Salmos 42:4 - Chayahuita (Shahui)

⁴ Ina yonquihuatora, paꞌpi sëtërahuë. Iráca naꞌa niyontonahuatoi, Yosë chinotërai. Pëinënquë yapaꞌpatoira, cari piyapiꞌsa quëparahuë. Capa cancantatoi nonca nonca tërarai. “Yosparinquën Sinioro,” tëcatoi, panca pita ninai. Iporaso napoaponahuëꞌ, parisitárahuë.

Salmos 42:4 ပူးပေါင်းရင်းမြစ်များ

2 Reyes 18:30

Inasoꞌ: ‘Sinioro ninahua nichaꞌëinpoaꞌ. Ina nohuanton isëquësoꞌ, co Asiria sontaroꞌsa yaꞌconatona minsëarinënpoahuëꞌ,’ itërinquëmaꞌ.

2 Reyes 18:32

Ina piquëran aꞌna roꞌtëꞌpaꞌ quëpaponquëmaꞌ. Iso noꞌpanëma pochin nininꞌpaꞌ quëpaponquëmaꞌ. Inaquë pan nicacaso marëꞌ trico noya noyatërin. Huinonta nicacaso marëꞌ opa noya noyatërin. Oripontaꞌ noyatërin niꞌton, notohuaroꞌ toma ocoipi. Ninointa co pahuaninhuëꞌ. Inaquë paꞌpatamaꞌ noya yaꞌhuëaramaꞌ. Co chiminaramahuëꞌ. Isiquiasëso pënënatënquëmaꞌ: ‘Sinioro nichaꞌësarinpoaꞌ,’ itárinquëmaꞌ. Napotatënquëma inasoꞌ, nonpintárinquëmaꞌ. Napoaton co ina natëamaso yaꞌhuërinhuëꞌ.

Salmos 100:4

Chinotacaso marëꞌ yaꞌconpatëhuaꞌ: “Yosparinquën Sinioro. ¡Ma noyanquëncha niꞌton, catahuarancoi paya!” itahuaꞌ.

Salmos 115:2

Inpioroꞌsasoꞌ, tëhuatona nataninacoi: “¿Insëquëta ipora Yosënëmasoꞌ?” itërinacoi.

Salmos 122:1

“Sinioro chinotacaso pëiquë paꞌahuaꞌ,” itohuachinacora, inapitaroꞌco capa cancantërahuë.

Salmos 122:8

Quëmopinëhuëpita inaquë yaꞌhuëpi. Amiconëhuëpitantaꞌ, inaquë yaꞌhuëpi. Inapita yonquiato: “Inaquë sano niꞌtona yaꞌhuëꞌinaꞌ,” tënahuë.

Salmos 80:6

Niyacaparaisoꞌ capini nipirinhuëꞌ, nocanatonacoi tëhuarinacoi. Inimicoroꞌsanta tëhuarinacoi.

Joel 2:17

Sinioro marëꞌ sacatopisoꞌ corto huaꞌanoꞌsantaꞌ, naꞌnëinaꞌ. Yosë pëinën ishpanamën notënanquë artaro yaꞌhuërinsoꞌ, co aquëyahuëꞌ. Ina huáncana huanirahuatonaꞌ, piyapiꞌsa marëꞌ Sinioro nonchinaꞌ: “Piyapinënpita Sinioro tëhuëtatënën oshahuanpisoꞌ, inquitëquëꞌ. Piyapinënpitacoi nipiraihuëꞌ co catahuahuatancoihuëꞌ, aꞌnapitaso tëhuaponacoi. Ama aꞌnapita nacionoꞌsa canarahuatonacoi, huaꞌanënchinacoisohuëꞌ. Inapitaso co chinotopirinënhuëꞌ, canarahuatonacoi: ‘¿Inata nipachin israiroꞌsa Yosënënari catahuarinhuëꞌ?’ tosapi,” ichinaꞌ.

Lucas 16:25

‘Coꞌchi nanitërahuë paya. Niꞌquëꞌ. Quëmasoꞌ nanpipon, nani maꞌsha yaꞌhuëtopirinquënhuëꞌ, inasáchin yonquiran niꞌton, iporasoꞌ parisitáran. Nasaroso nipirinhuëꞌ nanpipon, parisitápirinhuëꞌ, iporasoꞌ noya yaꞌhuarin huachi.

Rota naporinso' 1:21

Naporoꞌ pacapo, naꞌcon quëparëso pochin ninahuë. Iporaso nipirinhuëꞌ co huachi manta quëntarësohuë pochin ninahuë. Sinioro ina pochin nohuantërin niꞌton, naporahuë. ¡Napoaton ama huachi Noimi itocosohuëꞌ! Siniorosoꞌ yaꞌipi nanitaparin. Ina anaꞌintatonco aparisitërinco.