Romanos 8:30 - Chayahuita (Shahui)

³⁰ Nohuantërinpoaꞌ niꞌton, huëntonënquë chachin ayaꞌconinpoaꞌ. Oshanënpoaꞌ inquitatonpoaꞌ, noya niꞌninpoaꞌ. Ina nohuanton, aꞌna tahuëri inápaquë noya noya acoarinpoaꞌ.

Romanos 8:30 ပူးပေါင်းရင်းမြစ်များ

Isaías 41:9

Noꞌpaꞌ nanirinso parti quëran pochin ocoiranquëmaꞌ. Paꞌpi áquë yaꞌhuëapiramahuëꞌ, acoranquëma piyapinëhuëpita nicacamaso marëꞌ. Carinquëma huayonanquëma niꞌton, co aꞌporanquëmahuëꞌ.

Juan 17:22

Quëma nohuanton, noyápiachin cancantërahuë. Imarinacosopitantaꞌ catahuarahuë noyápiachin cancantacaiso marëꞌ. Ina quëran aꞌna huënton pochin napopianachin yonquiapi. Canpo pochachin cancantapi.

Juan 17:24

Quëma nohuanton Tata, isopitasoꞌ imasarinaco. Inapita nohuantërahuë carëꞌ yaꞌhuëcaisoꞌ. Iráca quëran huarëꞌ quëma nosororanco. Coꞌhuara isoroꞌpaꞌ yaꞌhuëyátërasohuëꞌ, nosoroatonco, nóya acoranco. Inatohuaꞌ inapitantaꞌ pantahuachinaꞌ, noya noya niꞌsarinaco. Ina naꞌcon nohuantërahuë.

Juan 5:24

Noꞌtëquën itaranquëmaꞌ. Yosë chachin aꞌpaimarinco. Noya natanpatamaco, cancanëma quëran huarëꞌ ina imapatamaꞌ, nanpimiataramaꞌ. Co onporontaꞌ anaꞌintaranquëmahuëꞌ. Chiminpatamaꞌ, co parisitomiataramahuëꞌ. Nani Yosë nohuitaramaꞌ niꞌton, nanpimiataramaꞌ.

Romanos 1:6

Canpitantaꞌ nisha piyapinquëmaꞌ nipomarahuëꞌ, Quisocristo imaramaꞌ. Yosë nohuanton, imaramaꞌ.

Romanos 11:29

Nani Yosëri shaꞌhuitohuachin, inachachin nisarin. Co onporontaꞌ nisha nontarinhuëꞌ. Huëntonënquë ayaꞌconpachin, co onporontaꞌ naniantarinhuëꞌ.

Romanos 8:1

Napoaton iporasoꞌ Quisocristo imapatëhuaꞌ, co huachi anaꞌintinpoasoꞌ yaꞌhuërinhuëꞌ.

Romanos 8:21

Naporoꞌ co huachi maꞌsha chanatarinhuëꞌ. Yosë huiꞌninpitanpoa ninëhuasopita noya noya acohuachinpoaꞌ, maꞌsharoꞌsantaꞌ noya noya niantapi. Co huachi chiminaponahuëꞌ.

Romanos 8:28

Yosë nosorohuatëhuaꞌ, noyasáchin yonquirinpoaꞌ. Maꞌsha onpohuatëhuara, naꞌcon catahuarinpoaꞌ. Piꞌpian parisitapirëhuahuëꞌ, ina nohuanton, parisitërëhua quëran noya noya pipiarëhuaꞌ. Achinicancaninpoaꞌ niꞌton, noya noya imarihuaꞌ. Nani huayoninpoaꞌ ina nohuantërinsoꞌ nicacaso marëꞌ.

1 Corintios 1:2

Corintoquë yaꞌhuëramasopita ninshitaranquëmaꞌ. Canpitantaꞌ Yosë huëntonënquë yaꞌconamaꞌ. Quisocristo imapatamaꞌ, anoyacancantërinquëmaꞌ niꞌton, noyápiachin cancantëramaꞌ. Yosë acorinquëmaꞌ piyapinënpita nicacamaso marëꞌ. Nisha nisha parti aꞌnapitantaꞌ Quisocristo imapi. Yaꞌipinpoaꞌ ina huaꞌanëntërinpoaꞌ. Aꞌna huënton pochin ninëhuaꞌ.

1 Corintios 1:9

Yosë co naniantarinquëmahuëꞌ. Shaꞌhuitërinquëmaso chachin catahuarinquëmaꞌ. Nani acorinquëmaꞌ huiꞌnin nohuitacamaso marëꞌ. Quisocristo chachin huaꞌanëntërinpoa huachi.

1 Corintios 2:7

Co inapita pochin aꞌchinaihuëꞌ. Yosë yonquirinso chachin aꞌchinai. Iráca coꞌhuara isoroꞌpaꞌ yaꞌhuëyátërasohuëꞌ, Yosë ninotonpoaꞌ, yonquirinpoaꞌ anoyacancantinpoaso marëꞌ. Anoyacancantohuachinpoaꞌ, inarëꞌquënpoaꞌ yaꞌhuëmiatarihuaꞌ. Iráca co insontaꞌ nitotopirinahuëꞌ, iporaso huachi Yosë anitotërinpoaꞌ niꞌton, aꞌchintërainquëmaꞌ.

