitacamaso marëꞌ. Insoquëma tërantaꞌ natëhuatamaꞌ, noya cancantaramaꞌ,” itërinco.