Romanos 9:32 - Chayahuita (Shahui)

³² ¿Onpoatontaꞌ co noya niꞌninhuëꞌ? “Pënëntërinsoꞌ nanan noꞌtëquën natëhuatëhuaꞌ, nóya cancantarëhuaꞌ,” topirinahuëꞌ, co nanitopihuëꞌ. “Yosëíchin nanitërin anoyacancantinpoasoꞌ,” taꞌcaiso nipirinhuëꞌ, co Quisocristo nohuantopihuëꞌ. Inapoatonaꞌ, pancaraꞌpi iꞌpatërëso pochin niꞌpi. Ina marëꞌ Yosëri co noyahuëꞌ niꞌnin.

Romanos 9:32 ပူးပေါင်းရင်းမြစ်များ

Isaías 8:14

Israiroꞌsanquëmasoꞌ, cato huënton yaꞌhuëramaꞌ. Natëhuatamaco, carima catahuaranquëma noꞌtëquën chinotamacosoꞌ. Coꞌsoꞌ natëhuatamacohuëꞌ, pëcotan pochin nisarahuë. Iraquë naꞌpi iꞌpatochináchin yaꞌhuërinso pochin nisarahuë. Huënsonquë maꞌsha mapiso pochin, ritiquë sami mapiso pochin, Quirosarinquë yaꞌhuëpisopita anaꞌintarahuë.

Isaías 8:15

Naꞌcon israiroꞌsa iꞌpatona anotopiso pochin nicaponaꞌ. Inapoatona chiminaponaꞌ. Pëcotanquë maꞌsha mapachinara co huachi pipirinsohuë pochin nisapi,” itërinco.

Mateo 13:57

Co natëtonaraihuëꞌ tëhuapi. Napohuachinara, Quisosori itërin: —Iráca quëran huarëꞌ napopi. “Yaꞌipi piyapiꞌsari pënëntonaꞌpi noya natanpi. Ninanonënquë yaꞌhuëpisopitaso nipirinhuëꞌ, co noyahuëꞌ natanpi. Co quëmopinënpitari tërantaꞌ yanatëpihuëꞌ,” topi iráca. Noꞌtëquën napopi, tënin Quisoso.

Lucas 2:34

—Yosë noya aꞌpainquëmaꞌ, itërin Simioni. Ina quëran aꞌshin itantapon: —Huaꞌhuan mashotohuachin, yaꞌipi israiroꞌsaꞌ pënënarin. Natanahuatonaꞌ, aꞌnaquën natëtonaꞌ, noya cancantapi. Aꞌnaquënso nipirinhuëꞌ co nohuantapihuëꞌ niꞌton, anotërëso pochin nisapi. Yosë nohuitacaiso marëꞌ noꞌtëquën pënëntapirinhuëꞌ, chiníquën noꞌhuiapi.

Lucas 7:23

Yaꞌipi cancanëma quëran natëhuatamaco, noya cancantaramaꞌ. Co nisha nisha yonquiamacosoꞌ yaꞌhuërinhuëꞌ, itërin Quisosori.

Romanos 10:3

Yosëíchin anoyacancantërinpoaꞌ. Nipirinhuëꞌ, co nohuantopihuëꞌ ina nanan imacaisoꞌ. “Pënëntërinsoꞌ natëhuatëhuaꞌ, Yosë noya niꞌsarinpoaꞌ,” toconpi. “Quëma Sinioro anoyacancantocoi,” co itopihuëꞌ.

Romanos 11:11

Napoaton natanaranquëmaꞌ. ¿Israiroꞌsaꞌ co yanatëpihuëꞌ niꞌquëhuarëꞌ Yosëri aꞌpomiatërin ti? Co Yosëri aꞌpomiatërinhuëꞌ. Nipirinhuëꞌ, co imapihuëꞌ niꞌton, nisha piyapiꞌsantaꞌ Yosëri anoyacancantarin. Ina quëran israiroꞌsasoꞌ, apiratonaꞌ yonquiapi: “Canpoantaꞌ inapita pochin cancantohuatëhuaꞌ, Yosë noya niꞌsarinpoaꞌ,” tosapi.

Romanos 4:16

Napoaton Apraaniso natëton: “Yosë noꞌtëquën nontërinco,” topachina, Yosëri itërin: “Oshahuanpiranhuëꞌ, caora nohuanto, nosoroatënquën catahuaranquën. Huiꞌnanpitantaꞌ catahuarahuë,” itërin Yosëri. Co cotioroꞌsaráchin nosororinhuëꞌ. Yaꞌipi Apraan pochin cancantopisopitantaꞌ nosororin. Ina huiꞌninpita pochin ninëhuaꞌ.

1 Corintios 1:23

Quiyaso nipirinhuëꞌ Quisocristo nanamënáchin aꞌchinai: “Corosëquë canpoa marëꞌ chiminin,” tënai. Cotioroꞌsasoꞌ co natëtopihuëꞌ: “Inasoꞌ Yosë huiꞌnin naporini, co chimiintonhuëꞌ,” toconpi. Nisha piyapiroꞌsarintaꞌ co nohuantatonaraihuëꞌ, tëhuapi.

1 Pedro 2:6

Quiricanën quëran ina ninorin: “Yapëihuachinara, noya noya naꞌpi nohuantopi pëiꞌ achinicaso marëꞌ. Cristo ina naꞌpi pochin nisarin. Sionquë acoarahuë. Ina natëhuatamaꞌ, ‘Co naniantarinpoahuëꞌ,’ taꞌtomaꞌ, co sëtërëso pochin cancantaramahuëꞌ,” tënin Yosë quiricanënquë.

1 Pedro 2:8

Quiricanën quëran itantarin: “Iratohuatëra, naꞌpi iꞌpatahuatëꞌ, anotërëꞌ,” tënin. Inapochachin aꞌnaquën co Quisocristo nanamën natëtonaraihuëꞌ, nisha cancantopi. Ina marëꞌ Yosë nohuanton, naꞌinpi huachi.