Salmos 65:3 - Chayahuita (Shahui)

³ Co noyahuëꞌ cancantatoi co noyahuëꞌ ninai. Oshahuanpiraihuëꞌ, oshanëhuëi inquitërancoi.

Salmos 65:3 ပူးပေါင်းရင်းမြစ်များ

2 Reyes 19:20

Naporoꞌ Isaiasëri, Isiquiasë shaꞌhuitacaso marëꞌ aꞌnara comision aꞌpatërin. Iso pochin taꞌcasoꞌ aꞌpatërin: “Yosënënpoa nontëransoꞌ, nani nataninquën.

Salmos 40:12

Naꞌcon maꞌsha onporahuë. Co tiquinahuanhuë niꞌton, co shaꞌhuichináchinhuëꞌ. Co noyahuëꞌ ninahuëso marëꞌ parisitárahuë. Yaꞌpirahuë quëraontaꞌ, co huachi noya quënantërahuëꞌ. Motohuëquë naꞌcon ain yaꞌhuërin. Ina quëran naꞌcon naꞌcon maꞌsha onporahuë. Naporahuaton co huachi chiníquën cancantërahuëꞌ.

Salmos 51:7

Oshanëhuë inquitoco noyápiachin cancanchi. Paꞌmocancanco huiri huiríchin pochin cancanchi.

Isaías 6:7

Ina pënayaquë carianantonco: “Niꞌquëꞌ. Nani pënayaquë carianananquën. Napoaton co noyahuëꞌ ninansoꞌ Yosë inquitërinquën. Co noyahuëꞌ ninansopita naꞌintopirinquënhuëꞌ, inquitërinquën,” itërinco.

Juan 1:29

Tahuëririnquë inaquë Quisoso huëꞌsarin. Coanshari quënanahuaton, piyapiꞌsaꞌ itërin: “Pasoꞌ quëmapi niꞌcoꞌ. Yosëri aꞌpaimarinsoꞌ. Inasoꞌ carniroaꞌhua pochin nicaton, oshanënpoaꞌ inquitiinpoaso marëꞌ chiminapon.

Gálatas 5:17

Ispirito Santo noyasáchin ayonquiinpoasoꞌ nohuantopirinhuëꞌ, ipora huantaꞌ co noyahuëꞌ yonquirëhuaꞌ. Ispirito Santoso nipirinhuëꞌ pënëninpoaꞌ ama ina pochin cancantacaso marëhuëꞌ. Co noyahuëꞌ yonquihuatëhuaꞌ, co nanitërëhuahuëꞌ Ispirito Santo natëcasoꞌ. Catoꞌ cancan pochin yaꞌhuëtërinpoaꞌ. Itohuara capini nipatëtatë pochin nipi. Noya cancantacasoꞌ nohuantopirëhuahuëꞌ, canpoara co nanitërëhuahuëꞌ noya nicacasoꞌ.

Hebreos 9:14

Quisocristo huënainënso nipirinhuëꞌ noya nóya. Inasoꞌ Yosë huiꞌnin niꞌton, co piꞌpisha tërantaꞌ oshahuaninhuëꞌ. Ispirito Santo yaꞌhuëmiatërinsori catahuarin niꞌton, canpoa marëꞌ chiminaton anoyacancantomiatërinpoaꞌ. Inaso huënainën aꞌparin oshanënpoaꞌ inquitinpoaso marëꞌ. Inapoaton noyápiachin cancan quëtërinpoaꞌ. Ina quëtohuachinpoaꞌ, Yosë noya chinotarihuaꞌ. Inasoꞌ nanpiarin niꞌton, canpoantaꞌ ina marëꞌ noya sacatarihuaꞌ.

Apocalipsis 1:5

Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa.