Romanos 9:17 - Chayahuita (Shahui)

¹⁷ Iráca Iquipito copirnosoꞌ co noyahuëꞌ cancantopirinhuëꞌ, Yosëri huayonin huaꞌanëntacaso marëꞌ. “Piyapinëhuëpita huaꞌanëntopiranhuëꞌ, nichaꞌësarahuë noya pipicaiso marëꞌ. Ina quëran naꞌa piyapiꞌsaꞌ nicatonaꞌ, ‘Ma noyacha Yosësoꞌ nanitaparin paya. Copirno co nohuantopirinhuëꞌ, piyapinënpita nichaꞌërin,’ tosapi,” tënin. Quiricanën quëran shaꞌhuitërinpoaꞌ.

Romanos 9:17 ပူးပေါင်းရင်းမြစ်များ

Éxodo 9:16

Napoaponahuëꞌ, quëmaso ca nohuanto nanpiaran. Nani acoranquën chiníquën nanantërahuësoꞌ, aꞌnotaꞌhuanquënso marëꞌ. Anaꞌintëranquënsoꞌ nitotohuachinaꞌ, yaꞌipi parti nahuinarahuë huachi.

Daniel 4:22

Ina nara pochinquën quëmasoꞌ sinioro copirno. Quëmanta ina nara aꞌshininso pochin chini chiníquën nanantëran. Chiníquën nanantëransoꞌ, piꞌiroꞌtëquë nincaninso pochin ninin. Naporahuaton yaꞌipi isoroꞌpaquë huaꞌanëntëran.

Juan 17:26

Quëma nanamën nani aꞌchintërahuë nohuitinënquënso marëꞌ. Ipora huantaꞌ aꞌchintarahuë niꞌton, noya noya nohuitarinënquën. Quëma nosororancoso pochachin ninosorocaiso marëꞌ. Inapohuachinaꞌ, inapita yaꞌcoancantato, yaꞌhuëmiatarahuë,” itërin.

Romanos 11:4

Napotopirinhuëꞌ, ¿maꞌtaꞌ Yosëri itantarin? “Aꞌnaquën mini mamanshi moshapi, Paaro itopisoꞌ. Nipirinhuëꞌ, ca nohuanto, canchisë huaranca quëmapiꞌsaꞌ chinotarinaco. Co mamanshi moshapihuëꞌ,” itërin. Nani ina nitotëramaꞌ.

Gálatas 3:22

Nipirinhuëꞌ, co insontaꞌ nanitërinhuëꞌ noꞌtëquën natëcasoꞌ. Yaꞌipinpoaꞌ oshahuanëhuaꞌ. Ina marëꞌ anaꞌintinpoasoꞌ yaꞌhuërin, tënin Yosë quiricanën quëran. Napoaton Quisocristoráchin nanitaparin anoyacancantinpoasoꞌ. Inasáchin imapatëhuaꞌ, Yosë noya niꞌsarinpoaꞌ.

Gálatas 3:8

Co cotioroꞌsaráchin Yosëri nohuantërinhuëꞌ. Nisha piyapiꞌsantaꞌ imapachinaꞌ, noya niꞌsarin. Noya nicaton, co oshanëna marëꞌ anaꞌintarinhuëꞌ. Iráca iso noya nanan ninoton, Apraan itapon: “Nisha nisha piyapiꞌsantaꞌ quëma pochin cancantohuachinaꞌ, naꞌcon catahuaarahuë,” itërin Yosëri. Quiricanën quëran naporin.

Gálatas 4:30

Cosonaꞌ huaꞌhuinso nipirinhuëꞌ, co yaꞌhuëmiatërinhuëꞌ. Inaꞌton nasitaponahuëꞌ, Yosë co nohuantërinhuëꞌ paꞌpin maꞌshanënpita huaꞌanëntacasoꞌ. Apraan nontaton, itapon: “Isaco yaꞌipi huaꞌanëntapon. Napoaton cosonasoꞌ, huaꞌhuinë chachin aꞌpaquëꞌ paꞌinaꞌ,” tënin.

1 Samuel 4:8

Inasoꞌ Yosë, chini chiníquën nanantërin. Inari iquipitoroꞌsa inotëro parti ataꞌhuantërin. Nisha nisha maꞌsha onpotaton tiquirin. ¿Inta iporasoꞌ ina quëran nichaꞌëinpoa? ¡Maꞌhuantacha canpoasoꞌ nisarëhua paya!