Romanos 7:7 - Chayahuita (Shahui)

⁷ Napoahuarëꞌ, “Moisësë pënëntërinsoꞌ aoshahuaninpoaꞌ niꞌton, co noyahuëꞌ,” ¿tëcarihuaꞌ ti? ¡Co naporinhuëꞌ! Napoaponahuëꞌ, pënëntërin quëran oshahuanëhuasoꞌ nitotërëhuaꞌ. Iso pochin yonquiaꞌahuaꞌ. “Ama aꞌna piyapi maꞌshanënaꞌ noyapatocosohuëꞌ,” tënin iráca pënëntaton. Casoꞌ ina natanato, “Tëhuënchachin aꞌnapita maꞌshanën noyapatato, co noyahuëꞌ yonquirahuë. Ina marëꞌ oshahuanahuë,” tënahuë.

Romanos 7:7 ပူးပေါင်းရင်းမြစ်များ

Génesis 3:6

Ina natanaton, sanapiso nara nitërinso niꞌsárin: Noyápiachin nicaton caꞌchináchin cancantërin. “Ina caꞌpato, yaꞌipi nitotarahuë huachi,” tënin. Napoyan quëran, sëꞌpashorahuaton caꞌnin. Soꞌionta quëtohuachina, inanta caꞌnin.

2 Samuel 11:2

Aꞌna tahuëri iꞌhuararahuasoꞌ, inaso chinotërin quëran huënsërin. Pëinën aipi nanpëontarahuaton, costatarin. Costatapon pochin nocotopirinhuëꞌ, aꞌnara sanapi quënanin. Inasoꞌ sanapi noyápiroyanchin. Iꞌiratënënquë amararin.

Éxodo 20:17

Ama aꞌnapita maꞌshanën noyapatocosohuëꞌ: Saꞌinaꞌ, piyapinënapita, toronënaꞌ, moranënaꞌ, inapita co noyapatamaso yaꞌhuërinhuëꞌ. Co maꞌshanëna tëranta noyapatamaso yaꞌhuërinhuëꞌ,” itërin Yosëri israiroꞌsa pënënaton.

Mateo 5:28

Nipirinhuëꞌ, co monshihuanpiso marëáchin anaꞌintacasoꞌ yaꞌhuërinhuëꞌ, tënahuë. Aꞌna sanapi cancanëna quëran noyahuachinaꞌ, ina marëntaꞌ oshahuanapi. Nani monshitërinso pochin Yosëri niꞌsarin.

Lucas 12:15

Napotahuaton, yaꞌipiya pënënin. —Ama iyaroꞌsaꞌ maꞌsha canacamasoáchin yonquicosohuëꞌ. Co nani maꞌsha yaꞌhuëtinquëmaꞌ huarëꞌ noya nanpiaramahuëꞌ, itërin.

Lucas 20:16

Aꞌnaroáchin huëntarahuaton, inpriatonënpita tëpapon. Ina quëran nasha inpriatoroꞌsaꞌ acoantapon, tënahuë,” itërin Quisosori. Ina natanahuatonaꞌ: —¡Ama onporontaꞌ napoinsohuëꞌ! topi.

Hechos 20:33

Aꞌchintohuatënquëmara, co aquëtëꞌ coriqui yonquirahuëꞌ. Aꞌna piyapi coriquinën co nohuantaparahuëꞌ. Co aꞌmopiso tërantaꞌ noyapatërahuëꞌ.

Romanos 13:9

Iráca pënëntohuachina, itërin: “Saꞌahuanpatamaꞌ, ama aꞌna sanapi sëꞌhuacosohuëꞌ. Ama tëpatocosohuëꞌ. Ama mantaꞌ ihuatocosohuëꞌ. Ama nonpinapicosohuëꞌ. Ama aꞌna piyapi maꞌshanënpita nohuantapatocosohuëꞌ,” tënin. Ninosorohuatëhuaꞌ, yaꞌipi Yosë pënëninpoasoꞌ natëarëhuaꞌ. “Quëmaora ninosororanso pochachin aꞌnapitantaꞌ nosoroquëꞌ,” tënin Yosë.

Romanos 3:20

“Pënëntërinsoꞌ natëhuatëhuaꞌ, Yosë noya niꞌsarinpoaꞌ,” topirinahuëꞌ aꞌnaquën. Co ina marëꞌ noya niꞌninpoahuëꞌ. Pënëntërin quëran oshahuanëhuasoꞌ anitotërinpoaꞌ. Ina natanpatëhuara, “Tëhuënchachin oshahuanëhuaꞌ. Co noyahuëꞌ ninëhuaꞌ,” tënëhuaꞌ.

Romanos 3:5

Aꞌnaquën poꞌpin yonquipi: “Canpoa co noyahuë ninëhua niꞌton, Yosë noyasáchin nininsoꞌ aꞌninquëchin anitotërinpoaꞌ. Napoaton anaꞌintohuachinpoaꞌ, co noꞌtëquën anaꞌintërinpoahuëꞌ,” toconpi.

Romanos 4:1

Apraan naporinsoꞌ shaꞌhuichinquëmaꞌ. Inasoꞌ shimashonënpoaꞌ. ¿Onporahuatontaꞌ Yosëri noya niꞌnin?

