Romanos 8:9 - Chayahuita (Shahui)

⁹ Canpitaso nipirinhuëꞌ co noyahuëꞌ yonquiramasopita naniantëramaꞌ. Ispirito Santo yaꞌcoancantohuachinquëmaꞌ, ina nohuantërinsoꞌ nisaramaꞌ. Co Ispirito Santo yaꞌcoancantohuachinquëmahuëꞌ, co tëhuënchachin Quisocristo imaramahuëꞌ.

Romanos 8:9 ပူးပေါင်းရင်းမြစ်များ

Lucas 11:13

Canpitasoꞌ co noyahuëꞌ yonquiapomarahuëꞌ, huiꞌnamaꞌ nosororamaꞌ. Noya maꞌsha quëtëramaꞌ. Yosësoꞌ noya noya niꞌton, naꞌcon naꞌcon nosororinquëmaꞌ. Inápaquë yaꞌhuaponahuëꞌ, huiꞌninpita pochin niꞌninquëmaꞌ. Nontohuatamaꞌ, ‘Ispirito Santo ayaꞌcoancantoco,’ itohuatamaꞌ, ayaꞌcoancantarinquëmaꞌ,” itërin.

Juan 14:17

Ispirito Santosoꞌ noꞌtëquënáchin nonin niꞌton, Yosë nanamën noꞌtëquën anitotarinquëmaꞌ. Co imarinacosopitasohuëꞌ nipirinhuëꞌ co ina natëpihuëꞌ. Napoaton co nohuitapihuëꞌ. Canpitaso nipirinhuëꞌ nohuitaramaꞌ. Nani tahuëri catahuarinquëmaꞌ. Yaꞌcoancantarinquëmaꞌ.

Juan 14:23

Napotohuachina, Quisosori itërin: —Co yaꞌipi piyapiꞌsaꞌ nanitopihuëꞌ nohuitinacosoꞌ. Insosona nosorohuachinaco, natëarinaco. Natëhuachinaco, Tata Yosëri nosoroarin. Inaroꞌco yaꞌcoancantatoi, inaquë yaꞌhuëarai.

Juan 3:34

Quisososoꞌ Yosë nanamën chachin nonin. Ispirito Santori noyá yaꞌcoancantërin niꞌton, noꞌtëquënáchin nonin.

Juan 3:6

Piyapi quëran nasitohuatamara, piyapi pochin cancantëramaꞌ. Ispirito Santo quëransoꞌ nasitaantahuatamaꞌ, Yosë pochin cancantaramaꞌ.

Hechos 16:7

Misia parti yaꞌcaritonahuatonaꞌ, Pitinia parti yapaꞌsapirinahuëꞌ. Naquëranchin Ispirito Santori yaꞌcopirin. “Co Quisoso nohuantërinhuëꞌ inaquë aꞌchinaꞌhuaisoꞌ,” taꞌtonaꞌ, co inatohuaꞌ paꞌpihuëꞌ.

Romanos 7:5

Iráca, canpoara nipaꞌyatacasoáchin yonquirëhuaꞌ. Co noyahuëꞌ cancantërëhuaꞌ. Pënënpachinënpoara, aquë aquëtëꞌ co noyahuëꞌ yonquiatëhuaꞌ, co noyahuëꞌ ninëhuaꞌ. Ina marëꞌ chiminpatëhuaꞌ, parisitomiatacasoꞌ yaꞌhuërin.

Romanos 8:1

Napoaton iporasoꞌ Quisocristo imapatëhuaꞌ, co huachi anaꞌintinpoasoꞌ yaꞌhuërinhuëꞌ.

Romanos 8:11

Ispirito Santo yaꞌcoancantërinpoaꞌ. Yosë huaꞌyanën chachin niꞌton, achinicancaninpoaꞌ Yosë pochin cancantacaso marëꞌ. Aꞌna tahuërintaꞌ Yosë ananpitaantarinpoaꞌ. Quisocristo ananpitaantarinsoꞌ pochachin ananpitaantarinpoaꞌ canpoantaꞌ. Nonënpoaꞌ chiminacaso yaꞌhuëpirinhuëꞌ, Ispirito Santo yaꞌcoancantërinpoaꞌ niꞌton, nanpiantarihuaꞌ.

Romanos 8:2

Oshanënpoa natëhuatëhuaꞌ, co noyahuë ninëhuaꞌ. Inapohuatëhuaꞌ, chiminpatëhuaꞌ, anaꞌintarinpoaꞌ. Nipirinhuëꞌ, Quisocristo imapatëhuaꞌ, Ispirito Santo catahuarinpoaꞌ nanpimiatacaso marëꞌ. Naporahuaton, co huachi oshanënpoa natëcasoꞌ yaꞌhuërinhuëꞌ.

