Salmos 80:1 - Chayahuita (Shahui)

^1-2 Quëmasoꞌ Sinioro, ohuica huaꞌanën pochin ninan. Israiroꞌsacoisoꞌ, ohuicanënpita pochin ninai. Cosi shinpita noya aꞌpaiquëꞌ. Quiropinoꞌsa anquipisoanaquë quëmasoꞌ yaꞌhuëran. Noya nicaton Iprain, Mincamin, Manasisi, inapita huëntonoꞌsa catahuaquëꞌ. Chiníquën nanantaton nichaꞌëcoi.

Salmos 80:1 ပူးပေါင်းရင်းမြစ်များ

2 Samuel 6:2

Inapitarë chachin Quirosarin quëran paꞌnin. Paꞌsahuatonaꞌ, Quiriato-quiarimoquë canconpi. Inaso ninanoꞌ, Paara itopi antaꞌ. Cota huënton noꞌpanënaquë yaꞌhuërin. Siniororë anoyatopiso caposonën macaton Quirosarinquë quëpacaso marëꞌ inatohua paꞌnin. (Israiroꞌsasoꞌ, Sinioro yaꞌipi nanitaparinsoꞌ chinotopi. Ina caposo aꞌtanamënquë, Sinioroso huaꞌanëntërinso shiranën yaꞌhuëtërin. Cato quiropinoꞌsa nonanpisoꞌ huáncana yaꞌhuërin.) Yaꞌhuërinso ninanoquë acocaso marëꞌ Tapiri yaquëparin.

2 Reyes 19:15

Ina quëran Yosë nontaton: “Quëmasoꞌ Sinioro, Yosënquën. Israiroꞌsacoi chinotërainquën. Quiropinoꞌsa aipi, huaꞌanëntëranso shiranën yaꞌhuërin. Quëmariáchin yaꞌipi nacionoꞌsa ninan. Isoroꞌpaꞌ, piꞌiroꞌtëꞌ, inapitanta quëma nohuanton yaꞌhuërin.

Salmos 69:1

Quëmaso Yosënëhuënquën. Paꞌitato yachimiitarahuëso pochin nisarahuë. Nosoroatonco nichaꞌëco. Yaꞌcoroquë paꞌmiatarahuëso pochin nisarahuë. Co maquë tëranta nantëhuë chinicaso yaꞌhuërinhuëꞌ. Anpo acopo camarëso pochin nisarahuë. Chiniiꞌ quëpararincoso pochin parisitarahuë.

Salmos 80:19

Quëmasoꞌ Sinioronquën, yaꞌipi nanitaparan. Catahuacoi iráca pochachin niantaꞌi. Noya nicatoncoi nichaꞌëpatancoi, chaꞌësarai huachi.

Salmos 80:3

Quëmaso Yosënquën. Catahuacoi iráca pochachin niantaꞌi. Noya nicatoncoi nichaꞌëhuatancoi, chaꞌësarai.

Salmos 80:7

Quëmaso Yosënquën. Yaꞌipi nanitaparan. Catahuacoi iráca pochachin niantaꞌi. Noya nicatoncoi nichaꞌëpatancoi, chaꞌësarai.

Isaías 40:11

Huaꞌanëni ohuicanënpita aꞌpairin. Carniroaꞌhuaroꞌsaꞌ, iporahuaton quëparin. Nasha huaipisopita oshaquëran quëpaton aꞌcarin. Ina naporinso pochin canpoantaꞌ, Sinioro noya aꞌpaiarinpoaꞌ,” itocoꞌ.

Isaías 60:1

Cota huëntonquë, Quirosarinquë, inaquëpita yaꞌhuëramasoꞌ, noya natancoꞌ: Sinioro noya noya nininsoꞌ, canpitarë nisarin. Inasoꞌ, huënaráchin huënaráchin aꞌpinarin. Napoaton canpitantaꞌ, aꞌpininso ahuënaratarinquëmaꞌ.

Isaías 63:11

Napotohuachina inapitasoꞌ, iráca Yosëri shimashonënpita catahuarinsoꞌ yonquipi: “Yosëri iráca Moisësë huayonaton, Niroiꞌ quëran nichaꞌërin. Inapotahuaton nohuantërinsoꞌ nicacaso marëꞌ ispiritonën ayaꞌcoancantërin. Inapotohuachina, inaso huaꞌanënpoa pochin nicaton Iquipito quëran ocoirinpoaꞌ. Iporaso napoaponahuëꞌ, ¿Intohuata pacaton co huachi yacatahuarinpoahuëꞌ?