1 Corintios 6:11

Iráca aꞌnaquëmaꞌ ina pochin nipiramahuëꞌ. Sinioro Quisocristo imapatamara, oshanëmaꞌ inquitërinquëmaꞌ. Nani anoyacancantërinquëmaꞌ niꞌton, Yosë noya niꞌninquëmaꞌ. Ispirito Santo chachin catahuarinquëmaꞌ noya cancantacasoꞌ.

2 Corintios 4:17

Tëhuënchachin iporasoꞌ piꞌpian parisitapirëhuahuëꞌ, co huaꞌquiꞌ isoroꞌpaquë yaꞌhuarihuahuëꞌ. Yosëꞌpaꞌ paꞌpatëhuaꞌ, co onporontaꞌ pipiarëhuahuëꞌ. Imarëhuaso marëꞌ parisitapirëhuahuëꞌ, inapaquësoꞌ noya noya cancantarihuaꞌ. Yosë pochachin cancantarihuaꞌ.

Gálatas 1:15

Yosë nosoroatonco, nohuantërinco huiꞌnin imacaꞌhuaso marëꞌ. Coꞌhuara nasichátërapohuëꞌ, yonquirinco nanamën aꞌchinaꞌhuaso marëꞌ. Inaora nohuanton, nosororinco niꞌton, huiꞌnin anohuitërinco nisha piyapiꞌsaꞌ pënënaꞌhuaso marëꞌ. Ina marëꞌ acohuachincora, co piyapiꞌsaꞌ paaparahuëꞌ aꞌchintinacoso marëꞌ.

Gálatas 1:6

Yosë ayonquirinquëmaꞌ imacamaso marëꞌ. Quisocristo inaora nohuanton nosoroatënquëmaꞌ, catahuarinquëmaꞌ niꞌton, imaramaꞌ. Imapiramahuëꞌ, aꞌnaroáchin ina naniantatomaꞌ, nisha nanan yaimaramaꞌ. Ina yonquiato, paꞌyanahuë.

Gálatas 5:8

Co ina pochin Yosë aꞌchintërinpoahuëꞌ. Huëntonënquë ayaꞌconinpoaꞌ niꞌton, cancanënpoaquë nontarinpoaꞌ. Noꞌtëquën yonquicasoꞌ nohuantërin.

Efesios 1:11

Inaora nohuanton, acorinpoaꞌ piyapinënpita nicacaso marëꞌ. Quisocristo imapatëhuaꞌ, huiꞌnin pochin niꞌsarinpoaꞌ. Napoaton aꞌna tahuëri Yosëꞌpaꞌ noya noya acoarinpoaꞌ. Iráca chachin yonquirinpoaꞌ niꞌton, huëntonënquë ayaꞌconinpoaꞌ.

Efesios 1:5

Iráca quëran huarëꞌ nosoroatonpoaꞌ, acorinpoaꞌ huëntonënquë yaꞌconacasoꞌ. Quisocristo anoyacancantërinpoaꞌ niꞌton, huiꞌnin pochachin niꞌninpoaꞌ. Inaora nohuanton, noya yonquirinpoaꞌ.

Efesios 2:6

Iráca Quisocristo paꞌpitopirinahuëꞌ, Yosëri ananpitaantarahuaton, inápaquë quëpantarin. Canpoantaꞌ imarëhuaꞌ niꞌton, inarëꞌquënpoaꞌ nanpiantarëhuaso pochin anoyacancantërinpoaꞌ. Quisocristo yaꞌcoancantërinpoaꞌ niꞌton, ipora chachin inápaquë yaꞌhuarëhuaso pochin Yosë niꞌninpoaꞌ.

Efesios 3:11

Iráca quëran huarëꞌ Yosë yonquirinpoaꞌ imacaso marëꞌ. Quisocristo oꞌmaton, huëntonënquë ayaꞌconinpoaꞌ. Inasáchin huaꞌanëntërinpoaꞌ.

Efesios 4:4

Quisocristo imapatëhuaꞌ, yaꞌipinpoaꞌ aꞌna huëntoínchin pochin ninëhuaꞌ. Aꞌnaíchin Ispirito Santo yaꞌhuërinsoꞌ yaꞌcoancantërinpoaꞌ. Imarëhuasopita nichaꞌësarinpoaꞌ yaꞌhuërinquë chachin quëpantaꞌinpoaso marëꞌ. Inasáchin ninarëhuaꞌ.

Colosenses 3:4

Quisocristo chachin yaꞌcoancantërinpoaꞌ Yosë yonquicaso marëꞌ. Aꞌna tahuëri oꞌmantahuachin, noya noya yaꞌnoarin. Naporoꞌ inarëꞌquënpoaꞌ yaꞌhuërarihuaꞌ niꞌton, canpoantaꞌ noya noya acoarinpoaꞌ.