1 Corintios 15:23

Co napopináchin nanpiantarihuahuëꞌ. Quisocristoꞌton nanpiantarin. Aꞌna tahuëri oꞌmantahuachin, imarëhuasopitantaꞌ ananpitaantarinpoaꞌ.

1 Corintios 3:16

Yosë imapatëhuaꞌ, ina pëinën pochin ninëhuaꞌ. Ispirito Santo yaꞌcoancantohuachinpoaꞌ, cancanënpoaquë yaꞌhuërarin. ¿Co ina nitotëramahuëꞌ ti?

1 Corintios 6:17

Quisocristoíchin imapatëhuaꞌ, ina pochin cancantarëhuaꞌ.

1 Corintios 6:19

Quisocristo imapatëhuaꞌ, Ispirito Santo yaꞌcoancantërinpoaꞌ. Nani ina nitotëramaꞌ. Yosë aꞌpatimarinpoaꞌ niꞌton, cancanënpoaquë chachin yaꞌhuërarin. Napoaton co huachi canpoara nohuantërëhuasopita nicacasoꞌ yaꞌhuërinhuëꞌ. Yosë chachin huaꞌanëntërinpoaꞌ.

2 Corintios 10:7

Canpitasoꞌ yaꞌpirama quëran quënanamasoráchin yonquiramaꞌ. Co cancanëma quëran huarëꞌ yonquiramahuëꞌ. Aꞌnaquën “Quisocristo chachin imarai,” topachinara, isontaꞌ yonquiꞌinaꞌ. Quiyantaꞌ Quisocristo imarai mini.

2 Corintios 6:16

Yosë chinotërëhuaquë noyasáchin nicacasoꞌ yaꞌhuërin. Co inaquësoꞌ mamanshi moshacasoꞌ yaꞌhuërinhuëꞌ. Inapochachin canpoantaꞌ Yosë imapatëhuaꞌ, yaꞌcoancantarinpoaꞌ niꞌton, ina pëinën pochin ninëhuaꞌ. Yosësoꞌ nanpiárin. Quiricanën quëran naporin: “Imapatamaco, yaꞌcoancantaranquëmaꞌ. Canpitaroꞌco yaꞌhuarahuë. Chinotohuatamaco, noya aꞌpaiaranquëmaꞌ. Piyapinëhuëpita pochin niꞌsaranquëmaꞌ,” tënin.

Gálatas 4:6

Huiꞌnin pochachin nicatonpoaꞌ, Ispirito Santo ayaꞌcoancantërinpoaꞌ. Ina quëran Yosë nontohuatëhuaꞌ, Ispirito Santo nohuanton, “Tata” itërëhuaꞌ.

Gálatas 5:24

Quisocristo corosëquë chiminaton, oshanënpoaꞌ inquitërinpoaꞌ. Napoaton canpoantaꞌ ina imapatëhuaꞌ, co noyahuëꞌ yonquirëhuasopita corosëquë patanantatë pochin nitatëhuaꞌ, naniantacasoꞌ yaꞌhuërin. Co huachi nohuantarihuahuëꞌ sopai pochin cancantacasoꞌ.

Efesios 1:13

Canpitantaꞌ Yosë nanamën natanamaꞌ. “Quisocristo anoyacancantohuachinquëmaꞌ, nichaꞌësarinquëmaꞌ,” itërainquëmaꞌ. Natanpatamara: “Noꞌtën nanan inasoꞌ,” taꞌtomaꞌ, natëramaꞌ. Quisocristo imapatamaꞌ, huiꞌnin pochin Yosë niꞌninquëmaꞌ. Napoaton Ispirito Santo ayaꞌcoancantërinquëmaꞌ. Sichoquë marca acopiso pochin ayaꞌcoancantërinquëmaꞌ huëntonënquë ayaꞌconinquëmasoꞌ nitotacaso marëꞌ. Iráca shaꞌhuirinso chachin napotërinquëmaꞌ.

Efesios 2:22

Canpitantaꞌ Quisocristo imatomaꞌ, yaꞌconamaꞌ. Aꞌnaya aꞌnayanpoaꞌ naꞌpi pochin ninëhuaꞌ pëiꞌ nanicaso marëꞌ. Yaꞌipi imarëhuasopita Yosë pëinën pochin ninëhuaꞌ. Ispirito Santo yaꞌcoancantohuachinpoaꞌ, Yosë chachin canpoarëꞌ yaꞌhuërarin huachi.