Ezequiel 1:13

Maꞌsharoꞌsa pochin nipisopitasoꞌ, pënaya huënaratërinso pochin yaꞌnopi. Yanatëtë huënin huënintohuatëra, huënaratërin. Inapoatonaꞌ, itohuaran itohuaran niyaꞌcontapiso pochin nisapi. Pënsoꞌ chiníquën huënaratarin. Ina quëran oꞌcoriroꞌsanta pipirantapi.

Ezequiel 34:23

Ca nohuanto piyapinëhuë Tapi itërahuësoꞌ, huënantapon. Inaíchin yaꞌipi ohuicanëhuëpita noya aꞌpaiapon.

Daniel 9:17

Quëmaso Sinioro Yosënëhuëinquën. Caso piyapinënco nipirahuëꞌ nontaranquënsoꞌ natanco. Natanatonco pëinën nishinahuën acopisoꞌ yonquiquëꞌ. Catahuaantahuatancoi: ‘¡Ma noyacha Siniorori catahuarin paya!’ taꞌtonaꞌ, piyapiroꞌsa paꞌyatarinën.

Juan 10:14

Caso nipirinhuëꞌ noya huaꞌanën pochin ninahuë. Imarinacosopita nohuitërahuë. Cantaꞌ nohuitërinaco.

Hebreos 13:20

Yosë catahuainquëmaꞌ noya ninicatomaꞌ yaꞌhuëcamasoꞌ. Inasáchin asanocancaninpoaꞌ. Inari chachin iráca Quisocristo ananpitaantarin. Iporasoꞌ ohuicanënpita pochin nicatonpoaꞌ, Sinioro Quisoso aꞌpairinpoaꞌ. Huënainën paꞌnin niꞌton, nasha quëran anoyatërinso shaꞌhuitërinpoaꞌ imacaso marëꞌ. Ina anoyatërinsosoꞌ yaꞌhuëmiatarin. Co onporontaꞌ nishataponhuëꞌ.

1 Pedro 2:25

Ohuica chihuërinso pochin nicatëhuaꞌ, co Yosë nohuitopirëhuahuëꞌ, iporasoꞌ Quisocristo imarëhuaꞌ. Inasoꞌ ohuicaroꞌsaꞌ huaꞌanën pochin niꞌton, noya aꞌpaiarinpoaꞌ.

1 Pedro 5:4

Quisocristo imarëhuaꞌ niꞌton, yaꞌipinpoaꞌ huaꞌanëntërinpoaꞌ. Aꞌna tahuëri oꞌmantararin. Noya ansianoꞌsaꞌ nipatamaꞌ, naporoꞌ noya canaaramaꞌ. Isoroꞌpaquë canatohuachinara, yancotëꞌ huëron quëran nipisoꞌ quëtopirinahuëꞌ, inasoꞌ aꞌnaroáchin ahuirin. Inapaquëso nipirinhuëꞌ canahuatamaꞌ, yaꞌhuëtomiatarinquëmaꞌ. Noya noya yaꞌhuëcontaramaꞌ.

Apocalipsis 21:23

Inatohuaꞌ paꞌpatëhuaꞌ, co huachi piꞌi, yoqui, inapita nohuantarihuahuëꞌ. Tata Yosë chachin huënaráchin aꞌpintarinpoaꞌ. Carniroaꞌhuantaꞌ aꞌpintarinpoaꞌ.

1 Samuel 4:4

Ninapotatonaꞌ, sontaroꞌsa aꞌpapi. Inapitasoꞌ paꞌsahuatonaꞌ, Siniororë anoyatopiso caposonën macontapi. Siniorosoꞌ yaꞌipi nanitapaton, quiropinoꞌsa huáncana shiranënquë huënsaton huaꞌanëntërin. Iri huiꞌninpita: Opini, Pinisë, inapitanta paꞌpi. Inapitari Siniororë anoyatopisoꞌ caposonën aꞌpaipi niꞌton, inahuanta caꞌtantopi.