1 Tesalonicenses 2:12

Achinicancanainquëmaꞌ. “Yosë imaramaꞌ niꞌton, noyasáchin nicoꞌ Yosë noya niꞌinquëmaꞌ,” itërainquëmaꞌ. Ina acorinquëmaꞌ huaꞌanëntërinquë yaꞌconacamasoꞌ. Aꞌna tahuëri yaꞌhuërinꞌpaꞌ quëpantahuachinquëmaꞌ, noya noya yaꞌhuëcontaramaꞌ.

2 Timoteo 2:11

Noꞌtëquën itëranquën. Yatëpapirinënpoahuëntaꞌ, imamiatohuatëhuaꞌ, inarëꞌquënpoaꞌ nanpimiatarihuaꞌ.

Hebreos 9:15

Napoaton nasha quëran anoyatërinso nani shaꞌhuitërinpoaꞌ. Yaꞌnan anoyatërinso naꞌa piyapiꞌsaꞌ imapirinahuëꞌ, co noyahuëꞌ cancantatonaꞌ, oshahuanpi. Co maꞌsharoꞌsaꞌ huënainën quëran oshanënaꞌ inquimiatopihuëꞌ. Nipirinhuëꞌ, Quisocristo chiminin yaꞌipi huayoninsopita oshanënaꞌ inquitacaso marëꞌ. Yaꞌnan anoyatërinso imapisopita oshanënantaꞌ inquitërin.

1 Pedro 2:9

Imarëhuasopitaso nipirinhuëꞌ nohuantërinpoaꞌ. Huayoninpoaꞌ ina nohuitacaso marëꞌ. Inasáchin huaꞌanëntërinpoaꞌ. Nani acorinpoaꞌ corto huaꞌanoꞌsa pochin nicatëhuaꞌ, ina marëꞌ sacatacasoꞌ. Noyápiachin cancan quëtërinpoaꞌ. Yosë piyapinënpoaꞌ ninëhuaꞌ. Iráca tashi pochin cancantopirëhuahuëꞌ, Yosë nichaꞌërinpoaꞌ tahuëri pochin cancantacaso marëꞌ. Acorinpoaꞌ Yosë noya nosororinpoasoꞌ shaꞌhuicaso marëꞌ.

1 Pedro 3:9

Piyapiꞌsaꞌ maꞌsha onpotohuachinënquëmaꞌ, ama iꞌhuërëtacamasoꞌ yonquicosohuëꞌ. Pinopachinënquëmaꞌ, ama canpitarisoꞌ pinocosohuëꞌ. Noya nontocoꞌ. Naporahuaton, Yosë nontocoꞌ inapitantaꞌ catahuain. Imapatëhuaꞌ, ina shaꞌhuitërinpoaꞌ aꞌnapitantaꞌ nosorocasoꞌ. Napohuatëhuaꞌ, Yosë noya catahuarinpoaꞌ.

1 Pedro 5:10

Yosë paꞌpi nosororinpoaꞌ. Quisocristo imarëhuaꞌ niꞌton, aꞌna tahuëri inápaquë quëpantarinpoaꞌ. Iporasoꞌ maꞌsha onpopirëhuahuëꞌ, catahuarinpoaꞌ. Co huaꞌquiꞌ parisitarihuahuëꞌ. Ina quëran nosoroatonpoaꞌ, anoyatarinpoaꞌ. Achinicancanarinpoaꞌ. Noya noya acoarinpoaꞌ.

2 Pedro 1:10

Napoaton iyaroꞌsaꞌ, naꞌcon yonquicoꞌ yaꞌipi cancanëma quëran huarëꞌ imacamaso marëꞌ. Yosë huayonatënquëmaꞌ, nontërinquëmaꞌ niꞌton, noyá matërëso pochin imamiatocoꞌ. Inapohuatamaꞌ, co nisha cancantatomaꞌ, aꞌpoaramahuëꞌ.

Apocalipsis 17:14

Inapitasoꞌ Carniroaꞌhua yaminsëatonaꞌ, quira nisapirinahuëꞌ, co nanitapihuëꞌ minsëcaisoꞌ. Inari minsëapon. Inasoꞌ Quisocristo chachin. Chini chiníquën nanantarin niꞌton, yaꞌipiya huaꞌanëntarin. Inasáchin natëcasoꞌ yaꞌhuërin. Piyapinënpitari imasapi. Yosëri huayonin niꞌton, natëmiatapi,” itërinco anquëni.

Apocalipsis 19:9

Ina quëran anquëni shaꞌhuitërinco ninshitaꞌhuaso marëꞌ: “Carniroaꞌhua saꞌacasoꞌ pita nininquë përapachinquëmaꞌ, nóya cancantaramaꞌ,” itërinco. Ina quëran itaantarinco: “Yosë chachin noꞌtëquën shaꞌhuitërinquën niꞌton, ina ninshitëquëꞌ,” itërinco.