Efesios 3:17

Yaꞌipi cancanëna quëran natëtatonaꞌ, Quisocristoíchin yonquiꞌinaꞌ. ‘Cancanëhuëquë yaꞌhuërarin,’ taꞌtonaꞌ, noya noya nohuichinën. Catahuaquëꞌ noya nosoroꞌinën. Yaꞌipi piyapiꞌsantaꞌ nosoroꞌinaꞌ, Nara itëquën acopoꞌ paꞌpachina, co inpaninhuëꞌ. Inapochachin inapitantaꞌ ‘Quisocristo naꞌcon nosororincoiꞌ,’ taꞌtonaꞌ, aꞌnapitantaꞌ nosoroꞌinaꞌ. Noya ninosorohuachinaꞌ, Ispirito Santori catahuararin chiníquën cancantacaisoꞌ.

Filipenses 1:19

Nani tahuëri ca marëꞌ Yosë nontëramaꞌ. Naporahuaton, Ispirito Santo nani tahuëri catahuarinco. Napoaton co paꞌyanahuëꞌ. Ocoiarinaco nimara. Co casoꞌ nitotërahuëꞌ. Yosëíchin nitotërinsoꞌ. Maꞌsona tërantaꞌ onpotohuachinaco, inantaꞌ noya, tënahuë. Noyasáchin Yosë yonquirinpoaꞌ. Ina marëꞌ noya cancantarahuë.

2 Timoteo 1:14

Yosë nohuanton, nanamën noꞌtëquën nitotëran. Ama mantaꞌ nisha aꞌchinquësohuëꞌ. Ispirito Santo catahuarinquën noꞌtëquën yonquicamasoꞌ. Nani yaꞌcoancantërinpoaꞌ catahuainpoaso marëꞌ.

1 Pedro 1:11

Ispirito Santo nohuanton, iráca Cristo ninopi. “Parisitapon. Ina quëran nanpiantarahuaton, noya noya yaꞌhuapon,” topi ninotonaꞌ. Napoatonaꞌ, yonquiapi. “¿Ma quëmapitaꞌ oꞌmaton, parisitapon? ¿Onporotaꞌ parisitaponsoꞌ?” topi.

1 Juan 3:24

Yosë natëhuatëhuaꞌ, yonquirinsoráchin imasarihuaꞌ. Imapatëhuaꞌ, yaꞌcoancantomiatërinpoaꞌ. Ispirito Santo quëtërinpoaꞌ yaꞌcoancantinpoaso marëꞌ. Ina catahuahuachinpoaꞌ, noya nisarëhuaꞌ. Ina quëran Yosë nohuitërëhuasoꞌ nitotërëhuaꞌ.

1 Juan 4:13

Yosë huëntonënquë yaꞌconpatëhuaꞌ, Ispirito Santo aꞌpatimarinpoaꞌ yaꞌcoancantinpoaso marëꞌ. Huaꞌyanën chachin niꞌton, cancanënpoaquë ayonquirinpoaꞌ. “Tëhuënchachin Yosë yaꞌcoancantërinpoaꞌ,” tënëhuaꞌ.

1 Juan 4:4

Canpitasoꞌ apiaꞌhuaroꞌsaꞌ, Yosë huiꞌninpitanquëmaꞌ ninamaꞌ. Noꞌtëquën yonquiatomaꞌ, nisha aꞌchinaꞌpiroꞌsaꞌ minsëaramaꞌ. Sopai nohuanton, nonpin nananoꞌsaꞌ aꞌchintopirinënquëmahuëꞌ, Ispirito Santo nani yaꞌcoancantërinquëmaꞌ. Inasoꞌ sopai quëran chini chiníquën nanantarin niꞌton, catahuahuachinpoaꞌ, co nonpin nananoꞌsaꞌ natëtarihuahuëꞌ.

Apocalipsis 13:8

Huaꞌhuayatërahuëꞌ piyapiꞌsari natëapi. Carniroaꞌhua imapisopitaíchin co ina chinotapihuëꞌ. Inasoꞌ aꞌna quirica yaꞌhuëtërin. Nanpirin quirica itopisoꞌ. Inaquë nininënpita nani ninshitërin. Isoroꞌpaꞌ ninin quëran huarëꞌ imapisopita ninoton, inaquë ninshitërin. “Canpoa marëꞌ Carniroaꞌhua chiminin,” taꞌtonaꞌ, ina imasapi. Aꞌnapitaso nipirinhuëꞌ co nanpirin quiricaquë nininënpita yaꞌhuërinhuëꞌ niꞌton, maꞌsha marë quëran pipirinsoꞌ chinotapi.

Apocalipsis 20:15

Co nanpirin quiricaquë nininënpita yaꞌhuëhuachinahuëꞌ inaquë chachin aꞌpararin.