Romanos 4:15

Moisësë pënëntërinsoꞌ co natëhuachinarahuëꞌ, anaꞌintacasoꞌ yaꞌhuërin. Co pënëntërinsoꞌ yaꞌhuërinhuëꞌ naporini, co natëcasoꞌ yaꞌhuëꞌitonhuëꞌ. Co ina marëꞌ oshahuaintërihuahuëꞌ.

Romanos 5:20

Iráca Moisësë pënëntërin oshahuanëhuasoꞌ anitotinpoaso marëꞌ. Ina quëran naꞌcon oshahuanëhuasoꞌ nitotërëhuaꞌ. Naꞌcon oshahuanpirëhuahuëꞌ, inaora nohuanton, Yosë naꞌcon naꞌcon nosororinpoaꞌ.

Romanos 6:15

Tëhuënchachin co huachi iráca pënëntërinsoꞌ natëcasoꞌ yaꞌhuërinhuëꞌ. Yosë nosoroatonpoaꞌ, nichaꞌërinpoaꞌ. Aꞌnaquënso nipirinhuëꞌ ina natanatonaꞌ, co mantaꞌ yanatëpihuëꞌ. “Noya oshahuanacasoꞌ,” toconpi. ¡Co ina pochin yonquicaso yaꞌhuërinhuëꞌ!

Romanos 7:11

Pënëntërinsoꞌ natëhuato, noya cancantarahuë, topirahuëꞌ. Co ina natërahuëꞌ niꞌton, oshahuanahuë. Chiminpato, anaꞌintincosoꞌ yaꞌhuërin.

Romanos 7:13

Napoahuarëꞌ pënëntërinsoꞌ noya nipirinhuëꞌ, ina marëꞌ anaꞌintarinco, ¿topiramahuëꞌ ti? ¡Co pënëntërinso marëꞌ anaꞌintincosoꞌ yaꞌhuërinhuëꞌ! Oshahuanahuë niꞌton, anaꞌintincosoꞌ yaꞌhuërin. Pënëntërinsoꞌ noya nipirinhuëꞌ natanahuë quëran aquë aquëtëꞌ co noyahuëꞌ yonquiato, co noyahuëꞌ ninahuë. Pënëninpoa quëran oshahuanahuësoꞌ nitotërahuë. Paꞌpi co noyahuëꞌ ninahuë, tënahuë.

Romanos 7:5

Iráca, canpoara nipaꞌyatacasoáchin yonquirëhuaꞌ. Co noyahuëꞌ cancantërëhuaꞌ. Pënënpachinënpoara, aquë aquëtëꞌ co noyahuëꞌ yonquiatëhuaꞌ, co noyahuëꞌ ninëhuaꞌ. Ina marëꞌ chiminpatëhuaꞌ, parisitomiatacasoꞌ yaꞌhuërin.

Romanos 7:8

“Ama maꞌsha noyapatocosohuëꞌ,” itërinco. Ina natanato, aquë aquëtëꞌ aꞌnapita maꞌshanënaꞌ noyapatërahuë. Co noyahuëꞌ cancantërahuësoꞌ canarinco. Iráca oshahuanpirahuëꞌ. Coꞌhuara pënëntërinsoꞌ nitochatërasocohuëꞌ, oshahuanahuësoꞌ co nitotërahuëꞌ.

1 Corintios 15:56

Yosë iráca pënëntërinsoꞌ co natëtatëhuahuëꞌ, oshahuanëhuaꞌ. Oshahuanëhuaꞌ niꞌton, chiminacasoꞌ yaꞌhuërin.

Efesios 5:3

Yosë anoyacancantërinquëmaꞌ niꞌton, ama iyaroꞌsaꞌ monshihuancosohuëꞌ. Ama aꞌna quëmapi saꞌin noyapacosohuëꞌ. Ama maꞌsharáchin cancantatomaꞌ, apiracosohuëꞌ. Ama aꞌnapita tëranta ina pochin nipiso shaꞌhuitocosohuëꞌ.

Colosenses 3:5

Napoaton piꞌpian tërantaꞌ co noyahuëꞌ yonquihuatamaꞌ, aꞌnaroáchin naniantocoꞌ. Ama monshihuancosohuëꞌ. Ama taparoꞌ yonquicosohuëꞌ. Ama aꞌna sanapi sëꞌhuacamasoꞌ yonquicosohuëꞌ. Ama aꞌna quëmapi saꞌin noyapacosohuëꞌ. Ama nani maꞌsha nohuantapatocosohuëꞌ. Aꞌnaquënsoꞌ maꞌsha naꞌcon nohuantatonaꞌ, mamanshi moshapiso pochin niconpi.

1 Tesalonicenses 4:5

Aꞌnaquën co Yosë nohuitatonahuëꞌ, ichihuëꞌëcaisoachin yonquiatonaꞌ, aꞌnaroáchin mapi. Ama inapita pochin cancantocosohuëꞌ. Tëhuënchachin nosoroatomaꞌ, macoꞌ.

Hebreos 7:19

Moisësë pënëntërinsoꞌ nanan co mantaꞌ anoyatërinhuëꞌ. Quisocristoso nipirinhuëꞌ anoyacancantërinpoaꞌ. Anoyacancantohuachinpoaꞌ, nanitërëhuaꞌ Yosë nohuitacasoꞌ. Huëntonënquë chachin ayaꞌconinpoaꞌ. Inasoꞌ noya noya, tënëhuaꞌ.